Létid Bib ou épi Témwen Jéhova ja édé’w pou vini okouwan épi lavéwité-a. Sa ou apwann ja édé’w pou vansé pwé Bondyé èk ba’w an bèl èspwa pou viv an pawadi anba Wéyòm Bondyé. Ou ni pli konfyans an Pawòl Bondyé, èk paski ou ka asosiyé épi kongwigasyon kwityen-an ou ja èspéyansé plizyè bennédiksyon. Osi ou ka apwésyé mannyè Jéhova ka diwèkté èk sipòté pèp li jòdi.​—Zèk. 8:23.

Kon ou ka pwépawé pou batenm, ou kay twapé bennéfis lè ou wivizé épi sé ansyen-an adan sé bagay-la kwityen ka kwè adan. (Hib. 6:1-3) Jéhova kay kontiné benni’w pou tout sé éfò-a ou ka fè pou konnèt li, épi I kay ba’w sa I ja pwonmèt.​—Jan 17:3.

1. Pouki ou vlé batizé?

2. Ki moun Jéhova yé?

   • “Menm si la ni bagay moun ka kwiyé “bondyé” an lézè-a ében asou latè, épi menm si la ni an chay an sé “bondyé” épi “senyè” sala, mé pou nou menm la ni yon sèl Bondyé, sa sé Papa-a ki fè tout bagay.”​—1 Kòr. 8:5, 6.

   • “Sé pou moun konnèt ou, non’w sé Jéhova, sé ou sèlman ki Pli Ho-a asou tout latè-a.”​—Sam 83:18. (New World Translation)

3. Pouki I enpòtan pou sèvi non Bondyé?

   • “Papa nou ki an syèl, sé pou ou sanngtifyé non’w.”​—Maf. 6:9. (New World Translation)

   • “Senyè-a kay sové népòt moun ki kwiyé asou nonʼy.”​—Ronm 10:13.

4. Kouman Bib-la ka dékwi Jéhova?

   • “Lè yo té ensiltéʼy I pa janmen ensilté yo déviwé. Lè yo té fèʼy soufè I pa di I kay fè yo anyen. Mé pito sa I mété kòʼy an lanmen Bondyé, ki toujou ka jijé dwèt.”​—Jémz 4:12.

   • “Papa nou ki an syèl.”​—Maf. 6:9.

   • “Lanmityé sé kawaktè Bondyé.”​—1 Jan 4:8.

5. Ki sa ou sa bay Jéhova?

   • “Ou oblijé enmen Bondyé Senyèʼw épi tout tjèʼw, épi tout lam ou, épi tout lidéʼw èk épi tout kouway ou.”​—Mak 12:30.

   • “Jézi wéponn li, “Mi sé sa ki ékwi an lévanjil, ‘Adowé Bondyé Senyè, èk sé li sèlman pou sèvi!’ ””​—Louk 4:8.

6. Pouki ou vlé wèsté fidèl bay Jéhova?

   • “Gason mwen, moutwé ou savan, pou mwen sa wéponn moun-lan ki ka pwovoké mwen-an.”​—Pwov. 27:11. (New World Translation)

7. Bay ki moun ou ka pwédyé, épi an non ki moun?

   • “Mwen [Jézi] ka di zòt lavéwité-a, Papa-a menm ki kay bay zòt népòt bagay zòt mandéʼy an non mwen.”​—Jan 16:23.

8. Ki sa nou sa pwédyé pou?

   • “Mi kalité lapwiyè-a pouʼw pwédyé: ‘Papa nou ki an syèl, nou ka pwédyé pou tout moun onnowéʼw kon Bondyé. Nou ka pwédyé pou tout moun vini anba kondwit ou, épi pou tout moun obéyiʼw asou latè-a menm kon tout sa ki an syèl ka obéyiʼw. Ban nou jòdi-a manjé-a nou bizwen-an. Pawdonnen nou péché nou menm kon nou ka pawdonnen moun ki fè nou mové. Pa kité nou tonbé anba tantasyon, mé délivwé nou anba lanmen Denmou-an.’”​—Maf. 6:9-13.

   • “Épi mi konfyans-lan nou ni an li-a, kon sa népòt bagay nou mandéʼy, dépi nou ka fè sa I di nou pou fè, I kay tann nou.”​—1 Jan 5:14.

9. Pou ki wézon Jéhova pé pa kouté lapwiyè an moun?

   • “Yo kay kwiyé asou Jéhova pou mandé’y èd, mé I pa kay wéponn yo. Lè sala, I kay séwé fidji’y hòd yo, a kòz di tout méchansté-a yo ka fè.”​—Mayk. 3:4. (New World Translation)

   • “Paski Bondyé ka toujou gadé apwé sé sa ki ka viv dwèt-la, épi I ka toujou kouté lapwiyè yo. Mé I toujou kont sé sa ki ka viv an péché-a.”​—1 Pita 3:12.

10. Ki moun Jézi Kwi yé?

    • “Pita wéponn li, “Ou sé Mèsaya-a, Gason Bondyé ki ka viv pou tout tan.””​—Maf. 16:16.

11. Pouki Jézi vini asou latè-a?

    • “Mwen [Gason lézòm-lan] pa vini pou moun té sèvi mwen sèvant, mé mwen vini pou sèvi moun sèvant épi pou mwen bay lavi mwen pou mwen sové an chay moun.”​—Maf. 20:28.

    • “Mwen [Jézi] ni pou alé an lòt plas osi pou mwen sa pwéché Bon Nouvèl konsèné ki mannyè Bondyé kay établi kondwit li adan on mannyè nèf, paski sé pou wézon sala mwen vini.”​—Louk 4:43.

12. Kouman ou sa moutwé ou apwésyé sakwifis Jézi?

    • “Jézi mò pou tout moun. I mò kon sa nou pa kay viv bay kò nou ankò, mé bay sa ki mò-a épi wésisité-a.”​—2 Kòr. 5:15.

13. Ki lotowité Jéhova bay Jézi?

    • “Jézi vini épi I di, “Bondyé ja ban mwen tout pouvwa asou tout sa ki an syèl épi sa ki asou latè-a.””​—Maf. 28:18.

    • “Bondyé lévéʼy épi I ba li on pozisyon ki pli ho pasé tout lòt pozisyon an syèl, épi an non ki pli ho pasé tout lòt non.”​—Filip. 2:9.

14. Ès ou ka kwè Pwensipal Konmité Témwen Jéhova sé “èslav-la ki fidèl èk ki ni lasajès” Jézi té apwenté?

    • “[Èslav-la ki fidèl èk ki ni lasajès], sé li mèt-la kay mété wèskonsab tout sé lézòt sèvant-lan lè I pa la, pouʼy ba yo manjé lè I lè manjé.”​—Maf. 24:45.

15. Ès lisentèspwi-a èben lèspwi Bondyé sé an moun?

    • “Nanj-lan wéponn li, “Lèspwi Bondyé kay vini anlèʼw, èk pouvwa Bondyé kay kouvèʼw kon yon lonbwaj. Ou kay twapé kòʼw gwo bouden, épi ti manmay-la ou kay fè-a kay Gason Bondyé. I kay pawfé san pyès péché.””​—Louk 1:35.

    • “Si zòt ki mové konnèt mannyè pou bay ich ou bon kado, Papaʼw ki an syèl konnèt on chay plis pasé sa ki mannyè pou I bay Lèspwi Bondyé pou sa ki mandéʼy li.”​—Louk 11:13.

16. Ki mannyè Jéhova ja sèvi lisentèspwi’y?

    • “Bondyé Senyè-a palé, èk syèl-la vini fèt, I souflé, èk sé étwal-la ki an syèl-la vini fèt.”​—Sam 33:6.

    • “Lè Lèspwiʼy désann anlèʼw, ou kay wisivwè pouvwa épi ou kay sèvi mwen témwen . . . toupatou an latè-a.”​—Twav. 1:8.

    • “Pyèsonn pa sa sèvi pouvwaʼy menm pou sa di konmisyon Bondyé, mé sé Lèspwi Bondyé ki bwennen tjè sé moun sala pou fè yo palé konmisyon-an Bondyé ba yo pou palé-a.”​—2 Pita 1:20, 21.

17. Ki sa Wéyòm Bondyé yé?

    • “Ou Bondyé sé Senyè nou ki ni tout pouvwa-a. Sé ou ki vivan atjwèlman, ki té vivan dépi avan anyen té fèt. Nou ka wimèsyéʼw paski ou ja sèvi gwan pouvwaʼw épi ou koumansé kondwi latè-a.”​—Wév. 11:17.

18. Ki sa Wéyòm Bondyé kay fè ban ou?

    • “I kay swiyé tout dlo ki an zyé yo. La pa kay ni lanmò ankò. La pa kay ni lapenn ében pléwé ében soufwans ankò, paski tout sé vyé bagay sala ja dispawèt.”​—Wév. 21:4.

19. Pouki ou asiwé ou kay wè bennédiskyon Wéyòm Bondyé toutalè?

    • “Sé disip-la vini kotéʼy an sigwé épi yo diʼy, “Di nou ki tan Kay Bondyé-a kay kwazé. Ki sa ki kay fèt pou moutwé I tan pouʼw vini? Épi ki lè tan-an kay bout?” Jézi di yo, ‘. . . Nasyon kay goumen kont nasyon épi wéyòm kay ataké yonn a lòt. La kay ni lafen èk twanblanntè adan an chay koté. Épi moun kay pwéché Bon Nouvèl-la ki Bondyé kay kondwi adan an mannyè ki nèf. Yo kay pwéché toupatou an latè-a pou tout nasyon jwenn an chans pou aksèpté Bon Nouvèl-la. Épi sé lè sala tan-an kay bout.’”​—Maf. 24:3, 4, 7, 14.

    • “La kay ni lè ki kay difisil asou dènyé tan-an. Nonm kay adowé kò yo an chay, yo kay enmen lajan, yo kay bava, yo kay kwè yo enpòtan, yo kay abizé lézòt, yo pa kay kouté manman yo épi papa yo, yo kay malonnèt, yo pa kay ni pyès wèspé pou Bondyé, yo pa kay ni pyès natiwèl, yo pa kay pawdonnen lézòt, yo kay malpalan, yo pa kay sa konpòté kò yo byen, yo kay bwital, yo pa kay ni pyès wèspé pou sa ki bon, yo kay twèt, yo kay fè ében di népòt bagay san katjilé, yo kay ni an chay lògèy, yo kay enmen plézi latè-a pasé yo enmen Bondyé. Yo kay fè akwèdi yo ka swiv Bondyé mé mannyè yo ka viv-la kay moutwé sé pa Bondyé ki ka kondwi lavi yo. Sé pa pou ou ni anyen pou fè épi sé moun sala.”​—2 Tim. 3:1-5.

20. Ki mannyè ou ka moutwé Wéyòm Bondyé enpòtan pou ou?

    • “Mé kité Bondyé kondwi laviʼw avan, épi fè tout sa I vléʼw fè, épi I kay baʼw tout sé lézòt bagay sala.”​—Maf. 6:33.

    • “Jézi di sé disip li-a, ‘Si an nonm vlé vini disip mwen, I ni pou pòté kwaʼy épi swiv mwen. Sa vlé di inyowé kòʼy pou lapéti mwen.’”​—Maf. 16:24.

21. Ki moun Satan èk sé vyé nanj li-a yé?

    • “Dépi an koumansman latè-a I [Denmou] té ka tjwé moun.”​—Jan 8:44.

    • “Yo pwan gwo sèpan-an yo ka kwiyé Satan ében Denmou-an, èk yo jétéʼy désann anlè latè-a, li épi tout sé nanj li-a. Sé li ki gwo sèpan-an ki té la dépi an koumansman-an ki té ka kwennen sé moun latè-a.”​—Wév. 12:9.

22. Ki akizasyon Satan lévé kont Jéhova èk moun ki ka adowé Jéhova?

    • “Fanm-lan di sèpan-an: ‘Nou sa manjé fwi ki an sé pyé bwa-a ki an jaden-an. Mé, pou fwi ki an pyé bwa-a ki an mitan jaden-an, Bondyé té di: “Nou pa sipozé manjé adan’y, non, nou pa sipozé manyen’y. Si nou fè sa, nou kay mò.”’ Épi, sèpan-an di fanm-lan: ‘Zòt pa kay mò pyès. Paski Bondyé konnèt ki, jou-a zòt manjé fwi pyé bwa sala, zyé zòt kay ouvè èk zòt kay vini menm kon Bondyé, zòt kay konnèt sa ki bon èk sa ki mové.’”​—Jen. 3:2-5. (New World Translation)

    • “Satan wéponn Jéhova: ‘Dépi yon moun wè lanmò douvan’y, I kay bay tout sa I ni pou sové lavi’y.’”​—Jòb 2:4. (New World Translation)

23. Ki mannyè ou sa moutwé akizasyon Satan pa vwé?

    • “Enmen Bondyé Senyèʼw épi tout tjèʼw, tout lam ou èk tout lidéʼw.”​—Maf. 22:37.

    • “Jis lè mwen mò, mwen kay wèsté fidèl pou Bondyé!”​—Jòb 27:5. (New World Translation)

24. Pouki moun ka mò?

    • “I sé yon nonm ki mennen péché an latè sala, épi péchéʼy mennen lanmò. Bon, kon tout moun ja péché-a, kon sa tout moun oblijé mò.”​—Romn 5:12.

25. An ki kondisyon lé mò yé?

    • “Lè Jézi fini di sa, I di yo ankò, “Kanmawad nou Lazaròs ka dòmi.””​—Jan 11:11.

26. Ki èspwa la ni pou moun ki mò?

    • “Mwen ni èspwa-a ki tout moun, ni bon ni mové, kay wésisité.”​—Twav. 24:15.

27. Konmen moun ki ka alé an syèl pou kondwi épi Jézi?

    • “Mwen gadé ankò, èk ki sa mwen ka wè pasé Ti Mouton Bondyé-a ki té doubout asou Mòn Zayonn! I té ni yon san kawant kat mil (144,000) moun épiʼy. Yo té ni non Ti Mouton-an èk non Papaʼy ékwi asou fon yo.”​—Wév. 14:1.

An létid Bib ou, ou ja apwann sa Jéhova vlé’w fè èk mannyè ou sa swiv wèg li. Paski ou ja apwann pwensip ki an Bib-la, ou ja fè an chay chanjman an aksyon’w èk atitid ou konsèné lavi. Osi, paski ou désidé pou swiv wèg Jéhova, ou mété kò’w adan an pozisyon pou Jéhova aksèpté sèvis ou kon an pwoklanmatè di bon nouvèl-la.

Kon ou wivizé sé kwèsyon sala, sa kay édé’w tjenn an lidé’w wèg Bondyé èk osi, ou kay chonjé bagay ou sa fè pou vini an moun ki kay fè tjè Bondyé kontan. Enfòmasyon sala kay pézé asou enpòtans-lan pou ou toujou fè tout bagay épi an bon konsyans èk pou ou toujou pòté Jéhova lonnè.​—2 Kòr. 1:12; 1 Tim. 1:19; 1 Pita 3:16, 21.

Kon ou ka pwépawé pou batenm, nou asiwé ou kay abésé kò’w anba kondwit Jéhova èk ou vlé vini an manm an ògannizasyon’y. Sé kwèsyon-an èk sé lévanjil-la kay édé’w pou konpwann sa I vlé di pou abésé kò’w anba awanjman Jéhova an kongwigasyon-an, an fanmi-an èben lè’y vini pou bagay politik. Ou kay ni pli apwésiyasyon pou sé awanjman-an Jéhova ja fè pou endiké èk fòtifyé lafwa pèp li. Anpami sé awanjman sala sé mitin nou. Ou kay vlé atandé sé mitin sala èk patisipé kon sitiwasyon’w ka pèwmité’w.

Osi, sèksyon sala kay konsidiwé enpòtans-lan pou pwéché wèglé pou édé moun vini konnèt Jéhova, èk sa I ka fè pou lézòm. (Maf. 24:14; 28:19, 20) Finalman, sèksyon sala kay pézé fò asou lidé’w ki, dèdikasyon èk batenm byen sèwyé. Ou sa ni asiwans-lan Jéhova kontan sa ou ka fè pou moutwé ou ka apwésyé favè èstòdinè’y.

1. Ki sa ki wèg Kwityen konsèné mawiyaj? Bib-la bay yon sèl wézon pou an moun dévosé. Ki sa wézon sala yé?

   • “Ès ou pʼòkò li sa lévanjil-la di? I di, an koumansman-an Bondyé té fè moun, nonm épi fanm, épi Bondyé di, ‘Sé pou wézon sala an nonm kay kité manmanʼy épi papaʼy épi I kay viv épi madanm li kon madanm èk misyé, épi yo kay kon on sèl moun.’ Kon sa yo pa dé moun ankò, mé an sèl. Pyès nonm pa sipozé sépawé sa Bondyé ja mété ansanm. . . . si an nonm dévosé madanm li pou pyès wézon apa di si madanm-lan fè adiltè, épi I mayé an lòt fanm, nonm sala ka fè adiltè.”​—Maf. 19:4-6, 9.

2. Pouki an nonm èk an fanm ki ka viv ansanm kon madanm èk misyé sipozé swiv lwa péyi-a èk mayé? Si ou mayé, ès ou asiwé mawiyaj ou légal douvan gouvèdman-an?

   • “Fè sé moun ou-an chonjé pou yo sa obéyi ni sé moun-an ki ka kondwi-a épi ni gouvèdman-an.”​—Titòs 3:1.

   • “Sé pou tout moun onnowé mawiyaj, èk sé pa pou madanm èk misyé fè adiltè. Paski Bondyé kay jijé moun ki ka kouwi vyé lavi èk fè adiltè.”​—Hib. 13:4.

3. Chak manm an fanmi-an ni an wèskonsabilité. Ki sa ki wèskonsabilité’w an fanmi-an?

   • “Zòt sé manmay-la sipozé obéyi papa épi manman zòt.”​—Èfés. 6:1.

   • “Mawi-a ni lotowité anlè madanm-lan menm kon Jézi ni lotowité anlè légliz-la . . . Zòt sé mawi-a ni pou enmen madanm ou menm kon Jézi enmen légliz-la.”​—Èfés. 5:23, 25.

   • “Zòt sé papa-a sipozé pwan pokosyon mannyè ou ka twété ich ou avan ou fè yo faché. Lévé yo adan an bon mannyè épi enstwi yo menm kon an moun ki ka kwè an Senyè-a.”​—Èfés. 6:4.

   • “Zòt sé manmay-la​—toujou obéyi manmanʼw épi papaʼw, paski lè ou obéyi yo, sa kay plè Bondyé an chay.”​—Kòl. 3:20.

   • “Zòt sé madanm-lan ni pou abésé kò zòt anba mawi zòt.”​—1 Pita 3:1.

4. Pouki nou sipozé ni wèspé pou lavi?

   • “Sé li [Bondyé] menm ki ka bay tout moun lavi épi lèspiwasyon épi tout bagay yo bizwen. . . . ‘Sé li ki ban nou lavi épi sé li ki ka fè nou maché épi sé li ki fè nou sa nou yé-a.’”​—Twav. 17:25, 28.

5. Pouki nou pa sipozé tjwé pyèsonn jik an ti bébé ki p’òkò fèt?

   • “Si dé nonm ka goumen épi yonn adan yo fwapé yon fanm ki ansent, . . . si manman-an ében bébé-a mò, ou sipòzé bay lavi pou lavi.”​—Ègz. 21:22, 23. (New World Translation)

   • “Ou té ja wè mwen avan mwen té fèt.”​—Sam. 139:16.

   • “Jézi di, “Ou konnèt yo té ka di sé moun nou-an an tan lontan, ‘Pa tjwé.’ ””​—Maf. 5:21.

6. Ki konmand Bondyé bay konsèné san?

   • “Ou pa sipozé . . . manjé san, ni pa manjé pyès vyann zannimo ki twanglé.”​—Twav. 15:29.

7. Pouki nou sipozé enmen sé fwè èk sé sè nou-an?

   • “Atjwèlman mwen ka bay zòt an konmandman nèf: Sé pou zòt enmen yonn a lòt. Enmen yonn a lòt menm kon mwen ja enmenʼw. Si zòt enmen yonn a lòt, sé lè sala tout moun kay sav zòt sé disip mwen.”​—Jan 13:34, 35.

8. Si an moun ni an mové maladi ki pitèt sa tjwé lézòt moun, pou’y pa simen maladi sala: (a) Pouki moun sala sipozé pwan pokosyon pou pa fè bagay kon anbwasé èben bo lézòt moun? (b) Pouki moun sala pa sipozé santi ofwansé si lézòt moun pa envité’y lakay yo? (c) Pouki an moun ki kwè I pé ni an mové maladi ki sa simen sipozé tès san’y avan I koumansé moutwé lantéwé adan an moun I vlé mayé? (d) Pouki an moun ki ni an mové maladi ki sa simen sipozé di koòdinatè sé ansyen-an sa avan I batizé?

   • “Sé pa pou ou dwé pyèsonn anyen. Sèl bagay ou ni pou dwé sé sa, ou ni pou ni lanmityé pou yonn a lòt. . . . ‘Ni lanmityé pou pwochenʼw menm kon ou ni lanmityé pou kòʼw.’ Si nou ni lanmityé sala nou pa kay fè pwochen nou anyen ki pa bon.”​—Ronm 13:8-10.

   • “Pa gadé pou kòʼw tousèl, mé toujou gadé pou lòt moun-an tou.”​—Filip. 2:4.

9. Pouki Jéhova ka èkspèkté nou pou pawdonnen lézòt?

   • “Fè bon épi ni an tjè fèb pou yonn a lòt. Pawdonnen yonn a lòt menm kon Bondyé pawdonnen nou an Jézi.”​—Èfés. 4:32.

10. Ki sa ou sipozé fè si an fwè èben an sè sali non’w èben I bòbòl ou?

    • “Si fwèʼw fè an péché kont ou, alé épi moutwé fwè-a lèwèʼy. Mé fèʼy an sigwé ant zòt dé-a. Si I dakò épiʼw, ou ja genyenʼy viwé kon an fwè. Mé si I pa dakò, alé pwan yonn ében dé moun épi mennen épiʼw, paski lévanjil-la di ou pa sa fè an akizasyon kont an moun si ou pa ni dé ében plis témwen. Si I pa vlé kouté sé moun sala, ou kay mennen sa douvan légliz-la, épi si I wifizé dakò épi légliz-la, twétéʼy kon an moun ki pa an fwè ében yonn an sé bòbòlis-la ki ka anmasé taks-la.”​—Maf. 18:15-17.

11. Ki mannyè Jéhova ka gadé sé péché sala?

    • ▪ Imowalité sèksyouwal

    • ▪ Sèvi imaj an adowasyon

    • ▪ Homosèksyouwalité

    • ▪ Vòlè

    • ▪ Jwé pou lajan èben byen

    • ▪ Wonmyé èben Wonmyèl

    • “Pa kwennen kò zòt; moun ki ka viv vyé lavi, ében sa ki ka adowé fo bondyé, ében sa ki ka fè adiltè, ében sa ki ka kouché épi nonm kon yo, ében sa ki ka vòlè, ében sa ki vowas, ében sa ki toujou sou, ében sa ki ka sali non lézòt, ében sa ki ka bwitalizé moun pou pwan bagay yo—pyès sé kalité moun sala pa kay ni dwa pou kondwi épi Bondyé.”​—1 Kòr. 6:9, 10.

12. Lè I vini pou imowalité sèksyouwal, ki sa ou détèminé pou fè?

    • “Pa antanmé vyé lavi.”​—1 Kòr. 6:18.

13. Pouki nou pa sipozé sèvi dwòg èben lòt bagay ki sa afèkté lidé nou si sé pa an dòktè ki ban nou’y?

    • “Ofè kòʼw bay li, kon an sakwifis ki vivan. Sa sé yonn ki nèt épi yonn Bondyé kay aksèpté. Épi sé kon sa pou ou adowé Bondyé. Sé pa pou ou swiv mannyè latè-a, mé kité Bondyé chanjé laviʼw kon i ka baʼw an lidé ki nèf-la.”​—Ronm 12:1, 2.

    • “Enmen Bondyé Senyèʼw épi . . . tout lidéʼw.”​—Maf. 22:37.

14. Ki kalité vyé pwatik Bondyé vlé nou tjenn kò nou hòd?

    • “La pa dwé ni pyèsonn anpami zòt . . . ki ka chaché pou sav sa ki kay fèt denmen, ni majisyen, ni pyèsonn ki ka fè pyay, ni pyèsonn ki ka alé oti moun ki ka fè kontak épi vyé lèspwi, ében moun ki di yo sav sa ki kay fèt denmen, ni pyèsonn ki ka palé épi lé mò.”​—Dito. 18:10, 11. (New World Translation)

15. Si an moun fè an péché ki gwav èk I vlé Jéhova pawdonnen’y, ki sa I sipozé fè vitman?

    • “Lè sala mwen konfésé péché mwen baʼw, mwen pa té séwéʼw movèzté mwen. Mwen di bay kò mwen, “Mwen kay konfésé tout fòt mwen bay Bondyé Senyè-a.””​—Sam 32:5.

    • “Si la ni pyèsonn ki malad anpami zòt, sé pouʼy voyé kwiyé sé ofisyé-a ki ka kondwi légliz-la. Yo kay pwédyé ba li èk yo kay vidé lwil anlèʼy an non Senyè-a. Lè yo pwédyé èk lafwa èk kwè ki Bondyé kay djéwi moun sala, Bondyé kay viwé ba li santé ankò èk pawdonnenʼy si I ja fè péché.”​—Jémz 5:14, 15.

16. Si ou konnèt an Kwityen fè an péché ki gwav, ki sa ou sipozé fè?

    • “Si yon moun wè an lòt moun fè an péché, ében I apwann an moun té fè an péché, mé I pa di anyen lè I tann yo mandé pou moun bay témwenyaj konsèné péché-a, moun sala koupab èk I kay péyé pou sa.”​—Livi. 5:1. (New World Translation)

17. Si an moun pa an Témwen Jéhova ankò, ki mannyè ou sipozé twété’y?

    • “Sé pa pou zòt ni anyen pou fè épi moun ki di yo kwè an Jézi mé yo ka kouwi vyé lavi, ében yo vowas, ében yo ka adowé fo bondyé, ében moun ki ka ensilté lézòt, ében moun ki toujou sou, ében an vòlè. Sé pa pou ou menm manjé épi an moun ki kon sa.”​—1 Kòr. 5:11.

    • “Si pyèsonn vini douvanʼw épi an diféwan konmisyon, pa wisivwèʼy lakay ou, pa menm diʼy bonjou.”​—2 Jan 10.

18. Pouki ou sipozé chwazi moun ki enmen Jéhova pou bon jan’w?

    • “Moun ki ka maché épi moun ki ni lasajès kay ni lasajès, mé moun ki ka asosiyé épi moun ki sòt kay ni an chay pwòblenm.”​—Pwov. 13:20. (New World Translation)

    • “Pa kité moun kwennen zòt. Swiv mové konpanni épi ou oblijé twapé kòʼw an dézagwéman.”​—1 Kòr. 15:33.

19. Pouki Témwen Jéhova pa ka mélé an politiks?

    • “Menm kon mwen [Jézi] pa menm èk sé jan latè-a, sé nonm sala sé pa menm èk sé jan latè-a.”​—Jan 17:16.

20. Pouki ou sipozé obéyi gouvèdman-an?

    • “Zòt tout sipozé wèspèkté lwa gouvèdman péyi-a, paski pyès gouvèdman pa ni dwa-a pou kondwi [san] Bondyé ba li pouvwa sala. I sé Bondyé ki mété tout gouvèdman an pouvwa.”​—Ronm 13:1.

21. Si lwa gouvèdman-an ka alé kont lwa Bondyé, ki sa ou kay fè?

    • “Sé Bondyé nou ni pou obéyi, sé pa nonm.”​—Twav. 5:29.

22. Ki lévanjil ki kay édé’w pou tjenn kò’w hòd latè-a lè ou ni pou désidé ki djòb ou kay fè?

    • “Nasyon pa kay sèvi sab pou yo ataké yonn a lòt ankò, èk yo pa kay apwann fè ladjè ankò.”​—Mayk. 4:3. (New World Translation)

    • “Lévé sòti andidan vil sala [Babilonn Li Gwan] pouʼw pa fè menm sé péché-a I ka fè-a, pou modisyon-an ki kay tonbé anlèʼy-la pa tonbé anlèʼw tou.”​—Wév. 18:4.

23. Ki kalité anmizman èk wékwéyasyon ou kay chwazi? Ki kalité anmizman èk wékwéyasyon ou kay widjèkté?

    • “Jéhova . . . hayi népòt moun ki enmen vyolans.”​—Sam 11:5. (New World Translation)

    • “Hayi tout movèzté, tjenbé fò sa ki bon.”​—Ronm 12:9.

    • “Sé pouʼw plen lidéʼw èk sé bagay-la ki bon-an épi bagay ki ka plè Bondyé, bagay ki vwé, bagay ki wèspèktab, bagay ki dwèt, bagay ki nèt, bagay ki bèl, épi bagay ki pa ka fè moun hont.”​—Filip. 4:8.

24. Pouki Témwen Jéhova pa ka adowé ansanm épi lòt wilizyon?

    • “Ou pa sa manjé asou tab Senyè-a, épi a menm lè-a manjé asou tab denmou.”​—1 Kòr. 10:21.

    • “Bondyé Senyè di, “Sòti anpami sé moun-an ki pa ka kwè-a épi sépawé kò zòt hòd yo. Pa touché sé bagay yo-a péché ja sali-a, épi mwen kay aksèpté zòt ankò.””​—2 Kòr. 6:17.

25. Ki pwensip Bib ki kay édé’w désidé si ou sipozé patisipé adan an sélébwasyon?

    • “Yo té mélé épi sé nasyon-an èk yo koumansé fè menm kon yo. Yo té ka sèvi idòl sé nasyon-an, èk sé idòl sala té vini kon an zatwap pou yo.”​—Sam 106:35, 36. (New World Translation)

    • “Moun ki mò pa konnèt anyen.”​—Éklé. 9:5. (New World Translation)

    • “Menm kon mwen [Jézi] pa menm èk sé jan latè-a, sé nonm sala sé pa menm èk sé jan latè-a.”​—Jan 17:16.

    • “Paski ou ja pèdi asé tan avan, ka fè bagay jan ki pa ka kwè an Bondyé ka fè. Ou té ka kouwi vyé lavi, swiv vyé dézi, bwè wonm èk toujou sou, anmizé kòʼw an tout kalité bon tan èk fèt, épi adowé fo bondyé.”​—1 Pita 4:3.

26. Ki mannyè ègzanp ki an Bib-la ka édé’w désidé si ou sipozé sélébwé annivèwsè jou nésans?

    • “Twazyenm jou-a sété annivèwsè jou nésans Féro. I té fè an gwo fèt pou tout sé sèvant li-a, èk I té fè yo mennen ni chèf sèvant bwason-an ni chèf béka-a douvan sé sèvant li-a. Féro té fè chèf sèvant bwason-an witounen an twavay li . . . Mé I té pann chèf béka-a.”​—Jen. 40:20-22. (New World Translation)

    • “Mé asou jou annivèwsè Hèròd, tifi Hèrodiyas-la dansé douvan tout sé moun-an ki té an fèt-la, épi sa fè Hèròd plézi an chay. Kon sa I sèwmanté douvan tout moun I kay bay tifi-a népòt sa I mandé. Tifi-a swiv konsèy manmanʼy épi I mandé pou tèt Jan Batis asou on pla! Kon sa I konmandé sòldaʼy pou ay koupé tèt Jan Batis an lajòl-la.”​—Maf. 14:6-8, 10.

27. Pouki ou vlé swiv diwèksyon sé ansyen-an?

    • “Obéyi sé moun-an ki ka kondwi zòt-la èk swiv sa yo ka di. Yo ka gadé apwé lam zòt tout lè, paski yo sav yo ni pou di Bondyé ki mannyè yo fè twavay yo. Si zòt obéyi yo, yo kay fè twavay yo èk tjè kontan, mé si zòt pa obéyi yo, yo kay fèʼy èk lapenn, èk sa pa kay bon pou zòt pyès.”​—Hib. 13:17.

28. Pouki I enpòtan pou ou èk fanmi’w fè tan pou li èk étidyé Bib-la wèglé?

    • “I ka pwan plézi pou obéyi lwa Bondyé Senyè-a, èk I ka étidyéʼy lajouné kon lannwit. I menm kon an pyé bwa yo planté koté ki ni an pil dlo, ki ka pòté fwi lè sézonʼy wivé, èk fèy li pa ka fennen pyès. Moun sala ka pwòspéwé an tout sa I ka fè.”​—Sam 1:2, 3.

29. Pouki ou enmen atandé èk patisipé an sé mitin-lan?

    • “Mwen kay fè sé fwè mwen-an konnèt sa ou ja fè. Mwen kay lévé nonʼw lè mwen asanblé èk yo.”​—Sam 22:22.

    • “Annou toujou katjilé ki mannyè pou nou sa ankouwajé yonn a lòt pou enmen èk pou fè sa ki bon. Annou pa néglijé asanblé ansanm kon lézòt ka fè. Pito nou fè sa, annou ankouwajé yonn a lòt plis toujou, paski kon nou ka wè, Jou Senyè-a ka apwoché.”​—Hib. 10:24, 25.

30. Ki sa ki pli enpòtan twavay-la Jézi ban nou pou fè?

    • “Alé toupatou épi pwéché bay sé moun-an pou yo sa vini disip mwen, épi batizé yo, . . . épi enstwi yo pou obéyi tout sé bagay-la mwen ja konmandéʼw-la.”​—Maf. 28:19, 20.

31. Pou nou sa plè Jéhova, ki atitid nou sipozé ni lè nou ka fè donnasyon pou twavay Wéyòm-lan èben lè nou ka édé sé fwè èk sé sè nou-an?

    • “Onnowé Jéhova épi sa ou ni ki ni valè.”​—Pwov. 3:9. (New World Translation)

    • “Chak moun sipozé bay sa I ja fè lidéʼy pou bay. Sé pa pou zòt siyé dèyè lè zòt ka bay, épi sé pa pou zòt bay paski an moun ka fòsé zòt. Bondyé enmen an moun ki ka bay épi tout tjèʼy.”​—2 Kòr. 9:7.

32. Ki difikilté Kwityen sav yo kay èspéyansé?

    • “Pa dé bon I bon pou moun ki ka jwenn pèsikasyon paski yo ka viv dwèt. Bondyé ka kondwi yo épi tout pwonmèt li sé sa yo. “Pa dé bon I bon pou ou lè moun ka ensiltéʼw épi ka pèsikitéʼw épi ka manti anlèʼw pou lapéti mwen. Sé kon sa yo té pèsikité sé pwòfèt-la ki té avanʼw-lan. Sé pouʼw kontan épi wéjwi, paski Bondyé ni péyimanʼw an syèl ka tjenbé baʼw.””​—Maf. 5:10-12.

33. Pouki I sé an bèl pwivilaj pou batizé kon an Témwen Jéhova?

    • “Pawòl ou té fè tjè mwen kontan an pil. Paski, mwen ka pòté non’w, wi Dyé Jéhova.”​—Jér. 15:16. (New World Translation)