Ès Témwen Jéhova Ka Détwi Ében Fòtifyé Fanmi?

Témwen Jéhova ka twavay wèd pou édé tout fanmi vini pli fò, ni fanmi yo, ni népòt lòt fanmi. Nou ni bon wèspé pou Bondyé, paski sé li ki mété awanjman fanmi-an an plas. (Jennésis 2:21-24; Èfésòs 3:14, 15) Bondyé bay pwensip an Bib-la ki ja édé moun mayé oliwon latè-a. Sé pwensip sala ja édé yo fè mawiyaj yo pli fò èk édé yo ni pli tjè kontan.

Ki Mannyè Témwen Jéhova Ka Édé Fanmi Épi Pwòblenm Yo?

Nou ka fè fòs kò nou pou swiv konsèy ki an Bib-la, paski yo ka édé nou vini pli bon mawi, madanm, èk pawan. (Pwovèb 31:10-31; Èfésòs 5:22–6:4; 1 Timòfi 5:8) Menm si tout moun an fanmi-an pa an menm wilizyon-an, konsèy-la ki an Bib-la sa édé yo viv byen épi yonn a lòt. (1 Pita 3:1, 2) Annou konsidiwé sa moun ki pa Témwen Jéhova di konsèné mawi yo ében madanm yo ki vini yon Témwen Jéhova:

• Non mwen sé Clauir èk mwen sòti Bwazil. “Pou pwèmyé sis lanné mawiyaj nou, nou té ka manjé yonn a lòt èk sa anpéché nou ni tjè kontan. Kanmenm, apwé Ivete vini yon Témwen Jéhova, i vini ni pli lanmityé èk pli pasyans. Sé chanjman-an Ivete fè sové mawiyaj nou.”

• Non mwen sé Agness èk mwen sé jan Zambia. “Mwen té byen faché lè Chansa, mawi mwen, té koumansé étidyé épi Témwen Jéhova. Pouki? Paski mwen té kwè Témwen Jéhova ka kwazé fanmi. Mé apwé an lè, mwen wéyalizé pwensip ki an Bib-la vwéman édé mawiyaj nou.”

Lè nou ka pwéché, nou ka moutwé moun mannyè pwensip ki an Bib-la sa édé yo. Yo sa édé moun:

• Chaché an bon moun pou mayé épi

• Wanjé pwòblenm ki ka lévé sitou an pwèmyé lanné mawiyaj

• Viv byen épi fanmi madanm yo ében fanmi mawi yo

• Konnèt mannyè pou sèvi lajan yo

• Doubout chikannen

• Apwann mannyè pou pawdonnen

• Konnèt mannyè pou lévé ich yo

Lè yon moun chanjé wilizyon’y ès sa ka pòté pwòblenm an mawiyaj li?

Wi, délè sa ka fèt. Pa ègzanp, an lanné 1998, Sofres, an biznis ki ka fè wichach té bay yon wapò asou sa. Wapò-a di pou chak ven (20) mawiyaj, yonn an sé mawiyaj sala té ni gwo pwòblenm, lè swé mawi-a ében madanm-lan vini yon Témwen Jéhova.

Jézi té ja di, délè, moun ki swiv lésisyon’y té kay ni pwòblenm an fanmi yo. (Mafyou 10:32-36) Will Durant, an nonm ki endiké an sa ki té fèt an tan pasé, di dépi tan moun koumansé swiv Jézi, moun té ka di yo ka kwazé fanmi.a An tan nou, moun ka di menm bagay-la asou Témwen Jéhova. Mé ès sa vlé di sé Témwen Jéhova ki ka annékòz sé pwòblenm-lan moun ni an fanmi yo?

European Court of Human Rights di: lè la ni pwòblenm an fanmi, byen souvan sé manm fanmi-an ki pa Témwen Jéhova ki ka annékòz sé pwòblenm-lan. Wézon-an sé paski yo wifizé “aksèpté èk wèspèkté dwa manm fanmi yo, pou swiv wilizyon-an yo vlé.” European Court of Human Rights osi di: “Sé pa an fanmi Témwen Jéhova tousèl pwòblenm sala ka ègzisté. Mé, sa ka fèt an tout fanmi koté mawi èk madanm an diféwan wilizyon.”b Menm lè moun pa ka wèspèkté Témwen Jéhova pou lapéti wilizyon yo, Témwen Jéhova ka fè fòs kò yo pou swiv konsèy-la Bib-la bay an Ronm 12:17, 18. Sé vèwsé sala di: “Lè moun fè’w movèzté, sé pa pou ou fè yo menm bagay-la déviwé. . . . Fè sa ou pé pou ou sa viv an lapé épi tout moun.”

Pouki Témwen Jéhova kwè sé lòt Témwen Jéhova yo sipozé mayé?

Témwen Jéhova ka obéyi konmand-lan an 1 Kòrint 7:39 ki ka ankouwajé yo pou mayé an moun ki “ka kwè an Jézi.” Sa vlé di, yo ni pou mayé an moun ki an menm wilizyon épi yo. Lè nou obéyi konmand sala ki an Bib-la, nou ka jwenn bon wézilta. Pa ègzanp an lanné 2010, yon jounal té di lè “dé moun ki an menm wilizyon mayé èk yo kwè menm bagay-la,” sa ka fè’y pli ézé pou yo ni an bon wilasyon épi yonn a lòt.c

Kanmenm, Témwen Jéhova pa ka ankouwajé manm wilizyon yo pou kité madanm yo ében mawi yo ki pa Témwen Jéhova. An 1 Kòrint 7:12, 13 Bib-la di: “Si an nonm ki ka kwè an Jézi ni an madanm ki pa ka kwè épi madanm-lan dakò pou kontiné viv épi’y, mawi-a pa sipozé dévoséʼy. Si pyès madanm ki ka kwè mayé épi an nonm ki pa ka kwè, épi mawi-a dakò pou kontiné ka viv épi’y, madanm-lan pa sipozé dévosé mawi-a.” Témwen Jéhova ka wèspèkté konmand sala!