Jéhova pa an Dyé ki ka mété konfizyon. (1 Kòrint 14:33) Konsa, nou sa ni asiwans-lan pèp Jéhova té kay byen ògannizé. Ki mannyè kongwigasyon Kwityen-an ògannizé? Èk kisa nou sa fè pou sipòté sé awanjman-an ki an kongwigasyon-an?

1. Ki moun ki mèt kongwigasyon-an?

Èfésòs 5:23 ka di nou “Jézi ni lotowité anlè [kongwigasyon-an].” Alò, sé Jézi ki mèt kongwigasyon-an. Magwé i an syèl, i ka djidé pèp Jéhova oliwon latè-a. Jézi apwenté “sèvant-lan ki ni lèspwi épi ki obéyisan-an”. Sa sé an ti gwoup ansyen ki ni èspéyans. Nou ka kwiyé yo Pwensipal Konmité-a. (Li Mafyou 24:45-47.) An pwèmyé syèk-la sé zapòt-la èk sé ansyen-an an Jérouzalèm té ka diwèkté sé kongwigasyon-an. An menm mannyè-a, Pwensipal Konmité-a ka diwèkté sé kongwigasyon-an oliwon latè-a. (Twavay 15:2) Mé sé fwè sala pa mèt ògannizasyon-an. Yo ka li Bib-la pou apwann sa Jéhova vlé yo fè, èk yo ka swiv diwèksyon Jézi.

2. Ki moun sé ansyen-an yé, èk ki twavay yo ka fè an kongwigasyon-an?

Sé ansyen-an sé fwè ki ja wèsté fidèl bay Jéhova pou plizyè lanné. Yo ka sèvi Bib-la pou enstwi, pou édé èk pou ankouwajé pèp Jéhova. Sé ansyen-an pa ka twapé péyiman pou sèvis-la yo ka wann an kongwigasyon-an. Mé, yo ka wann sèvis “épi djèwté an tjè [yo], paski sé sa Bondyé vlé [yo] fè”. (1 Pita 5:1, 2) Sé sèvant ministiriyal-la sé fwè an kongwigasyon-an ki ka édé sé ansyen-an. Apwé an lè, sé sèvant ministiriyal-la sa kwalifyé pou wann sèvis kon ansyen.

Pwensipal Konmité-a ka apwenté adan sé ansyen-an pou wann sèvis kon ansyen pou sékyout-la. Ansyen-an pou sékyout-la ka vizité diféwan kongwigasyon pou djidé, enkouwajé èk fòtifyé sé fwè èk sè-a. Osi, i ka sèvi Bib-la pou détèminé si yo sa apwenté yon fwè pou wann sèvis kon yon sèvant ministiriyal ében kon yon ansyen.—1 Timòfi 3:1-10, 12; Titòs 1:5-9.

3. Ki wèskonsabilité chak Témwen Jéhova ni?

Tout fwè èk sè an kongwigasyon-an ka ‘glowifyé non Jéhova’ an sé mitin nou-an. Yo ka fè sa lè yo wéponn kwèsyon, lè yo chanté, èk lè yo bay diskou ében démonstwasyon an kongwigasyon-an. Osi, yo ka glowifyé non Jéhova lè yo fè tout sa yo pé an minis-la.—Li Sam 148:12, 13.

ANNOU APWANN PLI

4. Jézi sé yon mèt ki janti

Jézi ka ban nou yon bèl envitasyon. Annou li Mafyou 11:28-30, èk apwé nou kay kozé asou sé kwèsyon sala:

• Ki kalité mèt Jézi yé, èk ki mannyè i vlé nou santi?

VIDIYO: Sa Sé Ansyen-an Fè Apwé Twanblanntè-a An Népal (4:56)

Bib-la ka moutwé a klè mannyè sé ansyen-an sipozé fè twavay yo.

Annou li Izaya 32:2 èvèk 1 Pita 5:1-3, èk apwé nou kay kozé asou sé kwèsyon sala:

• Menm kon Jézi, sé ansyen-an vlé soulajé’w èk wéfwéchi’w. Ki mannyè ou ka santi pou konnèt sa?

• An ki lòt mannyè sé ansyen-an ka imité Jézi?

5. Nou sa swiv bon ègzanp sé ansyen-an

VIDIYO: Sé Ansyen-an Ka Pwan Douvan! (7:39)

Jézi kité yon bon ègzanp bay sé fwè-a ki ka pwan douvan an kongwigasyon-an. Annou li Mafyou 23:8-12, èk apwé nou kay kozé asou sé kwèsyon sala:

• Kisa Bib-la ka di konsèné moun ki ka pwan douvan an kongwigasyon-an? Lè’w konpawé sa sé mèt wilizyon-an ka fè épi sa Bib-la ka di, ès la ni an diféwans?

1. Sé ansyen-an ka fè éfò pou tjenn wilasyon yo épi Jéhova fò, èk yo ka édé fanmi yo pou fè menm bagay-la

2. Sé ansyen-an ka gadé apwé tout moun ki an kongwigasyon-an

3. Sé ansyen-an ka pwéché souvan

4. Sé ansyen-an sé titja an kongwigasyon-an. Mé osi, yo ka édé pou nétwayé plas adowasyon nou èk yo ka fè lòt bagay an kongwigasyon-an

6. Nou ni pou obéyi sé ansyen-an

Bib-la ka ban nou yon bon wézon pou obéyi sé ansyen-an. Annou li Hibrou 13:17, èk apwé nou kay kozé asou sé kwèsyon sala:

• Pouki Bib-la ka di nou pou obéyi sé ansyen-an? Ès ou dakò épi sa?

Annou li Louk 16:10, èk apwé nou kay kozé asou kwèsyon sala:

• Pouki i enpòtan pou obéyi sé ansyen-an jis an ti bagay?

CHONJÉ SÉ PWEN SALA

Jézi sé mèt kongwigasyon-an. Sé ansyen-an ka wéfwéchi épi soulajé nou èk yo sé bon ègzanp nou sa swiv. Alò nou byen kontan pou obéyi yo, paski yo ka swiv diwèksyon Jézi.

Annou Wivizé Sa Nou Ja Apwann

• Ki moun ki mèt kongwigasyon-an?

• Kisa sé ansyen-an ka fè pou édé sé fwè èk sè-a an kongwigasyon-an?

• Ki wèskonsabilité chak Témwen Jéhova ni?

LÒT ENFÒMASYON OU SA GADÉ

Gadé pwèv ki ka moutwé mizi lanmityé Pwensipal Konmité-a èk sé ansyen-an ni pou Kwityen.

Yo Fòtifyé Sé Fwè Èk Sè-a Ki Té Anba Bann (4:22)

Apwann konsèné twavay-la sé ansyen-an pou sékyout-la ka fè.

Twavay Ansyen Pou Sékyout-la An Bitasyon (4:51)

Apwann konsèné wèskonsabilité-a sé sè-a ni an kongwigasyon-an.

“Ès Témwen Jéhova Ni Fanm Ki Pastè?” (Gad-la, li 1 Sèptanm, 2012)

Apwann mannyè sé ansyen-an ka twavay wèd pou ankouwajé sé fwè èk sè-a.

“Sé Ansyen-an Ka Twavay Épi Nou Pou Ban Nou Djèwté” (Gad-la, li 15 Janvyé, 2013)

1. Ki konsèy Bib-la ka ba mawi?

Jéhova mété mawi-a tèt-la an fanmi-an. (Li Èfésòs 5:23.) Jéhova vlé an mawi fè bon disizyon bay fanmiʼy. Alò i di mawi: “Enmen madanm ou.” (Èfésòs 5:25) Kisa sa vlé di? Yon mawi ki enmen madanm li kay twétéʼy épi jantiyès. Èk i kay fè sa lè yo lakay yo, èk lè yo anpami moun. Osi, i kay fè tout saʼy pé pou madanm li sa ni lakontantman. I kay pwotéjé madanm li, i kay potjiwé baʼy, èk i kay baʼy atansyon. (1 Timòfi 5:8) Mé sa ki pli enpòtan sé sa, yon mawi ki ni lanmityé, ka édé madanm li pou ni an bon wilasyon épi Jéhova. (Mafyou 4:4) Pou ègzanp, i ka pwédyé épi madanm li, èk i ka li Bib-la épi madanm li. Lè on mawi ka twété madanm li byen, mawi sala kay ni an bon wilasyon épi Jéhova.​—Li 1 Pita 3:7.

Èfésòs 5:23 ka di nou “Jézi ni lotowité anlè [kongwigasyon-an]”. Alò, sé Jézi ki mèt kongwigasyon-an. Magwé i an syèl, i apwenté an ‘sèvant ki ni lèspwi épi ki obéyisanʼ.a Èk i ka sèvi sèvant sala pou diwèkté pèp li oliwon latè-a. (Li Mafyou 24:45.) Paski sé Jézi ki apwenté “sèvant-lan” yo ni lotowité pou fè sèten disizyon, mé sèvant-lan ni pou obéyi Jézi èk édé sé fwè Jézi-a. Ki moun ki sèvant sala? Èk kisa sèvant-lan ka fè pou édé nou?