Konmisyon-an ki pli enpòtan an Bib-la sé konmisyon-an konsèné Wéyòm Bondyé. Jéhova kay sèvi Wéyòm sala pou fè latè-a vini an pawadi, menm kon’y té vlé dépi an koumansman-an. Kisa ki Wéyòm Bondyé? Ki mannyè nou sav Wéyòm-lan ka kondwi apwézan? Kisa Wéyòm-lan ja fè? Èk kisa i kay fè an tan ki ka vini? An lison sala épi an sé dé lòt lison-an nou kay twapé sé wépons-lan pou sé kwèsyon sala.

1. Kisa ki Wéyòm Bondyé, èk ki moun ki Wa-a an Wéyòm Bondyé?

Wéyòm Bondyé sé an gouvèdman Jéhova ògannizé. Wa-a an Wéyòm Bondyé sé Jézi Kwi, èk i ka kondwi hòd syèl. (Mafyou 4:17; Jan 18:36) Bib-la di nou konsèné Jézi: “I kay kondwi [kon wa] . . . pou tout tan.” (Louk 1:32, 33) Kon Wa an Wéyòm Bondyé, Jézi kay kondwi tout moun ki asou latè-a.

2. Ki moun ki kay kondwi épi Jézi?

Jézi pa ka kondwi pa kò’y. Bib-la di nou an Wévélasyon 5:9, 10: “[Moun ki] sòti an tout lafanmi, . . . moun ki ka palé tout diféwan langaj. [Moun ki] sòti an tout péyi épi an tout nasyon . . . kay kondwi . . . latè sala.” Konmen moun ki kay kondwi épi Jézi? Dépi Jézi té asou latè-a pou jis apwézan, plizyè milyon di moun ja vini disip li. Mé, sé annèk yon san kawant kat mil (144,000) an sé moun sala, ki kay alé an syèl pou kondwi épi Jézi. (Li Wévélasyon 14:1-4.) Tout lòt disip Jézi kay viv asou latè-a anba Wéyòm Bondyé.—Sam 37:29.

3. Ki mannyè Wéyòm Bondyé pli mèyè pasé gouvèdman lézòm?

Menm si la ni an moun an gouvèdman lézòm ki vlé fè sa ki bon, i pa ni pouvwa-a pou fè tout sa i té kay kontan fè. Osi, apwé an lè an lòt moun ka wiplasé’y, èk pitèt moun sala ka gadé pou kò’y sèlman. Kanmenm, pyèsonn pa kay wiplasé Jézi kon Wa an Wéyòm Bondyé. Bib-la di nou an Dannyèl 2:44: ‘Bondyé an syèl [ja] établi an wéyòm ki pa kay janmen kwazé.’ Jézi kay kondwi tout latè-a, èk i kay twété tout moun byen, paski i ni lanmityé, i janti épi i jis. Osi, Jézi kay enstwi tout moun mannyè pou twété yonn a lòt épi lanmityé, jantiyès èk jistis menm kon’y ka fè.—Li Izaya 11:9.

4. An gouvèdman ki ni an chay pouvwa kay kondwi tout latè-a

Bondyé ba Jézi pouvwa asou tout bagay, konsa i ni pli pouvwa pasé tout moun ki ka kondwi. Annou li Mafyou 28:18, èk apwé nou kay kozé asou kwèsyon sala:

• Silon vèwsé sala, kisa ki diféwans-lan ant pouvwa-a Jézi ni pou kondwi épi sa lézòm ni?

Lè’y vini pou gouvèdman lézòm, chak péyi ni yon gouvèdman èk gouvèdman-an ka chanjé souvan. Mé, ès sé sa ki kay fèt anba Wéyòm Bondyé? Annou li Dannyèl 7:14, èk apwé nou kay kozé asou sé kwèsyon sala:

• Pouki i sé an bon bagay ki, ‘pyèsonn pa kay détwi wéyòm’ Bondyé?

• Pouki i sé an bon bagay ki, Wéyòm Bondyé kay kondwi tout latè-a?

5. Gouvèdman lézòm ni pou alé

Pouki Wéyòm Bondyé ni pou wiplasé gouvèdman lézòm? Annou gadé VIDIYO-A, èk apwé nou kay kozé asou sé kwèsyon sala:

VIDIYO: Ki Sa Wéyòm Bondyé Yé?—An Ti Pòsyon (1:41)

• Kisa ki ka fèt anba gouvèdman lézòm?

Annou li Ékléziyastis 8:9, èk apwé nou kay kozé asou kwèsyon sala:

• Ès ou vlé Wéyòm Bondyé wiplasé gouvèdman lézòm? Pouki?

6. Sé kondwitè-a an Wéyòm Bondyé ka konpwann sitiwasyon nou

Wa nou Jézi Kwi, té viv asou latè-a kon on nonm, konsa, i sa “konpwann byen mannyè nou ka santi lè nou anba tantasyon”. (Hibrou 4:15) Osi, liv Wévélasyon ka di nou ki koté sé moun-lan Jéhova chwazi pou kondwi épi Jézi sòti. Wévélasyon 5:9 di: Yo sé moun ki “sòti an tout lafanmi, yo . . . ka palé tout diféwan langaj. Yo sòti an tout péyi épi an tout nasyon.” Wi, yo sé nonm èk fanm ki té ka viv asou latè-a. Alò, yo sa byen konpwann sitiwasyon nou.

• Ès ou kontan Jézi èvèk sé moun-lan ki kay kondwi épi’y-la ka konpwann sitiwasyon nou? Pouki?

7. Wéyòm Bondyé ni pli mèyè lwa pasé gouvèdman lézòm

Gouvèdman lézòm ka fè lwa pou pwotéjé pèp yo épi pou pòté yo bennéfis. An menm mannyè-a Wéyòm Bondyé ni lwa, épi moun ki anba kondwit Wéyòm Bondyé sipozé obéyi sé lwa sala. Annou li 1 Kòrint 6:9-11, èk apwé nou kay kozé asou sé kwèsyon sala:

• Ki mannyè ou kwè latè-a té kay yé si tout moun té ka obéyi lwa Bondyé?a

• Ès ou kwè Jéhova ni dwa-a pou mandé moun ki anba Wéyòm li pou obéyi lwa’y? Pouki?

• Silon 1 Kòrint 6:11, ki mannyè nou sav moun ki pa ka obéyi lwa Bondyé sa fè chanjman èk koumansé obéyi lwa Bondyé an lavi yo?

CHONJÉ SÉ PWEN SALA

Wéyòm Bondyé sé an gouvèdman an syèl, èk i kay kondwi tout latè-a.

Annou Wivizé Sa Nou Ja Apwann

• Ki moun ki kay kondwi an Wéyòm Bondyé?

• Ki mannyè Wéyòm Bondyé pli mèyè pasé gouvèdman lézòm?

• Kisa Jéhova vlé moun ki anba Wéyòm li fè?

LÒT ENFÒMASYON OU SA GADÉ

Apwann sa Jézi té di konsèné ki koté Wéyòm Bondyé yé.

“Ès Wéyòm Bondyé An Tjè’w?” (yon atik asou jw.org)

Pouki Témwen Jéhova ka sipòté Wéyòm Bondyé pito yo sipòté gouvèdman lézòm?

Nou Ka Sipòté Wéyòm Bondyé (1:43)

Apwann sa Bib-la ka di konsèné san kawant kat mil (144,000) moun-lan Jéhova chwazi pou kondwi épi Jézi.

“Ki Moun Ki Ka Alé An Syèl?” (yon atik asou jw.org)

Kisa ki ba yon madanm ki té an pwizon asiwans-lan ki, sé sèlman Bondyé ki sa mennen jistis an latè-a?

“Mannyè-a Mwen Twapé Solousyon-an Pou Enjistis” (Awake!, Novanm 2011)

Wéyòm Bondyé té koumansé kondwi an syèl an lanné mil nèf san katòz (1914). An menm lanné sala, sé dènyé jou-a pou lézòm kondwi té koumansé. Koumannyè nou sav sa? Ében konsidiwé sé twa (3) bagay sala: (1) sa Bib-la té ja di, (2) kondisyon latè-a, èk (3) atitid moun dépi lanné mil nèf san katòz (1914).

1. Kisa Bib-la té ja di?

An yon pwofèsi an liv Dannyèl, Bib-la ka di nou ki, Wéyòm Bondyé té kay koumansé kondwi an bout tan-an Bib-la ka kwiyé ‘sèt tan’. (Dannyèl 4:16, 17) Plizyè san lanné apwé, an Louk 21:24, Jézi té palé konsèné ‘sèt tan’ sala lè’y té di, ‘tan pouvwa sé nasyon-an kay fini’. Èk Jézi té enstwi ‘sèt tan’ sala p’òkò té bout. Alò, an lison sala nou kay apwann ‘sèt tan’ sala té bout an lanné mil nèf san katòz (1914).

2. Dépi lanné mil nèf san katòz (1914), kisa ki ka fèt an latè-a èk ki atitid moun ni?

Disip Jézi té mandé’y: “Ki sa ki kay fèt pou moutwé i tan pouʼw vini? Épi ki lè tan-an kay bout?” (Mafyou 24:3) Jézi té di yo an chay bagay ki té kay fèt apwé i koumansé kondwi kon Wa an Wéyòm Bondyé an syèl. Pou ègzanp, i di, la té kay ni ladjè, lafen èk twanblanntè. (Li Mafyou 24:7.) Kisa Bib-la ka di nou konsèné atitid moun? Bib-la di nou atitid moun té kay fè lavi “difisil” asou “dènyé tan-an”. (2 Timòfi 3:1-5) Dépi lanné mil nèf san katòz (1914), kondisyon asou latè-a èk atitid moun ka vini pli mové menm kon Bib-la té di.

3. Dépi Wéyòm Bondyé koumansé kondwi, pouki kondisyon asou latè-a vini si tèlman mové?

Touswit apwé Jézi vini Wa an Wéyòm Bondyé, i koumansé ladjè an syèl kont Satan èk sé vyé lèspwi-a. Mé Satan pèd batay-la. Bib-la di: “Yo jétéʼy désann anlè latè-a, li épi tout sé nanj li-a.” (Wévélasyon 12:9, 10, 12) Konsa Satan “ni an pil waj”, paski i sav touswit Bondyé kay détwi’y. Alò, Satan ka annékòz penn èk soufwans toupatou asou latè-a. Sé pou wézon sala kondisyon asou latè-a si tèlman mové! Touswit Wéyòm Bondyé kay wanjé tout sé pwòblenm sala.

ANNOU APWANN PLI

4. Pwofèsi Bib ka moutwé Wéyòm Bondyé té koumansé kondwi an lanné mil nèf san katòz (1914)

VIDIYO: Wéyòm Bondyé Té Koumansé Kondwi An Lanné 1914 (5:02)

Bondyé té annékòz Wa Babilonn, Nèbyoukadnéza, pou ni on wèv konsèné sa ki té kay fèt an tan ki ka vini. Nou sa li konsèné wèv sala èk èsplikasyon’y an Bib-la. Silon èsplikasyon-an pwofèt Dannyèl té bay-la, i a klè wèv-la té ni pou fè épi ni wéyòm Nèbyoukadnéza ni Wéyòm Bondyé.—Li Dannyèl 4:17.a

Annou li Dannyèl 4:20-26, èk apwé nou kay sèvi enfòmasyon-an an bwèt-la ki ni tit-la ‘Kisa Wèv-la Konsèné Pyé Bwa-a Té Ni Pou Fè Épi Wéyòm Bondyé?’ pou wéponn sé kwèsyon sala:

• (A) Silon vèwsé 20 èk 21, kisa Nèbyoukadnéza té wè an wèv li?

• (B) Silon vèwsé 23, kisa ki té kay wivé pyé bwa-a?

• (C) Silon vèwsé 26, kisa ki té kay fèt an bout ‘sèt tan-an’?

Kisa Wèv-la Konsèné Pyé Bwa-a Té Ni Pou Fè Épi Wéyòm Bondyé?

PWOFÈSI-A (Dannyèl 4:20-36)

Kondwit

(A) On gwo pyé bwa

Kondwit doubout

(B) ‘Koupé pyé bwa-a,’ èk kité ‘sèt tan pasé asou’y’

Kondwit koumansé ankò

(C) ‘Ou kay twapé wéyòm ou ankò’

Pwèmyé mannyè-a pwofèsi-a té fèt . . .

• (D) Silon vèwsé 22, ki moun pyé bwa-a té ka wépwézanté?

• (E) Ki mannyè Wa Nèbyoukadnéza té pèd kondwit li?—Li Dannyèl 4:29-33.

• (F) An bout ‘sèt tan-an’, kisa ki té wivé Nèbyoukadnéza?—Li Dannyèl 4:34-36.

PWÈMYÉ MANNYÈ-A PWOFÈSI-A TÉ FÈT

Kondwit

(D) Nèbyoukadnéza, Wa Babilonn

Kondwit doubout

(E) Apwé lanné sis san sis (606) avan lépòk nou, Nèbyoukadnéza vini fou èk i pa té sa kondwi pou sèt lanné

Kondwit koumansé ankò

(F) Nèbyoukadnéza twapé bon sans li ankò èk i koumansé kondwi ankò

Dézyenm mannyè-a pwofèsi-a té fèt . . .

• (G) Kisa pyé bwa-a ka wépwézanté? Èk ki moun ki té ka wépwézanté kondwit sala asou latè-a?—Li 1 Kwonnikèl 29:23.

• (H) Ki mannyè kondwit yo té doubout? Ki mannyè nou sav yo pa té ka kondwi padan Jézi té asou latè-a?—Li Louk 21:24.

• (I) Ki lè èk ki koté kondwit sala té koumansé ankò?

DÉZYENM MANNYÈ-A PWOFÈSI-A TÉ FÈT

Kondwit

(G) Wa Izwayèl té ka wépwézanté kondwit Bondyé

Kondwit doubout

(H) Jérouzalèm té détwi, èk sa doubout kondwit sé wa-a an Izwayèl pou dé mil senk san ven (2,520) lanné

Kondwit koumansé ankò

(I) Jézi koumansé kondwi an syèl kon Wa an Wéyòm Bondyé

5. Dépi lanné mil nèf san katòz (1914) latè-a chanjé

Annou gadé VIDIYO-A.

VIDIYO: Dépi Lanné 1914 Latè-a Chanjé (1:10)

Jézi té ja di nou ki mannyè kondisyon latè-a té kay yé apwé i vini Wa an Wéyòm Bondyé. Annou li Louk 21:9-11, èk apwé nou kay kozé asou kwèsyon sala:

• Kilès an sé kondisyon sala, ou ja wè ében tann konsèné?

Zapòt Pòl té dékwi kalté atitid-la moun té kay ni an dènyé jou kondwit lézòm. Annou li 2 Timòfi 3:1-5, èk apwé nou kay kozé asou kwèsyon sala:

• Ès ou ka wè sé atitid sala an moun jòdi jou?

6. Kondwit Wéyòm Bondyé sipozé motivé nou

Annou li Mafyou 24:3, 14, èk apwé nou kay kozé asou sé kwèsyon sala:

• Ki twavay ki byen enpòtan ki ka fèt jòdi jou ki ka moutwé Wéyòm Bondyé ka kondwi apwézan?

• Ki mannyè ou sa pwan pa an twavay sala?

Wéyòm Bondyé ka kondwi apwézan, èk jou-a tou pwé lè Wéyòm Bondyé kay kondwi latè sala. Annou li Hibrou 10:24, 25, èk apwé nou kay kozé asou kwèsyon sala:

• Kisa chak di nou sipozé fè “kon nou ka wè, Jou Senyè-a ka apwoché”?

CHONJÉ SÉ PWEN SALA

Pwofèsi Bib èk kondisyon asou latè-a ka moutwé nou ki, Wéyòm Bondyé ka kondwi apwézan. Lè nou pwéché konsèné Wéyòm Bondyé èk nou atandé sé mitin-lan, nou ka moutwé nou ka vwéman kwè Wéyòm Bondyé ka kondwi.

Annou Wivizé Sa Nou Ja Apwann

• Silon pwofèsi-a an liv Dannyèl chapit 4, kisa ki té fèt an bout ‘sèt tan-an’?

• Pouki ou asiwé Wéyòm Bondyé té koumansé kondwi an lanné mil nèf san katòz (1914)?

• Ki mannyè ou sa moutwé ou ka vwéman kwè Wéyòm Bondyé ka kondwi apwézan?

LÒT ENFÒMASYON OU SA GADÉ

Apwann sa moun ka di konsèné sé chanjman-an ki ka fèt an latè-a dépi lanné mil nèf san katòz (1914).

“Lanné-a Moun Koumansé Pèd Pwensip Yo Toubonnman” (Awake!, Avwi 2007)

Li konsèné mannyè pwofèsi-a an Mafyou 24:14 té chanjé lavi yon nonm.

“Mwen Té Enmen Baseball Plis Pasé Pyès Lòt Bagay!” (Gad-la Limowo 3 2017)

Ki mannyè nou sav pwofèsi-a an liv Dannyèl chapit 4 ni pou fè épi Wéyòm Bondyé?

“Ki Lanné Wéyòm Bondyé Té Koumansé Kondwi? (Pwèmyé Pa-a)” (Gad-la, li 1 Òktòb, 2014)

Kisa ki ka moutwé ‘sèt tan-an’ an Dannyèl chapit 4 té bout an lanné mil nèf san katòz (1914)?

“Ki Lanné Wéyòm Bondyé Té Koumansé Kondwi? (Dézyenm Pa-a)” (Gad-la, li 1 Novanm, 2014)

Wéyòm Bondyé ja ka kondwi, èk touswit, i kay fè gwo chanjman asou latè-a. Annou gadé adan sé bagay-la nou sa èspéwé anba Wéyòm Bondyé.

1. Ki mannyè Wéyòm Bondyé kay mennen lapé èk jistis asou latè-a?

Adan an ladjè Bib-la ka kwiyé Anmagèdonn, Jézi, Wa Wéyòm Bondyé, kay détwi tout lé méchan èk tout gouvèdman ki asou latè-a. (Wévélasyon 16:14, 16) A lè sala, pwonmèt-la an Sam 37:10 kay fèt vwé: “Sé méchan-an kay dispawèt touswit.” Jézi kay sèvi Wéyòm-lan pou fè asiwé la kay ni lapé èk jistis toupatou asou latè-a.—Li Izaya 11:4.

2. Ki mannyè lavi kay yé lè Wéyòm Bondyé ka kondwi latè-a?

Bib-la di nou, “sé moun-an ki dwèt-la kay éwityé tè-a Bondyé té pwonmèt yo-a, èk yo kay viv adanʼy pou tout tan.” (Sam 37:29) Sa kay fèt lè Wéyòm Bondyé ka kondwi latè-a. Imajiné mannyè lavi kay yé, lè tout moun ka fè sa ki bon, lè tout moun enmen Jéhova èk enmen yonn a lòt! Osi, pyèsonn pa kay vini malad èk tout moun kay viv pou tout tan.

3. Kisa Wéyòm Bondyé kay fè apwé i détwi lé méchan?

Apwé Jézi détwi lé méchan, i kay kondwi kon Wa pou yon mil (1,000) lanné. Diwan mil (1,000) lanné sala, Jézi èvèk sé moun-lan ki kay kondwi épi’y-la, kay édé lézòm asou latè-a pou vini pawfé. Konsa pyèsonn pa kay ni péché ankò. Apwé mil lanné-a, Jéhova kay détwi Satan, sé vyé lèspwi-a, épi népòt moun ki pa vlé aksèpté kondwit li. (Wévélasyon 20:7-10) Osi, latè-a kay an bèl pawadi èvèk tout moun kay ni tjè kontan, paski yo ka obéyi lwa Jéhova. Apwé sa, Jézi kay bay papa’y Wéyòm-lan viwé. Alafen, “tout moun [kay] onnowé [non Jéhova]” plis pasé pyès tan avan. (Mafyou 6:9, 10) Sa kay bay pli pwèv ki, Jéhova sé yon bon kondwitè ki enmen pèp li. Èk pa obliyé, tout sé bon bagay-la Wéyòm Bondyé kay akonpli kay diwé pou tout tan.

ANNOU APWANN PLI

4. Wéyòm Bondyé kay détwi tout gouvèdman lézòm

Kon lévanjil-la an Ékléziyastis 8:9 di, ‘moun ka donminé lòt moun pou fè yo soufè’. Mé, Jéhova kay sèvi Wéyòm li pou mennen an bout pou enjistis.

Annou li Dannyèl 2:44 èvèk 2 Tèsalonnika 1:6-8, èk apwé nou kay kozé asou sé kwèsyon sala:

• Kisa Jéhova èk Jézi kay fè épi tout gouvèdman lézòm èk sé moun-lan ki ka sipòté yo?

• Ki mannyè sa ou ja apwann konsèné Jéhova èk Jézi ka ba’w asiwans-lan ki, sa yo kay fè kay dwèt èk jis?

5. Jézi sé pli mèyè Wa-a

Kon Wa an Wéyòm Bondyé, Jézi kay édé moun asou latè an plizyè diféwan mannyè. Annou gadé VIDIYO-A. An vidiyo sala nou kay wè mannyè Jézi ja moutwé i vlé édé moun èk mannyè Bondyé ja ba’y pouvwa-a pou fè sa.

VIDIYO: Jézi Moutwé Sa Wéyòm-lan Kay Fè (1:13)

Sé bagay-la Jézi té fè lè’y té asou latè-a, ka bay an ti lidé asou sa Wéyòm-lan kay fè an tan ki ka vini. Kilès an sé pwonmèt sala ou vwéman vlé wè fèt? Annou li sé lévanjil-la pou apwann pli konsèné sé pwonmèt sala.

6. Wéyòm Bondyé kay mennen bèl kondisyon an tan ki ka vini

VIDIYO: Gadé Mannyè Lavi Kay Yé An Tan Pou Vini (4:38)

Annou li Sam 145:16, èk apwé nou kay kozé asou kwèsyon sala:

• Ki mannyè ou ka santi pou konnèt Jéhova kay ‘satisfè dézi tout sa ki vivan’?

CHONJÉ SÉ PWEN SALA

Wéyòm Bondyé kay akonpli divwa Bondyé, i kay chanjé latè-a èk fè’y vini an bèl pawadi. Latè-a kay plen épi bon moun èk yo kay adowé Bondyé pou tout tan.

Annou Wivizé Sa Nou Ja Apwann

• Ki mannyè Wéyòm Bondyé kay onnowé non Jéhova?

• Pouki nou sa kwè, Wéyòm Bondyé kay fè tout sé pwonmèt-la ki an Bib-la vini vwé?

• An tout sé bèl bagay-la Wéyòm Bondyé kay fè-a, kilès ou ka èspéwé pli?

LÒT ENFÒMASYON OU SA GADÉ

Apwann kisa Anmagèdonn vlé di.

“Kisa Ki Ladjè Anmagèdonn?” (yon atik asou jw.org)

Ègzanminé sa ki kay fèt diwan tan-an Jézi kwiyé gwan twibilasyon-an ében “gwo soufwans-lan”.—Mafyou 24:21.

“Kisa Ki Gwan Twibilasyon-an?” (yon atik asou jw.org)

Gadé mannyè fanmi sa imajiné sa Wéyòm Bondyé kay akonpli an tan ki ka vini.

Imajiné Kò’w An Pawadi (1:50)

Apwann mannyè yon nonm ki té kont gouvèdman té twapé wépons pou sé kwèsyon’y-la an atik-la, “Mwen Té Ni An Chay Kwèsyon Ki Té Ka Twakasé Lidé Mwen”.

“Bib-la Ka Chanjé Lavi Moun” (Gad-la, li 1 Janvyé, 2012)