Dul Lok me Apar
Ker “Ma Pe Gitwero Balone”
1. Kit lok ada ango ma onyute kamaleng ki i kom jammi ma otimme i kwo pa dano cakke i tekwaro?
JAMMI ma timme i lobo nino ki nino nyuto ada ni dano pe gunongo yomcwiny i kwero loc madit pa Jehovah kun gitemme me lone kengi. Pe tye kit gamente pa dano mo ma okelo jammi mabeco ki dano. Kadi bed dano gudongo ngecgi me cayan i yo ma malo ma laporre peke, gin pe gumedo ki loyo kit lweny mo i kom two nyo juko to, kadi i kom ngat acel mo. Loc pa dano pe ojwayo lweny, bwami, turo cik, camcana, nyo can ducu matye. Gamente ma giloyo lwak ki dic pud gitye i lobo mapol. (Latitlok 8:9) Cuma me tet, woro, ki kwiya piny ducu tye otore kacel i kelo awola i ngom, pii, ki yamo. Ludito tic ma gitiyo ki cente i yo marac gimiyo jo mapol pe gitwero nongo jammi ma mitte me kwo. Mwaki alip mapol me loc pa dano onyuto lok ada man kamaleng: “Dano pe loyo kwone kene nio i agikkine; pe tye ngat mo ma tye ki twero me loyo kwone.”—Jeremia 10:23.
2. Ngo keken aye ma obedo yat me cango peko pa dano?
2 Yat me cango peko meno obedo ngo? Obedo Ker pa Lubanga, ma Yecu opwonyo lulub kore me lego pire ni: “Ker meri obin; giti gin ma imito i lobo kit ma gitiyo i polo.” (Matayo 6:9, 10) Kitito pi Ker pa Lubanga me polo i 2 Petero 3:13 calo “polo manyen,” ma omyero olo “lobo manyen,” ma meno obedo dul pa dano ma kitgi atir. Ker me polo pa Lubanga pire tek atika ma omiyo Yecu oketo odoko wi lok me pwony-nye. (Matayo 4:17) En onyuto ker man i kit ma omyero water kwede kwowa, kun cuko cwinywa ni: “Kong wukwong keto cwinywu i kom kerre, ki nongo kit ma atir ma en tye kwede.”—Matayo 6:33.
3. Pingo nongo pwonnye i kom Ker pa Lubanga obedo gin ma mitte me oyot i kare-ni?
3 Nongo pwonnye i kom Ker pa Lubanga obedo gin ma mitte pi oyot i kare-ni, kit ma Ker meno dong cok ki cako tic me loko loc i wi lobo man matwal. Daniel 2:44 otito ni: “Dok i kare pa luker meno [gamente ma gitye ka loc i kare-ni] Lubanga me polo biketo ker mukene [i polo] ma ri nakanaka ma pe gitwero balone, kadi dit me locce bene pe gibiweko i cing rok mukene [dano pe dong gibiloyo lobo matwal]. Ker meno manyen-ni bituro ker magi [me kare-ni] ducu ngidogi woko matinotino, ci tyekogi woko ducu, en aye dong bicung bedo matwal.” Pi meno Kerri biloro agikki me kare man ki jwero yub magi maraco-ni ducu. Ker me polo-ni biloyo lobo labongo pyem mo. Cwinywa pud dong yom ni yweyo man dong tye cok!
4. Gin ango ma otimme i polo i mwaka 1914 ma mako Kerri, dok gin ango ma omiyo pire tek botwa?
4 I mwaka 1914, kiketo Kricito Yecu calo Kabaka dok kimiye twero me “loc i dye lukwor[re].” (Jabuli 110:1, 2) I mwaka meno bene, “kare me agikki” me yub maraco me kare-ni ocakke. (2 Temceo 3:1-5, 13) Ki dok bene, jammi ma Daniel onongo oneno i ginanyuta ma tito jammi ma anyim ada otimme i polo. “Ngat ma yam okwongo bedo kwo wa con-ni,” Lubanga Jehovah, omiyo ki Wod pa dano, Yecu Kricito “ker ducu ki deyone, wek lwak me rok ducu ki rok ducu, ki jo ma loko leb mapatpat-gu ducu, gubed luticce.” I kare ma tye ka lok i kom ginanyuta-ni, Daniel ocoyo ni: “Locce aye loc ma bedo matwal, locce pe bigik, ki kerre bene pe gitwero turone.” (Daniel 7:13, 14) Lubanga biweko jo ma gimaro kit ma atir me limo yomcwiny i jammi mabeco ma en yam oyubo i kare ma en oketo lunyodowa mukwongo i Paradic kun bitic ki Ker me polo man ma tye i cing Kricito Yecu-ni.
5. Lok matut ango i kom Kerri ma pire mit botwa atika, dok pingo?
5 Mono obedo mitti-ni me bedo ngat acel i kin lugen me Kerri? Ka kit meno, ci ibibedo ki mitti i kom yub ki tic pa gamente me polo man. Ibimito ngeyo gin ma loc man tye ka timo-ne i kare-ni, gin ma bitimo i anyim, ki gin ma mitte ki boti. Ka ibedo ka ngiyo lok i kom Kerri maber, pwocci bimedde pire. Ka ijolo locce, ibibedo ma iyubbe maber me tito bot jo mukene jammi me aura ma Ker pa Lubanga bitimo pi dano ma luwiny.—Jabuli 48:12, 13.
Luloc me Ker pa Lubanga
6. (a) Ginacoya nyuto nining ni Ker pa Meciya ocung pi loc mamalo twal? (b) Jammi ma wapwonyo i kom Kerri omyero ogudwa nining?
6 Gin mukwongo ma ngiyo kodi lok man yabo iye wangwa aye ni, Ker pa Meciya man aye obedo kit ma Jehovah nyuto kwede locce ma malo twal. Jehovah aye onongo omiyo “ker ducu ki deyone” bot Wode. I kare ma Wod pa Lubanga onongo twero me cako loc calo Kabaka, dwan ma i polo otito kamaleng ni: “Ker me lobo dong odoko ker pa Rwotwa [Lubanga Jehovah] ki Kricitone, en [Jehovah] dong bibedo ka loc matwal.” (Niyabo 11:15) Pi meno, jammi ducu ma waniang i kom Ker man ki jammi ma dong otimo twero weko wabedo ki wat macok ki Jehovah kikome. Pwony ma wanongo omyero ominiwa mitti me minne i te locce madit pi nakanaka.
7. Pingo bedo me mitti tutwal botwa ni Yecu Kricito aye Laloc ma lubo kor Jehovah?
7 Tam bene, kit ma Jehovah oketo kwede Yecu Kricito macalo Laloc ma lubo kore. Macalo Ladiro tic ma Lubanga otiyo kwede me keto lobo ki dano, Yecu ngeyo jammi ma mitte piwa maber makato ngat mo keken i kinwa. Me medo i kom meno, cakke i acakki me kwo pa dano, en onyuto ‘yomcwinye i kom litino pa dano.’ (Carolok 8:30, 31; Jo Kolocai 1:15-17) Marre onongo dit mada i kom dano, ma omiyo en obino i lobo ci omiyo kwone calo ginkok piwa. (Jon 3:16) Pi meno, en oyabo yo me gonyowa ki i bal ki to ki me kwo naka naka.—Matayo 20:28.
8. (a) Ma pat ki loc pa dano, pingo gamente pa Lubanga biri naka? (b) Kit wat ango ma “lagwok ot ma lagen dok maryek” tye kwede ki gamente me polo-ni?
8 Ker pa Lubanga obedo gamente ma rii dok pe yenge pi naka. Man tye kit meno pien ni Jehovah kikome pe twero to. (Kabakuk 1:12, NW) Ma pat ki kabaka ma gubedo dano, Yecu Kricito, ngat ma Lubanga omiye loc, bene pe twero to. (Jo Roma 6:9; 1 Temceo 6:15, 16) Jo 144,000 gubedo jo mukene ma gibibedo kacel ki Kricito i komker me polo, lutic pa Lubanga ma lugen ma gua ki “i kaka mapol mapat pat, ki i leb ki rok mapat pat ducu.” Gin bene kibimiyo-gi kwo ma pe twero to. (Niyabo 5:9, 10; 14:1-4; 1 Jo Korint 15:42-44, 53) Polgi dong gitye i polo, dok manokke ma odong i lobo aye gitye “lagwok ot ma lagen dok maryek” me kare-ni, ma gitye ka yaro lok me Kerri ki gen.—Matayo 24:45-47.
9, 10. (a) Gin ma kelo apoka poka ki yo me aram ango ma Kerri bijwayo woko? (b) Ka pe wamito doko lukwor pa Ker pa Lubanga, kit jammi ango ma omyero wakwer?
9 Cok cokki dong, Jehovah bicwalo mony-nye me tiyo tic me lwoko lobo i karene ma en oketo. Gin gibijwero matwal jo ma gikwero locce madit pi mitigi ken-gi dok ma gitero yubbe ma en miyo wok ki i Yecu Kricito ki anywar. (2 Tecalonika 1:6-9) Meno bibedo nino pa Jehovah, nino ma dong kikuro pi kare malac ma en binyuto Locce Madit ngene kwede. “Wunen, nino pa Rwot tye ka bino. En ger dok akemo ki kiniga mo mager omake, . . . tyeko lubalo woko ducu ki iye.” (Icaya 13:9) “Nino meno aye nino me akemo, nino me can ki me remcwiny madwong, nino me nginyo ki me balo piny, nino me colpiny ki mutu, nino me pol ki colpiny mapek.”—Jepania 1:15.
10 Dini me goba wa ki gamente pa dano ducu ki monygi-gu, ma laloc marac ma pe nen me lobo man tye ka loyone, kibinginyo woko matwal. Jo ducu ma ginyuto ni gibedo jo me lobo man ma gikwo kwo ma cobo mittigi ken-gi, lutim aram ki lutim tarwang kibinekogi woko. Kibikwanyo Catan ki jogine woko pe me rwatte ki jo ma bedo i lobo, kun kitweyogi liking i bur ma tere pe gik pi mwaka alip acel. Nongo Ker pa Lubanga dong biloyo jammi ducu ma i wi lobo. Man pud dong bibedo me yweyo bot jo ma gimaro kit ma atir ya!—Niyabo 18:21, 24; 19:11-16, 19-21; 20:1, 2.
Yub ma Kerri Oketo—Kit ma Bicobbe Kwede
11. (a) Ker pa Meciya-ni bicobo yub pa Jehovah pi lobo nining? (b) Loc me Kerri bitimo gin ango pi dano ma gibikwo i lobo i kare meno?
11 Ker pa Meciya bicobo mitti mukwongo pa Lubanga ducu pi lobo. (Acakki 1:28; 2:8, 9, 15) Kadi wa i kare-ni, cwako yubbe meno oloyo dano woko. Kadi bed kit meno, ‘lobo ma obibino-ni’ bibedo i te loc pa Wod pa dano, Yecu Kricito. Jo ducu ma gibibwot ki i ngolo kop pa Jehovah i kom yub man macon-ni gibiribbe i tic kacel i te Kricito Kabaka, kun gitimo gin mo keken ma en cimo me atima ki yomcwiny, me wek lobo ducu odok paradic. (Jo Ibru 2:5-9) Dano me lobo ducu gibinongo mit me tic cingi dok gibinongo kony ma oromo ki i jammi ma pol ma bia ki i lobo.—Jabuli 72:1, 7, 8, 16-19; Icaya 65:21, 22.
12. Tam ki kom ma roc pe iye binonge nining bot jo ma bibedo i te loc me Ker?
12 I kare ma kicweyo Adam ki Kawa, onongo gin pe gitye ki roc mo, dok onongo yub pa Lubanga tye ni lobo myero opong ki lutinogi, ma nongo gin ducu gilimo mit me bedo ki tam ki kom ma roc pe iye. Yub ma kit meno bicobbe i yo me aura mada i te loc me Kerri. Man mito ni kong omyero kikwany jammi ducu ma kelo bal, ma omiyo Kricito pe bitiyo macalo Kabaka keken ento calo Lalam Dog madit bene. Mot mot, en bikonyo jo ma luwiny ma bedo i te locce me nongo adwogi maber ma a i kom kwone macalo dano ma en otyero.
13. Adwogi ango ma bibino i yo me kom i te loc me Kerri?
13 Jo ma bedo i lobo gibinongo adwogi maber i yo me kom i te loc me Kerri nining. “I kare meno lutowang wanggi biyabbe, jo ma itgi oding bene itgi biyabbe. I kare meno lungolo bipye malo calo til, ki jo ma te lebgi oto gibicako wero wer ki yomcwiny. Pien pii bimwoco piny woko i dye tim, ki kulu bene piine bibedo ka mol i lobo mutwo.” (Icaya 35:5, 6) Del kom ma orunge pi two nyo tiyo biroc makato pa latin woko, goro kom mo keken biweko yo ki yot-kom. “Ci ringo kome biroc, bidoko nyen macalo pa latin, tekone bidwogo macalo i kare me awobine.” (Yubu 33:25) Kare bibino ma pe tye ngat mo ma bibedo ki tyen lok me waco ni, “An koma lit.” Pingo? Pien gibigonyo dano ma gilworo Lubanga woko ki i peko me bal kacel ki i adwogine maraco. (Icaya 33:24; Luka 13:11-13) Ada, Lubanga “bijwayo pig wanggi woko ducu. To bene dong bibedo pe, kadi kumo nyo koko nyo arem, pien gin macon dong ducu gurwenyo woko matwal.”—Niyabo 21:4.
14. Nongo kwo ma pe ki roc kwako ngo?
14 Bedo labongo roc kono, kwako jammi makato bedo ki kom mayot ki tam ma kwiri keken. Kwako nyuto kit Jehovah i kwowa, kit ma wan kicweyowa ‘i cal pa Lubanga-ni.’ (Acakki 1:26) Pi meno, pwony madit bimitte. I lobo manyen-ni, “kit ma atir bedo iye.” Dong, kit ma Icaya otito con, “jo ma bedo iye pwonyo kit ma atir.” (2 Petero 3:13; Icaya 26:9) Kodi kit man kelo kuc—i kin dano me rok ducu, i kin lurem, i ot pa ngati moni, ki ma loyo ducu, ki Lubanga kikome. (Jabuli 85:10-13; Icaya 32:17) Jo ma gibipwonyo kit ma atir gibipwonyogi mot mot me dongo i ngeyo miti pa Lubanga pirgi. Gibilubo yo pa Jehovah i kit me kwogi ducu kit ma nongo marre woto ki donyo i cwinygi matut. Gibiwaco kit ma Yecu owaco ni ‘An i kare ducu atimo jammi ma yomo cwiny Wora.’ (Jon 8:29) Kwo pud dong bibedo mit ya, ka man otimme i kom dano ducu!
Gin ma Otimme ma Dong Onen
15. Nyut jammi ma Kerri dong otimo dok inyut jammi ma omyero wabed ka timone kombeddi kun itiyo ki lapeny ma i paragraf man.
15 Jammi mabeco ma Ker pa Lubanga kacel ki jo ma gimine i tere otimo dong tye ma nen kamaleng. Lapeny ki ginacoya matye ka bino-ni, bipoyo wi i kom jammi magi ma gutimme, kacel ki jammi ma jo ducu ma gimine i te Ker me omyero gubed ka timone kombeddi.
Kerri okwongo ki cako tic i kom anga, dok adwogi ango ma obino ki iye? (Niyabo 12:7-10, 12)
Coko udong pa dul mene ma kitye ka keto iye cwiny cakke i kare ma kiketo Kricito i komker? (Niyabo 14:1-3)
Kit tic ango ma Yecu otito pire con ni ebitimo i nge cakke pa twon can madit-ti, kit ma kicoyo i Matayo 25:31-33?
Kit tic ma mitte ma okwongo ango ma kitye ka timone i kare-ni? Angagi ma gitye ka timo tic man? (Jabuli 110:3; Matayo 24:14; Niyabo 14:6, 7)
Pingo luwibye ki ludini ma gitye ki adage pe gumedo ki juko tic me pwonyi? (Jekaria 4:6; Tic pa Lukwena 5:38, 39)
Kit alokaloka ango ma otimme i kwo pa jo ma gumine i te loc me Kerri? (Icaya 2:4; 1 Jo Korint 6:9-11)
Ker ma Bibedo pi Mwaka Alip Acel
16. (a) Kricito biloc pi kare ma rom mene? (b) Jammi me aura ango ma kibitimo-ne i kare meno ki i ngeye?
16 Inge tweyo Catan ki jogine i bur matut, Yecu Kricito ki jo 144,000 gibiloc calo kabaka ki dok lulam dog pi mwaka alip acel. (Niyabo 20:6) Kit ma kibikwanyo bal ki to ma Adam okelo woko matwal-li, i kare meno dano dong bibedo labongo roc mo. Ka dong en otyeko ticce maber macalo Kabaka ma Lalam Dog ma bene obedo Meciya i agikki me locce me Mwaka Alip Acel, Yecu ‘bimiyo ker’ bot Wonne “wek Lubanga dong ocok jammi ducu i te locce.” (1 Jo Korint 15:24-28) I kare meno, kibigonyo Catan pi kare manok me temo jo ma nongo kikwanyo balgi me neno ka gicwako loc madit pa Jehovah. I nge agikki me atematema meno, Jehovah bineko Catan ki lujemone ma gicwakke woko. (Niyabo 20:7-10) Jo ma bimoko i loc madit pa Jehovah—twerone me loc—nongo dong gunyuto genegi ma pe yenge. Kibimiyo gimoko wat ma myero ki Jehovah, kun nongo dong en jologi calo awobene ki anyirane, ma nongo dong gupore pi kwo ma pe tum.—Jo Roma 8:21.
17. (a) Ngo ma bitimme i kom Kerri i tum pa mwaka alip acel? (b) I yo ango ma Ker meno ‘pe gitwero turone kwede’?
17 Pi meno, tic pa Yecu ki pa jo 144,000 pi lobo bilokke woko. Ticgi dong bibedo ngo i anyim? Baibul pe otito. Ento ka wamoko i kom loc madit pa Jehovah ki gen, ci wabibedo ma kwo i kare me agikki me Mwaka Alip Acel me locci ma bimiyo wangeyo jammi ma Jehovah oyubo pirgi kacel ki lakalatwe ma omako piny malac ata-ni ducu. Kadi bed kit meno, loc pa Kricito me mwaka alip acel-li ‘bibedo matwal,’ dok, “kerre bene pe gitwero turone.” (Daniel 7:14) Pi tyen lok ango? Pi tyen lok acel ni, twero me loc man pe gibiweko-ne i cing rok mukene ma gitye ki tam mapat, kit ma Jehovah aye bibedo ka Locci. Dok Ker meno, “pe gitwero balone” pien jammi ma kerri bitimo bicung matwal. (Daniel 2:44) Dong kibimiyo deyo ki Meciya ma obedo Kabaka dok Lalam dog ki luker dok lulam dog luwote pi ticgi ki gen bot Jehovah.
Nyammo wi Lok ma Kineno
• Pingo Ker pa Lubanga keken aye obedo yat me cango peko pa dano? Awene ma Kabaka me Ker pa Lubanga ocako kwede loc?
• Ngo ma dong inongo ma oyomo cwinyi i kom Ker pa Lubanga ki dok gin ma locci bitimo-ne?
• Ngo ma Ker man otimo ma dong wangeyo, ka dok ngo matye pi wan me atima pire?
[Cal ma tye i pot karatac 92, 93]
I Ker pa Lubanga, dano ducu bipwonyo kit ma atir