LISON 45
Jéhova Sépawé Wéyòm-lan An Dé «2»
Diwan tout tan-an Sòlomonn té ka adowé Jéhova, la té ni lapé an Izwayèl. Mé Sòlomonn mayé épi an chay madanm ki pa té ka adowé Jéhova. Sé madanm sala té ka adowé fo dyé, èk yo ankouwajé Sòlomonn pou fè menm bagay-la. Konsa, piti an piti Sòlomonn kité Jéhova, èk i koumansé adowé fo dyé. Jéhova pa té plè épi sa pyès. Èk i di Sòlomonn: ‘Mwen kay pwan Wéyòm-lan an lanmen fanmi’w, èk mwen kay sépawé’y an dé «2». Yonn an sé sèvant ou-a kay kondwi pli gwo pòsyon-an, èk fanmi’w kay kondwi pli piti pòsyon-an.’
Apwé sa, Jéhova fè on lòt bagay pou édé tout moun konpwann, kisa sa té vlé di. Mi sé sa ki fèt: Sòlomonn té ni on sèvant yo té ka kwiyé Jèwobowam. Yon jou, Jèwobowam sala té ka maché asou chimen-an, èk i jwenn pwofèt Ahaydja. Ahaydja déchiwé had li an douz «12» mòso, èk i di Jèwobowam: ‘Jéhova kay pwan wéyòm-lan an lanmen fanmi Sòlomonn, èk i kay sépawé’y an dé «2». Pwan dis «10» mòso twèl sala, paski ou kay vini wa, èk ou kay kondwi dis «10» lafanmi an Izwayèl.’ Lè Wa Sòlomonn tann sa ki té fèt, i té tèlman faché i té vlé tjwé Jèwobowam. Konsa Jèwobowam mawon, èk i alé wèsté an péyi Éjip. Bon, apwé Sòlomonn mò, gason’y Réyobowanm vini wa. Sé a lè sala Jèwobowam kité Éjip, èk i witounen an péyi Izwayèl.
Lè Réyobowanm vini wa, sé ansyen-an an Izwayèl di’y: ‘Si’w twété pèp-la byen, yo kay kontiné sipòté’w.’ Mé, sé ti jenn kanmawad-la Réyobowanm té ni-an di’y: ‘Fè pèp-la twavay pli wèd, paskè ou ni pou moutwé yo, sé ou ki ni pouvwa-a pou kondwi!’ Ében, pito Réyobowanm kouté sé ansyen-an, i swiv konsèy sé ti kanmawad li-a, èvèk i koumansé maltwété pèp-la. Konsa, yo wébélé kont li. Dis «10» lafanmi an Izwayèl pwan Jèwobowam pou wa yo. Yo té ka kwiyé pòsyon sala, Izwayèl. Lòt dé «2» lafanmi-a wèsté épi Réyobowanm, èk yo té ka kwiyé pòsyon sala Jouda. Épi sé kon sa Wéyòm Izwayèl sépawé an dé «2», menm kon Jéhova té di.
Bon, Réyobowanm té ka kondwi an Jérouzalèm. Mé Jèwobowam pa té vlé pèp li alé Jérouzalèm pou adowé Jéhova. Ès ou konnèt pouki i pa té vlé yo alé la? Èben, Jèwobowam té pè paskè i té ka kwè, si pèp li alé Jérouzalèm yo té kay tounen kont li, èk yo té kay koumansé sipòté Réyobowanm. Konsa Jèwobowam fè dé «2» ti bèf an lò, èk i di pèp li: ‘Jérouzalèm twò lwen pou zòt alé. Zòt sa adowé Jéhova isi-a.’ Èvèk sé kon sa sé moun-lan koumansé adowé sé ti bèf-la Jèwobowam té fè-a, èk yo tounen do yo asou Jéhova.
“Sé pa pou zòt viv kon yonn épi moun ki pa ka kwè an Jézi. Moun ki ka viv an lavi nèt bay Bondyé, pa sa viv kon yonn épi moun ki ka kasé lwa Bondyé. . . . Ki mannyè an moun ki ka kwè, sa maché épi an moun ki pa ka kwè?”—2 Kòrint 6:14, 15