Ès Si Ou Té Kay Avoudwé Konnèt Lavéwité-a?

LAVÉWITÉ-A konsèné ki sa? Konsèné déotwa an sé pli enpòtan kwèsyon-an lézòm ja janmen mandé. Pitèt ou ja katjilé asou kwèsyon kon sé sala:

• Ès si Bondyé vwéman konsèné épi nou?

• Ès si ladjè èvèk soufwans kay janmen bout?

• Ki sa ki ka wivé nou lè nou mò?

• Ès si la ni pyès èspwa pou lé mò?

• Ki mannyè mwen sa pwédyé pou Bondyé tann mwen?

• Ki mannyè mwen sa jwenn lakontantman an lavi?

Ki koté ou té kay gadé pou wépons pou sé kwèsyon sala? Si ou alé adan népòt laybri ében magazen liv, ou pitèt kay twapé an chay liv ki ka éklanmé pou potjiwé sé wépons-lan. Souvanman, kanmenm, yon liv ka alé kont an lòt liv. I ka pawèt ki lézòt liv ni valè pou monman-an mé touswit yo pa kay ni sèvis ankò èk yo kay viwé ékwi yo ében wiplasé yo.

Kanmenm, la ni yon liv ki ni wépons ou sa dépan asou. I sé liv lavéwité-a. An lapwiyè bay Bondyé Jézi Kwi di: “Pawòl ou sé lavéwité.” (Jan 17:17) Jòdi-a nou ka kwiyé Pawòl sala Bib Sen-an. Asou sé lézòt paj-la, ou kay jwenn an ti lakopwann asou wépons Bib-la ki a klè, èk vwé pou sé kwèsyon-an ki ékwi pli ho-a.

Ès si Bondyé Vwéman Konsèné Épi Nou?

WÉZON POU KWÈSYON SALA: Nou ka viv adan an latè ki plen kwiyoté èk pasdwa. An chay wilizyon ka enstwi moun sé Bondyé ki ka annékòz sé soufwans-lan nou ka èspéyansé-a.

SA BIB-LA KA ENSTWI: Bondyé pa janmen ka annékòz movèzté. Jòb 34:10 di: “I enposib pou Dyé lavéwité-a fè sa ki méchan, èk pou Dyé Toupisan-an fè sa ki mové!” Bondyé ni an bon antansyon di lanmityé bay lézòm. Sé pou wézon sala Jézi enstwi nou pou pwédyé ka di: “Papa nou ki an syèl, kité . . . Wéyòm ou vini. Kité divwaʼw fèt, asou latè, menm kon an syèl.” (Mafyou 6:9, 10) Bondyé konsèné épi nou tèlman I ja pwan aksyon adan an gwan dégwé pou fè asiwé divwaʼy akonpli.—Jan 3:16.

Gadé osi Jennésis 1:26-28; Jémz 1:13; èk 1 Pita 5:6, 7.

Ès si Ladjè Èvèk Soufwans Kay Janmen Bout?

WÉZON POU KWÈSYON SALA: Ladjè ka kontiné annékòz milyon di moun pou pèd lavi yo. Soufwans lézòm ja afèkté nou tout.

SA BIB-LA KA ENSTWI: Bondyé pwédi an tan lè I kay établi lapé owon latè-a. Anba Wéyòm li, an gouvèdman an syèl, moun pa kay “apwann ladjè ankò.” Pito sa, yo kay “fè sab yo tounen chawi.” (Izaya 2:4) Bondyé kay mennen an bout pou tout pasdwa èk soufwans. Bib-la pwonmèt: “[Bondyé] kay swiyé tout dlo ki an zyé yo, èk la pa kay ni lanmò ankò, ni la pa kay ni soufwans ében pléwé ében lapenn ankò. Tout sé vyé bagay sala [ki ka enkloudé pasdwa èk soufwans jòdi] ja dispawèt.”—Wévélasyon 21:3, 4.

Gadé osi Sam 37:10, 11; 46:9; èk Mayka 4:1-4.

Ki sa Ki Ka Wivé Nou Lè Nou Mò?

WÉZON POU KWÈSYON SALA: Majòwité wilizyon an latè-a an tan jòdi ka enstwi ki an bagay andidan an moun ka kontiné viv apwé moun-an mò. Adan moun ka kwè ki lé mò sa fè moun ki ka viv ditò ében Bondyé ka pini sé méchan-an ka kondanné yo pou tòmanté an difé lanfè pou tout tan.

SA BIB-LA KA ENSTWI: Apwé lanmò, lézòm annèk pa ka ègzisté. Ékléziyastis 9:5 di: “Lé mò pa konnèt anyen.” Paski lé mò pasa konnèt anyen, ni santi, ében èspéyansé anyen, yo pasa fè ditò—ében édé—moun ki ka viv.—Sam 146:3, 4.

Gadé osi Jennésis 3:19 èk Ékléziyastis 9:6, 10.

Ès si la Ni Pyès Èspwa Pou Lé Mò?

WÉZON POU KWÈSYON SALA: Nou vlé viv, èk nou vlé enjwi lavi épi moun nou kontan. I annèk natiwèl pou nou anvi wè ankò moun nou kontan ki ja mò.

SA BIB-LA KA ENSTWI: Majòwité di moun ki ja mò kay wésisité. Jézi pwonmèt ki ‘moun ki an mémwa Bondyé kay . . . sòti an tonm yo.ʼ (Jan 5:28, 29) An ling épi divwa Bondyé dépi an koumansman-an, sa ki wésisité an lachè kay ni òpòtyounité-a pou viv an pawadi asou latè. (Louk 23:43) Pwonmèt sala pou tan pwochen-an ka enkloudé santé pawfé èk lavi étonnèl pou lézòm ki obéyisan. Bib-la di: “Sé moun-an ki dwèt-la kay éwityé latè-a, èk yo kay viv adanʼy pou tout tan.”​—Sam 37:29.

Gadé osi Jòb 14:14, 15; Louk 7:11-17; èk Twavay 24:15.

Ki Mannyè Mwen sa Pwédyé Pou Bondyé Tann Mwen?

WÉZON POU KWÈSYON SALA: Moun an pwèskè tout wilizyon ka pwédyé.

SA BIB-LA KA ENSTWI: Jézi enstwi nou pou pa wépété menm lapwiyè-a konstanman. I di: “Lè ou ka pwédyé, pa di menm bagay-la ankò èk ankò.” (Mafyou 6:7) Si nou vlé Bondyé kouté lapwiyè nou, nou ni pou pwédyé an mannyè-a I ka apwouvé-a. Pou fè sa, nou ni pou apwann sa divwa Bondyé yé èvèk pwédyé an ling épiʼy. Pwèmyé Jan 5:14 èspliké: “Népòt sa nou mandé an ling épi divwa [Bondyé], I ka tann nou.”

Gadé osi Sam 65:2; Jan 14:6, 14; èk 1 Jan 3:22.

Ki Mannyè Mwen sa Jwenn Lakontantman an Lavi?

WÉZON POU KWÈSYON SALA: An chay moun ka kwè ki lajan, pou pòpilè, ében bèlté kay bay yo lakontantman. Alò, yo ka bay lapouswiv pou sé bagay sala—sèlman pou twapé ki sa pa ka mennen yo pyès lakontantman.

SA BIB-LA KA ENSTWI: Jézi aydenntifyé laklé-a pou lakontantman lè I di: ‘Lakontantman pou moun ki sav yo bizwen Bondyé.’ (Mafyou 5:3) Nou sa twapé lakontantman ki vwé sèlman lè nou pwan démach pou satisfè pli gwan labizwen nou—dézi nou pou lavéwité spiwitwèl konsèné Bondyé épi divwa’y pou nou. Nou sa twapé lavéwité sala an Bib-la. Pou konnèt lavéwité sala sa édé nou apèsivwè sa ki vwéman enpòtan èk sa ki pa enpòtan. Pou kité lavéwité Bib djidé nou an disizyon nou épi aksyon nou kay mennen nou pou an lavi ki pli mèyè.—Louk 11:28.

Gadé osi Provèb 3:5, 6, 13-18 èk 1 Timòfi 6:9, 10.

Sa annèk sé ti wépons ki kout ki sòti an Bib-la pou sis kwèsyon. Ès si ou vlé konnèt pli? Si ou anpami sé moun-an ki ‘sav yo bizwen Bondyé,’ san dout ou vlé konnèt pli. Pitèt ou ja katjilé asou pli kwèsyon, tèl kon: ‘Si Bondyé konsèné épi nou, pouki sa I ja kité otan kwiyoté èk soufwans fèt an listwa lézòm? Ki mannyè mwen sa fè lavi fanmi mwen pli mèyè?’ Bib-la ka bay wépons ki konplèt èk ki ka satisfè pou sé kwèsyon sala èk an chay lòt kwèsyon.

Kanmenm, an chay moun an tan jòdi ka tjenn dèyè pou gadé sa ki an Bib-la. Yo ka wè’y kon an gwo liv ki wèd pou konpwann délè. Ès si ou té kay kontan pou an moun édé’w jwenn sé wépons-lan an Bib-la? Témwen Jehovah ka ofè dé zouti ki sa asisté’w.

Pwèmyé-a, sé liv-la Kouté Bondyé èvèk Viv Pou Tout Tan. I fòmé pou édé moun ki anbawasé ègzanminé wépons Bib-la ki a klè pou kwèsyon ki enpòtan. Dézyenm zouti-a sé an pwogwanm pou étidyé Bib-la épi’w lakay ou. San ou péyé, an vwézinaj ki apwochab èk ki kwòlifyé pou enstwi Bib-la sa vini lakay ou ében an lòt lokasyon ou simyé èvèk fè an ti tan chak simenn pou diskité Bib-la épi’w. Milyon di moun owon latè-a ja jwenn bennéfis an pwogwanm sala. An chay ja wépété sé pawòl wémakab sala: “Mwen jwenn lavéwité-a!”

La pa ni pyès lòt twézò ki pli mèyè an moun sa twapé. Lavéwité Bib ka libéwé nou anba vyé tèm, anba lidé ki twoublé, èk mové pèwèz. I ka ban nou èspwa, diwèksyon, èk lajwa. Jézi di: “Ou kay konnèt lavéwité-a, èk lavéwité-a kay fè’w lib.”—Jan 8:32.