Ès Tout Wilizyon Sé Menm? Ès Yo Tout Ka Édé’w Vansé Pwé Bondyé?

Mi Sa Bib-la Ka Di

Non, sé pa tout wilizyon ki menm. Bib-la ka palé konsèné an chay wilizyon ki ka déplè Bondyé. Anfen, Bib-la mété sé fo wilizyon sala anba dé (2) diféwan gwoup.

Gwoup 1: Wilizyon ki ka adowé fo dyé

Bib-la ka palé konsèné moun ki ka adowé fo dyé. Èk konsèné adowasyon fo dyé Bib-la ka sèvi èspwèsyon tèl kon, ‘pa vo anyen’, ‘san valè’, èk ‘ennitil’. (Jérémaya 10:3-5; 16:19, 20) An Ègzodòs 20:3 Jéhovaa té bay nasyon Izwayèl koumandman sala: ‘Ou pa sipozé ni pyès lòt dyé apa di mwen menm.’ (Ègzodòs 20:23; 23:24) Èk lévanjil-la an Limowo 25:3 di: ‘Jéhova té vini faché an pil’ lè jan Izwayèl té ka adowé lòt dyé.—Livitikòs 20:2; Jij 2:13, 14.

Kanmenm Jéhova pa ka chanjé, konsa jòdi jou i ka santi menm mannyè-a konsèné adowasyon fo dyé. (1 Kòrint 8:5, 6; Galécha 4:8) Anfen, i ka di moun ki vlé adowé’y pou doubout asosiyé épi wilizyon ki pa ka adowé’y mannyè-a i vlé-a. Sé pou wézon sala i ban nou koumandman-an ki an 2 Kòrint 6:17: “Sòti anpami sé moun-an ki pa ka kwè-a épi sépawé kò zòt hòd yo.” (2 Kòrint 6:14-17) Alò, si tout wilizyon sé menm èk yo ka mennen moun pwé Bondyé, Jéhova pa té kay bay konmandman sala.

Gwoup 2: Wilizyon ki di yo ka adowé Bondyé, mé yo pa ka adowé’y an mannyè-a i vlé-a

Lè sé Jwif-la té ka adowé Bondyé an menm mannyè-a sé fo wilizyon-an té ka adowé dyé yo, Jéhova pa té plè épi yo. Konsa, i pa té aksèpté adowasyon yo. (Ègzodòs 32:8; Ditonronnonmi 12:2-4) Osi, Jézi té kondanné sé chèf wilizyon-an an tan’y a kòz di mannyè-a yo té ka adowé Bondyé. Pou ègzanp, Jézi kwiyé yo ipokwit paski yo té ka fè konmsi yo té ka vwéman obéyi Bondyé, mé ‘yo té ka néglijé pou obéyi sé bagay-la ki pli enpòtan an Lwa-a’. Osi ‘yo pa té ka fè sa ki dwèt, yo pa té ka fè bon bay moun, épi yo pa té ka tjenn pawòl yo’.—Mafyou 23:23.

An menm mannyè-a, jòdi jou, sé sèlman wilizyon ki ka bazé tout enstwiksyon yo asou Bib-la, ki ka édé moun vansé pwé Bondyé. (Jan 4:24; 17:17; 2 Timòfi 3:16, 17) Konsa, tout wilizyon ki pa ka enstwi sa Bib-la ka di pa ka édé moun pou vini pwé Bondyé. Pito sa yo ka fè moun alé lwen Bondyé. Pou ègzanp, fo wilizyon ka enstwi bagay tèl kon, la ni twa dyé an yonn, lam-la pa ka janmen mò, èvèk moun ka bwilé an lanfè pou tout tan. Èk an chay moun ka kwè sé fo enstwiksyon sala sòti an Bib-la, mé, yo vwéman sòti hòd moun ki té ka adowé fo dyé. Alò, népòt wilizyon ki ka enstwi sé bagay sala pa vo anyen èben yo ennitil, paski yo ka wiplasé lwa Bondyé épi konmandman nonm.—Mak 7:7, 8.

Wi, Jéhova vwéman hayi wilizyon ki ipokwit. (Titòs 1:16) Konsa, pou édé moun vansé pwé Bondyé, an wilizyon sipozé édé moun swiv pwensip Bib an lavi yo touléjou, èk pa konmandman nonm. Pou ègzanp, Bib-la di nou an Jémz 1:26, 27: “Si an moun kwè i ka sèvi Bondyé an tout bagay mé i pa ka véyé sa i ka di èk lanng li, i ka kwennen kòʼy èk sèvis li pou Bondyé pa vo anyen. Mi mannyè pouʼw vini dwèt èk nèt an zyé Bondyé, Papa-a: Édé manmay ki pa ni manman èk papa èk sé madanm-lan mawi yo ja mò-a lè yo ka soufè. Èk pa fè sé mové bagay-la ki ka fèt an latè-a.”