Konmen Témwen Jehovah ou konnèt? Pitèt adan di nou sé vwézinaj ou, moun ou ka twavay épi, ében moun ou ka alé lékòl épi. Ében pitèt nou ja diskité Bib-la épi’w. Ki kalité moun nou vwéman yé, èvèk pou ki sa nou ka patajé sa nou kwè épi lòt moun?

Nou sé moun ki òdinè. Nou lévé diféwan mannyè èk an diféwan kondisyon sosyal. Adan di nou té ka swiv diféwan wilizyon, èk adan di nou pa té ka menm kwè an Bondyé. Kanmenm, avan nou vini Témwen Jehovah, nou tout pwan tan pou byen ègzanminé lésisyon ki an Bib-la. (Twavay 17:11) Nou dakò épi sa nou apwann, èk apwé sa nou fè an disizyon pou sèvi Jehovah, Dyé nou.

Nou ka jwenn bennéfis paski nou ka étidyé Bib-la. Menm kon tout lézòt moun, nou ni pou débwiyé épi tout kalité pwòblenm èvèk épi fèblès nou. Mé paski nou ka éséyé apliké pwensip ki an Bib-la an lavi nou toulé jou, nou ja èspéyansé an kalité lavi ki twòp pli mèyè. (Sam 128:​1, 2) Sa sé yon wézon nou ka patajé sé bon bagay-la nou ja apwann an Bib-la épi lézòt.

Nou ka viv pa pwensip Bondyé. Sé pwensip-la ki an Bib-la bon pou nou, èk yo ka ankouwajé nou pou wèspèkté moun èk pou vini onnèt èk janti. Yo osi ka édé nou vini sitwayen ki ni bon santé èk ki twavayan. Alò sa ka ankouwajé lilyon an fanmi èk mowalité. Paski nou asiwé “Bondyé pa ni pwéféwans,” nou sé an fanmi fwè èk sè ki entònasyonnal, koté was èvèk politik pa ka divizé nou. Menm si nou sé moun ki òdinè, nou sé an ògannizasyon ki èstòdinè.—Twavay 4:13; 10:​34, 35.

• Ki mannyè Témwen Jehovah menm kon tout lézòt moun?

• Ki pwensip sé Témwen-an ja apwann paski yo ka étidyé Bib-la?

An chay moun kwè Témwen Jehovah sé non an wilizyon nèf. Kanmenm, I ja ni pli pasé 2,700 lanné, dépi Bondyé kwiyé sèvant li “témwen’y.” (Izaya 43:​10-12) Avan lanné 1931, nou té ni non-an Étidyan Labib. Pou ki wézon nou adòpté non-an Témwen Jehovah?

Non sala ka idantifyé Bondyé nou. Akòdans pou ékwiti ki té matjé an tan lontan, nou sa jwenn non Bondyé, Jehovah, plizyè mil fwa an Bib-la. Mé, adan an chay Bib yo ja wiplasé non sala épi diféwan tit, tèl kon Senyè ében Bondyé. Mé Bondyé té ja fè Moziz konnèt non’y sé Jehovah lè I di’y: “Sa sé non mwen pou tout tan.” (Ègzodòs 3:15) An mannyè sala, I mété kò’y apa di tout fo dyé. Nou kontan pou pòté non sen Bondyé.

Sa ka fè moun konnèt misyon nou. An tan lontan, la té ni plizyè moun ki té bay témwenyaj konsèné lafwa yo an Jehovah. Pwèmyé moun-an ki té fè sa sété Ébèl, an nonm ki té jis. Diwan sé syèk-la, Nowa, Abrahanm, Séra, Moziz, David, èk lòt moun vini anpami “gwan pòpilas témwen” sala. (Hibrou 11:4–12:1) Menm kon an moun sa bay témwenyaj adan an kay lodyans pou édé an moun ki inosan, nou ditèminé pou fè moun konnèt lavéwité-a konsèné Bondyé nou.

Paski nou ka imité Jézi. Bib-la ka kwiyé’y “témwen-an ki fidèl èk vwé.” (Wévélasyon 3:14) Jézi menm di I ‘fè moun konnèt non Bondyé’ épi I kontiné ‘bay témwenyaj pou lavéwité-a’ konsèné Bondyé. (Jan 17:26; 18:37) Alò, disip Jézi Kwi oblijé pòté non Bondyé èk fè moun konnèt non sala. Sé sa Témwen Jehovah ka twavay wèd pou fè.

• Pou ki wézon Étidyan Labib adòpté non-an Témwen Jehovah?

• Pou ki mizi tan Jehovah ja ni témwen asou latè?

• Ki moun ki pli gwo Témwen Jehovah?

Bib-la té ja pwédi ki apwé lanmò Jézi Kwi, fo titja té kay lévé anpami sé Kwityen-an an tan lontan èk yo té kay défòmé lavéwité-a ki an Bib-la. (Twavay 20:​29, 30) Apwé an tan, sé ègzaktiman sa ki fèt. Yo mélé sa Jézi enstwi épi mansonj, èk fo Kwityen dévlopé. (2 Timòfi 4:​3, 4) An tan jòdi, ki mannyè nou sa fè asiwé nou ni an lakopwann ki dwèt konsèné sa Bib-la ka vwéman enstwi?

Lè-a wivé pou Jehovah wévélé lavéwité-a. I té ja pwédi ki diwan ‘dènyé tan-an, lavéwité-a té kay an abondans.’ (Dannyèl 12:4) An lanné 1870 la té ni an ti gwoup moun ki té ka chaché pou lavéwité. Yo apèsivwè ki an chay dòktwin sé légliz-la pa té an Bib-la. Alò, yo koumansé chaché pou konpwann sa Bib-la té ka enstwi dépi an koumansman-an. Kon sa Jehovah benni yo ék I fè yo konpwann pawòl li.

Nonm ki ni tjè onnèt byen étidyé Bib-la. Sé Étidyan Labib sala ki té la avan nou-an, té sèwiyé. Yo té ka étidyé adan an mannyè nou ka sèvi jis toujou. Yo diskité Bib-la sijé pa sijé. Lè yo jwenn an pasaj an Bib-la ki té difisil pou konpwann, yo gadé pou lòt vèwsé pou èspliké’y. Apwé yo fè asiwé sa yo konpwann té an ling épi lèwèstan Bib-la, yo ékwi sa yo apwann. Paski yo kité Bib-la déchifwé kò’y, yo viwé dékouvè lavéwité-a konsèné non Bondyé èk Wéyòm li, antansyon’y pou lézòm èk pou latè-a, kondisyon lé mò, èk èspwa-a ki moun ki mò kay wésisté. Ègzanminasyon yo libéwé yo anba an chay fo dòktwin épi fo pwatik.—Jan 8:​31, 32.

Bò lanné 1879 Étidyan Labib vini konpwann ki tan-an té ja wivé pou fè moun toupatou vini konnèt lavéwité-a. Kon sa, an menm lanné sala, yo koumansé pwodwi jounal-la nou ka pibliyé jis toujou, The Watchtower Announcing Jehovah’s Kingdom. Apwézan nou ka patajé lavéwité ki an Bib-la épi moun an 240 péyi èk an pli pasé 750 langaj. Lavéwité-a p’òkò té janmen an abondans kon sa!

• Apwé lanmò Jézi Kwi, ki sa ki wivé lavéwité-a ki an Bib-la?

• Ki sa ki ja annékòz nou pou viwé dékouvè lavéwité-a an Pawòl Bondyé?

Pou plizyè lanné, Témwen Jehovah ja enpwimé, yo ja sèvi, èk yo ja bay moun diféwan Bib. Mé apwé sa nou wè I  té nésésè pou pwodwi an twadiksyon nèf ki té kay édé moun jwenn “nòlaj aplon konsèné lavéwité-a,” èk sa sé divwa Bondyé pou tout moun. (1 Timòfi 2:​3, 4) Alò, an lanné 1950 nou koumansé délivwé pòsyon an Bib nou, New World Translation adan an langaj ki ézé pou moun konpwann. Bib sala fidèl, I dwèt, épi ou sa jwenn li an pli pasé 130 langaj.

An Bib ki ézé pou konpwann té nésésè. Langaj ka chanjé apwé an tan. Alò an chay Bib ni èspwèsyon ki pa a klè ében ki pa an sèvis ankò èk yo difisil pou konpwann. Osi, yo ja dékouvè ékwiti tan ansyen ki pli dwèt èk ki pli pwé sa ki té ékwi an koumansman-an. Sa ja annékòz an pli mèyè lakopwann an Hibrou, Araméyik, èvèk Gwik, sé langaj-la yo sèvi pou ékwi Bib-la.

An twadiksyon ki fidèl pou pawòl Bondyé té nésésè. Pito pou yo pwan léchanlib épi Pawòl Bondyé, twadiktè (moun ki ka mété Bib-la an diféwan langaj) sipozé wèsté fidèl pou pwèmyé ékwiti-a. Kanmenm, an plizyè twadiksyon, yo pa sèvi non Bondyé, Jehovah.

An Bib ki ka bay Mèt li lonnè té nésésè. (2 Sanmyèl 23:2) An New World Translation-lan, yo ja mété non Jehovah viwé tout koté I dwé yé. Sé pli vyé ékwiti Bib-la ni non Jehovah apipwé 7,000 fwa. Pòtwé-a ki pli ba-a sé yon ègzanp. (Sam 83:18) An wézilta di plizyè lanné wichach, Bib sala sé an plézi pou li paski I ka èspliké katjil Bondyé a klè. Ki ou ni New World Translation an langaj ou ki ou pa ni’y, nou ka ankouwajé’w pou pwan labitid pou li Pawòl Jehovah toulé jou.—Jòchwa 1:8; Sam 1:​2, 3.

• Pou ki wézon nou wè I té nésésè pou pwodwi an twadiksyon nèf?

• Ki sa moun ki vlé apwann konsèné divwa Bondyé sipozé fè toulé jou?