Chéwi Pwivilaj-la Ou Ni Pou Adowé Jéhova An Gwan Tanp Spiwityouèl Li

1. Kisa on nanj ka di, èk kisa nou sipozé fè?

SI YON nanj palé ba’w, ès ou té kay kouté sa’y ka di’w? Ében jòdi jou, la ni on nanj ki ka palé “bay tout nasyon, tout lafanmi, moun ki ka palé tout diféwan langaj, épi moun ki an tout péyi.” Èvèk nanj-lan ka di yo: “Obéyi Bondyé èk lévé nonʼy . . . adowé Bondyé-a ki fè syèl-la èk latè-a.” (Wév. 14:6, 7) Jéhova sé sèl Dyé vwé-a, konsa sé li tout moun sipozé adowé. Èk nou tèlman kontan Jéhova fè’y posib pou nou adowé’y an gwan tanp spiwityouèl li!

2. Kisa ki tanp spiwityouèl Jéhova? (Osi, gadé bwèt-la “Kisa Tanp-lan Pa Yé.”)

² Mé, kisa ki tanp Spiwityouèl Jéhova, èk ki koté an Bib-la nou sa twapé sé détay-la ki ka èspliké kisa tanp sala yé? Tanp spiwityouèl Jéhova sé pa on kay. Tanp sala sé awanjman-an Jéhova mété an plas pou moun adowé’y an mannyè-a i kay aksèpté. Sa sé yon awanjman spésyal ki bazé asou wanson sakwifis Jézi. Bon, liv Hibrou sé on lèt zapòt Pòl té ékwi bay sé Kwityen-an ki té an vil Joudiya an pwèmyé syèk-la. Èk an liv sala, sa vlé di an liv Hibrou, zapòt Pòl ka èspliké awanjman spésyal sala.b

3-4. Pitèt pou ki wézon zapòt Pòl té ékwi sé Kwityen-an ki té Jwif an vil Joudiya, èk kisa i fè yo chonjé?

³ Zapòt Pòl té ékwi sé Kwityen-an ki té Jwif an vil Joudiya, pitèt pou dé (2) wézon. Pwèmyéman, pitèt i té vlé ankouwajé yo. Bagay-la sé sa, pwèskè tout sé Kwityen-an an vil Joudiya, té lévé an wilizyon sé Jwif-la. Konsa lè yo vini Kwityen, pitèt sé mèt wilizyon sé Jwif-la té ka ba yo chalè èk pwan yo sèvi wizib, paski sé Kwityen-an pa té ka alé adan a bèl gwo tanp pou adowé Bondyé, yo pa té ni on lotèl pou ofè sakwifis bay Bondyé, èvèk yo pa té ni pyès pwèt. Kalité chalè sala té sa dékouwajé sé disip Jézi-a èk afébli lafwa yo. (Hib. 2:1; 3:12, 14) Anfen, pitèt adan di yo té jis vlé viwé an wilizyon sé Jwif-la.

⁴ Dézyenman, zapòt Pòl di sé Kwityen-an, yo pa té ka fè éfò pou konpwann “gwo manjé,” sa vlé di sé bagay-la ki pli fon an Pawòl Bondyé. (Hib. 5:11-14) Èk i sanm, adan di yo té ka swiv Lwa Moziz-la toujou. Mé zapòt Pòl di yo, sé sakwifis-la yo té ka ofè anba Lwa-a pa té sa tiwé péché yo. Èk sé pou wézon sala Lwa-a “té ni pou alé asou koté.” Konsa, zapòt Pòl koumansé enstwi yo yonndé bagay ki té pli fon an Pawòl Bondyé. I fè yo chonjé, Kwityen té ka èspéyé “pou an bagay ki pli bon pasé sa Lwa Moziz-la” té sa ba yo. Bèl èspwa sala yo té ni-an, té bazé asou sakwifis Jézi, èk i té kay fè yo “vini pli pwé Bondyé.”​—Hib. 7:18, 19.

5. Ki awanjman enfòmasyon-an an liv Hibrou ka édé nou pou konpwann, èk pouki nou bizwen konpwann awanjman sala?

⁵ Zapòt Pòl té édé sé Kwityen-an ki té Jwif pou konpwann pouki adowasyon-an yo té ka ofè kon Kwityen, té otan pli mèyè pasé adowasyon-an yo té ka ofè lè yo té anba Lwa-a. Paskè mannyè-a sé Jwif-la té ka adowé Bondyé anba Lwa-a, sété sèlman “an lonbwaj” pou sé bagay-la ki té kay vini-an, “mé bagay-la menm sé Jézi.” (Kòl. 2:17) Wi, on lonbwaj sé pa an bagay ki wéyèl. An menm mannyè-a, mòd sé Jwif-la té ka adowé Bondyé anba Lwa-a sété sèlman on lonbwaj, paski pli ta Jéhova té kay mété on lòt awanjman an plas. Èvèk nou ni pou byen konpwann awanjman sala, paski sé anba awanjman sala nou sa twapé pawdonnasyon pou péché nou, èk adowé Jéhova an mannyè-a i kay aksèpté. Konsa, annou sèvi enfòmasyon-an ki an liv Hibrou pou konpawé “lonbwaj-la” (mòd sé Jwif-la té ka adowé Bondyé anba Lwa-a), épi “bagay-la menm” (mòd Kwityen ka adowé Bondyé). Èvèk sa kay édé nou konpwann tanp spiwityouèl-la pli mèyè. Osi i kay édé nou wè kisa tanp spiwityouèl-la ni pou fè épi nou.

TABÈNAK-LA

6. Kisa jan Izwayèl té ka sèvi tabènak-la pou?

⁶ Sa yo té ni anba Lwa-a. Zapòt Pòl bazé diskasyon’y an liv Hibrou asou tabènak-la Moziz té établi an lanné mil senk san douz (1512) avan lépòk nou. (Gadé kat-la “Sa yo té ni anba Lwa-a​—Sa Kwityen Ni Pou Fè.”) Tabènak-la té ka sanm on tant, èk lè jan Izwayèl té an savann sèk-la, yo té ka pòté’y toupatou yo alé. Yo sèvi tabènak-la pou pwèskè senk san (500) lanné. Èk sé lè yo bati tanp-lan an Jérouzalèm, yo doubout sèvi Tabènak-la. (Ègz. 25:8, 9; Lim. 9:22) Tabènak sala, ében “tant mitin” sala, sété plas-la koté jan Izwayèl té ni pou vini ansanm pou adowé Bondyé. (Ègz. 29:43-46) Mé, tabènak-la té ka osi wépwézanté, yon awanjman Bondyé té kay mété an plas pou Kwityen. Èk awanjman sala té kay otan pli mèyè pasé sa sé Jwif-la té ni anba Lwa-a.

7. Ki lè tanp spiwityouèl-la té établi?

⁷ Sa Kwityen ni pou fè. Tabènak-la jan Izwayèl té ka sèvi-a sété “an lonbwaj [pou] twavay-la ki ka fèt an syèl-la,” èk i té ka wépwézanté gwan tanp spiwityouèl Jéhova. Zapòt Pòl di, tabènak-la “sé an lison pou nou atjwèlman.” (Hib. 8:5; 9:9) Konsa, bò lanné swasant é yonn (61) an lépòk nou lè zapòt Pòl ékwi liv Hibrou, Kwityen té ja ka adowé Bondyé an gwan tanp spiwityouèl-la paskè, tanp sala té établi an lanné vent nèf (29) an lépòk nou. Sa sété lanné-a Jézi batizé. Èvèk lè’y batizé, Jéhova sèvi lisentèspwi’y pou annonté’y, èk i koumansé wann sèvis kon “pli ho chèf pwèt” Jéhova, an tanp spiwityouèl-la.c​—Hib. 4:14; Twav. 10:37, 38.

CHÈF PWÈT-LA

8-9. Silon Hibrou 7:23-27, ki gwo diféwans la té ni ant sé chèf pwèt-la an nasyon Izwayèl, èk pli ho Chèf Pwèt-la, Jézi Kwi?

⁸ Sa yo té ni anba Lwa-a. Anba Lwa-a, chèf pwèt-la té ni wèskonsabilité-a pou wépwézanté nasyon-an douvan Jéhova. Pwèmyé moun ki té chèf pwèt an nasyon Izwayèl sété Éronn. Jéhova té annonté’y kon chèf pwèt lè yo té ka dèdiké Tabènak-la. Mé kon zapòt Pòl èspliké, akòz di lanmò, an chay moun té ni pou vini pwèt yonn apwé lòt. Kon sa “lè sé pli gwan-an mò, sé lézòt-la té ka kontiné fè twavay-la maché.”d (Li Hibrou 7:23-27.) Osi, sé chèf pwèt-la ki té ka wann sèvis an nasyon Izwayèl té ni pou ofè sakwifis pou péché yo, paskè yo menm té péchè. Èvèk sa sété on gwo diféwans ant sé chèf pwèt-la an nasyon Izwayèl, èk pli ho Chèf Pwèt-la, Jézi Kwi.

⁹ Sa Kwityen ni pou fè. Kon Chèf Pwèt nou, Jézi Kwi “ka fè twavay li an . . . tant pawfé-a Bondyé Senyè-a menm té fè-a. Sé pa nonm ki té fè” tant sala. (Hib. 8:1, 2) Zapòt Pòl èspliké, paski “Jézi ka viv pou tout tan, . . . i pa ka kité twavay li kon pwèt bay pyès moun.” Èvèk zapòt Pòl di ankò, Jézi “pa ni pyès fòt ében péché an li,” konsa, “i pa bizwen ofè sakwifis toulé jou pou péché’y,” kon sé chèf pwèt-la an Izwayèl té ni pou fè. Bon, apwézan annou konsidiwé sé lotèl-la épi sé sakwifis-la yo té ka ofè anba Lwa-a, èk nou kay wè kisa sé bagay sala ka wépwézanté pou nou jòdi jou.

SÉ LOTÈL-LA ÉPI SÉ SAKWIFIS-LA

10. Kisa sé sakwifis-la yo té ka ofè asou lotèl tjwiv-la té ka wépwézanté?

¹⁰ Sa yo té ni anba Lwa-a. La té an lotèl tou pwé plas-la yo té ka pasé pou antwé Tabènak-la. Lotèl sala té fèt épi tjwiv, èk sé asou’y yo té ka ofè zannimo kon sakwifis pou Jéhova. (Ègz. 27:1, 2; 40:29) Mé, sé sakwifis-la yo té ka ofè-a pa té sa fè pèp Izwayèl twapé pawdonnasyon pou péché yo konplètman. (Hib. 10:1-4) Sé sakwifis sala té ka wépwézanté sèl sakwifis-la ki té kay fè’y posib pou lézòm twapé pawdonnasyon ki konplèt pou péché yo.

11. Kisa ki lotèl-la Jézi té ofè kò’y asou-a? (Hibrou 10:5-7, 10)

¹¹ Sa Kwityen ni pou fè. Jézi té konnèt, Jéhova té voyé’y asou latè-a pou bay lavi’y kon yon sakwifis pou sové lézòm. (Maf. 20:28) Konsa, lè’y té ka batizé, Jézi pwézanté kò’y pou’y fè sa Jéhova té vlé fèt. (Jan 6:38; Gal. 1:4) Jézi ofè kò’y asou on lotèl, mé lotèl sala pa té kon lotèl-la jan Izwayèl té ka sèvi pou ofè sakwifis. Lotèl-la Jézi ofè kò’y asou-a té ka wépwézanté sa Bondyé té vlé’y fè. Sa vlé di, pou bay lavi pawfé-a i té ni kon on nonm, kon yon sakwifis. Jézi bay lavi’y kon on sakwifis “yon sèl fwa, èk sakwifis sala té asé” pou kouvè péché tout moun ki mété lafwa an li, pou tout tan. (Li Hibrou 10:5-7, 10.) Apwézan, nou kay diskité kisa sé bagay-la ki té andidan Tabènak-la té ka wépwézanté.

CHANM SEN-AN ÈK CHANM-LAN KI PLI SEN-AN

12. (a) Ki moun ki té sa antwé Chanm sen-an? (b) Ki moun ki té sa antwé Chanm-lan ki pli sen-an, èk pouki i té ka antwé chanm sala?

¹² Sa yo té ni anba Lwa-a. Andidan Tabènak-la épi andidan sé tanp-lan yo té bati an Jérouzalèm té fèt pwèskè menm mannyè-a. Chak té ni dé (2) chanm. Pwèmyé chanm-lan sété “Chanm-lan Ki Sen-an,” èk dézyenm chanm-lan sété “Chanm-lan Ki Pli Sen-an.” Osi, la té ni yon wido ki té ka sépawé sé dé (2) chanm sala. (Hib. 9:2-5; Ègz. 26:31-33) Andidan Chanm Sen-an, la té ni on lanp sèt (7) bwanch ki té fèt an lò. La osi té ni on lotèl yo té ka sèvi pou bwilé lansan, èk la té ni on tab. Yo té ka mété pen-an yo té ka pwézanté douvan Bondyé asou tab sala. Sé sèlman ‘sé pwèt-la Bondyé té chwazi-a,’ ki té sa antwé andidan Chanm Sen-an. Èk yo té ka antwé la pou fè twavay yo. (Lim. 3:3, 7, 10) Bwèt agwéman-an té andidan Chanm-lan Ki Pli Sen-an. Bwèt sala té fèt an lò, èk i té ka wépwézanté pwézans Jéhova. (Ègz. 25:21, 22) Sèl moun ki té sa janbé wido-a èk antwé andidan Chanm-lan Ki Pli Sen-an sété chèf pwèt-la. Èk i té ka antwé chanm sala yon fwa pa lanné, asou Jou-a pou Pawdonnasyon. (Livi. 16:2, 17) Chak lanné, chèf pwèt-la té ni pou antwé andidan Chanm-lan Ki pli Sen-an épi san zannimo pou mandé pawdonnasyon pou péché’y, èk pou péché tout moun an nasyon Izwayèl. Apwé on tan, Jéhova sèvi lisentèspwi’y pou moutwé a klè, kisa sé bagay-la ki té an Tabènak-la té ka vwéman wépwézanté.​—Hib. 9:6-8.e

13. Kisa Chanm Sen-an épi Chanm-lan Ki Pli Sen-an an Tabènak-la ka wépwézanté?

¹³ Sa Kwityen ni pou fè. Jéhova sèvi lisentèspwi’y pou annonté on ti gwoup moun anpanmi disip Jézi. Ti gwoup sala sé yon san kawant kat (144,000) mil, èk yo ni èspwa pou alé an syèl èk wann sèvis kon pwèt épi Jézi. (Wév. 1:6; 14:1) Mé paditan yo asou latè-a, yo ni on wilasyon spésyal épi Jéhova, paskè i ja adòpté yo kon ich li. Chanm Sen-an an Tabènak-la ka wépwézanté kondisyon spésyal-la san kawant kat (144,000) mil-la ni, paditan yo asou latè-a. (Ronm 8:15-17) Èk Chanm-lan Ki Pli Sen-an an Tabènak-la ka wépwézanté syèl, plas-la Jéhova ka wèsté-a. Bon chonjé, la té ni on “wido” ki té ka sépawé Chanm Sen-an épi Chanm-lan Ki Pli Sen-an. “Wido” sala ka wépwézanté kò-a Jézi té ni lè’y té on nonm asou latè-a. Kò sala sété san épi lachè, konsa Jézi pa té sa antwé an syèl pou wann sèvis kon pli ho Chèf Pwèt an tanp spiwityouèl-la, épi kò sala. I té ni pou bay kò’y kon yon sakwifis. Èk lè’y fè sa, i fè’y posib pou san kawant kat (144,000) mil-la alé an syèl. Mé san épi lachè pa sa alé an syèl. Konsa menm kon Jézi, san kawant kat (144,000) mil-la ni pou kité kò-a yo ni-an asou latè-a, pou yo sa alé an syèl. (Hib. 10:19, 20; 1 Kòr. 15:50) Apwé Jézi wésisité, i antwé Chanm-lan Ki Pli Sen-an an tanp spiwityouèl-la. Sa vlé di, i alé an syèl. Èvèk san kawant kat (144,000) mil-la kay alé la pou jwenn li.

14. Silon Hibrou 9:12, 24-26, pouki nou sa di, awanjman-an nou ni apwézan pou adowé Jéhova, otan pli mèyè pasé awanjman-an yo té ni pou adowé’y anba Lwa-a?

¹⁴ Wi, Jéhova mété an bèl awanjman an plas ki ka fè’y posib pou nou adowé’y. Awanjman sala bazé asou wanson sakwifis Jézi, épi sèvis-la i ka wann kon pli ho Chèf Pwèt nou. Èk kon nou ka wè a klè, awanjman sala otan pli mèyè pasé awanjman-an yo té ni pou adowé Jéhova anba Lwa-a. Paskè, sé chèf pwèt-la an Izwayèl té ka antwé andidan Chanm-lan ki pli sen-an an Tabènak-la épi san zannimo yo té ofè kon sakwifis. Mé, Jézi antwé “an syèl menm,” plas-la ki pli sen-an, pou pawèt douvan Jéhova. Èk lè’y wivé la, i pwézanté valè lavi’y i té bay “kon yon sakwifis,” pou nou sa twapé pawdonnasyon pou péché nou. (Li Hibrou 9:12, 24-26.) Èvèk, sakwifis Jézi ka fè’y posib pou nou twapé pawdonnasyon ki konplèt. Sé sakwifis-la yo té ka ofè anba Lwa-a pa té sa janmen fè sa. Alò, kon nou kay wè, ki nou ni èspwa pou viv an syèl, ében pou viv asou latè-a, nou tout sa adowé Jéhova an tanp spiwityouèl li.

SÉ LAKOU-A

15. Ki moun ki té ka wann sèvis an lakou Tabènak-la?

¹⁵ Sa yo té ni anba Lwa-a. Tabènak-la té ni yon sèl lakou. Lakou-a té gwan, èk la té ni on pak tout oliwon’y. Sé pwèt-la té ka fè twavay yo kon pwèt an lakou sala. Èk gwo lotèl tjwiv-la yo té ka sèvi pou bwilé sé sakwifis-la té an lakou-a. Osi, la té ni on bésin tjwiv ki té plen dlo. Èk sé pwèt-la té ka sèvi dlo sala pou nétwayé kò yo, avan yo fè twavay yo an lakou-a. (Ègz. 30:17-20; 40:6-8) Mé sé tanp-lan yo té bati pli ta-a, té ni dé (2) lakou. Ou té kay jwenn pwèmyé-a kon’w antwé tanp-lan. Moun ki pa té pwèt té ni pou doubout an lakou sala pou adowé Bondyé. Èk sé pwèt-la té ni pou alé an dézyenm lakou-a pou fè twavay yo.

16. An tanp spiwityouèl-la, ki moun ki ka adowé Bondyé an dézyenm lakou-a? Èk ki moun ki ka adowé’y an pwèmyé lakou-a?

¹⁶ Sa Kwityen ni pou fè. Avan yo alé an syèl pou wann sèvis kon pwèt épi Jézi, sé annonté-a ki asou latè-a ka adowé Jéhova épi fidèlité an dézyenm lakou-a, an tanp spiwityouèl-la. Gwo bésin dlo-a ki té an lakou Tabènak-la èk an lakou tanp-lan ka fè yo, épi tout lòt Kwityen chonjé, mannyè i enpòtan pou tout Kwityen wèsté nèt an zyé Jéhova, an tout sa yo ka fè. Mé, lè’y vini pou “gwan popilas” moun-lan ki ka sipòté sé annonté-a ki asou latè-a, ki koté yo ka adowé Jéhova an tanp spiwityouèl-la? Ében, adan on vizyon, zapòt Jan té wè gwan popilas-la “doubout douvan gwan chèz Bondyé-a. [Èk] oswè kon lajouné yo [té] ka adowéʼy an Kay li.” Konsa gwan popilas-la, ében sa nou ka kwiyé gwan latilyé-a, ka adowé Jéhova an pwèmyé lakou-a an tanp spiwityouèl-la (Wév. 7:9, 13-15) Wi, Jéhova ban nou bèl òpòtyounité-a pou adowé’y an tanp spiwityouèl li, èvèk sé pa dé kontan nou kontan pou ni pwivilaj spésyal sala!

PWIVILAJ-LA NOU NI POU ADOWÉ JÉHOVA

17. Ki kalité sakwifis nou sa ofè Jéhova jòdi?

¹⁷ Jòdi jou, tout Kwityen ni bèl pwivilaj-la pou sèvi tan yo, fòs yo, épi tout sa yo ni, pou adowé Jéhova èk sipòté Wéyòm li. Sa sé kalité sakwifis-la nou ka ofè Jéhova. Kon zapòt Pòl té di sé Kwityen-an ki té Jwif an vil Joudiya, nou sa “toujou onnowé Bondyé, . . . [èk] sa sé menm kon an sakwifis pou li. Nou ka ofè sakwifis sala bay Bondyé lè nou ka onnowéʼy èk lè nou ka di sé li ki Senyè nou.” (Hib. 13:15) Konsa, lè nou fè tout sa nou pé an sèvis Jéhova, nou ka moutwé, nou ka vwéman apwésyé bèl pwivilaj-la nou ni pou adowé’y.

18. Silon Hibrou 10:22-25, kisa nou toujou sipozé fè, èk kisa nou pa sipozé oblijé?

¹⁸ Li Hibrou 10:22-25. Tou pwé finisman liv Hibrou, zapòt Pòl mansyonnen diféwan bagay nou toujou sipozé fè an adowasyon nou pou Jéhova. Pou ègzanp, i moutwé, nou toujou sipozé palé épi Jéhova an lapwiyè, pwéché bon Nouvèl-la, atandé sé mitin-lan an kongwigasyon nou, èvèk ankouwajé yonn a lòt “plis toujou . . . kon nou ka wè jou [Jéhova] ka apwoché.” Osi, tou pwé finisman liv Wévélasyon, nanj Jéhova di dé (2) fwa, “Sé Bondyé ou ni pou adowé!” (Wév. 19:10; 22:9) Konsa, sé pa pou nou janmen obliyé tout sé bèl bagay-la nou apwann konsèné gwan tanp spiwityouèl Jéhova, èvèk pwivilaj spésyal-la nou ni, pou adowé Gwan Dyé nou, Jéhova!