In Itwero Bedo Lapwony!
1. Tic maber ango ma lutit kwena me Ker-ri ducu giromo timone?
1 But ticwa ma obedo pwonyo ngat moni ki lok me ada-ni kelo adwogi madit mada. Neno ngat ma kit meno ka jolo kwena me Ker-ri kun wakonnye me nyiko cok bot Laloc me polo ki lobo obedo gin mo ma dit mada i kwowa. (Yak. 4:8) Pwonyo ngat mo ma kec me ada neko ki dong neno kit ma en cako loko kwede kite, loko nenone, ki dong loko kwone i yo me aura myero obed miti pa lutit kwena ducu me Ker-ri.—Mat. 28:19, 20.
2. Pingo jo mukene gilworo kwano Baibul ki dano, dok ngo ma romo konyogi me lweny ki peko man?
2 Ket Genni i kom Jehovah: I kare mukato angec, lutic ma lugen gubedo ki tam ni pe gitwero cobo tic ma Jehovah omiyo botgi. Keto gen i kom Lubanga okonyo Moses, Jeremia, Amoc, ki jo mukene-ni me lweny ki akalakala nyo lworo ma gitye kwede ci gutiyo tic madongo. (Nia 4:10-12; Jer. 1:6, 7; Amoc 7:14, 15) Lakwena Paulo bene obedo ki “tekcwiny.” Pi teko pa anga? En otito ni man otimme pi teko pa “Lubangawa.” (1 Tec. 2:2) Ada, wan ducu watwero bedo ki gen ni Jehovah twero miyowa kony, ryeko kacel ki kero ma mitte me pwonyo lutino kwan me Baibul i yo ma miyo gidongo.—Ic. 41:10; 1 Kor. 1:26, 27; 1 Pet. 4:11.
3, 4. Pwonnye ango ma tye pi konyowa me pwonyo Lok pa Lubanga?
3 Ye Nongo Pwony: Lapwony Madit, Jehovah Lubangawa miyo botwa pwony ma jenge i Baibul kare ki kare wek wabed lupwonye mucwiny. (Ic. 54:13; 2 Tem. 3:16, 17) Ye nongo pwony man kun itiyo ki kare ma itye kwede maber me medo ngec-ci i Ginacoya kun idongo dironi me pwonyo ada me Baibul. Kadi bed ni cokke me Cukul me Tiokraci ki Cokke me Ticwa aye kiketogi pi tic man, ento cokke ducu pwonyowa me pwonyo Lok pa Lubanga.
4 Temme me ngeyo yo mayot me pwonyo lok me ada matut. Buk me Ministry School, pot karatac 227, wacci: “Omyero kong iniang gin ma ibipwonyo-ni maber ka imito ni oniange bot jo mukene.” Miyo lagam i cokke miyo wamako lok madongo i wiwa pi tic kwede i anyim. Pi meno yubbe maber, ci gen ma itye kwede i kom keroni me pwonyi bimedde.
5. Pwony mukene ango ma wanongo ki i kacokke ma konyowa me dongo macalo lupwonye?
5 Cakke wa i acakki, Lukricitayo gubedo kanongo pwonye ki bot luwotgi ka nongo gitye i tic me pwonyo dano. (Luka 10:1) Ka twere, wot ki lutit kwena ma gitye ki ngec muromo, calo painia, luelda, ki luneno ma giwoto awota i kwano Baibul ki lutino kwan. Bed ka neno kit ma gitiyo kwede ki lapor ki jami mogo calo calgi-gu ma gitye i bukkewa i tito ada ma tye i Ginacoya. Penygi wek gumini tam kit ma iromo doko kwede lapwony mucwiny. (Car. 1:5; 27:17) Nyut pwocci pi pwony ma kit man, kit macalo pwonye nongo a ki bot Lubanga-ni.—2 Kor. 3:5.
6. Ngo ma pire tek ma bikonyowa me doko lupwonye me Lok pa Lubanga?
6 Ket genni i kom Jehovah, ki nongo adwogi mabeco ki i pwony ma en miyo. Ket pi dongo-ni i lega. (Jab. 25:4, 5) In bene itwero bedo ki yomcwiny me konyo ngat mo me doko lapwony me Lok pa Lubanga calo in!