Annou Swiv Ègzanp Sé Nanj-lan

1-2. (a) Ki diféwans la ni, ant nou épi sé nanj-lan? (b) Kisa nou ni an konmen épi sé nanj-lan?

GWANMÈSI Jéhova, nou adan on bèl gwo fanmi. Nou ni an chay fwè èk sè oliwon latè-a, èk nou osi ni plizyè milyon nanj an fanmi sala. (Dann. 7:9, 10) Mé, pitèt ou ka di an lidé’w, la ni an chay diféwans ant nou épi sé nanj-lan. Pou ègzanp, Jéhova fè sé nanj-lan lontan avan i fè nou. (Jòb 38:4, 7) Èk, yo ni an chay pli pouvwa pasé nou. Osi, nou pa pawfé, èk nou ka fè lèwè. Mé, sé nanj-lan pawfé an tout sa yo ka fè.​—Louk 9:26.

² Konsa wi, la ni an chay diféwans ant nou épi sé nanj-lan. Mé, la osi ni an chay bagay nou ni an konmen épi yo. Pou ègzanp, nou ni abilité-a pou imité sé bèl kawaktè-a Jéhova ni-an. Ében, sé nanj-lan ni abilité sala osi. Èk, menm kon sé nanj-lan, nou ni abilité-a pou fè disizyon pou kò nou, chak di nou ni on non èk ti mannyè nou, èvèk nou ni diféwan ansayman an sèvis Jéhova. Osi, menm kon sé nanj-lan, nou ni dézi-a pou adowé Kwéyatè nou.​—1 Pita 1:12.

3. Kisa nou sa apwann an ègzanp sé nanj-lan?

³ Bon, kon nou ja wè, la ni an chay bagay nou ni an konmen épi sé nanj-lan. Èk la ni bèl lison nou sa apwann an ègzanp yo. Anfen, annou gadé mannyè nou sa swiv ègzanp yo lè’y vini pou imilité yo, lanmityé yo pou moun, mannyè yo ka tjébé fò, èk mannyè yo ka tjenn kongwigasyon-an nèt an zyé Jéhova.

SÉ NANJ-LAN NI IMILITÉ

4. (a) Ki mannyè nou sav, sé nanj-lan ni imilité? (b) Pou ki wézon sé nanj-lan ni tèlman imilité? (Sam 89:7)

⁴ Sé nanj-lan ni imilité. Nou sav sa paski, magwé yo konnèt an chay enfòmasyon, èk yo ni an chay pouvwa épi lasajès, Sam 103:20 ka di nou, yo ka obéyi konmandman Jéhova. (Sam 103:20) Èk yo pa ka bavadé konsèné sa yo akonpli an sèvis Jéhova, ében konsèné kantité pouvwa yo ni. Anfen, la ni nanj ki ja fè bagay ki byen èstòdinè, èk nou pa menm konnèt non yo. Mé magwé sa, yo kontan pou fè tout sa Jéhova mandé yo pou fè.a (Jen. 32:24, 29; 2 Wa 19:35) Èk yo pa ka aksèpté lonnè-a épi laglwa-a Jéhova sipozé wisouvwè-a. Mé pou ki wézon, sé nanj-lan ni tèlman imilité? Sé paski yo enmen Jéhova, èk yo ni an chay wèspé pou li.​—Li Sam 89:7.

5. Ki mannyè on nanj moutwé i té ni imilité lè’y té ka kowijé zapòt Jan? (Gadé pòtwé-a osi.)

⁵ Annou gadé on wakont an Bib-la ki ka moutwé, sé nanj-lan ni imilité. Owon lanné katwiven sèz «96» an lépòk nou, zapòt Jan té wisouvwè yon vizyon, èk on nanj té moutwé’y an chay bagay ki té èstòdinè. (Wév. 1:1) Nou pa konnèt non nanj sala, mé lè zapòt Jan wè sé bagay èstòdinè-a, i ajounou an pyé nanj-lan, èk i té pawé pou adowé’y. La menm, nanj-lan doubout li. Èk nanj-lan di’y: “Pa fè sa pyès. Mwen sé on sèvant menm kon ou, èk tout sé fwè’w-la. . . . Sé Bondyé ou ni pou adowé!” (Wév. 19:10) I a klè, nanj sala té ni an chay imilité. Konsa, i pa té vlé lonnè-a épi laglwa-a ki té sa Bondyé. Èvèk i pa gaspiyé pyès tan pou’y kowijé zapòt Jan, èk fè’y chonjé, sé Jéhova sèlman i sipozé adowé. Mé an menm di tan-an, i pa fè akwèdi i té pli enpòtan pasé zapòt Jan. San dout, nanj sala té ni twòp pli pouvwa pasé zapòt Jan, èk i té ja sèvi Jéhova pou plizyè syèk. Mé wonnman, i di zapòt Jan, “mwen sé on sèvant menm kon ou.” Osi, nanj-lan té konpwann sa ki té fèt-la. I wéyalizé, zapòt Jan té tèlman étonnen lè’y wè vizyon-an, sé sa ki fè i té pawé pou adowé’y. Konsa, i kowijé’y adan on mannyè ki té janti, èk wèspèktab.

6. Ki mannyè nou sa swiv ègzanp sé nanj-lan èk moutwé imilité?

⁶ Ki mannyè nou sa swiv ègzanp sé nanj-lan èk moutwé imilité? Ében menm kon sé nanj-lan, nou ka fè tout sa nou pé an sèvis Jéhova. Mé nou pa ka bavadé konsèné sa nou ka fè bay Jéhova. (1 Kòr. 4:7) Osi, menm si nou ja sèvi Jéhova pou plizyè lanné, ében nou ni sèten wèskonsabilité an kongwigasyon-an, nou pa ka fè akwèdi nou pli mèyè pasé lézòt. Anfen, pli wèskonsabilité nou ni an ògannizasyon-an, sé pli nou sipozé abésé kò nou. (Louk 9:48) Èk menm kon sé nanj-lan, nou kontan pou édé èk sipòté sé fwè èk sè nou-an. Konsa, nou pa ka janmen fè pyèsonn kwè, nou pli enpòtan pasé yo.

7. Lè nou ka kowijé on moun ében nou ka ba yo konsèy, ki mannyè nou sa moutwé nou ni imilité?

⁷ Bon. Délè, nou ni pou kowijé on moun, ében nou ni pou ba yo konsèy. Ki mannyè nou sa moutwé imilité lè nou ka fè sa? Ében chonjé, zapòt Jan té fè on bagay ki té byen sèwyé, konsa nanj-lan té ni pou palé épi’y adan on mannyè ki té fèplé. Mé wonnman, nanj-lan fè sa épi jantiyès. Konsa, menm si nou ni pou kowijé on moun konsèné on bagay ki byen sèwyé, nou ka fè’y épi jantiyès. Èk nou pa ka janmen fè moun-lan santi akwèdi, yo pa vo anyen. Wi, si nou ni imilité, nou kay sa moutwé moun lanmityé épi wèspé, lè nou ka ba yo konsèy ki bazé asou Bib-la.​—Kòl. 4:6.

SÉ NANJ-LAN ENMEN MOUN

8. (a) Ki mannyè Louk 15:10 ka moutwé, sé nanj-lan enmen moun? (b) Kisa sé nanj-lan ka fè pou édé nou an twavay pwèchman-an? (Gadé pòtwé-a osi.)

⁸ Sé nanj-lan enmen moun an chay. Konsa, yo byen antéwésé an sa ki ka wivé nou. Pou ègzanp, lè on moun aksèpté lavéwité-a, ében on moun viwé an ògannizasyon-an, sé pa dé kontan sa ka fè sé nanj-lan kontan. (Li Louk 15:10.) Osi, sé nanj-lan ka sipòté èk édé nou an twavay pwèchman-an. (Wév. 14:6) Èk non, sa pa vlé di sé nanj-lan ka pwéché bay moun. Mé sa yo pé fè, sé diwèkté nou pou alé palé épi moun ki vlé apwann konsèné Jéhova. Èvèk nou pa sa di, sé nanj-lan ka voyé nou oti tout moun ki bizwen apwann lavéwité-a nonplis. Paskè chonjé, Jéhova ka osi sèvi lisentèspwi’y pou édé nou an minis nou. (Twav. 16:6, 7) Mé, i ka sèvi sé nanj-lan an chay pou édé nou an twavay pwèchman-an. Konsa lè nou ka pwéché, nou sa asiwé, sé nanj-lan la épi nou pou sipòté nou.​—Osi, gadé enfòmasyon-an anba sijé-a: “Jéhova Wéponn Lapwiyè Yo.”b

9. Ki mannyè nou sa swiv ègzanp sé nanj-lan èk moutwé nou enmen moun?

⁹ Ki mannyè nou sa swiv ègzanp sé nanj-lan èk moutwé nou enmen moun? Ében, lè on fwè ében on sè viwé jwenn Jéhova, nou sa ni tjè kontan menm kon sé nanj-lan. Èvèk sé pou nou fè asiwé nou moutwé moun sala nou enmen yo an chay, èk nou kontan pou ni yo an kongwigasyon-an ankò. (Louk 15:4-7; 2 Kòr. 2:6-8) On lòt mannyè nou sa swiv ègzanp sé nanj-lan èk moutwé lanmityé pou moun, sé lè nou fè tout sa nou pé an twavay pwèchman-an. (Éklé. 11:6) Osi chonjé, sé nanj-lan ka sipòté èk édé nou lè nou ka fè minis nou. Konsa, i bon pou nou gadé pou wè kisa nou sa fè, pou sipòté èk ankouwajé sé fwè èk sè nou-an an minis yo. Pou ègzanp, nou sa twavay an minis-la épi on piblikatè nèf. Ében nou sa fè awanjman pou pwéché épi fwè èk sè ki pa sa sòti paskè yo an laj, ében yo malad.

10. Kisa nou sa apwann an ègzanp sè Sara?

¹⁰ Bon. Délè, sitiwasyon nou pa ka pèwmité nou pou fè, tout sa nou vlé fè bay Jéhova. Mé, népòt sa nou sa fè bay Jéhova, nou sa asiwé, sé nanj-lan kay édé nou. Pou édé nou wè sa, annou konsidiwé èspéyans yon sè yo ka kwiyé Sara.c Sè sala ka wèsté an péyi India, èk i té ka wann sèvis kon yon piyonnè pou apipwé ven «20» lanné. Apwé sa, i tonbé malad èk i pa té sa maché ankò. Anfen, i pa té sa menm kité kabann li. Èvèk sa dékouwajé sè-a an chay. Mé, sé fwè èk sè-a té ka sipòté’y, èk yo té ka ankouwajé’y. Sè-a menm té ka toujou li Bib-la. Konsa piti an piti, i koumansé ni tjè kontan ankò. Sè-a pa té sa fè minis li kon’y té abitwé. Èk i pa té sa asid pou’y ékwi lèt pou’y pwéché. Mé, i té sa sèvi téléfòn-lan. Konsa, i té ka kwiyé moun i té ja palé épi konsèné Bib-la. Sé moun sala té ka di’y konsèné lòt moun ki ni lantéwé an Bib-la, èk sè Sara té ka kwiyé yo. Apwé yonndé mwa, sè-a té ka étidyé Bib-la épi swasant dis «70» moun. Wi, i té ni tèlman étidyan Bib, i té ni pou mandé adan sé fwè èk sè-a pou édé’y. Apwézan, an chay an sé étidyan sala ka atandé sé mitin-lan. Ès ou sa imajiné mannyè sé nanj-lan ka kontan, pou sipòté fwè èk sè kon Sara, ki ka fè tout sa sitiwasyon yo ka pèwmité yo pou fè bay Jéhova!

SÉ NANJ-LAN KA KONTINÉ TJÉBÉ FÒ

11. Pou ki wézon nou sa di, sé nanj-lan ka tjébé fò?

¹¹ Sé nanj-lan ka ban nou on bèl ègzanp pou swiv, lè’y vini pou mannyè yo ka kontiné tjébé fò. Mé pou ki wézon nou sa di, sé nanj-lan ka tjébé fò? Ében pou plizyè mil lanné, yo ja wè an chay movèzté. Pou ègzanp, yo té la lè Satan épi sé mové nanj-lan tounen do yo asou Jéhova. Èk ou sa asiwé, sa sé on bagay ki fè sé bon nanj-lan byen twis. (Jen. 3:1; 6:1, 2; Joud 6) Osi, Bib-la ka di nou konsèné yon lokazyon lè on nanj té ni pou goumen kont on vyé lèspwi pou ventenyen «21» jou. Konsa nou sav, sé vyé lèspwi-a ka opozé sé nanj-lan. (Dann. 10:13) Èvèk ès ou sa imajiné mannyè sé nanj-lan ka santi pou wè kantité movèzté lézòm ka fè! Anfen, dépi an tan Adanm pou wivé tan nou, sé byen pé moun ki ka fè lidé yo pou swiv Jéhova. Mé magwé tout sé mové bagay sala, sé nanj-lan ni tjè kontan, èk yo ka wèsté fidèl pou Jéhova. Wi, yo ka tjébé fò paskè yo ni konfyans, Jéhova kay tiwé tout movèzté a bon lè-a.

12. Kisa ki kay édé nou pou kontiné tjébé fò?

¹² Ki mannyè nou sa swiv ègzanp sé nanj-lan èk kontiné tjébé fò? Ében jòdi jou, latè-a plen movèzté. Nou ka wè mannyè moun ka soufè, paskè lézòm ka maltwété yonn a lòt. Èk nou menm ka soufè paskè, la ni moun ki ka opozé nou. Mé menm kon sé nanj-lan, nou ‘pa ka doubout fè sa ki bon.’ Èk nou ka kontiné sèvi Jéhova épi tjè kontan paskè nou asiwé, i kay tiwé tout movèzté a bon lè-a. (Gal. 6:9) On lòt bagay sé sa, Jéhova pwonmèt pou ban nou kouway-la nou bizwen, pou nou sa tjébé fò. (1 Kòr. 10:13) Konsa lè’w ka pwédyé, mandé Jéhova pou ba’w lisentèspwi’y. Lè sala ou kay ni pasyans, èk ou kay sa kontiné sèvi Jéhova épi djèwté. (Gal. 5:22; Kòl. 1:11) Èvèk si’w ka èspéyansé òpozisyon, pa kité sa twakasé’w twòp. Pito sa, mété tout konfyans ou an Jéhova, paskè ou sa asiwé, i kay toujou édé’w.​—Hib. 13:6.

SÉ NANJ-LAN KA TJENN KONGWIGASYON-AN NÈT AN ZYÉ BONDYÉ

13. Ki twavay spésyal sé nanj-lan ka fè diwan sé dènyé jou sala? (Mafyou 13:47-49)

¹³ Jéhova bay sé nanj-lan on twavay spésyal pou fè, diwan sé dènyé jou sala. (Li Mafyou 13:47-49.) Kon nou té di pli bonnè-a, sé nanj-lan ka édé nou an twavay pwèchman-an. Èk gwan mèsi twavay sala, an chay moun ka moutwé lantéwé an Bon Nouvèl-la. Mé malèwèzman, sé pa yo tout ki ka fè sé chanjman-an ki nésésè pou yo sa sèvi Jéhova. Konsa Jéhova bay sé nanj-lan twavay-la pou “tiwé sé mové moun-an anpami sé sa ki bon-an.” An mannyè sala, sé nanj-lan ka tjenn sé kongwigasyon-an nèt an zyé Jéhova. Mé sa pa vlé di, si on moun kité Jéhova, yo pa kay janmen viwé jwenn li. Èk i pa vlé di, la pa kay ni ti difikilté an kongwigasyon-an nonplis. Mé, népòt sa ki fèt, nou sa asiwé sé nanj-lan ka twavay wèd pou tjenn sé kongwigasyon-an nèt an zyé Jéhova.

14-15. Ki mannyè nou sa swiv ègzanp sé nanj-lan èk tjenn kongwigasyon-an nèt an zyé Jéhova? (Gadé sé pòtwé-a osi.)

¹⁴ Ki mannyè nou sa swiv ègzanp sé nanj-lan èk tjenn kongwigasyon-an nèt an zyé Jéhova? Ében pwèmyéman, nou ni pou fè tout sa nou pé, pou tjenn wilasyon nou épi Jéhova fò. Konsa, nou ka chwazi moun ki enmen Jéhova pou jan nou, èk nou ka twavay wèd pou nou pa janmen fè anyen ki sa donmajé wilasyon nou épi Jéhova. (Sam 101:3) Dézyenman, nou ni pou édé sé fwè èk sè nou-an pou wèsté fidèl pou Jéhova. Pou ègzanp, si’w vini konnèt on fwè ében on sè fè on péché ki gwav, lanmityé sipozé pousé’w pou palé épi moun-lan, èk ankouwajé’y pou alé oti sé ansyen-an. Si moun-lan pa vlé fè sa, ou sipozé alé oti sé ansyen-an ou menm, èk di yo sa ou konnèt konsèné sitiwasyon-an. Èk nou ka fè sa paskè, lè on moun fè on péché ki gwav, yo ka donmajé wilasyon yo épi Jéhova. Konsa, nou ka fè tout sa nou pé pou édé yo twapé èd-la yo bizwen, pou yo sa wanjé wilasyon yo épi Jéhova.​—Jémz 5:14, 15.

¹⁵ Malèwèzman, délè on moun fè on péché ki gwav, èk sé ansyen-an ni pou tiwé moun-lan an kongwigasyon-an. Lè sa fèt, nou ni pou swiv pwensip Bib, èk doubout asosiyé épi moun-lan.d (1 Kòr. 5:9-13) Èk magwé i pa toujou ézé pou fè sa, nou sav sa sé yon awanjman ki ka tjenn kongwigasyon-an nèt an zyé Jéhova. Awanjman sala ka osi édé moun-lan ki fè péché-a. Paskè lè nou doubout asosiyé épi yo, sa pé édé yo pou wéyalizé, mannyè i enpòtan pou yo viwé jwenn Jéhova. Èvèk lè’w wè yo viwé, nou ka santi menm kon Jéhova épi sé nanj-lan. Sa vlé di, sé pa dé kontan nou ka kontan.​—Louk 15:7.

16. Kisa ou kay fè pou moutwé, ou ka swiv ègzanp sé nanj-lan?

¹⁶ Wi, Jéhova ka ban nou on bèl lonnè. I ka di nou konsèné sé nanj-lan, èk i ka ban nou bèl pwivilaj-la pou twavay ansanm épi yo. Konsa, annou fè tout sa nou pé, pou swiv ègzanp sé nanj-lan lè’y vini pou imilité yo, lanmityé yo pou moun, mannyè yo ka tjébé fò, èk mannyè yo ka tjenn kongwigasyon-an nèt an zyé Jéhova. Si nou fè sa, nou kay sa wèsté an fanmi Jéhova pou tout tan.