Ès Mwen Sipozé Pwédyé Bay Sé Sen-an?

Mi Sa Bib-la Ka Di

Non. Bib-la di, nou sipozé pwédyé bay Bondyé tousèl an non Jézi. An Mafyou 6:9 Jézi té di sé disip li-a: “Mi kalité lapwiyè-a pouʼw pwédyé: ‘Papa nou ki an syèl, nou ka pwédyé pou tout moun onnowéʼw kon Bondyé.” I pa té janmen enstwi sé disip li-a pou pwédyé bay sé sen-an, sé nanj-lan, ében bay pyès lòt moun apa di Bondyé.

Osi an Jan 14:6 Jézi té di sé disip li-a: “Sé mwen ki chimen-an, sé mwen ki lavéwité-a èk sé mwen ki lavi-a. Sé mwen ki sèl chimen pou alé jwenn Papa-a.” Wi, sé Jézi tousèl Bondyé bay lotowité-a pou plédé ban nou. Konsa, si nou vlé Bondyé kouté lapwiyè nou, nou ni pou pwédyé an non Jézi.—Hibrou 7:25.

Ès mwen sa pwédyé bay Bondyé èk bay sé sen-an osi?

An yonn an sé Dis Koumandman-an, Bondyé té di: ‘Mwen menm, Jéhova, Bondyé zòt, mwen sé yon Dyé ki vlé moun adowé mwen tousèl.ʼ (Ègzodòs 20:5) Kisa sa vlé di? Sa vlé di, Jéhova vlé nou adowéʼy sèlman. Èk lapwiyè sé an pa an adowasyon nou. Konsa, Jéhova vlé nou pwédyé baʼy tousèl.—Izaya 48:11.

Alò, si nou ka pwédyé bay sé sen-an ében sé nanj-lan, nou ka déplè Bondyé. Lè zapòt Jan té ka éséyé pou adowé an nanj, an Wévélasyon 19:10 nanj-lan diʼy: “Pa fè sa pyès. Mwen sé on sèvant menm kon ou épi kon tout sé fwèʼw-la ki ja kwè an sé pawòl-la Jézi Kwi té moutwé-a . . . Sé Bondyé ou ni pou adowé!”