An Mono Atye ma Apore me Tito Kwena?
1. Pingo omyero pe watam ni wan pe wapore me tito kwena?
1 Ka pol kare imaro penye ki lapeny macalo man, bed ki tekcwiny! Kwan nyo kero ma kinywalowa kwede aye pe weko wabedo ma wapore macalo lutit kwena. Lupwonnye me kare macon-ca bene kiwacci gubedo “jo mogo ata ma pe gupwonnye.” Kadi bed kit meno, gin gubedo jo mucwiny i tito kwena maber-ri pien gumoko i cwinygi me lubu lanen ma Yecu oweko.—Tic 4:13; 1 Pet. 2:21.
2. I yo mapat pat ango ma onongo Yecu pwonyo kwede?
2 Kit ma Yecu Opwonyo Kwede: En opwonyo i yo mayot, ma konyo dano ata-gu, dok ma niange pe tek. Lapeny ma openyogi, lapor, ki kit ma en cako kwede ki lokke i yo ma niange yot onongo gudu cwiny luwiny en. (Mat. 6:26) En onyutu miti me ada i kom dano. (Mat. 14:14) Medo i kom meno, Yecu oloko ki gen kacel ki twero, pien en onongo ngeyo ni Jehovah ocwale dok omiye kero me tiyo ticce.—Luka 4:18.
3. I yo ango ma Jehovah konyowa me cobo ticwa me pwony?
3 Jehovah Konyowa: Lapwonywa Madit miniwa pwony ma wamito wek watit kwena maber-ri i yo ma nyako nyige kun tiyo ki Lokke kacel ki dul ma mege. (Ic. 54:13) Pien Jehovah ogwoko rekod ma nyutu kit ma Yecu obedo ka pwony kwede, dok waromo ngiyone kun walubu yone me pwony. Jehovah miniwa cwiny mere maleng dok pwonyowa kun tiyo ki cokkewa. (Jon 14:26) Medo i kom meno, en miyo lutit kwena ma gitye ki ngec ma giromo konyowa me bedo jo mucwiny.
4. Pingo watye ki tyen lok ducu me bedo ki gen ni wapore me nywako kwena maber-ri ki jo mukene?
4 Watye ki tyen lok me bedo ki gen ni wan wapore me tito kwena, pien “bedowa ma wapore a ki bot Lubanga.” (2 Kor. 3:5, NW) Ka wajenge i kom Jehovah kun watiyo ki gen ki jami ma en miyogi, ci waromo “tiyo kit tic mo maber ducu.”—2 Tem. 3:17.