Mannyè Jéhova Ka Édé Nou Akonpli Minis Nou

1. Kisa ki kay fèt kon nou ka fè twavay pwèchman-an, mé ki asiwans nou ni?

KON NOU ka fè twavay pwèchman-an nou kay èspéyansé òpozisyon. Èk an tan pou vini nou pé èspéyansé pli òpozisyon. (Dann. 11:44; 2 Tim. 3:12; Wév. 16:21) Mé nou ni asiwans-lan, Jéhova kay ban nou sa nou bizwen pou nou tjébé fò. Pouki nou sa di sa? Sé paski Jéhova ka toujou édé sèvant li pou akonpli népòt ansayman i ba yo pou fè, menm si sé yon ansayman ki difisil. Pou ègzanp, pwofèt Izikèl té ni ansayman-an pou pwéché bay sé Jwif-la ki té an pwizon an Babilonn. Annou gadé déotwa bagay ki té wivéʼy, èk mannyè Jéhova té édéʼy.

2. Kisa Jéhova té di konsèné sé moun-lan Izikèl té ni pou pwéché bay, èk kisa nou kay konsidiwé an atik sala? (Izikèl 2:3-6)

² Ki kalité moun Izikèl té ni pou pwéché bay? Jéhova té di sé moun-lan té ni ‘tèt di, tjè wèdʼ, èk yo té ‘wébèlʼ. I osi di yo té mové kon pyé pikan èk yo té danjéwé kon èskoupyon. Sé pou wézon sala, Jéhova té di Izikèl plizyè fwa ‘pa pèʼ. (Li Izikèl 2:3-6.) Mé Izikèl té sa akonpli ansayman-an i té ni pou pwéché pou twa wézon. Pwèmyéman sé Jéhova ki té voyéʼy, dézyenman lisentèspwi Bondyé bay fòs-la i té bizwen, èk twazyenman Pawòl Bondyé fòtifyé lafwaʼy. Ki mannyè sé twa (3) bagay sala té édé Izikèl, èk ki mannyè yo sa édé nou an tan jòdi?

SÉ JÉHOVA KI TÉ VOYÉ IZIKÈL

3. Kisa Jéhova té di Izikèl ki té sipozé fòtifyéʼy? Èk ki mannyè i té sav Jéhova té kay sipòtéʼy?

³ Jéhova té di Izikèl, ‘mwen ka voyéʼw.ʼ (Izik. 2:3, 4) Sé pawòl sala té sipozé fòtifyé Izikèl. Pouki? Ében san dout, Izikèl té kay chonjé Jéhova té di an bagay kon sa lèʼy té bay Moziz èk Izaya ansayman yo. (Ègz. 3:10; Izay. 6:8) Osi, Izikèl té sav mannyè Jéhova té édé sé dé (2) pwofèt sala pou akonpli ansayman yo, magwé i té difisil. Konsa lè Jéhova di Izikèl dé fwa, ‘mwen ka voyéʼw,ʼ Izikèl té sa ni konfyans ki, Jéhova té kay édéʼy pou akonpli ansaymanʼy. (Izik. 3:16) Osi, nou ka jwenn sé pawòl-la ‘Jéhova di mwen,ʼ èk ‘Jéhova di mwen ankò,ʼ plizyè fwa an liv Izikèl. (Izik. 6:1) Asiwé Izikèl pa té ni pyès dout, sé Jéhova ki té voyéʼy. Apa di sa, papa Izikèl sété an pwèt èk pitèt papaʼy té enstwiʼy, Jéhova té ka toujou di sé pwofèt li-a i té kay édé yo. Pou ègzanp, Jéhova té di Ayzak, Jakòb, èk Jérémaya: ‘Mwen kay la épiʼw.ʼ​—Jen. 26:24; 28:15; Jér. 1:8.

4. Ki asiwans Jéhova té bay Izikèl ki té bay fòs-la pou akonpli minis li?

⁴ Kisa majòwité pèp Izwayèl té kay fè lè Izikèl pwéché bay yo? Jéhova té di Izikèl: ‘Pèp Izwayèl pa kay vlé koutéʼw, paski yo pa vlé kouté mwen.ʼ (Izik. 3:7) Konsa lè pèp Izwayèl widjèkté Izikèl, sa vlé di yo té ka widjèkté Jéhova. Jéhova bay Izikèl asiwans-lan ki, menm si pèp Izwayèl widjèkté konmisyonʼy sa pa té vlé di i pa té ka fè twavay li kon yon pwofèt. Èk lè sa i di-a vini vwé, sé moun-lan té kay ‘konnèt la té ni an pwofèt anpanmi yoʼ. (Izik. 2:5; 33:33) San dout asiwans sala bay Izikèl fòs-la i té bizwen pou akonpli minis li.

SÉ JÉHOVA KI VOYÉ NOU

5. Kisa Izaya 44:8 di ki ka ban nou kouwaj?

⁵ Menm kon Izikèl, nou ni kouwaj paski nou sav sé Jéhova ki voyé nou pwéché. I ka kwiyé nou ‘témwenʼyʼ. (Izay. 43:10) Èk sa sé an gwo lonnè èk an bèl pwivilaj. Jéhova té di Izikèl ‘pa pè.ʼ Èk Jéhova ka di nou ‘pa kité pèwèz fè nou séziʼ. Pouki nou pa sipozé pè lèlmi nou? Sé paski sé Jéhova ki voyé nou èk sé li ki ka sipòté nou menm kon i té fè bay Izikèl.​—Li Izaya 44:8.

6. (a) An Izaya 43:2 kisa Jéhova pwonmèt pou fè pou édé nou? (b) Kisa ki ka ankouwajé nou?

⁶ Jéhova pwonmèt i kay édé nou. Pou ègzanp, avan Jéhova té di ‘zòt sé témwen mwen,ʼ i di: ‘Lèʼw ka janbé sé dlo-a mwen kay la épiʼw. Èk lèʼw ka twavèsé sé lawivyè-a, dlo-a pa kay kouvèʼw. Lèʼw ka maché an difé-a ou pa kay bwilé. Èk flanm difé-a pa kay chodéʼw nonplis.ʼ (Izay. 43:2) Délè lè nou ka pwéché, nou ka èspéyansé difikilté ki tèlman mové, nou sa di yo pawé pou néyé nou menm kon gwo dlo, ében pou bwilé nou menm kon difé. Mé épi èd Jéhova nou ka kontiné pwéché. (Izay. 41:13) Èk an chay moun pa vlé aksèpté konmisyon nou. Sé moun-lan an tan Izikèl té fè menm bagay-la. Mé nou ni pou chonjé, menm si moun pa aksèpté konmisyon nou, sa pa vlé di nou pa fè twavay-la Jéhova té ban nou pou fè-a kon témwenʼy. Dépi nou wèsté fidèl èk nou kontiné pwéché nou sav Jéhova kay plè épi nou, èk sa ka ankouwajé nou. Kon zapòt Pòl té di: “Bondyé kay bay chak moun an péyiman pou twavay li.” (1 Kòr. 3:8; 4:1, 2) Yon sè ki ka wann sèvis kon an piyonnè pou plizyé lanné di: “Mwen ni tjè kontan paski mwen sav Jéhova kay benni éfò mwen.”

LÈSPWI BONDYÉ TÉ BAY IZIKÈL KOUWAY-LA I TÉ BIZWEN

7. Chak fwa Izikèl té chonjé vizyon-an ki mannyè sa té kay édéʼy? (Gadé pòtwé-a ki asou kouvèti-a)

⁷ Izikèl té wè an bagay adan an vizyon ki té édéʼy wéyalizé lèspwi Bondyé ni an chay pouvwa. Saʼy té wè-a sé sa, lèspwi Bondyé té ka édé sé nanj-lan, èk menm lèspwi sala té ka pousé an gwo kawòs an syèl ki té ni woul ki té èstòdinè an gwòsè. (Izik. 1:20, 21) Kisa Izikèl té fè lèʼy wè vizyon sala? Izikèl di: ‘Lè mwen wèʼy, mwen tonbé fas atè.ʼ Wi, Izikèl té tèlman étonnen, i tonbé atè-a. (Izik. 1:28) San dout chak fwa Izikèl té chonjé vizyon sala, sa té kay fòtifyé konfyans li ki, épi èd lisentèspwi Jéhova i té kay sa akonpli minis li.

8-9. (a) Kisa ki wivé Izikèl lè Jéhova koumandéʼy pou doubout asou dé pyéʼy? (b) Ki lòt bagay Jéhova té fè pou fòtifyé Izikèl?

⁸ Jéhova di Izikèl: ‘Gason lézòm, doubout asou dé pyéʼw pou mwen palé épiʼw.ʼ Koumandman sala épi lèspwi Bondyé bay Izikèl fòs-la i té bizwen pouʼy lévé atè-a. Izikèl di: ‘Lèspwi antwé an mwen èk i fè mwen doubout asou dé pyé mwen.ʼ (Izik. 2:1, 2) Pli ta èk diwan tout tan-an i té ka fè minis li, lanmen Bondyé, sa vlé di lisentèspwiʼy Jéhova té ka djidé Izikèl. (Izik. 3:22; 8:1; 33:22; 37:1; 40:1) Izikèl té ni pou pwéché bay moun ki té ni ‘tèt diʼ èk ‘tjè wèdʼ, mé lèspwi Jéhova fòtifyéʼy pou akonpli minis li. (Izik. 3:7) Jéhova di Izikèl: ‘Mwen ja fè fidjiʼw vini wèd menm kon fidji yo, èk mwen ja fè fonʼw wèd menm kon fon yo. Mwen ja fè fonʼw wèd kon an dyanman, pli wèd pasé moso wòch. Pa pè yo, èk pa kité fidji yo fèʼw pè.ʼ (Izik. 3:8, 9) Sé akwèdi Jéhova té ka di Izikèl: ‘Sé moun sala ni tèt di, mé pa kité yo dékouwajéʼw paski mwen kay fòtifyéʼw.ʼ

⁹ Apwé sa lèspwi Bondyé édé Izikèl pou kontiné pwéché. Izikèl di: ‘Lanmen Jéhova pozé fò asou mwen.ʼ I pwan yon simen pou Izikèl apwann èk konpwann konmisyon-an i té ni pou pwéché-a, konsa i té kay sa pwéché épi konfyans. (Izik. 3:14, 15) Jéhova diʼy pou alé adan an fon. Padan i té an fon-an ‘lèspwi antwé [adidanʼy].ʼ (Izik. 3:23, 24) Apwé sa Izikèl té pawé pou koumansé minis li.

LÈSPWI JÉHOVA KA BAN NOU KOUWAY-LA NOU BIZWEN

10. Ki èd nou bizwen pou nou kontiné pwéché, èk pouki?

¹⁰ Ki èd nou bizwen pou kontiné pwéché? Pou wéponn kèstyon sala, katjilé asou sa ki té wivé Izikèl. Chonjé, lèspwi Bondyé té bay fòs-la i té bizwen avan i té koumansé pwéché. Jòdi, sèl mannyè nou sa kontiné pwéché sé paski lèspwi Bondyé ka édé nou menm kon i té édé Izikèl. Pouki nou sa di sa? Sé paski Satan ka goumen kont nou pou fè nou doubout pwéché. (Wév. 12:17) An chay moun ka kwè, Satan si tèlman fò, nou pa sa ganyen a bout li. Mé lè nou kontiné pwéché nou ka moutwé nou pli fò pasé Satan. (Wév. 12:9-11) An ki mannyè? Ében menm si Satan mennasé nou, nou pa ka doubout pwéché èk sa ka moutwé nou pa pè Satan. Konsa chak fwa nou pwéché, Satan ka pèd batay-la. Lè nou wè mannyè nou sa kontiné pwéché menm si sé lèlmi nou-an ka opozé nou, kisa sa ka di nou? I a klè sèl mannyè nou sa kontiné pwéché sé paski nou ni favè Jéhova, èk lisentèspwiʼy ka ban nou kouway-la nou bizwen.​—Maf. 5:10-12; 1 Pita 4:14.

11. Kisa lèspwi Bondyé sa fè ban nou? Èk kisa nou ni pou fè pou fè asiwé nou kontiné wisouvwè lèspwi Bondyé?

¹¹ Ki lòt lison nou sa apwann lè nou katjilé mannyè Jéhova bay Izikèl kouway-la i té bizwen pou kontiné pwéché? Yon lison sé sa, lèspwi Jéhova sa ban nou fòs-la nou bizwen pou ganyen a bout népòt difikilté nou pé èspéyansé an minis nou. (2 Kòr. 4:7-9) Konsa, kisa nou ni pou fè pou fè asiwé nou kontiné wisouvwè lèspwi Bondyé? Lè nou ka pwédyé nou ni pou mandé Jéhova pou ban nou lisentèspwiʼy, èk nou ni pou ni konfyans ki, Jéhova kay wéponn lapwiyè nou. Jézi té di sé disip li-a, kontiné “mandé”, kontiné “gadé”, èk kontiné “konyen,” paski Jéhova kay “bay [Lèspwiʼy] pou sa ki mandéʼy.”​—Louk 11:9, 13; Twav. 1:14; 2:4.

PAWÒL BONDYÉ TÉ FÒTIFYÉ LAFWA IZIKÈL

12. Silon sa nou li an Izikèl 2:9–3:3, ki koté woulo-a té sòti, èk kisa ki té ékwi adanʼy?

¹² Lèspwi Bondyé bay Izikèl kouwaj-la i té bizwen pou pwéché, èk pawòl Bondyé fòtifyé lafwaʼy. An yon vizyon Izikèl té wè an lanmen ka tjébé an woulo. (Li Izikèl 2:9–3:3.) Bon, annou wéponn twa kwèsyon. Pwèmyéman, ki koté woulo-a sòti? Dézyenman, kisa ki té ékwi andanʼy? Èk twazyenman, ki mannyè i fòtifyé lafwa Izikèl? Woulo-a sòti an syèl. Avan sa Izikèl té wè kat (4) nanj adan an vizyon. Pitèt Jéhova sèvi yonn (1) di yo pou baʼy woulo-a. (Izik. 1:8; 10:7, 20) Pawòl Bondyé té ékwi an woulo-a. Sa vlé di woulo-a té ni an konmisyon jijman Izikèl té ni pou déklawé bay an bann moun wébèl. (Izik. 2:7) Konmisyon sala té ékwi ni douvan ni dèyè woulo-a.

13. Kisa Jéhova di Izikèl pou fè épi woulo-a, èk pouki Izikèl kwè woulo-a té dou?

¹³ Jéhova té di Izikèl pou ‘manjé woulo-a èk plen boudenʼy épiʼy.ʼ Izikèl obéyi èk i manjé tout woulo-a. Kisa sa vlé di? Sa vlé di Izikèl té ni pou byen konpwann konmisyon-an i té ni pou déklawé-a. Konmisyon-an té sipozé touché tjè Izikèl èk sa té kay motivéʼy pou alé pwéché. Lè Izikèl manjé woulo-a i wéyalizé i ‘té dou kon siwo myèlʼ, sa sé an bagay i pa té ka èspéyéʼ. (Izik. 3:3) Mé pouki Izikèl té ka kwè woulo-a té dou? Sé paski, i wè lonnè-a i té ni pou wépwézanté Jéhova kon an bon bagay, sé konmsi i té dou kon siwo myèl. (Sam 19:8-11) Pa dé kontan i té kontan pou fè twavay-la Jéhova té baʼy pou fè-a.

14. Kisa ki édé Izikèl pou fòtifyé lafwaʼy èk pou pwépawé pou fè ansaymanʼy?

¹⁴ Pli ta Jéhova di Izikèl: ‘Kouté tout sa mwen ka diʼw, èk tjenn li an tjèʼw.ʼ (Izik. 3:10) Konsa, Jéhova ankouwajé Izikèl pou fè éfò-a pou chonjé sa ki ékwi an woulo-a èk mèdité asouʼy. Lè Izikèl fè sa, sa fòtifyé lafwaʼy èk sa édéʼy pou déklawé konmisyon-an byen. (Izik. 3:11) Apwé Izikèl té byen konpwann èk kwè konmisyon-an i té ni pou déklawé-a, sé lè sala i té pawé pou pwéché èk akonpli asaynmanʼy.​—Gadé Sam 19:14.

PAWÒL BONDYÉ KA FÒTIFYÉ LAFWA NOU

15. Pou andiwé, kisa nou ni pou ‘tjenn an tjè nouʼ?

¹⁵ Pou andiwé an minis nou, nou ni pou kontiné sèvi pawòl Bondyé pou fòtifyé lafwa nou. Nou ni pou kouté tout sa Jéhova ka di nou, èk ‘tjenn li an tjè nouʼ. Jòdi jou Jéhova ka sèvi Pawòl li ki an Bib-la pou palé ban nou. Konsa, kisa nou ni pou fè pou fè asiwé Pawòl Bondyé ka touché tjè nou èk i ka afèkté katjil nou épi santiman nou?

16. Kisa nou ni pou fè pou konpwann Pawòl Bondyé byen, èk pouʼy sa touché tjè nou?

¹⁶ Lè nou byen manjé nou ka vini pli fò. An menm mannyè-a lè nou étidyé Pawòl Bondyé èk mèdité asouʼy lafwa nou ka vini pli fò. Kisa nou apwann an sa Jéhova té di Izikèl pou fè épi woulo-a? Lison-an sé sa, Jéhova vlé nou ‘plen bouden nouʼ épi Pawòl li. Sa vlé di i vlé nou konpwann Pawòl li byen. Pou fè sa nou ni pou pwédyé, li ében kouté Pawòl Bondyé, èk mèdité asouʼy. Pwèmyéman avan nou li ében kouté Bib-la, nou ni pou pwédyé pou pwépawé tjè nou pou aksèpté katjil Jéhova. Èk apwé nou li ében kouté an pòsyon an Bib-la, nou ni pou pwan tan pou mèdité asou sa nou li ében kouté-a. Ki mannyè sa kay édé nou? Ében pli nou mèdité asou Pawòl Bondyé sé pli nou kay konpwann li, èk sa kay fòtifyé lafwa nou.

17. Pouki i enpòtan pou mèdité asou Pawòl Bondyé?

¹⁷ Pouki i enpòtan pou li ében kouté Bib-la èk mèdité asouʼy? I enpòtan pou fè sa paski i kay ban nou kouwaj-la nou bizwen pou kontiné pwéché konmisyon Wéyòm-lan apwézan. Èk pli ta si nou ni pou kontiné pwéché konmisyon jijman-an nou kay sa fèʼy. Osi, lè nou mèdité asou sé bèl kawaktè-a Jéhova ni, sa kay fòtifyé wilasyon nou épiʼy. Lè sala nou kay enjwi an bagay ki byen dou, sa sé lapé an tjè nou èk lakontantman.​—Sam 119:103.

NOU DÉTÈMINÉ POU ANDIWÉ

18. Kisa sé moun-lan nou ka pwéché bay kay ni pou wéyalizé, èk pouki?

¹⁸ Izikèl sété an pwofèt èk nou menm pa pwofèt. Mé kanmenm, nou détèminé pou kontiné déklawé konmisyon Jéhova ki an Bib-la jistan i di nou doubout pwéché. Lè tan-an pou jijman wivé, sé moun-lan nou ka pwéché bay pa kay sa di pyèsonn pa té vèti yo, ében Bondyé pa té ba yo an chans pou konnèt li. (Izik. 3:19; 18:23) Pito sa, yo kay ni pou wéyalizé, nou té ka pwéché konmisyon Jéhova.

19. Kisa ki kay ban nou kouwaj-la nou bizwen pou akonpli minis nou?

¹⁹ Kisa ki kay ban nou kouwaj-la nou bizwen pou akonpli minis nou? Sé menm twa (3) bagay-la ki té fòtifyé Izikèl. Nou ka kontiné pwéché paski (1) nou sav sé Jéhova ki voyé nou, (2) lisentèspwi Jéhova ka ban nou fòs-la nou bizwen, èk (3) Pawòl Bondyé ka fòtifyé lafwa nou. Épi èd Jéhova, nou détèminé pou akonpli minis nou èk pou “tjébé fò jis an bout-la”.​—Maf. 24:13.