Ti ki Keroni Ducu —Kit me Lweny ki Tam ni Pe Itwero Tic
1. Ngo mumiyo jo mukene gijuke woko ki i kwano Baibul ki dano?
1 In mono i kare mukene ijukke woko ki i kwano Baibul ki dano pien pe itye ki tekcwiny muromo? I kine mukene, lutic pa Lubanga ma gin lugen calo Moses ki Jeremia bene guwinyo calo pe gupore pi tic ma kimiyogi. (Nia 3:10, 11; 4:10; Jer. 1:4-6) I yo acel-lu, dano mapol bene giwinyo kit meno. Watwero loyone nining?
2. Pingo pe myero wagik ticwa i ot ki ot keken, kun waweko kwan ki lutino kwan me Baibul pi jo mukene?
2 Wiwa myero opo ni Jehovah pe penyowa me timo gin ma kerowa pe twero. (Jab. 103:14) Pi meno, watwero cobo ticwa me ‘loko dano doko jo ma lubo Yecu’ kun ‘wapwonyogi’. (Mat. 28:19, 20) Man pe obedo mic ma Jehovah omiyo bot jo ma gitye ki ngec nyo diro madwong nyo ma gitiyo maber loyo i kinwa. (1 Kor. 1:26, 27) Pi man, pe myero watam me timo ticwa i ot ki ot keken, kun nongo waweko kwano Baibul pi jo mukene.
3. Jehovah aye opwonyowa me bedo lupwonye me Baibul nining?
3 Jehovah Aye Pwonyowa: Jehovah aye pwonyowa me tiyo tic me loko dano doko jo ma lubo Yecu. (2 Kor. 3:5) En tiyo ki dulle me pwonyowa ki ada me Baibul ma kadi bed jo ma gukwano matek pe gitye ki ngec man. (1 Kor. 2:7, 8) En ogwoko yo me pwony pa Yecu, Lapwony Madit piwa, wek wan bene walubi dok en pwonyowa kare ducu kun tiyo ki kacokke. Medo i kom meno, Jehovah ominiwa jami me cwiny ma mitte me pwonyo Baibul. En omiyo gin tic calo buk me Baibul Pwonyo, ma tito ngec me ada i yo ma niang iye yot. Kwan ki lutino kwan me Baibul pe romo bedo tek kit ma onongo watamo kwede.
4. Pingo watwero bedo ki gen ni Jehovah bikonyowa?
4 Ki kony pa Jehovah, Moses ki Jeremia gucobo tic ma kimiyogi maber. (Nia 4:11, 12; Jer. 1:7, 8) Wan bene watwero penyo Jehovah pi kony. Pien ka watye ka kwano Baibul ki dano moni, nongo watye ka pwonye lok ada i kom Jehovah dok meno obedo gin ma yomo cwiny Lubanga. (1 Jon 3:22) Dong, myero iket yubbi me pwonyo dano ki Baibul, ma obedo tic me yomcwiny adada-ni.