-
Kisa Bib-la Ka Di Konsèné Sèks?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 41
Kisa Bib-la Ka Di Konsèné Sèks?
An chay moun pa ka santi konfòtab lè yo ni pou palé konsèné sèks. Kanmenm, lè Bib-la ka palé konsèné sèks, i ka fè sa adan an mannyè ki fwanch, èk wèspèktab. Sa Bib-la ka di konsèné sèks ka pòté nou bennéfis. Èk sa ka fè sans. Pouki? Paski sé Jéhova ki ban nou Bib-la èk sé li ki fè nou. Konsa, i konnèt sa ki pli bon pou nou. I ka di nou sa nou ni pou fè pou fè tjèʼy kontan, èk sa nou sa fè pou nou sa ni on bon lavi pou tout tan.
1. Ki mannyè Jéhova ka gadé sèks?
Sèks sé on bèl kado Jéhova bay lézòm ki ka pòté yo plézi. Èk i vlé on nonm èk an fanm ki mayé épi yonn a lòt pou enjwi bèl kado sala. Kado sala ka fèʼy posib pou on mawi èk madanm fè ich. Èk osi, i ka édé yo pou moutwé yonn a lòt lanmou èk afèksyon. Mé, yo ni pou fè sa adan an mannyè ki kay plè Jéhova. Pawòl li di nou: “Sé pouʼw ni tjè kontan épi madanm-lan ou mayé-a dépiʼw té jenn.” (Pwovèb 5:18, 19) Jéhova vlé Kwityen ki mayé pou wèsté fidèl pou yonn a lòt, èk si yo fè sa yo pa kay janmen fè adiltè.—Li Hibrou 13:4.
2. Kisa sa vlé di pou viv an vyé lavi?
1 Kòrint 6:9, 10 di, “moun ki ka viv vyé lavi . . . pa kay ni dwa pou kondwi épi Bondyé.” Moun ki té ékwi Bib-la an Grik, té sèvi mo pawòl-la por·neiʹa pou dékwi vyé lavi ében imowalité sèksyouwal. Kisa ki ‘vyé laviʼ? Vyé lavi sé, (1) sèksa ant dé moun ki pa mayé épi yonn a lòt, (2) sèks ant nonm épi nonm ében fanm épi fanm, èk (3) sèks ant moun èk zannimo. Alò nou ka plè Jéhova èk nou ka twapé an chay bennéfis lè nou “pa viv . . . pyès vyé lavi.”—1 Tèsalonnika 4:3.
ANNOU APWANN PLI
Apwézan, annou apwann sa nou sa fè pou nou pa viv an vyé lavi. Èk osi sé bennéfis-la nou kay wisivwè lè nou viv an lavi ki nèt.
3. Kouwi hòd vyé lavi
On jenn nonm fidèl Bib-la kwiyé Jozèf, té di ‘non!ʼ lè on madanm té vlé kouché épiʼy. Annou li Jennésis 39:1-12, èk apwé nou kay kozé asou sé kwèsyon sala:
Silon vèwsé 9, pouki Jozèf kouwi?
Ès ou kwè Jozèf té fè on bon disizyon? Pouki ou di sa?
Koumannyè jenn moun sa fè menm kon Jozèf èk kouwi hòd vyé lavi? Annou gadé VIDIYO-A, Kouwi Hòd Imowalité.
Jéhova vlé nou tout kouwi hòd imowalité. Annou li 1 Kòrint 6:18, èk apwé nou kay kozé asou sé kwèsyon sala:
Ki sitiwasyon ki sa fè on moun tonbé an imowalité?
Ki mannyè ou sa kouwi hòd imowalité?
4. Ou sa wézisté tantasyon
Kisa ki sa fèʼy difisil pou wézisté tantasyon-an pou kouwi vyé lavi? Annou gadé VIDIYO-A, Li Pawòl Bondyé Touléjou Pou Édéʼw Kouwi Hòd Tantasyon, èk apwé nou kay kozé asou kwèsyon sala:
Lè fwè-a wéyalizé katjil li èk aksyonʼy té sa anpéchéʼy wèsté fidèl pou madanm li, kisa i fè?
Délè Kwityen ki fidèl ni pou goumen wèd pou tjenn katjil yo nèt. Kisa ou sa fè pou doubout katjilé asou bagay ki pa nèt? Annou li Filipay 4:8, èk apwé nou kay kozé asou sé kwèsyon sala:
Ki kalité bagay nou sipozé katjilé asou?
Lè nou li Bib-la èk nou tjenn kò nou anbawasé an sèvis Jéhova, ki mannyè sa sa édé nou pou wézisté tantasyon pou fè sa ki pa bon?
5. Wèg Jéhova sé pou bennéfis nou
Jéhova konnèt sa ki pli bon pou nou. Konsa i ka di nou sa pou fè pou tjenn lavi nou nèt, èk osi, i ka di nou sé bennéfis-la nou kay wisivwè lè nou fè sa. Annou li Pwovèb 7:7-27 ében annou gadé VIDIYO-A, I Pa Té Sèvi Bon Jijman èk apwé nou kay kozé asou sé kwèsyon sala:
Silon Pwovèb 7:8, 9, kisa jenn nonm-lan té fè pou tonbé an tantasyon?
Silon Pwovèb 7:23, 26, lè on moun antanmé vyé lavi, sa ka pòté mové wézilta. Konsa lè nou kouwi hòd vyé lavi, ki pwòblenm nou pa kay èspéyansé?
Si nou viv on lavi ki nèt, koumannyè sa kay édé nou pou enjwi lavi pou tout tan?
Bib-la di i pa dwèt pou nonm kouché épi nonm èk pou fanm kouché épi fanm, mé adan moun kwè lwa sala twò wèd. Kanmenm, Jéhova plen lanmityé, èk i vlé tout moun enjwi lavi pou tout tan. Mé pou nou sa viv pou tout tan, nou ni pou obéyi wèg li. Annou li 1 Kòrint 6:9-11, èk apwé nou kay kozé asou kwèsyon sala:
Silon sé vèwsé sala, apa di nonm ki ka kouché épi nonm, ès la ni lòt bagay Bondyé pa enmen?
Nou tout ni pou fè chanjman pou nou sa plè Bondyé. Ès i vo éfò-a pou fè tout sé chanjman sala? Annou li Sam 19:8, 11, èk apwé nou kay kozé asou sé kwèsyon sala:
Ès ou kwè wèg Bondyé asou sèks ka fè sans? Pouki ou di sa?
Jéhova ja édé on chay moun pou obéyi wèg li. Konsa i sa édéʼw tou
ADAN MOUN KA DI: “Ou sa ni sèks épi népòt moun ou vlé, dépi zòt enmen yonn a lòt la pa ni anyen an sa.”
Si on moun diʼw sa, kisa ou kay di?
CHONJÉ SÉ PWEN SALA
Sèks sé an kado Jéhova bay pou pòté on mawi èk madanm plézi.
Annou Wivizé Sa Nou Ja Apwann
Kisa ki vyé lavi?
Kisa ki kay édé nou kouwi hòd vyé lavi?
Ki bennéfis nou kay twapé lè nou obéyi lwa Jéhova konsèné sèks?
LÒT ENFÒMASYON OU SA GADÉ
Apwann pouki Jéhova vlé dé moun ki ka wèsté ansanm pou mayé.
“Kisa Bib-la Ka Di Konsèné Moun Ki Ka Viv Ansanm San Yo Mayé?” (yon atik asou jw.org)
Apwann pouki lwa Bondyé konsèné nonm ki ka kouché épi nonm èk fanm ki ka kouché épi fanm pa vlé di nou sipozé hayi yo.
“Ès I Mové Pou Nonm Kouché Épi Nonm Ében Fanm Kouché Épi Fanm?” (yon atik asou jw.org)
Apwann pouki lwa Bondyé konsèné sèks ka pwotéjé nou.
Apwann sa ki enkouwajé yon nonm ki té ka kouché épi lòt nonm pou chanjé laviʼy pouʼy sa plè Bondyé, an atik-la, “Yo Twété Mwen Épi Wèspé”.
a Anpami sé bagay-la Bondyé pa ka aksèpté sé: Fònikasyon, sèks pa bouch, sèks pa fès èk lè on moun jwé épi pwivé on lòt moun.
-
-
Kisa Bib-la Ka Di Konsèné Moun Ki Mayé Èk Moun Ki Pa Mayé?Ou Sa Ni On Bon Lavi Pou Tout Tan!—Annou Wè Sa Bib-la Ka Di
-
-
LISON 42
Kisa Bib-la Ka Di Konsèné Moun Ki Mayé Èk Moun Ki Pa Mayé?
An sèten kilti, la ni moun ki kwè si an moun pa mayé i pa sa ni tjè kontan. Kanmenm, la ni moun ki pa mayé ki ni tjè kontan, èk la ni moun ki mayé ki pa ni tjè kontan. Anfen, silon Labib, ki an moun mayé ki an moun pa mayé, moun-lan aksèptab an zyé Bondyé.
1. Ki mannyè moun ki pa mayé ka fè pli mèyè?
Bib-la di: “[Moun-lan] ki mayé-a ka fè byen, mé sa ki pa mayé-a ka fè jik pli mèyè.” (Li 1 Kòrint 7:32, 33, 38.) Ki mannyè an moun ki pa mayé “ka fè jik pli mèyè”? Ében, yon Kwityen ki pa mayé pa ni an madanm ében an mawi pouʼy otjipé. Konsa nou sa di i ni pli libèté. Pou ègzanp, adan moun ki pa mayé sa fè plis an sèvis Jéhova, èk yo sa jis alé lòt péyi pou pwéché bon nouvèl-la. Mé pli enpòtan toujou, yo ni pli tan pou fè bagay ki kay édé yo vansé pli pwé Jéhova.
2. Lè moun mayé silon lwa péyi-a, ki bennéfis yo ka twapé?
Moun ki pa mayé ka twapé bennéfis, mé moun ki mayé ka twapé bennéfis osi. Pou ègzanp, Bib-la di ‘dé pli bon pasé yonn.ʼ (Ékléziyastis 4:9) Èk sa vwé, sitou lè dé Kwityen ki mayé ka apliké pwensip Bib an mawiyaj yo. Lè an nonm épi an fanm mayé silon lwa péyi-a, yo ka fè an sèman pou enmen, wèspèkté, épi chéwi yonn a lòt. Konsa, yo ka santi pli sòv an wilasyon yo, pasé si yo té ka annik viv ansanm san mayé. Osi lè yo mayé, manmay yo sa lévé adan an fanmi koté yo ka santi sòv.
3. Ki mannyè Jéhova ka gadé mawiyaj?
Lè Jéhova té mayé pwenmyé dé moun-lan, mi sa i té di yo an Jennésis 2:24: ‘An nonm kay kité papaʼy èvèk manmanʼy, i kay ataché asou madanm li èk i pa kay kitéʼy.ʼ (Jennésis 2:24) Konsa, Jéhova vlé an mawi èk an madanm pou enmen yonn a lòt, èk i vlé yo wèsté ansanm tout lavi yo. Bondyé ka pèwmité moun pou dévosé sèlman si yonn adan yo fè adiltè. Si sa fèt, Jéhova ka kité moun-lan ki inosan-an désidé si i vlé dévosé opa.a (Mafyou 19:9) Osi, Jéhova pa ka pèwmité yon mawi pou ni pli pasé yon madanm, ében yon madanm pou ni pli pasé yon mawi.—1 Timòfi 3:2.
ANNOU APWANN PLI
Apwézan, annou apwann mannyè ou sa ni tjè kontan èk mannyè ou sa bay Jéhova tjè kontan, ki ou mayé ki ou pa mayé.
4. Lèʼw pa mayé sa sé an kado. Sèviʼy byen
Jézi di, moun ki pa mayé ni an kado. (Mafyou 19:11, 12) Annou li Mafyou 4:23, èk apwé nou kay kozé asou kwèsyon sala:
Jézi pa té mayé. Ki mannyè i sèvi kado sala pou fè volonté Papaʼy épi pou édé lézòt moun?
Kwityen ki pa mayé sa ni tjè kontan an sèvis Jéhova menm kon Jézi. Annou gadé VIDIYO-A, Kwityen Ki Pa Mayé Ki Fidèl èk apwé nou kay kozé asou kwèsyon sala:
An ki bon mannyè moun ki pa mayé sa sèvi tan yo?
Ès ou té sav?
Bib-la pa ka di ki laj an moun sipozé mayé. Kanmenm, i ka ankouwajé moun pou pa mayé twò jenn, paski an moun ki twò jwenn pʼòkò sa fè bon disizyon lèʼy vini pou mawiyaj.—1 Kòrint 7:36.
5. Chwazi an bon moun pouʼw mayé
Lèʼw ka chwazi an moun pou mayé sa sé on gwo disizyon. Konsa, chwazi byen. Annou li Mafyou 19:4-6, 9, èk apwé nou kay kozé asou kwèsyon sala:
Pouki an Kwityen sipozé pwan tanʼy pou byen katjilé avan i désidé pou mayé?
Bib-la sa édéʼw konnèt kisa pou gadé pou adan an moun ou vlé mayé. Pli enpòtan bagay-la sé, ou ni pou mayé épi an moun ki enmen Jéhova.b Annou li 1 Kòrint 7:39 èk 2 Kòrint 6:14, èk apwé nou kay kozé asou sé kwèsyon sala:
Pouki yon Kwityen sipozé mayé épi yon Kwityen ki enmen Jéhova?
Ki mannyè ou kwè Jéhova ka santi lèʼw mayé épi an moun ki pa enmenʼy?
Menm kon an towo bèf èk an bouwik pa kay sa twavay byen ansanm, an Kwityen ki mayé an moun ki pa enmen Jéhova kay ni an chay pwòblenm
6. Gadé mawiyaj menm mannyè-a Jéhova ka gadéʼy
An nasyon Izwayèl, adan sé nonm-lan té ka dévosé madanm yo pou népòt ti bagay. Annou li Malakay 2:13, 14, 16, èk apwé nou kay kozé asou kwèsyon sala:
Pouki Jéhova hayi lè moun dévosé pou an wézon apa di sa ki an Bib-la?
Lè an moun fè adiltè èk i dévosé moun-lan i mayé épi-a sa ka afèkté tout moun an fanmiʼy
Annou gadé VIDIYO-A, Mawiyaj Sipozé Diwé Pou Tout Tan èk apwé nou kay kozé asou kwèsyon sala:
Si moun-lan ou mayé épi pa enmen Jéhova, kisa ou sa fè pouʼw sa ni an bon mawiyaj?
7. Obéyi wèg Jéhova pou mawiyaj
An moun pé ni pou fè gwo éfò pou yo sa obéyi wèg Jéhova pou mawiyaj.c Kanmenm, Jéhova ka benni moun ki ka fè éfò sala. Annou gadé VIDIYO-A, Ou Sa Obéyi Wèg Jéhova Pou Mawiyaj.
Annou li Hibrou 13:4, èk apwé nou kay kozé asou sé kwèsyon sala:
Ès ou kwè i posib pou obéyi wèg Jéhova konsèné mawiyaj? Pouki ou di sa?
An sèten péyi, gouvèdman vlé moun wéjistwé mawiyaj yo, èk si yo dévosé yo ni pou wéjistwé sa osi. Konsa, Jéhova vlé Kwityen obéyi sé lwa sala. Annou li Titòs 3:1, èk apwé nou kay kozé asou kwèsyon sala:
Si ou mayé, ès ou asiwé mawiyaj ou wéjistwé silon lwa péyi-a ou ka wété-a?
ADAN MOUN PÉ MANDÉ: “Si dé moun enmen yonn a lòt, ès yo bizwen mayé?”
Si an moun mandéʼw kwèsyon sala, kisa ou té kay di yo?
CHONJÉ SÉ PWEN SALA
Ki an moun mayé ki an moun pa mayé, moun-lan aksèptab an zyé Bondyé. Alò, dépi moun-lan ka swiv pwensip Jéhova i kay ni on bon lavi.
Annou Wivizé Sa Nou Ja Apwann
Ki mannyè an moun ki pa mayé sa sèvi tanʼy byen?
Pouki Bib-la ka di an Kwityen sipozé mayé an Kwityen ki enmen Jéhova?
Ki wézon Bib-la ka bay pou an moun dévosé?
LÒT ENFÒMASYON OU SA GADÉ
Kisa i vlé di pou pa mayé épi an moun ki pa ka “kwè an Jézi”?
Gadé dé (2) vidiyo ki sa édéʼw fè bon disizyon lèʼw ka chwazi an moun pou mayé.
Apwann pouki yon fwè ka di Jéhova ja baʼy otan pli pasé saʼy kité dèyè.
Ki diféwan bagay an moun ni pou katjilé asou avan i désidé pou dévosé ében sépawé épi moun-lan i mayé épi-a?
“Moutwé Wèspé Pou ‘Sa Bondyé Ja Mété Ansanmʼ” (Gad-la, Désanm 2018)
a Gadé Nòt 4 an bout liv-la pou apwann sa Bib-la ka di konsèné: Ès an moun sa sépawé épi moun-lan i mayé épi-a siʼy pa té fè adiltè?
b An sèten kilti, pawan ka chwazi moun-lan pou ich yo mayé. An kilti konsa, pawan ki enmen ich yo pa kay katjilé sèlman asou kantité lajan moun-lan ni, ében pozisyonʼy. Sa ki pli enpòtan pou yo, sé pou gadé pou an moun ki enmen Jéhova.
c Si ou ka viv ansanm épi an moun èk zòt pa mayé, sé ou ki ni pou désidé si ou kay kité moun sala ében siʼw kay mayéʼy.
-