Miwak Èstòdinè-a Jéhova Té Fè Bò Lanmè Wouj-la

Lè Féro wéyalizé jan Izwayèl té vwéman kité Éjip, i wigwété i té voyé yo alé. Èk i di sòlda’y: ‘Pwépawé tout sé kawòs-la nou ka sèvi pou ladjè, èk annou alé dèyè jan Izwayèl. Nou pa té pou janmen kité yo alé.’ Konsa Féro épi lawmé’y pitjé kouwi pou yo tjébé jan Izwayèl.

Mé, Jéhova té ka djidé pèp li. Diwan lajounen-an i té ka sèvi on nwaj pou djidé yo, èk lé swè, i té ka sèvi on difé pou fè sa. Konsa, Jéhova ba yo diwèksyon, èk i mennen yo bò Lanmè Wouj-la. Lè yo wivé la, Jéhova di yo pou mouté tant yo.

Mé lè jan Izwayèl wè Féro épi lawmé’y ka vini, yon lapèwèz pwan yo! Yo koumansé pléwé, èk yo di Moziz: ‘Nou kay mò. Simyé ou té kité nou an péyi Éjip.’ Mé Moziz di yo: ‘Pa pè. Annou gadé pou nou wè mannyè Jéhova kay sové nou jòdi-a.’ Wi, Moziz té vwéman ni konfyans ki té fò an Jéhova.

Konsa Jéhova di jan Izwayèl pou démouté tant yo, sanblé tout sa yo té ni, èk pwépawé kò yo pou yo alé. Osi, Jéhova tiwé nwaj-la ki té douvan jan Izwayèl, èk i mété’y ant yo épi sé Éjipsyen-an. Asou fasad jan Izwayèl, nwaj-la té ka kléwé yo, mé asou fasad sé Éjipsyen-an, menm nwaj-la té ni yo an nwèsè.

Apwé sa, Jéhova di Moziz pou lonjé lanmen’y asou Lanmè Wouj-la, èk Jéhova fè on gwo van vanté tout lannwit lonng. Van-an fè lanmè-a fann an dé, èk la té ni on chimen an mitan-an. Konsa, tout jan Izwayèl maché asou tè sèk pou yo janbé lanmè-a.

Lè Féro wè jan Izwayèl ka janbé lanmè-a, i pwan lawmé’y èk i antwé andidan Lanmè Wouj-la dèyè yo, kon on nonm fou. Mé chonjé, Jéhova té ka pwotéjé pèp li. Konsa, Jéhova konfizé sé sòlda-a, èk yo pa té konnèt kisa pou yo fè. Jéhova koumansé waché woul kawòs sé Éjipsyen-an. Lè yo wè sa, yo hélé: ‘Annou kouwi! Jéhova ka goumen pou jan Izwayèl.’ Mé a lè sala, i té twò ta.

Jéhova di Moziz: ‘Lonjé lanmen’w asou lanmè-a ankò.’ Kon Moziz lonjé lanmen’y, dlo-a kouvè sé Éjipsyen-an. Konsa, Féro épi tout lawmé’y néyé. Pa yonn di yo ki chapé.

Mé, asou lòt fasad lanmè-a, jan Izwayèl té sòv. Lè yo wè miwak èstòdinè sala Jéhova fè pou délivwé yo, yo té si tèlman kontan, yo fè on chanson pou wimèsyé èk glowifyé Jéhova. Mi sé konsa chanson-an té ka alé: ‘Chanté pou glowifyé Jéhova. Annou chanté pou fè moun konnèt non’y. I jété sé chouval-la, épi sé moun-lan ki té asou yo-a, an lanmè-a.’ Paditan jan Izwayèl té ka chanté, sé madanm-lan té ka dansé èk yo té ka jwé tanbouwen.