An chay moun ja doubout alé lanmès paski yo pa ka twapé pyès djid ében konsolasyon. Alò, pou ki sa I enpòtan pou’w atandé mitin Témwen Jehovah? Ki sa ou kay twapé la?

Ou kay èspéyansé lajwa paski ou kay anpami moun ki ni lanmityé. An pwèmyé syèk-la, Kwityen té ògannizé an diféwan kongwigasyon, èk yo té ka tjenn mitin pou adowé Bondyé, pou étidyé Lévanjil, èk pou ankouwajé yonn a lòt. (Hibrou 10:​24, 25) Paski yo té enmen yonn a lòt, lè yo té asanblé, yo té ka santi yo anpami bon jan—fwè èk sè yo an kongwigasyon-an. (2 Tèsalonnika 1:3; 3 Jan 14) Nou ka swiv menm modèl-la èk nou ka èspéyansé menm kalité lajwa-a.

Ou kay apwann mannyè pou apliké pwensip ki an Bib-la. Menm kon yo té ka fè an tan lontan, nonm, fanm, èk manmay ka jwenn ansanm. An sé mitin-lan, titja ki kwòlifyé ka sèvi Bib-la pou édé nou apèsivwè mannyè pou apliké pwensip li an lavi nou toulé jou. (Ditonronnonmi 31:12; Néyimaya 8:8) Tout moun sa patisipé lè nou ni diskasyon èk lè nou ka chanté, paski sa ka kité nou déklawé èspwa nou.—Hibrou 10:23.

Lafwa’w an Bondyé kay vini pli fò. Zapòt Pòl te di yonn an sé kongwigasyon-an: “Mwen anvi wè zòt tèlman . . . pou nou chak jwenn ankouwajman an lafwa yonn a lòt, ni sa zòt ni san mwen.” (Ronm 1:​11, 12) Lè nou ka toujou asosiyé épi fwè èk sè nou an sé mitin-lan sa ka fòtifyé lafwa nou èk ditèminasyon nou pou viv an lavi Kwityen.

Pouki ou pa aksèpté envitasyon sala pou atandé lòt mitin-an kongwigasyon nou ni pou’w èspéyansé sé bagay sala pou kò’w? Nou kay byen kontan pou wè’w. Ou pa ni pou péyé pou atandé—nou pa ka anmasé latjèt.

• Ki mòdèl nou ka swiv pou sé mitin nou-an?

• Ki bennéfis nou ka jwenn lè nou atandé mitin?

Menm si nou ni pou pasé anba gwo lafowé ében débat anba mové tan, nou pa ka doubout atandé mitin nou. Magwé lavi ni difikilté ében nou las apwé an jouné twavay, pou ki wézon nou ka fè tèlman éfò pou asosiyé épi yonn a lòt?

I bon pou nou. Lè Pòl té ka palé konsèné moun nou ka asosiyé épi an kongwigasyon-an, I ékwi “konsidiwé yonn a lòt.” (Hibrou 10:24) Èspwèsyon sala vlé di “toujou moutwé nou entéwésé,” ében, pou vini konnèt yonn a lòt. Kon sa, pawòl zapòt-la ka ankouwajé nou pou moutwé nou entéwésé adan lézòt moun. Lè nou vini konnèt lòt fanmi Kwityen, nou ka dékouvè ki adan di yo ja ganyen a bout difikilté menm kon san nou èk yo sa édé nou éwisi osi.

Nou kay fè bon jan ki fidèl. Lè nou ka atandé mitin, nou pa ka asanblé épi moun nou annèk fè konnésans épi, mé nou ka asanblé épi bon jan nou. Délè nou ka fè tan ansanm pou anmizé kò nou adan an mannyè ki pwòp. Ki bennéfis asosiyasyon sala ka mennen nou? Nou ka apwann mannyè pou apwésyé yonn a lòt pli, èk sa ka fòtifyé lanmityé anpami nou. Alò, lè sé jan nou-an ka èspéyansé pwòblenm, nou toujou pawé pou édé yo paski nou ni an bon wilasyon épi yo. (Provèb 17:17) Lè nou asosiyé épi tout manm kongwigasyon nou, nou ka moutwé nou “entéwésé adan yonn a lòt.”—1 Kòrint 12:​25, 26.

Nou ka ankouwajé’w pou chwazi sé moun-an ki ka fè divwa Bondyé pou jan’w. Ou kay twapé jan kon sa anpami Témwen Jehovah. Souplé pa kité anyen anpéché’w asosiyé épi nou.

• Pou ki sa I bon pou asosiyé épi fwè èk sè nou an sé mitin-lan?

• Ki tan ou té kay vlé fè konnésans épi kongwigasyon nou?

An pwèmyé syèk-la, mitin Kwityen té ni chanson èk lapwiyè. Yo osi té ka li épi diskité Lévanjil—san pyès twadisyon wilizyèz. (1 Kòrint 14:26) Sa sé menm bagay-la ou kay wè lè ou atandé sé mitin nou-an.

Lésisyon-an sòti an Bib-la èk ou sa sèvi’y an lavi’w. An bout chak simenn, chak kongwigasyon ka asanblé pou kouté an diskou ki établi asou Bib-la. Diskou sala ka diwé pou 30 minit. I ka moutwé mannyè Lévanjil ka èspliké tan-an nou ka viv adan-an èk mannyè Bib-la sa édé nou an lavi nou. Nou tout ka jwenn ankouwajman pou li sé vèwsé-a an Bib nou menm. Apwé diskou-a, la ni an Létid “Watchtower” ki ka diwé pou yon nèditan. Yo ka sèvi yon atik ki sòti an édisyon létid Watchtower èk manm kongwigasyon-an sa patisipé an diskasyon-an. Diskasyon sala ka édé nou apliké konsèy Bib-la an lavi nou. Tout 110,000 kongwigasyon nou owon latè-a ka étidyé menm enfòmasyon sala.

Mitin-lan ka édé nou enstwi moun pli mèyè. Yon swè an simenn-an nou ka atandé an mitin ki ni twa pa èk yo ka kwiyé mitin sala, Lavi Nou èk Ministè Nou kon Kwityen. Enfòmasyon pou mitin sala ka sòti adan an dòkiman nou ka jwenn chak mwa ki ni tit-la, Lavi Nou èk Ministè Nou kon Kwityen. Pwèmyé pa-a an mitin sala sé, Twézò Ki An Pawòl Bondyé. Pa sala ka édé nou byen konpwann an pòsyon an Bib-la kongwigasyon-an ja li andavans. Dézyenm pa-a sé, Pwépawé Byen Pou Pwédikasyon-an. Sé pwézantasyon-an an pa sala ka moutwé nou mannyè pou diskité Bib-la épi lézòt moun. An fwè ka ban nou konsèy pou édé nou fè pwogwé an mannyè nou ka li èk palé. (1 Timòfi 4:13) An dènyé pa-a, Lavi Nou Kon Kwityen, nou ka ègzanminé mannyè nou sa apliké pwensip ki an Bib-la an lavi nou toulé jou. Nou osi ni yon létid an fòm kwèsyon épi wépons ki ka édé nou konpwann Bib-la pli mèyè.

Lè ou atandé mitin nou, ou kay wisivwè bon kalité endikasyon ki établi asou Bib-la èk sa kay touché tjè’w.—Izaya 54:13.

• Ki sa ou kay tann an mitin Témwen Jehovah?

• Kilès an sé mitin nou-an ou té kay vlé atandé?

Ès ou ja òbzòvé an sé pòtwé-a ki an ti liv sala mannyè Témwen Jehovah byen abiyé lè yo ka atandé mitin an kongwigasyon yo? Pou ki wézon nou ka bay otan antansyon pou abiman nou èk lapawans nou?

Pou moutwé wèspé pou Bondyé nou. Sa vwé Bondyé ka gadé pli pasé lapawans nou. (1 Sanmyèl 16:7) Kanmenm, lè nou asanblé pou adowé’y, dézi tjè nou sé pou moutwé wèspé pou li èk pou lòt Kwityen an kongwigasyon-an. Si nou té ni pou doubout douvan an jij adan an kay lodyans, nou té kay bay lapawans nou bon antansyon paski nou ni wèspé pou pozisyon’y. Alò, mannyè nou abiyé pou atandé mitin ka moutwé nou ni gwan wèspé pou Bondyé nou, Jehovah, “Jij tout latè-a,” èk pou plas-la koté nou ka adowé’y la.—Jennésis 18:25.

Pou moutwé sé pwensip-la nou ka swiv-la. Bib-la ankouwajé Kwityen pou abiyé adan an mannyè ki “senp épi ki ka moutwé bon sans” kon moun ki “ni wèspé pou Bondyé.” (1 Timòfi 2:​9, 10) Pou abiyé adan an mannyè ki “senp” vlé di pou pa mété had ki kay mennen antansyon asou kò nou paski I twò dékòlté, twò séwé, ében twò kout. Osi “bon sans” ka édé nou chwazi bèl had, had ki pa débwayé èk èkstwavagan. Menm si nou ka swiv sé pwensip sala, sa pa ka anpéché nou fè diféwan chwa lè’y vini pou abiman nou. San nou di yon mo pawòl, lapawans nou ka “fè lésisyon Sovè nou vini pli bèl” èk sa ka “glowifyé Bondyé.” (Titòs 2:10; 1 Pita 2:12) Lè nou byen abiyé pou atandé sé mitin-lan, sa ka enfliyansé mannyè lézòt moun ka konsidiwé adowasyon-an nou ka bay Jehovah.

Pa kité kalité had-la ou ni-an anpéché’w atandé mitin an Kingdonm Hòl-la. Had nou pa oblijé chè ében flanman pou nou byen abiyé, pou nou pwòp, èk pou nou pwézantab.

• Ki mizi enpòtans nou ni pou mété asou abiman nou lè nou ka adowé Bondyé?

• Ki pwensip ki ka djidé chwa nou lè’y vini pou abiman nou èk lapawans nou?

Si ou ka étidyé Bib-la épi yon Témwen Jehovah, ou pitèt ka éséyé pwépawé enfòmasyon-an andavans pou chak létid. Pou jwenn pli gwan bennéfis, I bon pou ou fè menm bagay-la avan ou atandé mitin an kongwigasyon-an. Nou ka jwenn pli mèyè wézilta lè nou ni an bon labitid pwépawé pou sé mitin-lan.

Chwazi ki lè èk ki koté pou étidyé. Ki lè ki pli fasil pou ou étidyé san anyen distwé’w? Ès sé bonnè bonmaten avan ou koumansé jouné twavay ou ében pli ta òswè apwé sé manmay-la ay dòmi? Menm si ou pa sa étidyé pou an chay tan, désidé ki mizi tan ou sa pwan pou’w étidyé, èk pa kité anyen distwé’w. Chaché an plas ki pa ni dézòd, èk fèmé tout bagay ki sa distwé’w tèl kon radyo-a, télévizyon-an, èk sèl fòn-an. Lè ou pwédyé avan ou étidyé, sa kay édé’w débawasé lidé’w épi tout pwòblenm jouné-a pou ou sa fiksé asou Pawòl Bondyé.—Filipay 4:​6, 7.

Matjé sé wépons-lan, èk pwépawé pou patisipé. Lè ou koumansé, éséyé konpwann sijé-a an jennéwal. Katjilé asou tit atik-la ében chapit-la èk konsidiwé mannyè chak ti sijé an ling épi tit-la. Ègzanminé sé pòtwé-a ki an lison-an èk sé kwèsyon-an pou wivisyon ki ka pézé fò asou sé gwo pwen-an. Apwé sa li chak pasaj, èk gadé pou wépons pou sé kwèsyon-an. Li sé vèwsé-a ki an pasaj-la an Bib ou, èk éséyé konpwann mannyè yo ka sipòté enfòmasyon-an. (Twavay 17:11) Lè ou sa wéponn kwèsyon-an, mété an ling anba sé pawòl-la an pasaj-la ki kay fè’w viwé chonjé wépons-lan. Alò lè ou atandé mitin-lan, ou sa lévé lanmen’w si ou té kay avoudwé bay an wépons an pawòl ou menm.

Lè ou ègzanminé diféwan sijé yo ka diskité chak simenn an sé mitin-lan, ou kay vini konnèt Bib-la twòp pli mèyè.—Mafyou 13:​51, 52.

• Ki bon labitid ou sa adòpté pou pwépawé pou sé mitin-lan?

• Ki mannyè ou sa pwépawé kò’w pou bay an wépons an mitin-lan?

Dépi tan lontan, Jehovah té toujou vlé chak fanmi pasé tan ansanm, pou fòtifyé wilasyon yo épi’y èk wilasyon yo épi yonn a lòt. (Ditonronnonmi 6:​6, 7) Sé pou wézon sala Témwen Jehovah ka fè tan chak simenn pou fanmi-an adowé Jehovah ansanm adan an koté yo alèz. Yo ka diskité sijé an Bib-la ki kay édé chak manm fanmi-an. Menm si ou ka viv pa kò’w, ou sa pasé tan sala épi Bondyé asou an pwojé Bib ou menm chwazi.

Sa sé an tan pou vansé pli pwé Jehovah. “Vansé pwé Bondyé, èk I kay vansé pwé’w.” (Jémz 4:8) Nou ka vini konnèt Jehovah pli mèyè lè nou apwann détay konsèné pèsonnalité’y èk aksyon’y an Pawòl li. An bon mannyè pou koumansé adowasyon an fanmi’w sé pou sèvi adan tan-an ansanm pou li Bib-la fò. Pitèt ou sa swiv pwogwanm-lan pou mitin-lan Lavi Nou èk Ministè Nou pou simenn-an. Chak manm fanmi-an sa li an pòsyon, èk apwé sa yo tout sa diskité sa yo apwann an sé vèwsé-a.

Sa sé an tan pou vansé pli pwé manm fanmi’w. Mawi èk madanm, osi pawan èk manmay, sa fòtifyé wilasyon yo épi yonn a lòt lè yo étidyé Bib-la ansanm. Tan sala sipozé sé an tan ki byen enpòtan an simenn-an, yonn ki ni lakontantman èk lapé. Dépan asou laj sé manmay-la, pawan sa chwazi sijé ki pli bon pou yo, pitèt sijé ki an Watchtower èk Awake! ében asou wèbsayt nou, jw.org. Zòt sa diskité an pwòblenm manmay zòt ja èspéyansé an lékòl èk mannyè pou débwiyé épi’y. Zòt sa gadé an pwogwanm asou JW Broadcasting (tv.jw.org) èk apwé sa zòt sa diskitéʼy ansanm. Pitèt tout moun kay kontan pou chanté sé chanson-an yo kay chanté an sé mitin-lan èk zòt sa pwan an ti wipa apwé adowasyon an fanmi-an.

Tan spésyal sala zòt pasé ansanm chak simenn koté zòt ka adowé Jehovah ka édé tout moun an fanmi-an pwan plézi an Pawòl Bondyé, èk Jehovah kay benni éfò zòt an chay.—Sam 1:​1-3.

• Pou ki sa nou ka fè tan pou adowasyon an fanmi-an?

• Ki mannyè pawan sa fè lokazyon sala an tan ki ka mennen lakontantman bay tout moun an fanmi-an?

Pou ki sa sé moun sala kontan kon sa? Yo ka atandé yonn an sé asanblé nou-an. Menm kon sèvant Bondyé an tan pasé té jwenn diwèksyon pou asanblé twa fwa pa lanné, nou ni gwo dézi pou atandé sé gwan asanblé nou-an. (Ditonronnonmi 16:16) Toulé lanné, nou ni twa lokazyon: dé asanblé sékyout, yo chak ka diwé yon jou èvèk yon asanblé wijonnal ki ka diwé twa jou. Ki bennéfis nou ka jwenn lè nou atandé sé asanblé sala?

Yo ka fòtifyé wilasyon nou kon fwè èk sè. Menm kon jan Izwayèl té kontan pou glowifyé Jehovah “an sé asanblé-a,” nou osi ka wéjwi lè nou ka adowé’y ansanm asou lokazyon ki spésyal. (Sam 26:​12, nòt ki anba paj-la; 111:1) Sé asanblé sala ka ban nou lokazyon pou jwenn ansanm pou asosiyé épi lòt Témwen Jehovah ki sòti an diféwan kongwigasyon ében an diféwan péyi. A midi, nou ka manjé ansanm menm koté-a nou ni asanblé-a èk sa ka fè nou pli kontan ankò. (Twavay 2:42) La nou ka èspéyansé pou kò nou lanmityé-a ki ka manché “tout fwè èk sè” ansanm owon latè-a.—1 Pita 2:17.

Yo ka édé nou fè pwogwé spiwitwèl. Jan Izwayèl osi jwenn bennéfis paski yo té “konpwann sé pawòl-la” ki té èspliké bay yo an Lévanjil. (Néyimaya 8:​8, 12) Nou osi ka apwésyé lésisyon Bib nou ka wisivwè an sé asanblé nou-an. Chak pwogwanm ni an tit ki sòti an Lévanjil. Sé diskou-a, sé simpoziyonm-lan, èk sé pwézantasyon-an ka moutwé nou mannyè pou fè divwa Jehovah an lavi nou. Nou ka jwenn ankouwajman lè nou tann èspéyans moun ki ka ganyen a bout difikilté-a pou viv an lavi Kwityen an tan difisil sala. An sé asanblé wijonnal-la, nou ni dranma ki ka fè wakont an Bib-la vini vivan èk nou ka apwann lison nou sa sèvi an lavi nou toulé jou. An chak asanblé, yo ka batizé moun ki dèdiké lavi yo bay Bondyé.

• Pou ki sa sé asanblé-a sé lokazyon ki ka mennen lakontantman?

• Ki bennéfis ou sa jwenn lè ou atandé yon asanblé?

Pa djè tan avan lanmò Jézi, I annonsé: “Moun kay pwéché bon nouvèl sala konsèné Wéyòm-lan an tout latè-a kon an témwenyaj pou tout nasyon; èk apwé sa tan-an kay bout.” (Mafyou 24:14) Mé ki mannyè nou sa akonpli twavay pwèchman sala owon latè-a? Nou ka fè sa lè nou swiv mòdèl-la Jézi kité lè’y té asou latè-a.—Louk 8:1.

Nou vlé twapé moun lakay yo. Jézi moutwé sé disip li-a mannyè pou pwéché bon nouvèl-la kay an kay. (Mafyou 10:​11-13; Twavay 5:42; 20:20) An pwèmyé syèk-la Jézi bay sé pwoklanmatè-a konmin pou yo té sa pwéché. (Mafyou 10:​5, 6; 2 Kòrint 10:13) Menm mannyè-a, an tan jòdi, twavay pwèchman nou byen ògannizé, èk chak kongwigasyon ni an konmin koté yo ka pwéché. Sa ka édé nou obéyi konmandman Jézi pou “pwéché bay sé moun-an èk pou bay an témwenyaj ki konplèt.”—Twavay 10:42.

Nou ka fè tout sa ki posib pou twapé moun népòt koté yo yé. Jézi osi kité an ègzanp ban nou, lè’y pwéché bay moun an plas piblik, tèl kon bò lanmè-a ében bò pi dlo. (Mak 4:1; Jan 4:​5-15) Nou osi ka palé épi moun konsèné Bib-la népòt koté ki posib—an lawi, an plas biznis, an sé pak-la, ében asou téléfòn. Nou osi ka pwéché bay vwézinaj nou, moun nou ka twavay épi, moun nou ka alé lékòl épi, èk fanmi nou népòt lè nou jwenn an bon òpòtyounité. Tout sé éfò sala ja fè’y posib pou plizyè milyon moun owon latè-a tann “bon nouvèl salvasyon-an.”—Sam 96:2.

Ès la ni an moun ou té kay kontan pou patajé bon nouvèl Wéyòm Bondyé épi èk moutwé’y mannyè bon nouvèl sala sa mennen’y bennéfis an tan pwochen? Pa tjenn bon konmisyon sala pou kò’w. Patajé’y épi yo pli vit ki posib!

• Ki “bon nouvèl” nou ni pou pwoklanmé?

• Ki mannyè Témwen Jehovah ka imité Jézi an mannyè-a I pwéché?

Byen souvan, yo ka sèvi mo-a “piyonnè” pou dékwi moun ki ka dékouvè konmin nèf èk ki ka ouvè chimen pou lézòt swiv. Jézi sété an piyonnè an sans sala. Jehovah voyé’y asou latè pou pwéché an konmisyon ki sa sové lavi moun èk pou ouvè chimen pou salvasyon. (Mafyou 20:28) An tan jòdi, sé disip li-a ka imité’y lè yo fè tout sa yo pé ‘pou fè disip.’ (Mafyou 28:​19, 20) Adan di yo ja volonté pou fè sa nou ka kwiyé sèvis piyonnè.

An piyonnè sé an moun ki ka pwéché an plen. Tout Témwen Jehovah sé pwoklanmatè ki ka pwéché bon nouvèl-la. Kanmenm, adan ja ògannizé lavi yo pou wann sèvis kon piyonnè wéglé. Sa vlé di yo ka pwéché pou 70 nèditan chak mwa. Pou fè sa, an chay ja chwazi pou pa twavay toulé jou. La ni lézòt yo chwazi pou wann sèvis kon piyonnè spésyal an plas koté la ni an pli gwan labizwen pou pwoklanmatè Wéyòm-lan. Chak mwa yo ka twavay pou 130 nèditan ében pli pasé sa an pwédikasyon-an. Sé piyonnè-a kontanté pou viv an lavi ki senp, épi konfyans-lan ki Jehovah kay potjiwé yo épi sa yo ni bizwen. (Mafyou 6:​31-33; 1 Timòfi 6:​6-8) Moun ki pa sa piyonnè an plen sa wann sèvis kon piyonnè òkzilè. Sa vlé di, yo ka pwéché pou 30 ében 50 nèditan pa mwa.

An piyonnè ka kité lanmityé’y pou Bondyé épi pou moun motivé’y pou pwéché. Menm kon Jézi, nou ka wè mannyè moun ja pèd èspwa an tan jòdi. (Mak 6:34) Mé nou ni nòlaj ki sa édé yo apwézan èk sa ka bay yo yon èspwa ki fò pou tan pwochen-an. Lanmityé-a an piyonnè ni pou pwochen’y ka motivé’y pou bay tan’y épi kouway li libman pou édé lézòt moun ni an bon wilasyon épi Bondyé. (Mafyou 22:39; 1 Tèsalonnika 2:8) An wézon di sa, lafwa’y ka vini pli fò, I ka vansé pli pwé Bondyé, èk I ka èspéyansé an chay lakontantman.—Twavay 20:35.

• Ki sa an piyonnè yé?

• Ki sa ki ka motivé adan moun pou wann sèvis an plen kon piyonnè?

Témwen Jehovah toujou ka mété an chay enpòtans asou endikasyon Bondyé bay. Moun ki ka sèvi tout tan yo an twavay-la pou pwéché Wéyòm-lan ka wisivwè lésisyon spésyal pou yo sa ‘byen akonpli pwédikasyon yo.’—2 Timòfi 4:5.

Lékòl pou Piyonnè. Apwé pwèmyé lanné sèvis li, an piyonnè wéglé ka atandé an lékòl ki ka diwé sis jou. Lékòl sala pé pwan kou adan an Kingdonm Hòl ki tou pwé. Wézon-an pou lékòl sala sé pou édé piyonnè-a vansé pli pwé Jehovah, pou ni pli ladwès an tout fason an twavay pwèchman-an, èk pou kontiné fidèlman an sèvis Jehovah.

Lékòl pou Pwoklanmatè Wéyòm-lan. Lékòl sala ki ka  diwé pou dé mwa, pwépawé èspwèsman pou enstwi piyonnè ki ni èspéyans èk ki pawé pou kité plas yo pou wann sèvis népòt koté ki ni an labizwen. Anfen, yo ka di, “Mi mwen! Voyé mwen!” menm kon Jézi Kwi, pli gwan Pwoklanmatè-a ki janmen viv asou latè. (Izaya 6:8; Jan 7:29) Lè yo kité plas yo pou alé adan an péyi ki lwen, yo pé ni pou vini abitwé épi an lavi ki pli senp. Kilti-a, sé sézon-an, èk manjé-a pé diféwan konplètman èk sa yo ja abitwé épi. Yo pé jis ni pou apwann an lòt langaj. Lékòl sala ka édé fwè èk sè ki mayé èk sa ki pa mayé, ki an laj di 23 pou 65 lanné, pou dévlopé sé kawaktè-a yo kay bizwen an ansayman yo èk sé ladwès-la ki kay fè’y posib pou Jehovah épi ògannizasyon’y sèvi yo konplètman.

Lékòl Giliyad. An Hibrou, “Giliyad” vlé di “Pil  Témwen.” Dépi Giliyad koumansé an lanné 1943, pli pasé 8,000 moun ja atandé lékòl-la. Yo voyé yo kon misyonnè pou bay an témwenyaj “an tout kwen latè-a” èk yo jwenn an chay siksé. (Twavay 13:47) Lè sé misyonnè-an wivé an Pérou, la pa té ni pyès kongwigasyon an péyi-a. Apwézan la ni anho 1,000 kongwigasyon. Lè sé misyonnè nou-an koumansé wann sèvis an Japon, la té ni mwens ki dis Témwen Jehovah an péyi-a. Apwézan la ni pli pasé 200,000 pwoklanmatè. An Lékòl Giliyad-la ki ka diwé pou senk mwa, sé fwè èk sè-a ka étidyé Bib-la konplètman. Piyonnè spésyal, misyonnè, èk moun ki ka twavay an sé ofis bwanch-lan, èvèk sivéyan sékyout ka jwenn envitasyon pou atandé lékòl sala pou wisivwè pli endikasyon pou yo sa stabilizé èk fòtifyé twavay pwèchman-an owon latè-a.

• Pou ki wézon la ni an Lékòl pou Piyonnè?

• Bay ki konpanni moun yo pwépawé Lékòl pou Pwoklanmatè Wéyòm-lan?