Koumannyè Nou Sa Wèsté Nèt An Zyé Bondyé?

Imajiné an manman ka pwépawé tibway li pou alé lékòl. Manman-an ka fè asiwé tibway-la benyen èk had li nèt èk pwòp. Sa ka tjenn ich li an bon santé. Èk sa ka moutwé lézòt moun i sé an bon pawan èk i ka otjipé ich li byen. Alò, menm kon pawan vlé ich yo wèsté nèt, Papa nou Jéhova vlé nou tjenn kò nou nèt. Èk osi, i vlé nou wèsté nèt an katjil nou, an aksyon nou, èk an pawòl nou. Konsa, lè nou fè tout sé bagay sala nou ka twapé bennéfis, èk nou ka onnowé Jéhova.

1. Koumannyè nou sa tjenn kò nou èk oliwon nou nèt èk pwòp?

Jéhova di nou: “Sépawé kò zòt hòd movèzté.” (1 Pita 1:16) Nou ka sépawé kò nou hòd movèzté lè nou tjenn kò nou, katjil nou, aksyon nou, èk pawòl nou nèt. Mé, koumannyè nou sa tjenn kò nou èk oliwon nou nèt èk pwòp? Nou ka fè sa lè nou benyen toulé jou, lè nou tjenn had nou, kay nou, machin nou èk plas adowasyon nou nèt èk pwòp. Lè nou fè sé bagay sala, nou ka onnowé Jéhova.—2 Kòrint 6:3, 4.

2. Pou wèsté nèt, ki diféwan labitid nou pa sipozé ni?

Bib-la di nou: “Tiwé an lavi nou tout sé bagay-la ki ka nwèsi lachè épi lèspwi nou.” (2 Kòrint 7:1) Konsa, nou pa ni pou fè anyen ki kay donmajé kò nou épi lidé nou. Osi, nou ni pou widjèkté tout mové katjil, paski katjil nou ni pou toujou plè Jéhova. (Sam 104:34) Èk si nou ni labitid ka sèvi mo sal, nou ni pou doubout fè sa, paski sa pa ka plè Jéhova.—Li Kòlòsé 3:8.

La ni sèten bagay ki ka jis donmajé kò nou. Bagay tèl kon tabak, ‘marijuanaʼ, sigawèt èk kokén. Lè nou wèsté hòd sé bagay sala, nou ka moutwé wèspé pou Bondyé ki ban nou lavi, èk santé nou kay pli mèyè. Èk la ni labitid ki sa sali katjil nou èk aksyon nou. Konsa, nou pa ka jwé épi kò nou adan an mannyè sèksyouwal èk nou pa ka gadé pònografi.a (Sam 119:37; Èfésòs 5:5) Tout sé labitid sala pa nèt an zyé Bondyé. Magwé i difisil pou kité sé vyé labitid sala, Jéhova sa édé nou.—Li Izaya 41:13.

ANNOU APWANN PLI

3. Lè nou nèt èk pwòp sa ka onnowé Jéhova

Lè nou li sé lwa-a Bondyé té bay nasyon Izwayèl, nou ka apwann mannyè i enpòtan pou Bondyé pou pèp li wèsté nèt èk pwòp. Annou li Ègzodòs 19:10 èk 30:17-19, èk apwé nou kay kozé asou sé kwèsyon sala:

• Kisa sé vèwsé sala ka di konsèné Jéhova lèʼy vini pou pwòpté?

• Kisa nou sa fè pou tjenn kò nou èk oliwon nou nèt èk pwòp?

I ka pwan an chay éfò pou tjenn kò nou èk oliwon nou nèt èk pwòp. Mé népòt koté nou ka viv, menm si nou wich ében nou pòv, nou sa tjenn kò nou èk oliwon nou nèt èk pwòp. Annou gadé VIDIYO-A, Bondyé Enmen Moun Ki Nèt èk apwé nou kay kozé asou kwèsyon sala:

VIDIYO: Bondyé Enmen Moun Ki Nèt (4:10)

• Si nou tjenn kò nou èk bagay nou nèt lè nou ka pwéché, ki mannyè sa kay édé moun pou ni pli wèspé pou Bondyé?

4. Ou sa doubout vyé labitid

Si ou ka fimen ében sèvi dwòg pou anmizman, pitèt ou sav mannyè i wèd pou doubout vyé labitid sala. Kisa ki sa édéʼw doubout an vyé labitid? Ou sa katjilé asou mannyè vyé labitid sala ka afèktéʼw. Annou li Mafyou 22:37-39, èk apwé nou kay diskité mannyè tabak èk dwòg sa afèkté . . .

• wilasyon an moun épi Jéhova.

• fanmi an moun èk lòt moun oliwonʼy.

Fè an plan pou ganyen a bout vyé labitid.b Annou gadé VIDIYO-A, Mannyè Pou Kontwolé Kòʼw.

VIDIYO: Mannyè Pou Kontwolé Kòʼw (2:47)

Annou li Filipay 4:13, èk apwé nou kay kozé asou kwèsyon sala:

• Lè an moun ka toujou pwédyé, étidyé Bib-la, èk atandé mitin, ki mannyè sa kay édéʼy doubout an vyé labitid?

5. Goumen wèd kont vyé katjil èk vyé labitid

Annou li Kòlòsé 3:5, èk apwé nou kay kozé asou sé kwèsyon sala:

• La ni diféwan bagay moun ka fè tèl kon: Gadé pònografi, voyé tèks ében pòtwé konsèné bagay sèksyouwal asou intannèt-la, èk jwé épi kò yo adan an mannyè sèksyouwal. Ki mannyè nou sav tout sé bagay sala pa nèt an zyé Bondyé?

• Jéhova vlé nou wèsté nèt an katjil nou, an aksyon nou èk an pawòl nou. Ès ou kwè i posib pou nou fè sa? Pouki?

Annou gadé mannyè nou sa goumen wèd kont vyé katjil. Annou gadé VIDIYO-A, Goumen Wèd Pou Wèsté Nèt.

VIDIYO: Goumen Wèd Pou Wèsté Nèt (1:51)

Jézi té sèvi an ilistwasyon pou moutwé mannyè nou ni pou goumen wèd pou wèsté nèt an katjil nou, an pawòl nou èk an aksyon nou. Annou li Mafyou 5:29, 30, èk apwé nou kay kozé asou kwèsyon sala:

• Jézi pa di nou pou blésé kò nou, mé i vlé nou pwan aksyon. Ki kalité aksyon an moun sa pwan pou goumen kont vyé katjil?c

Si ou ka goumen kont vyé katjil, Jéhova ka wè éfòʼw. Annou li Sam 103:13, 14, èk apwé nou kay kozé asou kwèsyon sala:

• Si ou ka goumen pou doubout an vyé labitid, ki mannyè lévanjil sala sa ankouwajéʼw pouʼw kontiné goumen èk pa doubout?

Kontiné goumen èk pa doubout!

Délè i byen ézé pou katjilé: ‘Mwen tonbé an menm vyé mès-la ankò, konsa mʼa kay kontiné goumen.ʼ Mé katjilé asou sa: Si ou ka kouwi an kous èk ou tonbé, ès sa vlé di ou ja pèd kous-la? Ében ès ou ni pou koumansé kous-la ankò? Mé non! Konsa, si ou tonbé an vyé mès-la ankò, sa pa vlé di ou pa sa doubout vyé labitid-la. Chonjé, lèʼw ka éséyé pou doubout an vyé labitid, i ézé pouʼw tonbé adanʼy ankò. Mé ou ni pou kontiné goumen! Èk ou sa ni tjè kontan pou pwogwé-a ou ja fè-a. Épi èd Jéhova, ou sa doubout vyé labitid-la!

CHONJÉ SÉ PWEN SALA

Nou ka plè Jéhova lè nou tjenn kò nou èk katjil nou nèt èk pwòp. Èk osi, lè nou ni bon kondwit.

Annou Wivizé Sa Nou Ja Apwann

• Pouki i enpòtan pou nou tjenn kò nou nèt?

• Kisa ou sa fè pou tjenn kòʼw èk oliwonʼw nèt èk pwòp?

• Ki mannyè ou sa tjenn katjil ou èk kondwit ou pwòp?

LÒT ENFÒMASYON OU SA GADÉ

Kisa ou sa fè pou tjenn kòʼw èk oliwonʼw nèt èk pwòp menm si ou pòv èk ou pa ni djè bagay?

Pou Ni Bon Santé Èk Pou Wèsté Nèt—Lavé Lanmenʼw (3:01)

Apwann déotwa bagay ou sa fè pou édéʼw doubout fimen.

“Mannyè Ou Sa Doubout Fimen” (Awake!, Mé 2010)

Apwann sé mové bagay-la ki ka wivé moun lè yo gadé pònografi.

“Lè Moun Ka Gadé Pònografi, Ès Sa Danjéwé?” (Gad-la, li 1 Awou, 2013)

Apwann mannyè yon nonm té sa doubout gadé pònografi.

“Mwen Tonbé Plizyè Fwa Avan Mwen Té Sa Doubout” (Gad-la Limowo 4 2016)