Bondyé Fè Pwèmyé Nonm-lan Èk Pwèmyé Fanm-lan

Jéhova té fè an jaden adan an plas yo té ka kwiyé Édenn. La té ni mizi flè, pyé bwa èvèk zannimo an jaden sala. Apwé, Bondyé sèvi lapousyè pou fè Adanm, pwèmyé nonm-lan, èk i souflé an né’y. Ki sa’w kwè ki té fèt lè’y fè sa? Ében nonm-lan vin vivan! Jéhova té mété Adanm an chaj jaden-an, èk i di’y pou bay chak zannimo an non.

Mé Jéhova té bay Adanm yon lwa ki té byen enpòtan. I té di’y: ‘Ou sa manjé fwi an tout pyé bwa ki an jaden-an, apa di yonn. Si ou manjé fwi an pyé bwa sala, ou kay mò.’

Tjèk tan apwé Jéhova di: ‘Mwen kay fè an moun pou édé Adanm.’ Kon sa, Bondyé fè Adanm dòmi. Padan Adanm té an fon sonmèy, Bondyé pwan yon zo kòt li èk sèvi’y pou fè an madanm ba li. Non madanm-lan sété Èv. Alò, Adanm épi Èv sété pwèmyé fanmi-an ki té asou latè. Ki mannyè Adanm té santi lè’y té pwèmyé wè madanm li? Adanm té si tèlman kontan, i di: ‘Gadé sa Jéhova fè épi zo kòt mwen-an! Alafen! Mwen ni an moun ki ka sanm mwen.’

Jéhova té di Adanm épi Èv pou fè ich èk pléplé latè-a. I té vlé yo pasé an bon tan ka twavay ansanm pou fè tout latè-a vini an pawadi, ében an bèl plas, menm kon jaden Édenn. Malèwèzman, sé pa sa ki té fèt. Pou ki sa? Nou kay apwann wézon-an an lòt chapit-la.