-
Ki Mannyè Kwityen Sipozé Gadé Alkòhòl?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
Ki Mannyè Kwityen Sipozé Gadé Alkòhòl?
Owon latè-a, moun ni diféwan opinyon lèʼy vini pou alkòhòl. Adan moun enmen pwan an ti bwè tanzantan. Mé, lézòt moun chwazi pou pa bwè pyès kalité alkòhòl. Apa di sa, la ni lézòt moun ki ka bwè tèlman, yo ka sou. Kisa Bib-la ka di konsèné alkòhòl?
1. Ès i sé an péché pou bwè alkòhòl?
Bib-la pa ka di i sé an péché pou bwè alkòhòl. Okontwè, Bib-la di diven sé yonn an sé kado-a Bondyé bay “pou fè tjè [moun] djé.” (Sam 104:14, 15) Bib-la mansyonnen nonm èk fanm ki fidèl ki té ka pwan an ti bwè tanzantan.—1 Timòfi 5:23.
2. Ki konsèy Bib-la ka bay moun ki chwazi pou bwè?
Jéhova pa vlé nou bwè twòp ében bwè jis tan nou sou. (Galécha 5:21) Pwovèb 23:20 di nou: ‘Sé pa pou ou fè jan épi moun ki ka bwè twòp diven.ʼ Konsa si nou chwazi pou bwè, nou pa sipozé bwè twòp. Pouki? Paski si nou bwè twòp, nou pa kay sa katjilé byen, nou pa kay sa kontwolé pawòl nou èk aksyon nou, èk nou kay jis donmajé santé nou. Alò, si nou pa sa kontwolé kantité alkòhòl-la nou ka bwè, i kay pli mèyè si nou pa bwè pyès.
3. Ki mannyè nou sa wèspèkté disizyon moun lèʼy vini pou alkòhòl?
Chak moun ni pou désidé siʼy kay bwè alkòhòl opa. Nou pa sipozé jijé an moun paski moun-lan chwazi pou pwan an ti bwè tanzantan. Épi si an moun désidé pou pa bwè, nou pa sipozé baʼy chalè pou sa. (Ronm 14:10) Osi, nou pé désidé pou pa bwè si sa kay ofwansé lézòt. (Li Ronm 14:21.) Paski lévanjil-la di, nou “pa sipozé katjilé asou sa ki bon pou kò [nou] yonn. [Nou] sipozé katjilé asou sa ki bon pou lézòt osi.”—Li 1 Kòrint 10:23, 24.
ANNOU APWANN PLI
Apwézan, annou ègzanminé pwensip Bib ki kay édéʼw désidé siʼw sa bwè alkòhòl èk kantité-a ou sa bwè siʼw chwazi pou fè sa. Osi apwann saʼw sa fè siʼw ni an pwòblenm lèʼy vini pou alkòhòl.
4. Désidé siʼw kay bwè opa
Ki mannyè Jézi té ka gadé alkòhòl? Pou twouvé wépons-lan, li konsèné pwèmyé miwak-la Jézi té fè. Annou li Jan 2:1-11, èk apwé nou kay kozé asou sé kwèsyon sala:
Kisa nou apwann an miwak sala konsèné mannyè Jézi té ka gadé alkòhòl èk moun ki té ka bwè?
Jézi pa té di i sé an péché pou bwè, konsa, ki mannyè Kwityen sipozé gadé an moun ki chwazi pou bwè?
Menm si an Kwityen sa bwè, sa pa vlé di i toujou apwopwiyab pouʼy fè sa. Annou li Pwovèb 22:3, èk apwé nou kay wè mannyè sé pwen sala kay édéʼw désidé si ou sipozé bwè:
Si ou kay kondwi an vwati ében ou kay sèvi zouti.
Si ou ansent.
Si dòktè-a diʼw pa bwè alkòhòl.
Si ou pa sa kontwolé kantité-a ou ka bwè.
Si lwa-a pa ka pèwmitéʼw pou bwè alkòhòl.
Si ou ansanm épi an moun ki chwazi pou pa bwè, paskè an tan pasé i té ka bwè twòp.
Ès ou sipozé ofè alkòhòl adan an nòs ében adan a lòt ti fèt ou pé ni? Pou édéʼw fè an disizyon, annou gadé VIDIYO-A, Ès Mwen Sipozé Ofè Alkòhòl?
Annou li Ronm 13:13 èk 1 Kòrint 10:31, 32. Èk apwé nou li chak lévanjil, nou kay kozé asou kwèsyon sala:
Lèʼw mété pwensip sala an pwatik, ki mannyè sa kay édéʼw fè an disizyon ki kay plè Jéhova?
Chak Kwityen ni pou désidé pou kòʼy si i kay bwè opa. Menm si i pwan an ti bwè tanzantan, la ni lè i pé désidé pou pa bwè
5. Désidé ki kantité ou kay bwè
Siʼw chwazi pou bwè, chonjé: Menm si Jéhova ka pèwmité moun pou bwè alkòhòl, i pa vlé nou bwè twòp. Pouki? Annou li Hozéya 4:11, 18, èk apwé nou kay kozé asou kwèsyon sala:
Kisa ki pé fèt lè an moun bwè twòp?
Kisa ki kay édé nou pou pa bwè twòp? Nou ni pou konnèt limit nou. Annou li Pwovèb 11:2, èk apwé nou kay kozé asou kwèsyon sala:
Pouki i bon pou mété an limit asou ki kantité alkòhòl ou kay bwè?
6. Kisa ki sa édé an moun doubout bwè twòp?
Gadé sa ki té édé yon nonm doubout bwè twòp. Annou gadé VIDIYO-A, ‘Mwen Té Las Épi Lavi-a Mwen Té Ka Viv-laʼ èk apwé nou kay kozé asou sé kwèsyon sala:
Silon sa ou wè an vidiyo-a, kisa Dmitry té ka fè lèʼy té bwè twòp?
Ès i té ézé pou Dmitry doubout bwè?
Kisa ki té édé Dmitry doubout bwè?
Annou li 1 Kòrint 6:10, 11, èk apwé nou kay kozé asou sé kwèsyon sala:
Lè an moun ka bwè jis tan i sou, ès sa sé an péché ki gwav?
Ès an moun ki ka bwè twòp sa chanjé? Pouki ou di sa?
Annou li Mafyou 5:30, èk apwé nou kay kozé asou kwèsyon sala:
Lè Jézi di koupé lanmenʼw, i té ka di nou ni pou fè sakwifis pou plè Jéhova. Kisa ou sa fè siʼy difisil pou ou doubout bwè twòp?a
Annou li 1 Kòrint 15:33, èk apwé nou kay kozé asou kwèsyon sala:
Si ou ni jan ki ka toujou bwè, ki mannyè yo sa afèktéʼw?
ADAN MOUN PÉ MANDÉ: “Ès i sé an péché pou bwè?”
Ki mannyè ou té kay wéponn?
CHONJÉ SÉ PWEN SALA
Jéhova potjiwé diven pou fè tjè nou djé, mé i pa vlé nou bwè twòp, épi i pa vlé nou bwè jis tan nou sou.
Annou Wivizé Sa Nou Ja Apwann
Kisa Bib-la ka di konsèné bwè?
Kisa ki pé fèt lè moun bwè twòp alkòhòl?
Ki mannyè nou sa wèspèkté disizyon lézòt lèʼy vini pou alkòhòl?
LÒT ENFÒMASYON OU SA GADÉ
Ki mannyè jennès sa fè bon disizyon lèʼy vini pou alkòhòl?
Li konsèné diféwan bagay ou sa fè ki sa édéʼw doubout bwè twòp.
Ès an Kwityen sipozé lévé vèʼy ansanm épi an lòt moun?
Li listwa-a “Mwen Té An Bouko Wonm,” pou wè sa yon nonm té fè pouʼy doubout bwè twòp.
a Moun ki pa sa doubout bwè alkòhòl bizwen alé wè dòktè pou édé yo. An chay dòktè ka di si an moun pa sa kontwolé kantité-a i ka bwè, i pa sipozé bwè pyès.
-
-
Pouki I Enpòtan Pou Konsidiwé Mannyè Nou Ka Abiyé Èk Mannyè Nou Ka Gadé?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 52
Pouki I Enpòtan Pou Konsidiwé Mannyè Nou Ka Abiyé Èk Mannyè Nou Ka Gadé?
Lèʼy vini pou mannyè nou ka abiyé èk mannyè nou ka gadé, chak di nou ni bagay nou kontan. Mé si nou swiv pwensip Bib, nou kay chwazi had ki kay plè Jéhova. Annou gadé yonndé an sé pwensip sala ki sa édé nou.
1. Ki pwensip Bib ki sa édé nou désidé mannyè pou abiyé èk mannyè pou gadé?
Nou sipozé “abiyé adan an mannyè ki senp, épi had ki pwòp épi wèspèktab.” Osi, nou sipozé tjenn kò nou nèt, konsa tout moun kay wè nou fè lidé nou “pou swiv Bondyé.” (1 Timòfi 2:9, 10) Annou konsidiwé sé kat (4) pwensip sala: (1) Had nou sipozé “senp” èk apwopwiyab. Lè ou atandé sé mitin-lan, asiwé ou ja òbzòvé pèp Jéhova ka abiyé kò yo an plizyè diféwan mannyè. Mé, had nou èk chivé nou ka toujou moutwé nou ni wèspé pou Jéhova. (2) Pou abiyé adan an mannyè ki “pwòp” vlé di, nou pa kay mété had ki kay mennen antansyon asou kò nou, paski i twò séwé, twò kout ében dékòlté. (3) Nou ka moutwé nou ka abiyé adan an mannyè ki “wèspèktab” lè nou pa swiv tout lanmòd ki ka pasé. (4) Mannyè nou ka gadé èk mannyè nou ka abiyé sipozé toujou moutwé nou ka “swiv Bondyé.” Konsa, lézòt moun kay wè nou ka adowé Dyé vwé-a.—1 Kòrint 10:31.
2. Pouki nou sipozé katjilé asou sé fwè èk sè-a lè nou ka désidé mannyè pou abiyé?
Nou tout ni libèté-a pou chwazi sa nou vlé mété asou nou. Mé i bon pou nou katjilé si mannyè-a nou abiyé kay ofwansé sé fwè èk sè-a, paski nou pa vlé ofwansé pyèsonn. Pito sa, nou vlé “fè bagay ki bon bay pwochen nou, épi bagay ki kay plèʼy osi. Mannyè sala lafwa pwochen [nou] kay vini fò.”—Li Ronm 15:1, 2.
3. Ès abiman nou sa fè moun vlé apwann pli konsèné Jéhova?
Nou toujou vlé abiyé adan an mannyè ki apwopwiyab, sitou lè nou ka atandé mitin ében lè nou ka alé an minis-la. Pouki? Paski nou pa vlé moun wifizé kouté bon nouvèl-la pou lapéti abiman nou. Pito sa, nou vlé abiman nou fè moun vlé konnèt pli konsèné Jéhova, épi pou “wèspèkté konmisyon Bondyé ki sové nou-an.”—Titòs 2:10.
ANNOU APWANN PLI
Apwézan, annou apwann mannyè nou sa fè asiwé had nou, èk mannyè nou ka gadé kay édé moun pou wè nou sé Kwityen.
Abiman nou sa moutwé si nou ni wèspé pou moun ki an lotowité. Menm si Jéhova sa wè sa ki an tjè nou, abiman nou sipozé moutwé nou ni wèspé pou li
4. Lè nou ka abiyé byen nou ka moutwé Jéhova wèspé
Kisa ki pli enpòtan wézon-an nou ni pou abiyé byen? Annou li Sam 47:2, èk apwé nou kay kozé asou sé kwèsyon sala:
Lè nou chonjé nou ka wépwézanté Jéhova, ki mannyè sa ka édé nou pou byen chwazi had nou?
Ès ou kwè i enpòtan pou nou abiyé byen lè nou ka atandé mitin èk lè nou an minis-la? Pouki ou di sa?
5. Sa ki sa édé nou pou désidé sa pou mété asou nou
Annou gadé VIDIYO-A, ‘Fè Tout Bagay Adan An Mannyè Pou Bay Bondyé Lonnèʼ
Ki had nou chè opa, yo sipozé nèt, pwòp, èk apwopwiyab pou lokazyon-an. Annou li 1 Kòrint 10:24 èk 1 Timòfi 2:9, 10, èk apwé nou kay diskité pouki nou pa sipozé mété had ki . . .
pa nèt èk pwòp.
séwé, kout, ében dékòlté.
Kwityen pa anba Lwa Moziz, mé lè nou ègzanminé lwa sala, i ka édé nou pou konpwann mannyè Jéhova ka katjilé. Annou li Ditonronnonmi 22:5, èk apwé nou kay kozé asou kwèsyon sala:
Pouki nou pa sipozé mété had èk lòt bagay asou nou ki ka fè nonm gadé kon fanm, èk fanm gadé kon nonm?
Annou li 1 Kòrint 10:32, 33 èk 1 Jan 2:15, 16, èk apwé nou kay kozé asou sé kwèsyon sala:
Pouki nou sipozé konsidiwé si abiman nou ka ofwansé moun an konmin nou ében sé fwè èk sè-a an kongwigasyon-an?
Ki mannyè moun an konmin ou ében an vil ou ka abiyé?
Ès ou kwè adan sé abiman-an moun ka mété jòdi jou apwopwiyab pou Kwityen? Pouki ou di sa?
La ni plizyè diféwan mannyè nou sa abiyé ki ka plè Jéhova
ADAN MOUN KA DI: “Mwen ni dwa-a pou mété népòt sa mwen vlé asou mwen.”
Ès ou dakò? Pouki?
CHONJÉ SÉ PWEN SALA
Lè nou fè bon disizyon konsèné abiman nou èk mannyè nou ka gadé, nou ka moutwé Jéhova épi lézòt wèspé.
Annou Wivizé Sa Nou Ja Apwann
Pouki had nou èk mannyè nou ka gadé enpòtan pou Jéhova?
Ki pwensip Bib ki sa édé nou désidé mannyè pou abiyé èk mannyè pou gadé?
Ès abiman nou sa fè moun vlé apwann pli konsèné Jéhova?
LÒT ENFÒMASYON OU SA GADÉ
Kisa moun kay katjilé lè yo wè mannyè ou ka abiyé?
Apwann pouki i enpòtan pouʼw katjilé byen avan ou désidé pou mété an ‘tattooʼ.
“Kisa Bib-la Ka Di Konsèné ‘Tattooʼ?” (yon atik asou jw.org)
Konsidiwé lòt pwensip Bib ki sa édé nou pou fè bon disizyon lèʼy vini pou abiman nou.
Li konsèné yon madanm ki apwann pou aksèpté mannyè lézòt moun ka abiyé.
“Mannyè Moun Té Ka Abiyé Té Ka Twakasé Lidé Mwen” (Awake!, li 22 Désanm, 2003)
-