Tika Ibitiyo Calo Painia pi Tutunu?
1. Pingo kare me Nipo obedo kare maber me medo cawawa i tic me pwony?
1 Kare me Nipo obedo kare maber me medo cawa i ticwa me pwony. Obedo bene kare me tamo pi mar madit ma Jehovah onyuto botwa pi miyo Wode macalo ginkok. (Jon 3:16) Pi tyen lok man watye ki pwoc madit atika, pwoc man tugo cwinywa me tito pi gin maber ma Jehovah tye ka timo pi wan dano. (Ic. 12:4, 5; Luka 6:45) Man obedo kare me nywako i rweyo luremwa ki jo ma gibedo i wang ticwa wek gubin guribbe kacel kwedwa i kwer me Nipo. Lacen wabitute me dongo miti pa jo ma gubedo tye i kwer man. Tika ibimedo cawani i tic me pwony ki tic macalo painia pi tutunu i dwe me Marci, April, nyo Mai?
2. Pingo dwe me Marci obedo dwe mupore pi tic calo painia pi tutunu?
2 Wek Marci Obed Dwe ma Pire Tek: Marci bibedo kare maber me tic calo painia pi tutunu. Jo ma gipenyo me bedo painia myero guyer cawa ma opore pigi, cawa 30 nyo 50. Ka lim pa laneno me adwol bibedo i dwe me Marci, ci painia pi tutunu gibinywako kacel ki painia marii, ki painia keken i cokke pi painia nicakke ki i acakkine nio wa i tumme. Kimedo kare me rwec me poko karatac me lwongo pi Nipo ma bibedo i Ceng Aryo me Marci 26, 2013, dong bicakke i Marci 1. Medo i kom meno, Marci tye ki tum pa cabit abic kulu. Myero itam kong ka itwero jalo kareni me medo ticci i dwe meno, pe kumeno?
3. Watwero yubbe nining wek wamed cawawa i tic me pwony?
3 Cak Yubbe Con: Man aye dong kare me neno kit ma myero iyubbe kwede wek iti calo painia pi tutunu. Goyo pulan i kinwu calo jo me ot pire tek, pi meno wuti ki otyeno me Worowu pi Jo me Ot me nyamo kit ma wutwero yubbe kwede pi tic calo painia. (Car. 15:22) Ka pe itwero tic calo painia pi tutunu pe iwek cwinyi otur. Tika itwero medo cawani wek ibed i tic me pwony pi cawa malac? Tika itwero bene cito i tic me pwony i nino mukene me cabit?
4. Adwogi maber ango ma wabinongo ka wamedo cawa i ticwa me pwony i dwe me Marci, April, ki Mai?
4 Ka wamedo cawa i ticwa me pwony i Marci, April, ki Mai, ci wabimedo yomcwinywa ki yengo ma bino pi tic pi Jehovah ki konyo jo mukene. (Jon 4:34; Tic 20:35) Medo i kom meno, jallewa i tic me pwony kelo yomcwiny madit bot Jehovah.—Car. 27:11.