Dul Me 10
Ker pa Lubanga Tye ka Loc
1, 2. Dong onen ka maleng ni gamente pa dano pe twero timo ngo?
GWOK nyo in bene ibiwilo macin mo, ento inongo ni pe tiyo. Kong waket calo lapor ni ilwongo fundi ni oyubi. Ento cutcut i nge “yubone,” dok obale woko. Man twero wango cwinyi adada!
2 Eni rom aroma ki gamente pa dano. Cakke con, dano gubedo ka mito gamente ma romo kelo botgi kuc ki yomcwiny. Ento yellegi matek me yubo kwo pa dano wek obed ki kuc pud peya ocobbe kakare. Keto cing mapol me kelo kuc otimme ento ingeye kiturogi woko. Gamente mene mono ma dong otyeko juko can, adegadega pi rangi del kom, turo cik, two, ki ballo lobo ki jami ma iye? Loc pa dano dong pe twero yubbe. Kadi Kabaka Solomon maryekki bene openyo ni: “Dano twero niang kit kwo ma etye kwede nining?”—Carolok 20:24.
3. (a) Wi pwony pa Yecu onongo tye ningo? (b) Jo mogo giwaco ni Ker pa Lubanga obedo gin ango?
3 Pe irweny genni! Gamente ma biloyo wi lobo ducu dok ma bicung matwal pe obedo lek mamwa. Man aye obedo wi lok me pwony pa Yecu. En obedo ka lwongo-ne ni “ker pa Lubanga,” dok bene opwonyo jo ma lube me lega pire. (Luka 11:2; 21:31) Ker pa Lubanga kono gire i kare mukene jo ma ludini loko i kome. I ada, dano milion mapol gilego pire nino ki nino ka gitye ka nwoyo kilega pa Rwotwa (ma kilwongo bene ni Wonwa ma i polo). Ento ka kipenyogi ni ‘Ker pa Lubanga obedo gin ango,’ dano gigamo i yo mapatpat. Jo mogo giwaco ni, “Tye i cwinyi.” Jo mukene gilwongo ni polo. Kit ma wabineno kwede, Baibul miyo lagam ma niang iye yot.
KER MA TYE KI YUB
4, 5. Pingo Jehovah oyero me nyuto twero me locce i yo manyen, dok loc meno bitimo gin ango?
4 Cakke con Lubanga Jehovah gire obedo Kabaka, nyo Laloc ma Malo Twal, i polo ki lobo. Rwom meno ma malo-ni en tye kwede pien en aye ocweyo jami ducu. (1 Tekwaro 29:11; Jabuli 103:19; Tic pa Lukwena 4:24) Ento Ker ma Yecu opwonyo pire-ni dok rwomme tidi ka kiporo ki twero me loc pa Lubanga i polo ki lobo. Ker pa Meciya-ni tye ki yub ma otike, ento yub meno obedo yub ango?
5 Kit ma kitito kwede i Dul me 6, jo aryo mukwongo-ni gujemo woko i kom twero pa Lubanga. Pi lok ma okatti ki iye oweko Jehovah oyero me nyuto twero me locce i yo manyen. Lubanga owaco pi yubbe me kelo “lakwaro” ma binyoto Twol, ma en Catan, ki bene bikwanyo jami ma bal alaka pa kwarowa okelo. “Lakwaro” madit man aye Yecu Kricito dok “ker pa Lubanga” aye obedo gin ma Yecu bitic kwede me bwoyo Catan dong matwal. Yecu Kricito obitiyo ki Ker man me dwoko loc me wi lobo i nying Jehovah ki bene obinyuto ber pa twero me loc pa Jehovah pi kare ducu.—Acakki 3:15; Jabuli 2:2-9.
6, 7. (a) Ker pa Lubanga tye kwene, dok anga ma obedo kabakane, ki bene angagi ma biloc kacel kwede? (b) Ker meno biloyo angagi?
6 Kit ma Baibul mo acel ogonyo kwede lok pa Yecu i kom Luparicayo ma kitgi raconi, en owaco ni: “Ker pa Lubanga tye i iwu.” (Luka 17:21, King James Version) Yecu onongo mono tye ka mito ni guniang ni Ker pa Lubanga tye i cwiny Luparicayo maraco ma gubedo jo ma lubuma-ni? Pe gire. Baibul me leb Acholi ogonyo lok man atir tutwal ki i leb Grik macon, ma kwanne ni: “Ker pa Lubanga dong tye i kinwu.” (coc ma obuto abuta-ni megwa) Yecu ma onongo tye i kin-gi-ni obedo ka lok i kome kekene ni en aye ebedo Kabaka ma biloc i anyim. Ker pa Lubanga pe obedo gin ma bedo i cwiny dano, ento obedo gamente ma tye ada, gamente ma tye ka tic, ma tye ki lalocce ki jo ma en loyo. Obedo gamente me polo pien kilwongo i yo aryo ni “ker me polo” ki “ker pa Lubanga.” (Matayo 13:11; Luka 8:10) I lanyut, lanebi Daniel oneno Lalocce ma obedo “macalo dano” ka gikelo i nyim Lubanga Won Twer Ducu ci loc ma ri nakanaka “gitingo . . . ducu gimiyo i cinge, kacel ki ker ducu ki deyone, wek lwak me rok ducu ki rok ducu, ki jo ma loko leb mapatpat-gu ducu, gubed luticce.” (Daniel 7:13, 14) Kabaka man obedo anga? Baibul lwongo Yecu Kricito ni “Wod pa dano.” (Matayo 12:40; Luka 17:26) Eyo, Jehovah oyero Wode, Yecu Kricito, me bedo Kabaka.
7 Yecu pe loyo loc kene. En tye ki jo 144,000 ma “gikokogi woko ki i lobo” me tic calo luloc ki lulamdog. (Niyabo 5:9, 10; 14:1, 3; Luka 22:28-30) Jo ma Ker pa Lubanga biloyogi bibedo jo ma gimine me bedo i te loc pa Kricito dok gibibedo i wi lobo ducu. (Jabuli 72:7, 8) Wangeyo kono nining ni Ker man binyuto twero me loc pa Lubanga ki dok bidwoko kwo me paradic i lobo kany?
GIN MA NYUTO NI KER PA LUBANGA TYE ADA
8, 9. (a) Waromo tic ki lapor ango me nyuto ni cikke ducu me Ker pa Lubanga genne? (b) Pingo watwero ye ni Ker-ri tye ada?
8 Ket kong ni mac owango gangi woko. Laremi mo ma tye ki lim ocikke ni ebikonyi ki gero odi odoco dok bene ni ebimiyo cam bot jo me ot-ti. Ka laremi-ni onongo obedo dano ma genne, in pe ibiye lokke? Kong waket ni orwone idwogo ki i dog tic ci inongo gicako yweyo buru oti ma owangi ki cam bene kikelo ki jo me odi. Labongo akalakala, iromo bedo ki tekcwiny ni motmot, jami pe biyube ayuba keken, ento bibedo ber ma kato kit ma con onongo tye kwede woko.
9 I yo acel-li, Jehovah bene nyutiwa ni Ker-ri tye ada. Kit ma kinyuto kwede i Baibul i buk me Jo Ibru, jami mapol mapatpat ma i cik pa Moses onongo ocung pi yub me Ker man. (Jo Ibru 10:1) Kit ma Ker pa Lubanga bibedo kwede onongo bene onen i ker pa Icrael macon i lobo. Man onongo pe obedo calo gamente mo keken, pien lulocce onongo gibedo “i wi komker pa [Jehovah].” (1 Tekwaro 29:23) Medo i kom meno, onongo dong kitito woko con ni: “Odoo-ker pe bia ki bot Juda, tal-ker bene pe bia ki ka tyene, nio ka rwode kikome bibino; en aye rok ducu biworo doge.” (Acakki 49:10)a Ada, Yecu ma en aye Kabaka matwal me Ker pa Lubanga onongo gibinywalo ki i ot pa luker me Juda.—Luka 1:32, 33.
10. (a) Guti me Ker pa Meciya-ni kiketo awene? (b) Tic ango ma pire tek ma jo ma gibiloc kacel ki Yecu gibitelone i lobo?
10 Guti me Ker pa Meciya pa Lubanga kiketo i kare ma giyero iye lukwena pa Yecu. (Jo Epeco 2:19, 20; Niyabo 21:14) Man aye jo mukwongo ki i kom jo 144,000 ma gibiloc i polo kacel ki Yecu Kricito. Ka pud gitye i lobo, jo magi ma biloc-ci kong gibitelo wi tic me miyo caden ma lubbe ki lok ma Yecu ociko ni: “Wuciti wucilok jo me rok ducu gudok jo ma luba, kun wubatijagi i nying Won ki Wod ki [c]winy [m]aleng.”—Matayo 28:19.
11. Tic me pwony i kom Ker-ri kitye ka tiyone nining i kare-ni, dok pwony man tye kelo alokaloka ango?
11 Cik me pwonyo dano me doko jo ma lubu Yecu-ni dong gitye ka lubone i yo mamalo loyo i kare macon ducu. Lucaden pa Jehovah gitye ka tito lok me kwena maber me ker pa Lubanga i wi lobo ducu, ma rwatte ki lok pa Yecu ma owaco ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Matayo 24:14) Macalo but tic acel me tito lok me Ker-ri, pwony madit adada tye ka wot anyim. Jo ma giye lubo cik ki pwony me Ker pa Lubanga dong gitye ka nongo kuc ki ribbe ma gamente pa dano pe twero kelone. Man ducu nyuto ka maleng ni Ker pa Lubanga obedo gin ma tye ada!
12. (a) Pingo porre me lwongo lupwonye me Ker ni Lucaden pa Jehovah? (b) Ker pa Lubanga dok pat ki gamente pa dano nining?
12 Jehovah owaco ki jo Icrael ni: “Wun cadenna . . . wun wubedo luticca ma an aye yam ayero.” (Icaya 43:10-12) Yecu, “Lacaden ma Genne,” otito lok me kwena maber me Ker pa Lubanga ki mit kom adada. (Niyabo 1:5; Matayo 4:17) Pi meno, dong pore ni lutit lok me Ker man i kare-ni omyero guti ki nying ma Lubanga aye omiyo ni Lucaden pa Jehovah. Ento pingo Lucaden pa Jehovah gitero cawa malac dok bene giketo tek tutwal me lok ki jo mukene i kom Ker pa Lubanga? Gin timo man pien Ker-ri aye pud dong gen acel keken ma wan dano wadong kwede. Gamente pa dano tur woko oyotoyot nyo olo twal gik woko, ento Ker pa Lubanga pe bigik. Icaya 9:6, 7 lwongo Lalocce, ma en aye Yecu ni, “Laloc ma kelo kuc” ka dok medo ni, “medde me locce ki kuc ma bia iye ka gikke bibedo pe.” Ker pa Lubanga pe cal ki gamente pa dano—ma tin tye ento diki nongo gituro woko-ni. I ada, Daniel 2:44 waco ni: “Lubanga me polo biketo ker mukene ma ri nakanaka ma pe gitwero balone, kadi dit me locce bene pe gibiweko i cing rok mukene. . . . En aye dong bicung matwal.”
13. (a) Peko mene ma Ker pa Lubanga obicobo mapwot? (b) Pingo watwero moko ni cikke pa Lubanga obicobbe kakare?
13 Kabaka ma dano mene ma twero giko jami calo lweny, turo cik, two, kec ki bedo labongo paco? Medo i kom meno, laloc mene me lobo-ni ma twero cero jo muto? Ker pa Lubanga ki Kabakane bitic i kom jami magi. Ker man tic pe biloyo, calo macin marac ma kare ducu mito ayuba-ni. Ma ka meno, Ker pa Lubanga bicobo jami ducu maber, pien Jehovah ocikke ni: “Lok ma a ki i doga . . . pe bidwogo bota nono ma nongo pe otiyo gin mo, lokka bitiyo gin ma amito ni oti, dok bicobo gin ma acwale pire.” (Icaya 55:11) Yub pa Lubanga pe bitur, ento loc me Ker-ri onongo kono myero ocakke awene?
LOC ME KER—AWENE?
14. Niang manok ango ma jo ma lubo Yecu onongo gitye kwede i kom Ker-ri, ento ngo ma Yecu onongo ngeyo i kom locce?
14 “Rwot, i kare man en aye ibidwoko iye ker bot jo Icrael bo?” Lapeny man ma jo ma lubo Yecu gupenyo-ni onongo nyuto ni i kare meno gin onongo pud pe gingeyo tic pa Ker pa Lubanga kacel ki kare ma gicimo ni myero ocak loc iye. Yecu ocikogi ni omyero pe gupong lok-ki aponga ki wigi kun waco ni: “Pe wun aye myero wunge kare wa nino ma yam Lubanga Won omoko i te twero mere.” Yecu ongeyo ni locce i wi lobo onongo pud tye pi kare me anyim, i kare mabor ata i nge cer ki dokke i polo. (Tic pa Lukwena 1:6-11; Luka 19:11, 12, 15) Ginacoya gire onongo oloko iye con. Oloko iye nining?
15. Jabuli 110:1 konyowa nining me niang kare me cakke me loc pa Yecu?
15 Macalo lanebi, Kabaka Daudi olwongo Yecu ni ‘rwot,’ kun waco ni: “Rwot [Jehovah] owaco bot rwoda ni ‘Bed i ngeta yo tung acuc i kabedo me deyo, nio ka abimiyo lukworri gidoko kom laten tyeni.’” (Jabuli 110:1; por ki Tic pa Lukwena 2:34-36.) Lok pa lanebi man nyuto ni loc pa Yecu onongo pe obicakke cutcut i nge dokke i polo. Ma ka meno, en onongo obikuro karene i nget Lubanga tung acuc. (Jo Ibru 10:12, 13) En onongo obikuro pi kare ma rom mene? Locce onongo obicakke awene? Baibul konyowa me gamo lapeny magi.
16. Ngo ma otimme i mwaka 607 K.M.P., dok meno nongo mako lok kom Ker pa Lubanga nining?
16 Jerucalem aye obedo boma madit acel keken i wi lobo ducu ma Jehovah oketo iye nyinge. (1 Luker 11:36) Man bene aye onongo gangkal me Ker ma Lubanga ocwako i lobo kany ma ocung pi ker pa Lubanga me polo. Pi meno, turo Jerucalem ma jo Babilon guturo i mwaka 607 K.M.P. onongo pire tek mada. Turo Jerucalem okelo acakki me kare mo malac ma loc atir pa Lubanga i wi jone i lobo onongo pud kong kijuko woko. Lacen, i nge mwaka mia me abicel, Yecu onyuto ni kare man ma loc pa Lubanga onongo pud kijuko woko-ni pud tye ka wot anyim pien en owaco ni: “Gibinyono Jerucalem piny, nio ka kare pa Lurok ocobo kakare.”—Luka 21:24.
17. (a) “Kare pa Lurok” obedo kare ango, ki onongo obiri pi kare ma rom mene? (b) “Kare pa Lurok” ocakke ki dok ogik awene?
17 I “kare pa Lurok,” gamente me lobo onongo kong kibiye ni gujuk loc ma Lubanga cwako woko. Kare man ocakke ki i turo Jerucalem i mwaka 607 K.M.P., dok Daniel onyuto ni bimedde anyim pi “mwaka abiro.” (Daniel 4:23-25) Kare man lac ma rom mene? Baibul nyuto ni “mwaka” adek ki nucu rom ki nino 1,260. (Niyabo 12:6, 14) Ka kinyayo mwaka meno tyen aryo, ci kinongo nino 2,520, ma rom aroma ki mwaka abiro. Ento pe tye gin mo ma pire tek ma otimme i kare meno manok-ki. Ka watiyo ki “mwaka acel pi nino acel acel” i kom lok pa lanebi Daniel ci wakwano mwaka 2,520 kun wacako ki i mwaka me 607 K.M.P., wao wa i mwaka me 1914 K.M.—Wel 14:34; Ejekiel 4:6.
18. Yecu otimo gin ango cutcut i nge gamo twero me Ker, ki adwogine obedo nining i lobo?
18 Yecu ocako loc i polo i kare meno? Tyen lok ma Ginacoya miyo ni en ocako loc i kare meno gibilok iye i dul ma lubo man. Ngene kene ni acakki me loc pa Yecu pe onongo obikelo kuc cucut i lobo. Niyabo 12:7-12 nyuto ni i nge gamo Ker meno, Yecu onongo kong obiryemo Catan ki malaika maraco woko ki i polo. Man onongo obikelo can malit i lobo, ento bedo me yomcwiny mada me kwano ki i Baibul ni Larac dong “karene tye manok.” Ma cokcokki wabibedo ki yomcwiny pe ni pien Ker pa Lubanga tye ka loc keken ento pien bikelo gum mapol i lobo bot dano ma luwiny. (Jabuli 72:7, 8) Wangeyo nining kono ni man bitimme ma cokcokki?
[Lok ma tye piny]
a Lacen ongene ni “Rwode Kikome” ma kitito pier-ni obedo Yecu Kricito, “Labwor ma i kaka me Juda.” (Niyabo 5:5) I Coc pa Lujudaya mogo, ka ma gicoyo ni “Rwode Kikome” eni kileyo ki “Meciya” nyo “Kabaka Meciya.”
TEM NGECCI
Ker pa Lubanga obedo gin ango, ki bene tye ka loc ki kwene?
Ngagi ma loyo i Ker meno, dok angagi ma bedo i tere?
Jehovah onyutiwa nining ni Kerre-ni tye ada?
“Kare pa Lurok” ocakke awene dok ogik awene?
[Bok i pot karatac 94]
JAMI MOGO MA PIGI TEGO MA MAKO KER PA LUBANGA
• Jehovah otito pi yubbe me nywalo “lakwaro” ma binyoto wi twol maconi, Catan Larac.—Acakki 3:15.
• I mwaka 1943 K.M.P., Jehovah onyuto ni “lakwaro” man obibedo lakwar Abraim.—Acakki 12:1-3, 7; 22:18.
• Gicikke me cik pa Moses ma gimiyo bot jo Icrael i mwaka 1513 K.M.P. onongo tye iye “tipo keken me jami mabeco me kare me anyim.”—Nia 24:6-8; Jo Ibru 10:1.
• Ker pa Icrael ma i lobo ocakke i mwaka 1117 K.M.P., ka dok omedde lacen i dogola me ot pa Daudi.—1 Camuel 11:15; 2 Camuel 7:8, 16.
• Gituro Jerucalem i mwaka 607 K.M.P., ci “kare pa Lurok” ocakke.—2 Luker 25:8-10, 25, 26; Luka 21:24.
• I mwaka 29 K.M., giwiro Yecu calo Ngat ma bibedo Kabaka ci ocako ticce ma i lobo.—Matayo 3:16, 17; 4:17; 21:9-11.
• I mwaka 33 K.M., Yecu odok i polo, ki kuno en obedo i nget Lubanga tung acuc ka kuro kare me cakke pa locce.—Tic pa Lukwena 5:30, 31; Jo Ibru 10:12, 13.
• Kiketo Yecu i wi komker i Ker me polo i mwaka 1914 K.M. ma onongo dong “kare pa Lurok” otum.—Niyabo 11:15.
• Catan ki jogine kibologi piny i lobo, man omedo can malit i kom dano.—Niyabo 12:9-12.
• Yecu tye ka neno wi tic me tito kwena maber me Ker pa Lubanga i wi lobo ducu.—Matayo 24:14; 28:19, 20.