Bed ma Iyubbe Maber pi Pwony
1. Pingo omyero waket cwinywa me konyo lutino kwan me Baibul me nyutu pwoc ka watye ka kwan kwedgi?
1 Ka watye ka kwan ki lutino kwan me Baibul, omyero wabed ma wayubbe maber ka ce wamito tugo cwiny latin kwan me tic pi Jehovah. Omyero wawek ticwa onyak nyige ki konyo latin kwanwa me nyutu pwoc pi lok ada ma en opwonyo ki i Baibul. Timo man bitugo cwiny latin kwan. (Nwo. 6:5; Car. 4:23; 1 Kor. 9:26) Waromo timo man nining?
2. I yo ma nining ma lega konyowa me yubbe maber pi pwony?
2 Yubbe ki Lega: Kit ma Jehovah aye miyo kodi me ada dongo i cwiny latin kwan-ni, pore mada me cako yubbewa me kwan ki latin kwan kun walego tutwalle pire ki peko ma en tye kwede. (1 Kor. 3:6; Yak. 1:5) Lega ma kit man romo konyowa me ngeyo ngo ma waromo timone me konyo latin kwan me ‘niang matut i gin ma’ Jehovah mito.—Kol. 1:9, 10.
3. Watwero yubbe kun watamo pi latin nining?
3 Tam pi Latin Kwan: Yecu onongo ngeyo ni pwony i yo maber kwako tamo pi jo ma giwinyo lokwa. Kipenyo Yecu wang aryo kulu ki lapeny acel man ni: “Atim ango wek alim kwo ma pe tum?” En otiyo ki yo mapat pat i kare ma tye ka gamo lapeny man. (Luka 10:25-28; 18:18-20) Omyero watam pi latin kwan ka watye ka yubbe. Ginacoya ma kicimogi mene ma wabikwano? Paragraf adi mono ma wabikwano? Pwony mene ma latin kwan romo nongo niange iye tek nyo ye lokke tek? Ka ce watamo pi lapeny mogo ma latin kwan romo penyone, ci wabiyubbe maber me miye lagam.
4. Yubbe maber kwako timo gin ngo?
4 Kwan Gin ma Ibipwonyo: Kadi bed ni wakwano pwony moni tyen mapol i kare mukato angec, man nongo pud obedo tyen me acel me kwanone ki latin kwan moni-ni. Ka wamito gudo cwinye, omyero wayubbe maber pi pwony acel acel. Man te lokke ni omyero watim gin ma wacuko cwiny latin kwanwa me timone. Kwan gin ma ibipwonyo, man kwako kwano ginacoya ma kicimogi, tamo pi latin kwan, ki ngolo te lok ma pigi tego.—Rom. 2:21, 22.
5. Wan watwero poro Jehovah nining?
5 Jehovah keto cwinye i dongo pa latin kwan me Baibul acel acel. (2 Pet. 3:9) Wan bene wanyutu kodi mar acel-lu ki kwanyo kare me yubbe pi latin kwan me Baibul acel acel.