Mannyè Ou Sa Konnèt Bondyé

Ou sa apwann konsèné Jehovah lè’w li Bib-la. An tan pasé Bondyé chwazi sèten moun pou ékwi katjil li. Nou ka kwiyé sé ékwiti sala Bib-la. An tan jòdi nou ka apwann konsèné Bondyé lè nou li Bib-la. Kon Bib-la ni pawòl Jehovah, ében konmisyon’y, I osi kwiyé Pawòl Bondyé. Nou sa kwè sa Bib-la di paski Jehovah pa janmen manti. “I enposib pou Bondyé manti.” (Hibrou 6:18) Pawòl Bondyé ni lavéwité-a.—Jan 17:17.

Bib-la sé yonn adan sé pli mèyè kado-a Bondyé ban nou. I kon an lèt an papa ki ni lanmityé ékwi bay ich li. I ka di nou konsèné pwonmèt Bondyé pou chanjé latè-a adan an bèl plas pou viv—an pawadi. I ka di nou sa’y ja fè an tan pasé, sa’y ka fè apwézan, èvèk sa’y kay fè an tan pou vini bay ich li ki fidèl. I osi ka édé nou twapé an solouzyon pou pwòblenm nou èvèk jwenn lakontantman.—2 Timòfi 3:16, 17.

Témwen Jehovah sé jan Bondyé; yo kay édé’w konpwann sa Bib-la ka enstwi. Annèk di yo ou vlé étidyé Bib-la. Yo pa ka mandé pyès lajan pou fè sa. (Mafyou 10:8) Plis toujou, ou sa atandé sé mitin Kwityen-an. Sé mitin sala ka pwan kou an plas adowasyon yo. Yo ka kwiyé sé plas sala Kingdonm Hòl. Si’w atandé sé mitin Kwityen-an, ou kay pwofité vit an nòlaj ou konsèné Bondyé.

Ou sa apwann konsèné Bondyé lè’w konsidiwé sé bagay-la I ja fè-a. Pa ègzanp, Bib-la di: “Bondyé kwéyété syèl-la èvèk latè-a.” (Jennésis 1:1) Lè Jehovah kwéyété “syèl-la,” I fè solèy-la. Ki sa sa ka di nou konsèné Bondyé? Sa ka di nou Jehovah ni an chay pouvwa. Sé li yonn ki sa fè an bagay ki ni otan pouvwa kon solèy-la. Sa osi ka di nou ki Jehovah savan, paski lasajès té nésésè pou fè solèy-la, ki ka pwodwi chalè èvèk klèté ki pa kay janmen fini.

Kwiyasyon Jehovah ka moutwé ki I kontan nou. Katjilé konsèné tout sé diféwan kalité fwi-a la ni asou latè. Jehovah té sa potjiwé sèlman yon kalité fwi ban nou—ében pyès. Pito, Jehovah ban nou tout kalité fwi adan an pil diféwan gwòsè, koulè, èvèk gou. Sa ka moutwé ki Jehovah sé pa sèlman an Dyé lanmityé mé I osi byen donnan, janti èvèk ka moutwé konsidiwasyon.—Sam 104:24.