Tic ma Pud Dong Pire Tek Loyo
1. Jami ango ma wabijalone ka ce watye ki pwoc pi ticwa me pwony-nyi?
1 Pingo kare ki kare kicuko cwinywa me jalo cawa, kero, ki jami ma watye kwede pi ticwa me pwony? Pien pe tye tic mo ma pire tek loyo tic man! Lwodo lok i kom kit ma ticwa-ni gudu kwede kwo pa dano bimedo mitiwa me nywako i tic man ma pe dong kibinwoyone-ni.—Tic 20:24.
2. Ticwa me tito kwena-ni konyo me lonyo nying Jehovah madit-ti nining?
2 Lonyo Nying Jehovah: Tic me tito kwena-ni nyuto ka maleng ni Ker pa Jehovah i te loc pa Yecu Kricito bileyo ka gamente pa dano ducu dok en aye bicobo pekki ducu ma dano tye iye. (Mat. 6:9, 10) Jehovah keken aye ngat ma oywek ma twero larowa ki i two kacel ki to. (Ic. 25:8; 33:24) Kit ma kilwongowa ki nyinge-ni, ka jo mukene gineno kitwa mabeco kacel ki mit komwa, ci gin bene giromo miyo deyo bote. (1 Pet. 2:12) Pud dong keliwa yomcwiny madit atika me tito nying Jehovah Rwot Won Twer i twok lobo ducu!—Jab. 83:18.
3. Mot ango ma jo ma gijolo kwena maber me Ker-ri ginongo?
3 Laro Kwo: Jehovah “pe mito ni ngat mo orweny woko matwal, ento mito ni jo ducu guo i ningut.” (2 Pet. 3:9) Ento, dano gitwero pwonyo kit ma Jehovah neno ni atir nyo pe atir nining labongo ngat mo ma pwonyogi? (Yona 4:11; Rom. 10:13-15) Ka dano gijolo kwena maber-ri, kwogi lokke ka giwoto ki weko tim maraco. (Mika 4:1-4) Medo i kom meno, gibedo ki gen me nongo kwo ma pe tum. Ka watiyo matek i tic me tito kwena ki pwonyo dano, ci wabinongo larre kacel ki jo ma winyowa. (1 Tem. 4:16) Pud dong watye ki mot madit i tiyo tic man ma pire tek loyo ducu-ni ya!
4. Pingo omyero watute matek i tic me tito kwena me Ker-ri ki loko dano me doko lupwonnye?
4 Cokcok-ki lobo man marac-ci bigik atura ka twon can madit atika-ni oo. Jo ma giworo Jehovah gibibwot. Pi meno, tic me tito kwena ki loko dano me doko lupwonnye-ni mitte pi oyot, pire tek, dok tic man kelo mot maber loyo i kareni. Dong waketu tic man obed tic ma pire tek loyo i kwowa!—Mat. 6:33.