Mannyè Ou Sa Bay Jéhova Djèwté Asou Jou Nòs Ou

1-2. Kisa Jéhova vlé ba ou asou jou nòs ou?

ÈS OU kay mayé touswit? Èben nou byen kontan pou ou! Èvèk Jéhova kontan pou ou tou. Wi, Jéhova vlé’w ni an chay djèwté asou jou nòs ou, èk i vlé zòt enjwi lavi ansanm.a​—Pwov. 5:18; Sòlo. 3:11.

² Bon, i byen enpòtan pou ou ni an nòs ki kay bay Jéhova lonnè. Mé pouki i si tèlman enpòtan? Èk ki mannyè ou sa fè asiwé ou kay bay Jéhova djèwté asou jou nòs ou? Bon, magwé atik sala sé pou moun ki kay mayé, sé pwensip-la nou kay diskité kay édé nou tout pou onnowé Jéhova si nou ka atandé an nòs, ében si sé moun-lan ki kay mayé-a mandé nou pou sijèsyon.

POUKI I ENPÒTAN POU BAY JÉHOVA DJÈWTÉ ASOU JOU NÒS OU?

3. Kisa an fwè èk sè ki ka fè pwépawasyon pou jou nòs yo sipozé tjenn an lidé?

³ Lè an fwè èk sè ka fè pwépawasyon pou jou nòs yo, yo ni pou fè disizyon ki bazé asou pwensip Bib. Mé pouki? Èben sa sé paski sé Jéhova ki établi mawiyaj. Sé li ki fè Adanm épi Èv mawi èk madanm. (Jen. 1:28; 2:24) Alò, moun ki vlé mayé sipozé fè asiwé yo kay bay Jéhova djèwté asou jou nòs yo.

4. Ki lòt wézon ou ni pou bay Jéhova djèwté asou jou nòs ou?

⁴ La ni lòt bèl wézon poutji ou ni pou bay Jéhova djèwté asou jou nòs ou. I sé Papa’w èk pli mèyè jan’w. (Hib. 12:9) Alò ou pa kay vlé fè anyen asou jou nòs ou ki kay blésé tjè’y, èk ki kay donmajé wilasyon’w épi’y. (Sam 25:14) Osi, lè ou chonjé tout sé bon bagay-la Jéhova ha fè ba ou, èk sa i kay fè ba ou an tan pou vini, ou kay fè tout sa’w pé pou bay Jéhova lonnè èk djèwté asou jou nòs ou.​—Sam 116:12.

KI MANNYÈ OU SA BAY JÉHOVA DJÈWTÉ ASOU JOU NÒS OU?

5. Ki mannyè Bib-la sa édé an fwè èk sè ki kay mayé, pou fè bon disizyon konsèné nòs yo?

⁵ Bon. Bib-la pa ka ban nou lwa konsèné nòs èben fèt-la apwé nòs-la. Alò ou sa fè pwépawasyon pou nòs ou silon sitiwasyon’w, kilti’w, èben sa ou simyé. Kanmenm, ou ni pou obéyi lwa gouvèdman-an konsèné mawiyaj. (Maf. 22:21) Èk lè’w swiv pwensip Bib kon ou ka pwépawé pou jou nòs ou, ou kay onnowé Jéhova èk ba’y an chay djèwté. Alò ki pwensip Bib ou ni pou tjenn an lidé kon ou ka pwépawé pou jou nòs ou?

6. Pouki i enpòtan pou Kwityen ki vlé mayé obéyi lwa gouvèdman-an pou mawiyaj?

⁶ Obéyi lwa gouvèdman-an. (Ronm 13:1, 2) Adan plizyè péyi, gouvèdman péyi-a ni sèten lwa moun ki ka fè pwépawasyon pou mayé ni pou obéyi. Alò, si ou vlé mayé, ou ni pou konnèt ki sa sé lwa sala yé. Èk si ou bizwen èd pou twapé enfòmasyon sala, ou sa mandé sé ansyen-an pou édé’w.b

7. Kisa ou sa fè pou ankouwajé moun pou moutwé jou nòs ou wèspé?

⁷ Fè asiwé jou nòs ou ka wéflèkté kawaktè Bondyé. (1 Kòr. 10:31, 32) Ou vlé jou nòs ou wéflèkté bèl kawaktè Bondyé, pito atitid moun an latè-a. (Gal. 5:19-26) Bon, paski fwè-a ki kay mayé-a kay vini tèt fanmi-an, i wèskonsab pou fè asiwé tout pwépawasyon avan nòs-la, èk sa ki kay fèt diwan nòs-la kay bay moun djèwté èk bay Jéhova djèwté osi. Alò, ou sa awanjé pou an fwè bay diskou nòs-la adan an mannyè ki kay bati apwésiyasyon pou mawiyaj. Èk lè fwè-a bay diskou-a épi wèspé èk lanmityé, sa kay édé tout moun ki atandé nòs-la pou wè a klè, mawiyaj sé an kado hòd Jéhova. I kay osi édé yo pou wè mawiyaj sé an bagay ki byen sèwyé. Alò, si’y posib, éséyé pou ni nòs-la an Sal Wéyòm-lan. Kanmenm, si ou vlé sèvi Sal Wéyòm-lan pou nòs ou, ou ni pou ékwi sé ansyen-an an lèt andavans pou mandé yo pèwmisyon.

8. Si ou kay ni an fèt apwé nòs-la, ki mannyè ou sa fè asiwé i kay bay Jéhova lonnè? (Ronm 13:13)

⁸ Li Ronm 13:13. Alò, si ou chwazi pou ni an fèt apwé nòs ou, ki mannyè ou sa fè asiwé fèt sala pa kay wéflèkté atitid moun an latè-a? Èben Bib-la ka sèvi èspwèsyon-an, ‘fèt ki ni malpwòpté andidan’y’, sa vlé di fèt koté moun ka bwè twòp wonm, èk yo ka jwé mizik byen ta li òswè. (Ronm 13:13.) Alò, si ou chwazi pou ni alkòhòl an fèt-la, fè asiwé pyèsonn pa kay bwè twòp.c Èvèk si ou kay jwé mizik, pa jwé’y twò fò pou fè’y difisil pou moun palé épi yonn a lòt. Èk osi byen chwazi mizik-la, èk fè asiwé ou kouté sé mo pawòl-la ki an sé chanson-an, pou’w pa ofwansé pyèsonn.

9. Si moun kay di yonndé pawòl an fèt-la, èben si la kay ni lòt anmizman, kisa ou ni pou tjenn an lidé?

⁹ Délè an fèt-la apwé nòs-la, fanmi èk jan vlé di yonndé bagay. Èben délè la ni vidiyo èben pòtwé épi fwè èk sè-a ki mayé-a, èben lòt kalté anmizman. Anfen tout sé bagay sala ka fè jou mawiyaj-la spésyal. Kanmenm, fè asiwé tout sa ki kay pwan kou kay apwopwiyab. (Filip. 4:8) Alò, kon’w ka pwépawé pou fèt-la apwé nòs-la, mandé kò’w: ‘Ès sa kay moutwé moun wèspé? Ès sa kay ankouwajé moun pou ni wèspé pou mawiyaj?’ Èvèk pli enpòtan: ‘Ès sa kay onnowé Jéhova?’ Sé vwé la pa ni an pwòblenm si moun bay yonndé blag. Kanmenm, pyèsonn pa sipozé di anyen ki kay annékòz moun pou katjilé asou sèks. (Èfés. 5:3) Alò, si fanmi’w èben jan’w kay di an bagay an fèt-la, fè asiwé ou di yo sé bagay-la ou pa vlé yo palé konsèné.

10. Pouki i kay bon pou an fwè èk sè ki kay mayé tjenn nòs yo senp? (1 Jan 2:15-17)

¹⁰ Tjenn nòs ou senp. (Li 1 Jan 2:15-17.) Bon, moun ki enmen Jéhova, ka bay Jéhova lonnè pito kò yo. Alò moun ki vlé onnowé Jéhova, pa kay dépansé an chay lajan ki pa nésésè. Èk lè’w tjenn an nòs ki senp, ki bennéfis ou kay twapé? Èben konsidiwé ègzanp Mike, an fwè ki ka wèsté Norway. I di: “Nòs nou té si tèlman bèl nou pa kay janmen obliyé’y. Èk paski nou té tjenn li senp, nou pa té mété kò nou an dèt. Èk nou té sa kontiné wann sèvis kon piyonnè.” Èvèk an sésé ki ka wèsté India, non’y sé Tabitha di: “Paski nou té ni an nòs ki té senp, nou pa té ni an chay tèt cho. Èk osi la pa té ni an chay bagay pou mwen, fiyansé mwen, èk fanmi nou pou ni dézagwéman asou.”

11. Ki mannyè an fwè èk sè ki kay mayé sipozé abiyé pou nòs yo? (Gadé sé pòtwé-a osi.)

¹¹ Bon. Ès ou ha désidé kisa ou kay mété asou’w pou nòs ou? San dout ou vlé gadé bèl. Anfen dépi an tan Bib-la, lè moun té ka mayé yo té ka abiyé adan an bèl mannyè. (Izay. 61:10) Kanmenm, ou vlé abiyé adan an mannyè ki pwòp épi wèspèktab pou nòs ou. (1 Tim. 2:9) Alò i enpòtan pou chonjé, bagay-la ki pli enpòtan pou nòs ou sé pa abiman’w èben lapawans ou.​—1 Pita 3:3, 4.

12. Pouki an fwè èk sè ki kay mayé ni pou widjèkté népòt twadisyon ki pa an ling épi Bib-la?

¹² Widjèkté twadisyon nòs ki pa an ling épi Bib-la. (Wév. 18:4) Bon. Jòdi jou an chay nòs ni bagay ki ni pou fè épi fo wilizyon, tjenbwa, èben lòt bagay ki pa an ling épi Bib-la. Kanmenm Jéhova vlé nou wèsté byen lwen sé bagay sala. (2 Kòr. 6:14-17) Alò si la ni bagay moun ka fè adan nòs yo, èk ou pa asiwé sé bagay sala kay plè Jéhova, fè wichach pou twapé pli enfòmasyon èk pou twapé pwensip Bib ki sa édé’w fè bon disizyon.

13. Ki mannyè an fwè èk sè ki kay mayé sa swiv ègzanp Jéhova lè moun ba yo kado?

¹³ Bon. Pitèt koté-a ou ka wèsté moun akoutimé bay moun ki ka mayé an kado. Ében si sé sa, kalté kado-a moun-lan kay ba’w kay dépan asou ki otan lajan i ni. Bon. Bib-la ka ankouwajé Kwityen pou bay. Èk lè nou bay, sa ka ban nou tjè kontan. (Pwov. 11:25; Twav. 20:35) Mé an fwè èk sè ki kay mayé pa vlé fè moun yo envité santi yo oblijé ba yo an kado. Èben si an moun ba yo an kado ki pa chè, yo pa vlé fè moun-lan santi hont. Anfen menm kon Jéhova, nou vlé moutwé apwésiyasyon pou népòt kado nou wisivwè, paski moun-lan ban nou kado sala paski i enmen nou.​—2 Kòr. 9:7.

MANNYÈ OU SA CHAPÉ DIFIKILTÉ ÈBEN GANYEN A BOUT YO

14. Ki difikilté adan fwè èk sè ki ka mayé kay èspéyansé?

¹⁴ Ou sa èspéyansé difikilté kon ou ka fè pwépawasyon pou ni an nòs ki kay bay Jéhova djèwté. Pou ègzanp, i pé difisil pou ni an nòs ki senp. Pou ègzanp Charlie, yon fwè ki ka wèsté an Solomon Islands-lan di: “I té byen wèd pou désidé ki moun nou té kay envité pou fèt mawiyaj-la. Ou wè, nou ni an chay jan, èk an kilti nou, tout moun kwè ou kay envité yo!” Èvèk Tabitha, nou té mansyonnen an pawagwaf dis «10» di: “Plas-la mwen ka wèsté-a, i byen konmen pou moun tjenn an gwo fèt apwé nòs-la. Konsa i pa té ézé pou pawan nou aksèpté ki, nou pa té kay envité an chay moun pou fèt nòs nou.” Èvèk Sarah, an sésé ki ka wèsté India di: “Adan moun ka fiksé twòp asou ki mannyè moun kay gadé yo, èben ki kantité lajan yo ni. Anfen sé kouzen mwen-an ki pa Témwen Jéhova té ni an gwo nòs, èk yo té dépansé an chay lajan. Alò moun ban mwen an chay chalè pou dépansé pli lajan èk pou ni an nòs ki té pli gwan pasé sa yo-a.” Konsa, kisa ki kay édé’w pou ganyen a bout sé difikilté sala?

15. Lè’w ka fè pwépawasyon pou nòs ou, kisa ou sa pwédyé konsèné, èk pouki i bon pou pwédyé souvan?

¹⁵ Pwédyé souvan konsèné sé pwépawasyon-an ou ka fè pou nòs ou. Bon, ou sa palé épi Jéhova konsèné sé disizyon-an ou vlé fè èben sé difikilté-a ou ka èspéyansé. (Filip. 4:6, 7) Osi, ou sa mandé’y pou édé’w fè bon disizyon, pou wèsté kam anba strès, èk pou moutwé kouwaj lè’w ni pou fè disizyon moun pa kay kontan. (1 Pita 5:7) Èk kon ou wè mannyè Jéhova ka wéponn lapwiyè’w, sa kay ba’w pli konfyans an Jéhova. Pou ègzanp, Tabitha nou té mansyonnen pli bonnè-a di: “Mwen èk fiyansé mwen té pè nou té kay ni dézagwéman épi yonn a lòt èk épi fanmi nou. Konsa chak kou nou té ni pou diskité sé plan nou-an, fiyansé mwen té ka di an lapwiyè. Èvèk Jéhova édé nou tjenn lapé-a ant yonn a lòt èk ant fanmi nou.”

16-17. Lè’w ka fè pwépawasyon pou nòs ou, ki mannyè ou sipozé palé épi yonn a lòt èk épi fanmi’w?

¹⁶ Palé épi yonn a lòt èk épi fanmi’w adan an mannyè ki wèspèktab. (Pwov. 15:22) Bon. Zòt kay ni pou fè an chay disizyon. Pou ègzanp, ki dat zòt kay ni nòs-la, ki kantité lajan zòt kay dépansé, ki moun zòt kay envité, èk plizyè lòt bagay. Kanmenm avan ou fè an disizyon, i kay bon pou palé konsèné sé diféwan chwa-a zòt ni. Osi, i kay bon pou diskité ki pwensip Bib zòt vlé swiv, èvèk sé konsèy-la zòt wisivwè hòd fwè èk sè ki ni lasajès èk yo sé bon ègzanp. Èvèk lè zòt ka palé épi yonn a lòt èben épi fanmi zòt konsèné sé bagay-la zòt vlé fè-a, i enpòtan pou moutwé wèspé èk pou zòt wézonnab. Pou ègzanp, si pawan’w vlé’w fè an bagay ki pa kay déplè Jéhova, éséyé fè sa yo ka mandé. Chonjé, nòs ou sé an lokazyon spésyal pou yo tou. Kanmenm si’w pa sa fè sa yo vlé’w fè, di yo poutji ou pa sa fè’y adan an mannyè ki wèspèktab èk épi lanmityé. (Kòl. 4:6) Osi édé tout moun pou kopwann byen, ou vlé an nòs ki kay bay Jéhova djèwté.

¹⁷ Bon, si pawan’w pa Témwen Jéhova pitèt i kay wèd pou yo kopwann pouki ou fè sèten disizyon pou nòs ou. Mé adan an mannyè ki wèspèktab ou sa édé yo pou kopwann. Pou ègzanp, Santhosh, yon fwè ki ka wèsté India di: “Fanmi nou té vlé nou sèvi bagay fo wilizyon an nòs nou, èk i pa té ézé pou yo kopwann poutji nou pa té sa fè sa. Kanmenm nou té pawé pou fè chanjman lè yo mandé nou pou fè bagay ki pa té kay déplè Jéhova. Pou ègzanp, nou chwazi kalté manjé-a yo té vlé an fèt mawiyaj-la. Èk nou désidé pou pa ni pyès chanté èben dansé paski yo pa té abitwé épi sé bagay sala.”

18. Kisa ou sa fè pou fè asiwé tout bagay kay maché byen asou jou nòs ou? (1 Kòrint 14:40) (Gadé pòtwé-a osi.)

¹⁸ Pwépawé byen. Si’w pwépawé byen, ou kay ni mwens strès asou jou nòs ou. (Li 1 Kòrint 14:40.) Wayne, yon fwè ki ka wèsté Taiwan, di: “Déotwa jou avan nòs nou, nou té ni an ti mitin épi sé moun-lan ki té kay édé nou an nòs-la. Nou diskité sé awanjman-an pou nòs-la, èk nou pwatiké adan sé bagay-la nou kay fè pou nòs-la, pou fè asiwé tout bagay maché byen.” Osi, i enpòtan pou tjenn nòs-la èk tout lòt bagay a lè, paski sa kay moutwé sé moun-lan ou envité-a wèspé.

19. Si’w ni an fèt apwé nòs ou, ki mannyè ou sa fè asiwé tout bagay kay bay Jéhova djèwté?

¹⁹ Bon. Si’w katjilé asou ki pwòblenm ki sa lévé adan fèt mawiyaj-la andavans, ou sa anpéché an chay pwòblenm. (Pwov. 22:3) Pou ègzanp, si’w ka wèsté adan an plas koté moun ni labitid-la pou atandé fèt nòs-la menm si yo pa twapé an envitasyon, ou sa katjilé asou sa’w sa fè pou anpéché sa. Osi, fè asiwé fanmi’w ki pa Témwen Jéhova konnèt sa ki kay fèt an nòs ou, èk di yo sé bagay-la ou pa vlé yo fè. Anfen, ou sa moutwé yo atik-la “Ki Mannyè Témwen Jéhova Ka Tjenn Nòs Yo?” asou wèbsayt-la jw.org. Èk osi, ou sa mandé an fwè ou ka konfyé pou fè asiwé tout bagay maché byen diwan fèt nòs-la. (Jan 2:8) Wi, si’w di fwè-a a klè tout sa ou vlé èben pa vlé pou fèt nòs-la, i kay sa fè asiwé tout bagay maché byen èk sa kay plè Jéhova.

20. Kisa an fwè èk sè ki kay mayé ni pou chonjé?

²⁰ Bon. Kon ou ka katjilé asou tout sa ou ni pou fè pou nòs ou, pitèt ou ni an chay strès. Kanmenm, i enpòtan pou chonjé, jou nòs ou sé sèlman yon jou. Anfen, sa sé annèk koumansman bèl lavi-a zòt kay enjwi kon zòt kay adowé Jéhova ansanm. Alò fè tout sa ou pé pou ni an nòs ki senp, èk ki kay bay Jéhova djèwté. Wi, mété tout konfyans ou an Jéhova. Èvèk épi djid li, ou kay ni an bèl nòs ou pa kay janmen wigwété. Èk chak kou ou chonjé nòs sala, ou kay ni an bèl souwi asou fidji’w.​—Sam 37:3, 4.