Sektemba

Lubanga omiyo bot Yecu teko me cobo pekki pa dano ducu. Yecu otiyo ki tangone me nyuto ni etye ki teko me loyo ariya ma wan kikomwa pe watwero loyone piwa kenwa. Me labolle, en tye ki teko me gonyowa ki i bal ma walako kacel ki adwogine, calo two ki to. (Mat. 9:​1-6; Rom. 5:​12, 18, 19) Tango ma en otimo onyuto ka maleng ni en twero cango “kit two ducu” kadiwa cero jo muto. (Mat. 4:23; Jon 11:​43, 44) Medo i kom meno, en tye ki teko me juko yamo lapiro magwar ki me gonyo dano ki i twec pa cen maraco. (Mar. 4:​37-39; Luka 8:2) Pud dong kweyo cwinywa ya, me ngeyo ni Jehovah omiyo ki Wode teko ma kit meno! Watwero bedo ki gen matek ni mot ducu ma kiciko pire i te Ker pa Lubanga bicobbe ada. Tango ma Yecu otimogi i kare ma onongo en tye i lobo, gipwonyowa gin ma en bitimo i wi lobo-ni ducu i kare ma en biloyo lobo macalo Kabaka me Ker pa Lubanga. w23.04 3 ¶5-7

Ka itye i kacokke madit dok iwinyo ni pol kare pe kicimmi me miyo lagam, itwero tamo ni myero dong ijuk miyo lagam woko. Ento pe ijuk tuteni me miyo lagam. Itwero yubo lagam mapol pi cokke acel acel. Dong ka pe kicimmi me miyo lagam i acakki me cokke, pud ibibedo ki kare me miyo lagam ka cokke tye ka wot anyim. Ka itye ka yubo Wi Lubele ma kibinyamo i cokke, tam i kom kit ma paragraf acel acel kubbe kwede ki wi lok me pwony meno. Ka itimo meno, ci itwero bedo ki lagam mabeco ma itwero miyone i cawa mo keken. Medo i kom meno, itwero yubbe me miyo lagam i paragraf mogo ma nyamo pwony me Baibul ma tere tut dok titone tek. Pingo? Pien jo manok keken aye giromo dyere me miyo lagam i paragraf ma kit meno. Ento ket kong ni, pud inongo ni pe kicimmi me miyo lagam i nge cokke mapol. Lok ki lador cokke ma peya cokke ocakke ci ititte pi lapeny ma imito gamone. w23.04 21-22 ¶9-10

Yucepu kare ducu onongo keto tira pa Jehovah i tic, dok meno oweko en obedo won gang maber. Tyen adek mapatpat, en onongo tira ki bot Lubanga ma kwako jo me ode. Tyen adek magi ducu, en olubo tira meno cutcut kadi bed timone onongo tek. (Mat. 1:20; 2:​13-15, 19-21) Lubo tira pa Lubanga oweko Yucepu ogwoko Maliam, okonye, dok omine jami me kom ma mitte. Tam kong kit ma jami ma Yucepu otimo oweko mar ki woro pa Maliam pire odongo matek! Wun co, wutwero lubo lanen pa Yucepu ka wuyenyo tira ma jenge i kom Baibul ka odok i kom gwoko jo me odiwu. Ka iketo tam man i tic, kadi bed timone pe yot, inyuto marri pi dakoni dok ijingo nyomwu. Laminwa mo ma bedo i lobo Vanuatu, ma dong orii i nyom pi mwaki makato 20 owaco ni: “Ka cwara yenyo dok keto i tic tira pa Jehovah, worona pire dongo matek. Awinyo ni atye agonya dok abedo ki gen matek i kom tam ma en moko.” w23.05 21 ¶5

Lujudaya ma gudwogo ki i Babilon onongo gibidoko “jo maleng” bot Lubangagi. (Nwo. 7:6) Ento meno onongo pe te lokke ni, pe mitte ni gutim alokaloka me yomo cwiny Jehovah. Pol pa Lujudaya onongo kinywalogi i Babilon dok onongo gungi woko ki tam kacel ki rwom me kwo pa Lubabilon. Mwaki mapol i nge dwogo pa gurup mukwongo i Icrael, Gabuna Nekemia obedo ki ur me niang ni lutino ma kinywalogi i Icrael onongo pe gupwonyo leb pa Lujudaya. (Nwo. 6:​6, 7; Nek. 13:​23, 24) Lutino magi onongo gibipwonnye me maro ki woro Jehovah nining ka pe gitwero niang leb Ibru—ma en aye leb ma kicoyo iye Lok pa Lubanga? (Ejira 10:​3, 44) Dong onongo mitte ni Lujudaya gutim alokaloka madongo, ento timo man onongo bibedo yot pien dong gibedo i lobo Icrael, ka ma onongo kitye ka roco iye woro me ada motmot.—Nek. 8:​8, 9. w23.05 15 ¶6-7

Ki cwercwiny, kadi bed watye ki miti madwong me tic nyo walubo yubwa kore ki kore, pud angola ngola twero bedo tye. Me labolle, “jami ma timme atura” twero kwanyo cawa ma omyero wati kwede me cobo yubwa. (Latit. 9:11) Watwero kato ki i peko mo ma turo cwinywa dok weko wawinyo ni kerowa nok adada. (Car. 24:10) Kit macalo watye ki roc, waromo timo gin mo ma weko bedo tek me cobo yubwa. (Rom. 7:23) Nyo watwero winyo ni waol woko. (Mat. 26:43) Ngo ma romo konyowa me loyo jami ma ngolle atura? Wi opo ni angola ngola pe tyen lokke ni omyero dong igik tuteni me cobo yubbi woko. Baibul tito ni watwero kato ki i peko teretere. Ento, tito bene ka maleng ni, pud watwero medde ki tute me cobo yubwa. Ada, ka imedde ki tute me cobo yubbi kadi bed timone tek, inyuto ki Jehovah ni imito yomo cwinye. Jehovah pud dong cwinye bedo yom ya ka oneno tuteni me cobo yubbi! w23.05 30 ¶14-15

Tic macalo painia marii konyo omego matidi me pwonyo kit me tic kacel ki dano mapatpat. Konye bene me pwonyo kit me tic ki cente ma en tye kwede maber kun pe wilo jami ma kerone pe romo. (Pil. 4:​11-13) Yo maber me donyo i tic pi kare malac aye me tic kong macalo painia pi tutunu, ma meno yubi me tic macalo painia marii. Ka dong icako tic macalo painia marii, ci kitwero lwongogi pi tic mukene, calo tic me gedo nyo tic i Betel. Omege ducu myero gutute me bedo ma gupore me tic pi omegigi ki lumegigi macalo luelda. Baibul waco ni co ma gitye ka tute matek me bedo mupore i yo man nongo ‘gimito tic maber.’ (1 Tem. 3:1) Omyero kong ibed mupore me tic macalo lakony kor tic. Lukony kor tic gikonyo luelda me gwoko omege ki lumege me kacokke. Luelda kacel ki lukony kor tic gimine ki mwolo me tic pi omege ki lumegigi dok gitito kwena ki mit kom. w23.12 28 ¶14-16

Kabaka Yocia onongo tye ki mwaka 16 i kare ma ocako yenyo Jehovah. En onongo mito pwonyo lok i kom Jehovah kacel ki timo Mitine. Ento, kwo onongo pe yot pi kabaka matidi-ni. Onongo mitte ni en ocung matek pi woro me ada i kare ma pol pa dano onongo gitye ka woro cal jogi. Dok en otimo meno! Ma mwaka pa Yocia peya oromo 20, en ocako jwayo woro goba woko ki i rok me Juda. (2 Tekwaro 34:​1, 2) Kadi bed pud itidi, itwero moko tammi me lubo lanen pa Yocia ki pwonyo lok i kom Jehovah kacel ki Kite mamwonya-ni. Timo man bitugo cwinyi me dyere bot Lubanga. Man bigudo kwoni nining? Omego Luke, ma onongo batija ki mwaka 14, owaco kit man i kare me batijane, “Cakke kombeddi, abiketo tic pi Jehovah bedo gin mukwongo i kwona dok abitute me yomo cwinye.” (Mar. 12:30) Pud dong bibedo ber ya ka itye ki miti macal ki pa Luke! w23.09 11 ¶12-13

I kare ma lakwena Paulo ocoyo waraga man, onongo kacokke me Tecalonika pud pe orii ma romo mwaka acel. Luelda ma iye onongo nen calo ngecgi pud nok dok pe gitimo jami mogo i yo mupore. Kadi bed kit meno, onongo gupore me awora. Ka twon can madit atika-ni woto ki nyiko cok, twero mitte ni wajenge i kom luelda me kacokkewa pi tira ma loyo i kare-ni. I kare meno, oromo doko tek adada me nongo tira ki i gang kalwa madit kacel ki i jang gang kal; dong pi meno, pire tek adada ni wapwonnye me maro ki woro lueldawa i kare-ni. Kadi bed gin ango otimme, omyero wagwokke kun pe waketo cwinywa i kom goro pa luelda, ento wiwa opo ni Jehovah tye ka tic ki Yecu Kricito me tiro co ma lugen magi. Kit macalo otok nyonyo gwoko wi lamony, genwa me larre gwoko tamwa. Waniang ni jami ma lobo-ni miyo konygi pe. (Pil. 3:8) Genwa konyowa me bedo ma wiwa opye mot. w23.06 11-12 ¶11-12

Jo ma giwinyo lwongo pa “dako ma laming” myero gumok tamgi: Tika gibijolo lwongone nyo gibikwero woko? Watye ki tyen lok mabeco me kwero tim tarwang. Kiwaco ni “dako ma laming” tye ka lwongo ni: “Pii akwala lim matek.” (Car. 9:17) “Pii akwala” obedo ngo? Baibul poro tim me buto i kin jo munyomme ki pii ma i wang it mamit. (Car. 5:​15-18) Laco ki dako ma gunyomme i te cik gitye agonya me nongo mit pa tim me buto. Ento, man pat adada ki “pii akwala.” Meno nen calo tye ka lok i kom tim me buto ma pe opore, nyo tim tarwang. Man pol kare timme i mung, kit macalo lakwo bene kwalo jami i mung. “Pii akwala” romo nen calo gin ma lim matek ka jo ma gitye ka matone gitamo ni ngat mo pe bingeyo timgi marac-ci. Ento nongo gitye ka bwolle kekengi pien Jehovah neno jami ducu! Ka warwenyo cwak pa Jehovah, meno aye gin makec nyo marac loyo, dong pe tye gin mo ma “lim” tarwang.—1 Kor. 6:​9, 10. w23.06 22 ¶7-9

Gin ango ma omyero itim ka iwinyo ni legani pe tye ka a ki i cwinyi, nyo pe itye ka nongo mit pa tito kwena kit ma yam con inongo kwede? Pe itam ni Jehovah dong okwanyo cwiny mere maleng woko ki boti. Macalo dano ma tye ki roc, kit ma wawinyo kwede bedo ka lokke kare ki kare. Ka mit komi ocako kwe woko, tam i kom lanen pa lakwena Paulo. Kadi bed en otute matek me lubo lanen pa Yecu, en onongo ngeyo ni i kare mogo pe ebibedo ki miti matek me cobo ticce. Paulo onongo omoko tamme me cobo ticce me pwony kadi bed mitine tye nyo pe. I yo acel-lu, pe imok tam ma lubbe ki kit ma iwinyo kwede keken. Mok tammi me timo gin ma atir kadi bed iwinyo calo pe imito. Ka imedde ki timo gin ma atir, ci i nge kare mo kit ma iwinyo kwede bilokke.—1 Kor. 9:16. w24.03 11-12 ¶12-13

Watwero nyuto mar bot omegiwa ki lumegiwa ki jologi macalo luremwa. (2 Kor. 6:​11-13) Pol pa wan watye i kacokke ma opong ki omege ki lumege ma kitgi pat kwedwa. Ka wapwonnye me neno jo mukene kit ma Jehovah nenogi kwede, ci wanyuto ka maleng ni wamarogi. Mar pire bibedo tek adada i kare me twon can madit atika-ni. Ka twon can meno ocakke, Jehovah bigwokowa nining? Nen kong gin ma Jehovah ociko ni jone myero gutim i kare ma kituro boma me Babilon macon: “Wubin, wun jona, wudony i kicikawu, ka wulor doggola woko; kong wukanne kunnu pi kare mo manoknok, nio wang ma akemo pa Rwot [Jehovah] dong okato.” (Ic. 26:20) Nen calo bimitte ni wan bene walub tira acel-lu i kare me twon can madit atika-ni. w23.07 6-7 ¶14-16

Nyut ki i ticci ni ibedo ngat ma niang. Pennye kekeni ni: ‘Tika dano ginena ni abedo ngat ma niang dok ajolo tam pa jo mukene? Nyo ginena macalo ngat ma lagingi, ger, dok wiye tek? Tika awinyo tam pa jo mukene dok atimo mitigi ka opore?’ Ka wamedde ki lubo lanen pa Jehovah ki Yecu, ci wabimedde bene ki nyuto niango. Mitte ni wanyut niango ka kwowa olokke. Alokaloka mogo gitwero keliwa pekki ma onongo pe watamo ni wabikato ki iye. Me labolle, watwero nongo peko me yotkom atura. Nyo peko me can lim nyo alokaloka i gamente twero weko kwowa bedo matek adada. (Latit. 9:11) Twero bene bedo tek botwa me tic pi Jehovah ka ce dulle ominiwa mot me tic mukene nyo kikobowa i kabedo mukene. Labongo paro pi alokaloka ma otimme, pud watwero cobo ticwa ka watimo jami angwen magi: (1) ye ni kwoni otyeko lokke woko, (2) tam i kom anyim ento pe kwoni macon, (3) ket cwinyi i kom jami mabeco ma tye i kwoni, dok (4) tim jami me konyo jo mukene. w23.07 21-22 ¶7-8

Lanebi Daniel onongo obedo awobi matidi i kare ma Lubabilon gumake ki i Jerucalem ci gutere macalo mabuc wa i Babilon. Ento kadi bed Daniel onongo pud awobi, en ogudo cwiny ludito me Babilon. Gin guneno “kome ki woko”—ni Daniel kome “pe ki mwonyo” dok tye i kin litino ker. (1 Cam. 16:7) Pi tyen lok magi, Lubabilon gucako mine pwonnye me tic i gang kal. (Dan. 1:​3, 4, 6) Jehovah omaro Daniel, pien awobi man oyero me bedo lagen bot Jehovah. Ki lok ada, i kare ma Jehovah oporo Daniel ki Nua gin ki Yubu, Daniel nen calo onongo pud tye i kine ka mwaka 20 keken. Dong Jehovah onongo neno Daniel macalo ngat ma kite atir calo Nua ki Yubu, ma onongo gutiyo pire ki gen pi mwaki mapol. (Acak. 5:32; 6:​9, 10; Yubu 42:​16, 17; Ejek. 14:14) Dok Jehovah omedde ki maro Daniel pi kare me kwone ducu.—Dan. 10:​11, 19. w23.08 2 ¶1-2

Ka itye ka moko tammi me wilo ot, ibibedo ki miti me neno jami ducu ma kwako ot ma imito wilo-ni ki wangi. Watwero timo gin marom aroma ka watye ka kwano Baibul i yo matut. Ka ikwano mere oyotoyot, ibipwonyo lok mayot—ma en aye “lok mukwongo ma dok i kom lok pa Lubanga” keken. (Ibru 5:12) Ento, kit macalo mitte ni idony wa i ot wek iniang jami mapol i kom ot meno, mitte bene ni ikwan Baibul i yo matut wek iniang lokke maber. Yo maber me kwano Baibul aye me neno kit ma bute moni kubbe kwede ki bute mukene. Pe itute me niang gin ma in iye keken ento bene pingo iye lok ada magi. Me niang Lok pa Lubanga maber, mitte ni wapwony lok ada me Baibul ma tere tut. Lakwena Paulo ocuko cwiny Lukricitayo luwote me kwano Lok pa Lubanga ki diro wek ‘guniang kit ma lok ada lac kwede, kit ma bor kwede, kit ma odongo kwede malo, ki kit ma tut kwede.’ Ka onongo gutimo meno, ci gibicung “matek macalo yat ma lwite odonyo matut i ngom.” (Ep. 3:​14-19) Wan bene omyero watim kit meno. w23.10 18 ¶1-3

Baibul tye ki labol mapol pa jo ma gudiyo cwinygi. Pingo pe iket macalo yubbi me timo kwed i kom labol pa jo magi? Me labolle, kadi bed Daudi onongo tidi adada i kare ma kiwire me doko kabaka me Icrael, onongo mitte ni en okur pi mwaki mapol ma peya obedo i wi komker. Cimeon ki Anna gutiyo pi Jehovah ki gen i kare ma gubedo ka kuro bino pa Meciya ma kiciko pire-ni. (Luka 2:​25, 36-38) Ka iwoto ki kwano labol magi, yeny lagam pi lapeny magi: Gin ango ma romo bedo ni okonyo ngat meno me diyo cwinye? En onongo adwogi mabeco ango pi diyo cwinye? Atwero lubo lanenne nining? Itwero bene nongo adwogi maber ki i kwano lok i kom jo ma pe gudiyo cwinygi. (1 Cam. 13:​8-14) Itwero pennye kekeni ni: ‘Ngo ma nen calo oweko pe gudiyo cwinygi? Peko ango ma gukato ki iye pien pe gudiyo cwinygi?’ w23.08 25 ¶15

Lakwena Petero onongo obedo lagen; en pe oye ni gin mo keken ogenge ki lubo kor Yecu. Me labolle, i nino mo acel, Yecu owaco gin mo ma lupwonnyene pe guniang iye. (Jon 6:68) Labongo kong diyo cwinygi jo mapol i kingi gujuko lubo kore woko. Kadi bed kit meno, Petero pe ojuko lubo kor Yecu. En onongo obedo lagen dok owaco ni Yecu keken aye tye ki “lok me kwo ma pe tum.” Yecu onongo ngeyo ni Petero kacel ki lupwonnye mukene-ni gibikwere woko. Kadi bed kit meno, Yecu owaco ni etye ki gen ni Petero onongo pud bidwogo cen dok bimedde ki bedo lagen bote. (Luka 22:​31, 32) Yecu oniang ni “cwiny kikome mito loyo abita pa Catan, ento kom aye nyap.” (Mar. 14:38) Dong, kadi bed Petero okwero ni pe engeyo Yecu, Yecu pe oilo cinge woko i kom Petero. I nge cerne, Yecu onen bot Petero i kare ma Petero onongo tye kakene. (Mar. 16:7; Luka 24:34; 1 Kor. 15:5) Man nen calo pud dong ocuko cwiny Petero ya! w23.09 22 ¶9-10

Lubanga timo kica nyo umo bal pa jo ma giketo niyegi i kome. En timmigi kica i yo ducu dok pe kwano balgi i komgi. (Jab. 32:​1, 2) Ki tung bote, jo ma kit meno gipe ki bal dok kitgi atir pi niyegi. Kadi bed Lubanga olwongogi ni kitgi atir, Abraim, Daudi, ki lutic pa Jehovah mukene ma lugen onongo pud gitye ki roc. Ento pi niyegi, Lubanga onenogi calo jo ma balgi pe, tutwalle ka kiporogi ki jo ma onongo pe giworo Lubanga. (Ep. 2:12) I waragane bot jo Roma, lakwena Paulo otito ni omyero wabed ki niye wek wabed lurem Lubanga. Abraim ki Daudi gubedo lurem Lubanga pien onongo gitye ki niye. Wan bene watwero bedo lurem Lubanga pi niyewa. w23.12 3 ¶6-7

I kare-ni, Lukricitayo ducu gitye ki mot me woro Jehovah kun gitiyo ki cawagi, kerogi, ki jami me kom ma gitye kwede. Watwero nyuto ni watye ki pwoc pi motwa me woro Jehovah ka wamiyo bote gin maber loyo ma watye kwede. Lakwena Paulo oryeyo jami ma kare ducu omyero watim ka waworo Jehovah. (Ibru 10:​22-25) Jami magi kwako lega bot Jehovah, tito kwena, cokke kacel, ki dong cuko cwiny luwotwa ‘makatone kit macalo waneno nino maca dong tye ka nyiko cok-ki.’ I agikki me buk me Niyabo, lamalaika pa Jehovah owaco ni: “Wor Lubanga.” (Yabo 19:10; 22:9) En onwoyo lok man tyen aryo me nyuto kit ma lok man pire tek kwede. Dong walego ni wiwa pe owil i kom ada ma tere tut ma wapwonyo ma kwako ot pa Jehovah i yo me cwiny, kacel ki mot ma watye kwede me woro Lubangawa madit tutwal-li! w23.10 29 ¶17-18

Wan ducu “myero wamarre kekenwa.” Ento, pire tek ni wiwa opo ni Yecu ociko ni “mar pa jo mapol bikwe woko.” (Mat. 24:12) Yecu onongo pe tye ka waco ni pol pa lupwonnyene gibigiko nyuto mar woko bot luwotgi. Kadi bed kit meno, omyero wabed ma wangwa twolo wek cwiny pa jo me lobo man ma gipe ki mar pe ogudwa. Kong dong wanyamu lapeny man ma pire tek-ki: Ngo ma bikonyowa me ngeyo ka marwa pi utmegiwa tye matek? Yo acel me ngeyo ka marwa pi utmegiwa tye matek aye ki ngiyo kit ma wadok kwede iye ka niang manok tye. (2 Kor. 8:8) Lakwena Petero oloko iye kun waco ni: “Makato ducu wumok matek i marre kekenwu; pien mar umo lwak bal mapol.” (1 Pet. 4:8) Dong, kit ma wadok kwede iye ka utmegiwa gutimo bal nyo gucwero cwinywa bikonyowa me niang ka marwa pigi tye matek. w23.11 10-11 ¶12-13

Ka wayero ayera anga ma omyero wanyut mar bote ci nongo pe watye ka lubo cik ma Yecu omiyo me nyuto mar. Ngene kene ni, lirem i kinwa twero bedo cok ki jo mogo loyo jo mukene. (Jon 13:23; 20:2) Ento lakwena Petero opoyo wiwa ni omyero watute matek me marre kekenwa “macalo utmego”—pien omege ki lumege gitye jo me ot acel. (1 Pet. 2:17) Petero ocoyo ni, “Wumarre kekenwu mada ki cwinywu ducu.” (1 Pet. 1:22) Ma lubbe ki lok pa Petero man, ‘marre kekenwa mada’ tyen lokke ni omyero wamar ngat moni kadi bed tek me nyutone. Me labolle, ket kong ni omego mo ocwero cwinywa. I acakkine, watwero bedo ki tam ni omyero wadwok gin marac i kom marac, me ka nyutte mar. Ento Petero opwonyo ki bot Yecu ni dwoko gin marac i kom marac pe yomo cwiny Lubanga. (Jon 18:​10, 11) Petero ocoyo ni: “Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubanga obed i komgi.” (1 Pet. 3:9) Ka watye ki mar matut, wabibedo lukica kun waparo pi luwotwa. w23.09 28-29 ¶9-11

Wabedo ki ur me neno kit ma latin dongo kwede oyotoyot me doko dano madit. Dongo man twero nen calo timme pire kene. Ento, dongo me doko Lakricitayo muteggi pe timme pire kene. (1 Kor. 13:11; Ibru 6:1) Wek meno otwere, mitte ni wadong wat macok ki Jehovah. Wamito bene cwiny mere maleng wek okonywa me dongo kit mogo ma en pwoyo, me pwonyo diro mapatpat, ki dong yubbe pi cobo tic ma waromo kemme kwede i anyim. (Car. 1:5) Jehovah ocweyo laco ki dako. (Acak. 1:27) Laco pat ki dako i kit ma ginen kwede, ento gipat i yo mukene bene. Me labolle, Jehovah ocweyo laco ki dako ni gucob tic mapatpat, pi meno mitte ni gubed ki diro kacel ki kit mogo ma twero konyogi me cobo ticgi magi.—Acak. 2:18. w23.12 18 ¶1-2

Tika onongo Yecu mito ni jo mukene guti ki nying Wonne? Labongo akalakala mo. Lupwonye dini mogo me kare meno onongo nen calo gitamo ni pe nyuto woro me lwongo nying Lubanga, ento Yecu pe oweko tim me tekwarogi meno ogenge ki keto deyo i kom nying Wonne. Tam kong i kom kare ma en ocango dano mo ma tye ki cen maraco i kabedo me Geraca. Jo ma kunnu lworo omakogi matek dok gubako doggi bot Yecu ni omyero oa woko ki i lobo tugi. (Mar. 5:​16, 17) Kadi bed kit meno, Yecu onongo mito ni nying Jehovah ongene i kabedo meno. Pi meno, en owaco bot laco ma en ocango-ni ni otit ki dano gin madit ma Jehovah, ento pe Yecu, otimo pire. (Mar. 5:19) En mito gin acel-lu i kare-ni, ni wawek nying Wonne ongene i wi lobo ducu! (Mat. 24:14; 28: 20) Ka watimo meno, wayomo cwiny Kabakawa Yecu. w24.02 10 ¶10

Watye ki mot madit me bedo i dul pa Jehovah i kare man me agikki ma kwo tek-ki. Kwo i lobo man tye ka doko tek medde ameda, ento Jehovah ominiwa omege ki lumege ma gikonyowa. (Jab. 133:1) En konyowa me bedo ki yomcwiny i paciwa. (Ep. 5:33–6:1) Dok en miniwa ryeko ma wamito me lweny ki par wek wabed ki yomcwiny. Ento omyero watute matek me medde ki tic pi Jehovah ki gen. Pingo? Pien i kare mogo jami ma dano giwaco nyo gitimo cwero cwinywa. Cwinywa bene twero tur ka watimo bal, tutwalle ka wabedo ka nwoyo bal acel-li teretere. Mitte ni wadi cwinywa i tic pi Jehovah (1) ka omego nyo lamego mo ocwero cwinywa, (2) ka ngat ma wanyomme kwede oturo cwinywa, ki (3) ka cwinywa otur pi bal ma watimo. w24.03 14 ¶1-2

Kare ki kare, ibiwinyo pi omege ki lumege ma gumedo ticgi pi Jehovah. Gwok nyo gucito i Cukul pi Lutit Kwena me Ker-ri nyo gukobo ka ma can lutit kwena tye iye. Ka itwero keto yub ma kit meno, ci nongo ber adada. Jo pa Jehovah kare ducu giyenyo yo me medo ticgi pire. (Tic 16:9) Ento, ket kong ni i kare-ni pe itwero timo meno? Pe itam ni jo ma gitwero medo ticgi, giber giloyi. Gin ma pire tek aye ni imedde ki diyo cwinyi i ngwec me kwo. (Mat. 10:22) Wi pe owil ni, iyomo cwiny Jehovah matek ka itiyo pire ma lubbe ki keroni. Meno obedo yo ma pire tek ma itwero medde ki lubo kor Yecu i nge nongo batija.—Jab. 26:1. w24.03 10 ¶11

Wonwa me polo ocikke me timiwa kica ka wangut i kom balwa. (Jab. 86:5) Dong ka ada wangut i kom balwa ki cwinywa ducu, watwero bedo ki gen ni lok pa Jehovah tye ada dok en otyeko timiwa kica. Wi opo ni Jehovah pe obedo lagingi. En pe mito ni watim gin ma kerowa pe twero. En pwoyo gin mo keken ma watimo pire ka obedo gin maber loyo ma watwero. Medo i kom meno, tam i kom jo mogo ma kiloko i komgi i Baibul ma gutiyo pi Jehovah ki cwinygi ducu. Me labolle, tam i kom lakwena Paulo. En otiyo matek pi mwaki mapol, kun woto pi mairo alip mapol dok ocako kacokke mapol. Ento i kare ma kwone olokke dok onongo pe twero tito kwena kit macon, tika en orwenyo cwak pa Lubanga woko? Pe kumeno. En omedde ki timo gin ma en twero, dok Jehovah ogoyo laane i kome. (Tic 28:​30, 31) I yo acel-lu, gin ma watwero miyo ki Jehovah oromo lokke i kare mogo. Ento gin ma pire tek loyo bote obedo tyen lok mumiyo watiyo pire. w24.03 27 ¶7, 9

Yecu oweko lanen maber pi lupwonnyene ki i lega ma en olego bot Jehovah. I kare me ticce me pwony, Yecu obedo ka lega teretere. Onongo mitte ni en okwany kare me lega pien pol kare onongo bedo ki tic mapol dok nongo lwak gurume woko. (Mar. 6:​31, 45, 46) En onongo a odiko con ma piny pud col wek ebed ki kare me lega. Tyen makato acel, en obedo ka lega dyewor benebene ma peya omoko tam ma pire tek. (Luka 6:​12, 13) Dok Yecu olego teretere i dyewor ma en peya kineke pien en onongo oketo cwinye me cobo tic matek loyo ma onongo tye i nyimme i lobo kany. (Mat. 26:​39, 42, 44) Lanen pa Yecu pwonyowa ni kadi bed watye ki tic mapol adada, pud mitte ni wakwany kare me lega. Calo Yecu, twero mitte ni waket cawa me lega. Gwok nyo watwero a odiko con nyo kong wabedo pi cawa mo otyeno ma peya wacito i kabuto. Ka watimo meno, wanyuto bot Jehovah ni watye ki pwoc pi mic mamwonya-ni. w23.05 3 ¶4-5

Nen kong nyig lok man ni “gionyo” i ginacoyawa matin. Buk mo acel ma loko i kom Baibul otito ni bedo “calo pii kulu ma kionyo i komwa.” Lapor man pud dong nyuto tut pa mar pa Jehovah pi Lukricitayo ma kiwirogi ya! Jo ma kiwirogi, gingeyo ni gitye i “mar pa Lubanga.” (Juda 1) Lakwena Jon otito kit ma jo ma kiwirogi giwinyo kwede ni: “Kong wunen kit mar madit ma Won omiyowa, ni gilwongowa ni wan litino pa Lubanga!” (1 Jon 3:1) Tika Jehovah maro jo ma kiwirogi keken? Pe tye kit meno, Jehovah onyuto mar mere ka maleng pi wan ducu. Gin madit loyo ma Jehovah omiyo me nyuto marre piwa obedo ngo? Obedo mic me ginkok. I kare ma en omiyo mic meno, Jehovah onyuto mar madwong ma loyo ngat mo keken!—Jon 3:16; Rom. 5:8. w24.01 28 ¶9-10

Tyeng ma malo-ni nyuto yo acel ma Daudi oloyo kwede ki lworone. Kadi bed kwone onongo pud tye ka mading, en olwodo gin ma Jehovah bitimone pire i anyim. Daudi onongo ngeyo ni Jehovah bilarre i kare mupore. Tye kit meno pien onongo Jehovah otito con ni Daudi bidoko kabaka me Icrael i nge Caulo. (1 Cam. 16:​1, 13) Ki tung bot Daudi, gin mo keken ma Jehovah ocikke pire wang ma ocobbe. Gin ango ma Jehovah ocikke me timo piri? Pe myero watam ni en bigengo peko ducu ma bino i komwa i kare-ni. Ento, kadi bed wakat ki i peko ma nining i lobo man marac-ci, Jehovah bijwayogi woko ducu i lobo manyen. (Ic. 25:​7-9) Lacwecwa tye ki teko me cero jo muto, cango twowa, jwayo cwercwinywa, ki jwero lumonene ducu.—1 Jon 4:4. w24.01 6 ¶12-13

Bed ka tam i kom tyen lok mumiyo idyero kwoni bot Jehovah dok inongo batija. Itimo jami magi pien onongo imito cung tung bot Jehovah. Wi myero obed ka po i kom gin ma okonyi me moko ni inongo ada. Inongo ngec ma atir i kom Jehovah dok meno oweko woroni kacel ki marri pire macalo Woru me polo odongo matek. Idongo niye dok meno otugo cwinyi me ngut i kom balli. Ijuko timo jami ma Jehovah dagi dok icako timo jami ma yomo cwinye. Cwinyi pe dong obedo ka pidi i kare ma iniang ni Lubanga otyeko timmi kica. (Jab. 32:2) Icako wire i cokke pa Lukricitayo kun bene inywako ki jo mukene jami mabeco ma itye ka pwonyone. Macalo Lakricitayo ma odyero kwone dok onongo batija, i kare-ni dong itye ka wot i yo ma terowa i kwo, dok imoko tammi pe me a ki i yo meno. (Mat. 7:​13, 14) Dong omyero icung matek ka odok i kom miyo woro bot Jehovah keken kun pe iyenge ka odok i kom lubo cikke. w23.07 17 ¶14; 19 ¶19

Ka ibedo ka lwodo legani me dyere bot Jehovah, ci ibinongo teko me kwero atematema mo keken. Me labolle, tika itwero cako nyuto miti i kom ngat mo ma dong onyomme woko? Pe twere kulu! Nongo dong ityeko cikke woko bot Jehovah ni pe ibitimo gin ma kit meno matwal. Ka pe iye ni miti ma kit meno odong i cwinyi, ci pe ibibedo ki peko me jwayone lacen. Dong meno biweko ‘ilokke woko’ ki i “yo pa jo maraco.” (Car. 4:​14, 15) Lwodo labol pa Yecu bikonyowa. En omoko tamme me yomo cwiny Wonne. Calo Yecu, mok tammi me kwero lajwac gin mo keken ma ingeyo ni pe biyomo cwiny Lubanga ma idyere bote-ni. (Mat. 4:10; Jon 8:29) Lok ada tye ni, atematema mini kare me nyuto ni imoko tammi me medde ki lubo kor Yecu. Dok itwero bedo ki gen ni Jehovah bikonyi me timo meno. w24.03 9-10 ¶8-10