-
Kisa Ki Wéyòm Bondyé?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
7. Wéyòm Bondyé ni pli mèyè lwa pasé gouvèdman lézòm
Gouvèdman lézòm ka fè lwa pou pwotéjé pèp yo épi pou pòté yo bennéfis. An menm mannyè-a Wéyòm Bondyé ni lwa, épi moun ki anba kondwit Wéyòm Bondyé sipozé obéyi sé lwa sala. Annou li 1 Kòrint 6:9-11, èk apwé nou kay kozé asou sé kwèsyon sala:
Ki mannyè ou kwè latè-a té kay yé si tout moun té ka obéyi lwa Bondyé?a
Ès ou kwè Jéhova ni dwa-a pou mandé moun ki anba Wéyòm li pou obéyi lwa’y? Pouki?
Silon 1 Kòrint 6:11, ki mannyè nou sav moun ki pa ka obéyi lwa Bondyé sa fè chanjman èk koumansé obéyi lwa Bondyé an lavi yo?
Gouvèdman lézòm ka fè lwa pou pwotéjé pèp yo épi pou pòté yo bennéfis. Mé, Wéyòm Bondyé ni pli mèyè lwa pou pwotéjé pèp li èk pou pòté yo bennéfis
-
-
Kisa Bib-la Ka Di Konsèné Sèks?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 41
Kisa Bib-la Ka Di Konsèné Sèks?
An chay moun pa ka santi konfòtab lè yo ni pou palé konsèné sèks. Kanmenm, lè Bib-la ka palé konsèné sèks, i ka fè sa adan an mannyè ki fwanch, èk wèspèktab. Sa Bib-la ka di konsèné sèks ka pòté nou bennéfis. Èk sa ka fè sans. Pouki? Paski sé Jéhova ki ban nou Bib-la èk sé li ki fè nou. Konsa, i konnèt sa ki pli bon pou nou. I ka di nou sa nou ni pou fè pou fè tjèʼy kontan, èk sa nou sa fè pou nou sa ni on bon lavi pou tout tan.
1. Ki mannyè Jéhova ka gadé sèks?
Sèks sé on bèl kado Jéhova bay lézòm ki ka pòté yo plézi. Èk i vlé on nonm èk an fanm ki mayé épi yonn a lòt pou enjwi bèl kado sala. Kado sala ka fèʼy posib pou on mawi èk madanm fè ich. Èk osi, i ka édé yo pou moutwé yonn a lòt lanmou èk afèksyon. Mé, yo ni pou fè sa adan an mannyè ki kay plè Jéhova. Pawòl li di nou: “Sé pouʼw ni tjè kontan épi madanm-lan ou mayé-a dépiʼw té jenn.” (Pwovèb 5:18, 19) Jéhova vlé Kwityen ki mayé pou wèsté fidèl pou yonn a lòt, èk si yo fè sa yo pa kay janmen fè adiltè.—Li Hibrou 13:4.
2. Kisa sa vlé di pou viv an vyé lavi?
1 Kòrint 6:9, 10 di, “moun ki ka viv vyé lavi . . . pa kay ni dwa pou kondwi épi Bondyé.” Moun ki té ékwi Bib-la an Grik, té sèvi mo pawòl-la por·neiʹa pou dékwi vyé lavi ében imowalité sèksyouwal. Kisa ki ‘vyé laviʼ? Vyé lavi sé, (1) sèksa ant dé moun ki pa mayé épi yonn a lòt, (2) sèks ant nonm épi nonm ében fanm épi fanm, èk (3) sèks ant moun èk zannimo. Alò nou ka plè Jéhova èk nou ka twapé an chay bennéfis lè nou “pa viv . . . pyès vyé lavi.”—1 Tèsalonnika 4:3.
ANNOU APWANN PLI
Apwézan, annou apwann sa nou sa fè pou nou pa viv an vyé lavi. Èk osi sé bennéfis-la nou kay wisivwè lè nou viv an lavi ki nèt.
3. Kouwi hòd vyé lavi
On jenn nonm fidèl Bib-la kwiyé Jozèf, té di ‘non!ʼ lè on madanm té vlé kouché épiʼy. Annou li Jennésis 39:1-12, èk apwé nou kay kozé asou sé kwèsyon sala:
Silon vèwsé 9, pouki Jozèf kouwi?
Ès ou kwè Jozèf té fè on bon disizyon? Pouki ou di sa?
Koumannyè jenn moun sa fè menm kon Jozèf èk kouwi hòd vyé lavi? Annou gadé VIDIYO-A, Kouwi Hòd Imowalité.
Jéhova vlé nou tout kouwi hòd imowalité. Annou li 1 Kòrint 6:18, èk apwé nou kay kozé asou sé kwèsyon sala:
Ki sitiwasyon ki sa fè on moun tonbé an imowalité?
Ki mannyè ou sa kouwi hòd imowalité?
4. Ou sa wézisté tantasyon
Kisa ki sa fèʼy difisil pou wézisté tantasyon-an pou kouwi vyé lavi? Annou gadé VIDIYO-A, Li Pawòl Bondyé Touléjou Pou Édéʼw Kouwi Hòd Tantasyon, èk apwé nou kay kozé asou kwèsyon sala:
Lè fwè-a wéyalizé katjil li èk aksyonʼy té sa anpéchéʼy wèsté fidèl pou madanm li, kisa i fè?
Délè Kwityen ki fidèl ni pou goumen wèd pou tjenn katjil yo nèt. Kisa ou sa fè pou doubout katjilé asou bagay ki pa nèt? Annou li Filipay 4:8, èk apwé nou kay kozé asou sé kwèsyon sala:
Ki kalité bagay nou sipozé katjilé asou?
Lè nou li Bib-la èk nou tjenn kò nou anbawasé an sèvis Jéhova, ki mannyè sa sa édé nou pou wézisté tantasyon pou fè sa ki pa bon?
5. Wèg Jéhova sé pou bennéfis nou
Jéhova konnèt sa ki pli bon pou nou. Konsa i ka di nou sa pou fè pou tjenn lavi nou nèt, èk osi, i ka di nou sé bennéfis-la nou kay wisivwè lè nou fè sa. Annou li Pwovèb 7:7-27 ében annou gadé VIDIYO-A, I Pa Té Sèvi Bon Jijman èk apwé nou kay kozé asou sé kwèsyon sala:
Silon Pwovèb 7:8, 9, kisa jenn nonm-lan té fè pou tonbé an tantasyon?
Silon Pwovèb 7:23, 26, lè on moun antanmé vyé lavi, sa ka pòté mové wézilta. Konsa lè nou kouwi hòd vyé lavi, ki pwòblenm nou pa kay èspéyansé?
Si nou viv on lavi ki nèt, koumannyè sa kay édé nou pou enjwi lavi pou tout tan?
Bib-la di i pa dwèt pou nonm kouché épi nonm èk pou fanm kouché épi fanm, mé adan moun kwè lwa sala twò wèd. Kanmenm, Jéhova plen lanmityé, èk i vlé tout moun enjwi lavi pou tout tan. Mé pou nou sa viv pou tout tan, nou ni pou obéyi wèg li. Annou li 1 Kòrint 6:9-11, èk apwé nou kay kozé asou kwèsyon sala:
Silon sé vèwsé sala, apa di nonm ki ka kouché épi nonm, ès la ni lòt bagay Bondyé pa enmen?
Nou tout ni pou fè chanjman pou nou sa plè Bondyé. Ès i vo éfò-a pou fè tout sé chanjman sala? Annou li Sam 19:8, 11, èk apwé nou kay kozé asou sé kwèsyon sala:
Ès ou kwè wèg Bondyé asou sèks ka fè sans? Pouki ou di sa?
Jéhova ja édé on chay moun pou obéyi wèg li. Konsa i sa édéʼw tou
ADAN MOUN KA DI: “Ou sa ni sèks épi népòt moun ou vlé, dépi zòt enmen yonn a lòt la pa ni anyen an sa.”
Si on moun diʼw sa, kisa ou kay di?
CHONJÉ SÉ PWEN SALA
Sèks sé an kado Jéhova bay pou pòté on mawi èk madanm plézi.
Annou Wivizé Sa Nou Ja Apwann
Kisa ki vyé lavi?
Kisa ki kay édé nou kouwi hòd vyé lavi?
Ki bennéfis nou kay twapé lè nou obéyi lwa Jéhova konsèné sèks?
LÒT ENFÒMASYON OU SA GADÉ
Apwann pouki Jéhova vlé dé moun ki ka wèsté ansanm pou mayé.
“Kisa Bib-la Ka Di Konsèné Moun Ki Ka Viv Ansanm San Yo Mayé?” (yon atik asou jw.org)
Apwann pouki lwa Bondyé konsèné nonm ki ka kouché épi nonm èk fanm ki ka kouché épi fanm pa vlé di nou sipozé hayi yo.
“Ès I Mové Pou Nonm Kouché Épi Nonm Ében Fanm Kouché Épi Fanm?” (yon atik asou jw.org)
Apwann pouki lwa Bondyé konsèné sèks ka pwotéjé nou.
Apwann sa ki enkouwajé yon nonm ki té ka kouché épi lòt nonm pou chanjé laviʼy pouʼy sa plè Bondyé, an atik-la, “Yo Twété Mwen Épi Wèspé”.
a Anpami sé bagay-la Bondyé pa ka aksèpté sé: Fònikasyon, sèks pa bouch, sèks pa fès èk lè on moun jwé épi pwivé on lòt moun.
-
-
Ki Mannyè Kwityen Sipozé Gadé Alkòhòl?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 43
Ki Mannyè Kwityen Sipozé Gadé Alkòhòl?
Owon latè-a, moun ni diféwan opinyon lèʼy vini pou alkòhòl. Adan moun enmen pwan an ti bwè tanzantan. Mé, lézòt moun chwazi pou pa bwè pyès kalité alkòhòl. Apa di sa, la ni lézòt moun ki ka bwè tèlman, yo ka sou. Kisa Bib-la ka di konsèné alkòhòl?
1. Ès i sé an péché pou bwè alkòhòl?
Bib-la pa ka di i sé an péché pou bwè alkòhòl. Okontwè, Bib-la di diven sé yonn an sé kado-a Bondyé bay “pou fè tjè [moun] djé.” (Sam 104:14, 15) Bib-la mansyonnen nonm èk fanm ki fidèl ki té ka pwan an ti bwè tanzantan.—1 Timòfi 5:23.
2. Ki konsèy Bib-la ka bay moun ki chwazi pou bwè?
Jéhova pa vlé nou bwè twòp ében bwè jis tan nou sou. (Galécha 5:21) Pwovèb 23:20 di nou: ‘Sé pa pou ou fè jan épi moun ki ka bwè twòp diven.ʼ Konsa si nou chwazi pou bwè, nou pa sipozé bwè twòp. Pouki? Paski si nou bwè twòp, nou pa kay sa katjilé byen, nou pa kay sa kontwolé pawòl nou èk aksyon nou, èk nou kay jis donmajé santé nou. Alò, si nou pa sa kontwolé kantité alkòhòl-la nou ka bwè, i kay pli mèyè si nou pa bwè pyès.
3. Ki mannyè nou sa wèspèkté disizyon moun lèʼy vini pou alkòhòl?
Chak moun ni pou désidé siʼy kay bwè alkòhòl opa. Nou pa sipozé jijé an moun paski moun-lan chwazi pou pwan an ti bwè tanzantan. Épi si an moun désidé pou pa bwè, nou pa sipozé baʼy chalè pou sa. (Ronm 14:10) Osi, nou pé désidé pou pa bwè si sa kay ofwansé lézòt. (Li Ronm 14:21.) Paski lévanjil-la di, nou “pa sipozé katjilé asou sa ki bon pou kò [nou] yonn. [Nou] sipozé katjilé asou sa ki bon pou lézòt osi.”—Li 1 Kòrint 10:23, 24.
ANNOU APWANN PLI
Apwézan, annou ègzanminé pwensip Bib ki kay édéʼw désidé siʼw sa bwè alkòhòl èk kantité-a ou sa bwè siʼw chwazi pou fè sa. Osi apwann saʼw sa fè siʼw ni an pwòblenm lèʼy vini pou alkòhòl.
4. Désidé siʼw kay bwè opa
Ki mannyè Jézi té ka gadé alkòhòl? Pou twouvé wépons-lan, li konsèné pwèmyé miwak-la Jézi té fè. Annou li Jan 2:1-11, èk apwé nou kay kozé asou sé kwèsyon sala:
Kisa nou apwann an miwak sala konsèné mannyè Jézi té ka gadé alkòhòl èk moun ki té ka bwè?
Jézi pa té di i sé an péché pou bwè, konsa, ki mannyè Kwityen sipozé gadé an moun ki chwazi pou bwè?
Menm si an Kwityen sa bwè, sa pa vlé di i toujou apwopwiyab pouʼy fè sa. Annou li Pwovèb 22:3, èk apwé nou kay wè mannyè sé pwen sala kay édéʼw désidé si ou sipozé bwè:
Si ou kay kondwi an vwati ében ou kay sèvi zouti.
Si ou ansent.
Si dòktè-a diʼw pa bwè alkòhòl.
Si ou pa sa kontwolé kantité-a ou ka bwè.
Si lwa-a pa ka pèwmitéʼw pou bwè alkòhòl.
Si ou ansanm épi an moun ki chwazi pou pa bwè, paskè an tan pasé i té ka bwè twòp.
Ès ou sipozé ofè alkòhòl adan an nòs ében adan a lòt ti fèt ou pé ni? Pou édéʼw fè an disizyon, annou gadé VIDIYO-A, Ès Mwen Sipozé Ofè Alkòhòl?
Annou li Ronm 13:13 èk 1 Kòrint 10:31, 32. Èk apwé nou li chak lévanjil, nou kay kozé asou kwèsyon sala:
Lèʼw mété pwensip sala an pwatik, ki mannyè sa kay édéʼw fè an disizyon ki kay plè Jéhova?
Chak Kwityen ni pou désidé pou kòʼy si i kay bwè opa. Menm si i pwan an ti bwè tanzantan, la ni lè i pé désidé pou pa bwè
5. Désidé ki kantité ou kay bwè
Siʼw chwazi pou bwè, chonjé: Menm si Jéhova ka pèwmité moun pou bwè alkòhòl, i pa vlé nou bwè twòp. Pouki? Annou li Hozéya 4:11, 18, èk apwé nou kay kozé asou kwèsyon sala:
Kisa ki pé fèt lè an moun bwè twòp?
Kisa ki kay édé nou pou pa bwè twòp? Nou ni pou konnèt limit nou. Annou li Pwovèb 11:2, èk apwé nou kay kozé asou kwèsyon sala:
Pouki i bon pou mété an limit asou ki kantité alkòhòl ou kay bwè?
6. Kisa ki sa édé an moun doubout bwè twòp?
Gadé sa ki té édé yon nonm doubout bwè twòp. Annou gadé VIDIYO-A, ‘Mwen Té Las Épi Lavi-a Mwen Té Ka Viv-laʼ èk apwé nou kay kozé asou sé kwèsyon sala:
Silon sa ou wè an vidiyo-a, kisa Dmitry té ka fè lèʼy té bwè twòp?
Ès i té ézé pou Dmitry doubout bwè?
Kisa ki té édé Dmitry doubout bwè?
Annou li 1 Kòrint 6:10, 11, èk apwé nou kay kozé asou sé kwèsyon sala:
Lè an moun ka bwè jis tan i sou, ès sa sé an péché ki gwav?
Ès an moun ki ka bwè twòp sa chanjé? Pouki ou di sa?
Annou li Mafyou 5:30, èk apwé nou kay kozé asou kwèsyon sala:
Lè Jézi di koupé lanmenʼw, i té ka di nou ni pou fè sakwifis pou plè Jéhova. Kisa ou sa fè siʼy difisil pou ou doubout bwè twòp?a
Annou li 1 Kòrint 15:33, èk apwé nou kay kozé asou kwèsyon sala:
Si ou ni jan ki ka toujou bwè, ki mannyè yo sa afèktéʼw?
ADAN MOUN PÉ MANDÉ: “Ès i sé an péché pou bwè?”
Ki mannyè ou té kay wéponn?
CHONJÉ SÉ PWEN SALA
Jéhova potjiwé diven pou fè tjè nou djé, mé i pa vlé nou bwè twòp, épi i pa vlé nou bwè jis tan nou sou.
Annou Wivizé Sa Nou Ja Apwann
Kisa Bib-la ka di konsèné bwè?
Kisa ki pé fèt lè moun bwè twòp alkòhòl?
Ki mannyè nou sa wèspèkté disizyon lézòt lèʼy vini pou alkòhòl?
LÒT ENFÒMASYON OU SA GADÉ
Ki mannyè jennès sa fè bon disizyon lèʼy vini pou alkòhòl?
Li konsèné diféwan bagay ou sa fè ki sa édéʼw doubout bwè twòp.
Ès an Kwityen sipozé lévé vèʼy ansanm épi an lòt moun?
Li listwa-a “Mwen Té An Bouko Wonm,” pou wè sa yon nonm té fè pouʼy doubout bwè twòp.
a Moun ki pa sa doubout bwè alkòhòl bizwen alé wè dòktè pou édé yo. An chay dòktè ka di si an moun pa sa kontwolé kantité-a i ka bwè, i pa sipozé bwè pyès.
-
-
Kisa Ou Sa Fè Si Ou Fè An Péché Ki Gwav?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
Magwé ou enmen Jéhova an chay, èvèk ou ka éséyé wèd pou pa fè bagay ki kay fèʼy lapenn, tanzantan, ou kay fè lèwè. (1 Kòrint 6:9, 10) Kanmenm, la ni péché ki pli sèwiyé pasé lézòt. Konsa si ou fè an péché ki gwav, chonjé sa pa vlé di Jéhova pa enmenʼw ankò. I pawé pou pawdonnenʼw èk i pawé pou édéʼw.
1. Kisa nou ni pou fè pou Jéhova pawdonnen nou?
Lè moun ki enmen Jéhova wéyalizé yo fè an péché ki gwav, yo ka byen twis. Mé yo sa twapé soulajman paski Jéhova pwonmèt pou konfòté pèp li. Bondyé di: ‘Menm si péché zòt pli wouj pasé san, mwen kay fè yo blan kon lannèj.ʼ (Izaya 1:18) Alò si nou fè an péché ki gwav èk nou wépanti ofon tjè nou, Jéhova kay pawdonnen nou konplètman. Mé kisa i vlé di pou wépanti? Lè on moun wépanti, sa vlé di moun-lan wigwété ofon tjèʼy saʼy té fè-a, i doubout fè bagay-la i té fè-a, èk i ka plédé épi Jéhova pou pawdonnenʼy. Apwé sa, moun-lan ka twavay wèd pou chanjé vyé katjil épi vyé labitid ki té annékòz li pou péché. Èk i ka éséyé pou viv an ling épi wèg Jéhova.—Li Izaya 55:6, 7.
2. Si nou fè an péché ki gwav ki mannyè Jéhova ka sèvi sé ansyen-an pou édé nou?
Ében, si nou fè an péché ki gwav, Jéhova di nou pou “kwiyé sé [ansyen-an] ki ka kondwi [kongwigasyon-an].” (Li Jémz 5:14, 15.) Sé ansyen-an enmen Jéhova èk yo enmen sé sèvant li-a osi. Yo sa édé nou wanjé wilasyon nou épi Jéhova.—Galécha 6:1.
Konsa, ki mannyè sé ansyen-an ka édé nou si nou fè an péché ki gwav? Ében, dé (2) ében twa (3) ansyen kay sèvi lévanjil-la pou édé nou konpwann pouki sa nou té fè-a pa té bon. Osi yo kay ban nou bon konsèy èk ankouwajman pou édé nou pa tonbé an péché ankò. Mé kanmenm si an moun pa vlé wépanti, sé ansyen-an kay tiwé’y an kongwigasyon-an. Èk sa sé paski si yo pa tiwé moun sala, i sa ni an mové enflouwans asou lòt moun an kongwigasyon-an.
ANNOU APWANN PLI
Apwézan, annou apwann mannyè ou sa dévlopé pli apwésiyasyon pou sé mannyè-a Jéhova ka édé nou si nou fè an péché ki gwav.
3. Lè nou konfésé péché nou, sa ka édé nou ni on bon wilasyon épi Jéhova ankò
Népòt lè nou péché nou ka blésé tjè Jéhova, sé pou wézon sala nou ni pou konfésé douvanʼy. Annou li Sam 32:1-5, èk apwé nou kay kozé asou kwèsyon sala:
Pouki i bon pou nou konfésé péché nou douvan Jéhova pito nou éséyé pou séwé yo?
Apwé nou konfésé péché nou douvan Jéhova, èk nou mandé sé ansyen-an pou èd, nou kay twapé soulajman. Annou gadé VIDIYO-A, “Jéhova Ka Kowijé Sé Moun-lan I Enmen-an” èk apwé nou kay kozé asou kwèsyon sala:
An vidiyo-a, kisa sé ansyen-an té fè pou édé Canon ni an bon wilasyon épi Jéhova ankò?
Lè nou ka palé épi sé ansyen-an nou ni pou onnèt èk pa séwé anyen, paski yo la pou édé nou. Annou li Jémz 5:16, èk apwé nou kay kozé asou kwèsyon sala:
Si nou onnèt lè nou ka palé épi sé ansyen-an, ki mannyè sa ka fèʼy pli ézé pou yo édé nou?
Konfésé péchéʼw douvan Jéhova, palé onnèt épi sé ansyen-an, èk aksèpté èd Jéhova
4. Jéhova ka moutwé péchè mizéwikòd
Si an moun fè an péché ki gwav èk i pa vlé wépanti, sé ansyen-an kay tiwé’y an kongwigasyon-an. Èk nou pa kay asosiyé épi’y. Annou li 1 Kòrint 5:6, 11, èk apwé nou kay kozé asou kwèsyon sala:
Menm kon “an tizing lèlven ka fè tout lapat-la lévé”, ki mannyè an moun ki pa vlé wépanti kay afèkté kongwigasyon-an?
Jéhova ka moutwé péchè mizéwikòd, èk sé ansyen-an ka swiv ègzanp li. Konsa sé ansyen-an ka fè tout sa yo pé pou édé moun yo tiwé an kongwigasyon-an pou wépanti. Èvèk an chay moun ja wépanti èk viwé an kongwigasyon-an, paski yo wéyalizé magwé disiplin-lan té wèd, i édé yo wè péché-a yo té fè-a té sèwiyé.—Sam 141:5.
Lè nou wè mannyè Jéhova ka twété péchè, ki mannyè sa ka moutwé Jéhova jis, i plen mizéwikòd, èk i plen lanmityé?
5. Lè nou wépanti Jéhova ka pawdonnen nou
Jézi té sèvi on pawabòl ki ka édé nou konpwann mannyè Jéhova ka santi lè an moun wépanti. Annou li Louk 15:1-7, èk apwé nou kay kozé asou kwèsyon sala:
Kisa ou apwann konsèné Jéhova an pawabòl sala?
Annou li Izikèl 33:11, èk apwé nou kay kozé asou kwèsyon sala:
Ki bagay enpòtan nou ni pou fè pou moutwé nou vwéman wépanti?
Menm kon an bèwjé mélé épi moutonʼy, Jéhova mélé épi nou an chay
ADAN MOUN KA DI: “Mwen pè pou di sé ansyen-an sa mwen fè, paski yo kay tiwé mwen an kongwigasyon-an.”
Kisa ou té kay di an moun ki ka santi kon sa?
CHONJÉ SÉ PWEN SALA
Si nou fè an péché ki gwav mé nou vwéman wépanti, èk nou détèminé pou doubout fè péché-a, Jéhova kay pawdonnen nou.
Annou Wivizé Sa Nou Ja Apwann
Pouki i bon pou nou konfésé péché nou douvan Jéhova?
Kisa nou ni pou fè pou Jéhova pawdonnen nou?
Si nou fè an péché ki gwav, pouki nou sipozé mandé sé ansyen-an pou èd?
LÒT ENFÒMASYON OU SA GADÉ
An ling épi Izaya 1:18 gadé mannyè an nonm té èspéyansé mizéwikòd Jéhova.
Kisa sé ansyen-an ka fè pou édé on fwè ében on sè ki fè an péché ki gwav?
Apwann mannyè nou ka moutwé moun sé ansyen-an tiwé an kongwigasyon-an lanmityé èk mizéwikòd.
“Mannyè Sé Ansyen-an Sa Édé Moun Yo Tiwé An Kongwigasyon-an” (Gad-la, Awou 2024)
Apwann pouki an nonm ki té kité lavéwité-a ka kwè sé Jéhova ki té mennenʼy viwé, an listwa-a “Mwen Té Bizwen Viwé An Bwa Jéhova”.
-