Mwen tonbé plizyè fwa avan mwen té sa doubout

LAVI MWEN AN TAN PASÉ:

An lanné mil nèf san kawant nèf «1949», papa mwen kité Almany èk i alé wèsté Australia pou twavay. An tan sala, moun té ka fouyé pou chèbon tè, èk yo té ka pwodwi kouwan. Konsa, i désidé pou wèsté Victoria. Padan i té la, i mayé manman mwen, èk mwen té fèt an lanné mil nèf san senkant twa «1953».

Déotwa lanné apwé, manman mwen koumansé étidyé Bib-la épi Témwen Jéhova. Alò, dépi mwen té toupiti, mwen té okouwan épi sa Bib-la ka di. Mé papa mwen pa té kontan pyès wilizyon. Konsa, i té vyolan èk i té ka bat manman mwen paski i té vlé’y doubout étidyé Bib-la. Pa dé pè manman mwen té pè, kanmenm, i kontiné étidyé Bib-la an sigwé paski i té kontan sa’y té ka apwann. Lè papa mwen pa té la, manman mwen té ka di mwen èk sésé mwen sa’y té apwann an létid li. I té ka di nou konsèné lè latè-a kay vini an pawadi. Osi, i di nou, si nou swiv sé pwensip-la ki an Bib-la nou kay ni lakontantman.​—Sam 37:10, 29; Izaya 48:17.

Lè mwen té dizwit «18» lanné, mwen kité kay-la paski papa mwen té ka vini pli an pli vyolan. Magwé mwen té kwè sa manman mwen té enstwi mwen hòd Bib-la m’a té ni apwésiasyon pou’y. Konsa, m’a te ka viv lavi mwen an ling épi sé pwensip Bib-la. Bon. Mwen té ka twavay kon an élèktrisyen koté moun té ka fouyé pou chèbon tè. Mwen mayé lè mwen té ven «20» lanné. Pwèmyé fi nou fèt twa lanné apwé, èk a lè sala, mwen koumansé katjilé kisa ki té pli enpòtan an lavi mwen. Mwen désidé pou étidyé Bib-la épi Témwen Jéhova, paski mwen té sav sé pwensip-la ki an Bib-la té sa édé fanmi mwen. Mé madanm mwen pa té enmen Témwen Jéhova pyès. Yon jou apwé mwen atandé on mitin, madanm mwen mandé mwen pou fè an chwa, i di ‘swé mwen doubout étidyé Bib-la ében kité kay-la’. Mwen désidé pou doubout ètidyé Bib-la paski mwen té vlé plè madanm mwen. Pli ta, mwen té wigwété disizyon-an mwen té fè-a.

Pwèmyé fwa-a mwen té wè pònografi, sé lè sé moun-lan mwen té ka twavay épi-a té ka gadé’y. Sa mwen wè té entéwésan, mé an menm di tan-an i té ka sivotjé mwen. Osi, mwen té ka santi koupab paski mwen sav Bib-la ka palé kont sé bagay sala. Mwen vwéman kwè Bondyé té kay pini mwen. Mé pli mwen gadé pònografi sé pli katjil mwen té ka chanjé. Mwen koumansé kontan’y. Èk apwé an tan, m’a té sa doubout gadé’y.

Pou ven «20» lanné apwé sa, mwen té ka viv lavi mwen mannyè mwen té vlé. M’a té ka swiv sé pwensip-la manman mwen té enstwi mwen an Bib-la. Sé bagay-la mwen té ka fè-a moutwé sa ki té an lidé mwen. Pou ègzanp, anyen ki bon pa té ka sòti an bouch mwen, èk mwen té kontan bay blag sal. Apa di sa, mannyè-a mwen té ka gadé sèks pa té nòmal. Èk magwé mwen té an kay épi madanm mwen, mwen té ni lòt fanm asou koté. Bon. Yon jou mwen gadé kò mwen an miwè-a èk m’a té kontan sa mwen té wè-a. Wèspé-a mwen té ni pou kò mwen pa té la ankò. Pito, mwen té hayi kò mwen.

Apwé tjèk tan, mawiyaj mwen kwazé èk lavi mwen té tèt anba. Konsa, sa pousé mwen pou ouvè tjè mwen bay Jéhova an lapwiyè. Magwé i té ni ven lanné dépi mwen té doubout étidyé Bib-la, mwen désidé pou koumansé ankò. Bò lè sala, papa mwen mò èk manman mwen té batizé kon on Témwen Jéhova.

MANNYÈ BIB-LA CHANJÉ LAVI MWEN:

La té ni an gwo diféwans ant mannyè-a mwen té ka viv lavi mwen èk mannyè-a Bib-la di moun sipozé viv lavi yo. Mé apwézan, mwen té détèminé pou twapé lapé-a Bib-la pwonmèt. Konsa, mwen désidé pou doubout sèvi mo sal èk pou kontwolé kòlè mwen. Osi, mwen té détèminé pou doubout kouwi vyé lavi, pou doubout payé, pou doubout bwè an chay wonm, èk pou doubout vòlè.

Sé moun-lan mwen té ka twavay épi-a pa té sa konpwann pouki mwen té ka fè tout sé chanjman sala. Konsa, pou twa «3» lanné, yo té ka pwovoké mwen. Yo té vlé mwen viwé an menm vyé lavi-a mwen té ka viv avan-an. Pou ègzanp, si mwen té fè an lèwè, tèl kon: mwen vini faché ében mwen di an vyé pawòl, yo té ka kontan. Yo té ka di: “É, é! Sa sé Joe-a menm nou konnèt-la.” Sé pawòl sala té ka vwéman blésé mwen. Mwen té ka santi dékouwajé èk m’a té kwè mwen té kay sa janmen fè sé chanjman-an mwen té vlé fè-a.

Tout sé moun-lan mwen té ka twavay épi-a té ka gadé pònografi asou pòtab yo ében asou liv. Yo té ka toujou voyé se pòtwé sal sala bay yonn a lòt asou konpyouta yo, menm mannyè-a mwen té ka fè avan. Mwen té ka fè tout sa mwen pé pou doubout gadé pònografi, mé yo té détèminé pou fè mwen tonbé. Konsa, mwen di fwè-a ki té ka étidyé Bib-la épi mwen tout sa ki té ka wivé mwen. Mwen mandé’y pou èd èk ankouwajman. I kouté mwen épi pasyans kon mwen ouvè tjè mwen ba li. I té sèvi sèten vèwsé an Bib-la pou édé mwen aji épi vyé labitid sala. Èk osi, i ankouwajé mwen pou toujou mandé Jéhova pou èd.​—Sam 119:37.

Yon jou, mwen té ni an mitin épi sé moun-lan mwen té ka twavay épi-a. Lè yo asanblé, mwen di yo pou pwan dé labyè èk bay dé nonm-lan ki té èslav pou wonm. Mé, lè yo tann sa, yo koumansé babyé èk di: “Ou fou! Ou pa sa fè sa gason! Sé nonm sala ka goumen pou kité vyé labitid sala!” La menm, mwen di yo: “Wi, èk mwen ka goumen pou kité on vyé labitid osi!” Dépi jou sala, yo konpwann mwen té ka lité pou doubout gadé pònografi. Èk a kòz di sa, yo pa té ban mwen tèt cho ankò.

Mizi an mizi, épi èd Jéhova, mwen té doubout gadé pònografi. Bon. An lanné mil nèf san katwiven dis nèf «1999», mwen té batizé kon on Témwen Jéhova. Pa dé kontan mwen té kontan mwen ni òpòtyounité-a pou viv on lavi ki bon èk nèt.

Apwézan mwen konpwann pouki Jéhova hayi sé bagay-la mwen té kontan-an. Sa sé paski Jéhova sé on bon Papa, èk i té vlé pwotéjé mwen. Osi, I té sav mannyè pònografi sa détwi lavi moun. Sé pawòl-la an Pwovèb 3:5, 6 sé lavéwité! La i di: “Konfyé Jéhova épi tout tjè’w, èk pa dépan asou lasajès ou. Chonjé’y an tout sa ou ka fè, èk i kay fè tout bagay maché byen an lavi’w.” Wi, lè nou viv lavi nou an ling épi sé pwensip-la ki an Bib-la nou kay twapé pwotèksyon èk lakontantman an lavi nou.​—Sam 1:​1-3.

MANNYÈ MWEN TWAPÉ BENNÉFIS:

Avan, mwen té hayi kò mwen, mé m’a ka santi konsa ankò. Apwézan, mwen ni wèspé pou kò mwen èk mwen ni lapé an lavi mwen paski Jéhova ja pawdonnen mwen. Épi èd Jéhova, mwen ka fè tout sa mwen pé pou viv an lavi ki dwèt an zyè’y. An lanné dé mil «2000», mwen mayé on bèl sè, non’y sé Karolin. Karolin ka fè tout sa’y pé pou plè Jéhova menm kon mwen. Lavi nou dou! Èvèk pa dé kontan nou kontan nou anpami an bèl fanmi owon latè-a ki ka sèvi Jéhova.