1. Koumonnon Bondyé, èk kisa ki ka moutwé i vlé nou konnèt non’y?

Jéhova vlé nou konnèt non’y. An Bib-la, Bondyé ka di nou non’y. l di: ‘Mwen sé Jéhova, sé sa ki non mwen.’ (Li Izaya 42:5, 8.) An Hibrou, non-an “Jéhova” vlé di: ‘I Sa Annékòz Népòt Sa I Vlé Fèt’. (Ègzodòs 3:15) Kisa ki ka moutwé Bondyé vlé nou konnèt non’y? Nou sav Bondyé vlé nou konnèt non’y, paski i mété non’y an Bib-la pli pasé sèt mil (7,000) fwa!a Non-an “Jéhova” sé non sèl Dyé vwé-a. “Sa sé Papa-a ki fè tout bagay.”—1 Kòrint 8:5, 6

2. Ki mannyè nou sipozé adowé Jéhova?

Jéhova méwité pou nou enmen’y èk adowé’y sèlman, paski sé li ki fè nou. (Wévélasyon 4:11) Konsa nou pa sipozé sèvi pyès idòl èben imaj an adowasyon nou.—Li Ditonronnonmi 5:8, 9.

Nou ni pou adowé Jéhova adan an mannyè, “ki nèt épi [adan an mannyè i] kay aksèpté”. (Ronm 12:1) Sa vlé di, nou ka obéyi lwa Jéhova an lavi nou. Pou ègzanp, moun ki enmen Jéhova ka obéyi konsèy li konsèné mawiyaj. Osi, yo pa ka fè bagay ki sa donmajé lavi yo, tèl kon sèvi tabak, bwè twòp alkòhòl, épi sèvi dwòg.a