Wutit pi Tic me Deyo pa Jehovah i Twok Piny Ducu
1. Ngo ma miyo cwinywa tuge me tito pi tic me deyo pa Jehovah i twok piny ducu?
1 ‘Ai Jehovah, dit ki tek ki deyo ki loc ki woro ducu meri, pien jami ducu ma tye i polo ki ma tye i lobo ducu meri.’ (1 Tekwaro 29:11) Mar kacel ki pwoc ma watye kwede pi Jehovah mono miyo wa winyo nining? Miyo cwinywa tuge me ‘tito pi tic me deyo pa ngat ma olwongowa nia ki i piny macol wek wadony i lengone me aura.’ (1 Pet. 2:9) Pe waromo weko tito pi Lubangawa me aura-ni bot jo mukene! Wabibedo ki kare maber me tito pi tic me deyo pa Jehovah i Marci, April, ki Mai.
2. Yub ango ma kiyubo me rweyo dano pi Nipo, dok angagi ma gibinywako ticce?
2 Yub me Rweyo Dano pi Nipo: I Ceng Baraja me April 2, wabinyuto deyo pa Jehovah i yo ma lamal ki kwero Cam pa Rwot me Otyeno. Karatac ma kite dok pat me lwongo dano pi yub man ma pire tek-ki kibipoko i wi lobo ducu cakke i Marci 17 me o i April 2. Kicuko cwiny wan ducu me nywako tic man ki tekowa ducu. Man bibedo kare maber pi jo manyen ma gimito cako tito lok me kwena maber, ka gitye ma gupore. Ka itye ki jo ma ikwano kwedgi Baibul nyo lutinoni ma gitye ma gupore, kwany kare me lok bot luelda.
3. Ngo ma waromo lokone ka watye ka lwongo dano me bino i Nipo?
3 Rwec man bibedo rom ki rweyo dano ma kitimo pi gure me distrik me “Larre Dong tye Cok!” Kibicwalo karatac me rweyo dano i kacokke ducu wek latit kwena acel acel onong gin 50 ki painia acel acel twero nongo gin 150. Lok macek, iromo wacci: “Man aye karatac ma megi me lwongo pi yub ma pire tek ma tye kabino ma bedo mwaka ki mwaka. Wabijoli ki yomcwiny madit mada. Ngec mukene mapol nonge i karatac me lwongo man.” Pi man, ka rwed ot tye ki lapeny, kwany kare me gamone. Lamed ngec ma wi lokke tye ni Cam pa Rwot me Otyeno ma tye i buk me Baibul Pwonyo cakke ki i pot karatac 206 twero bedo me kony. I tum pa cabit, wabitero magajin ma obino manyen kacel ki karatac me rweyo dano. Gwok nying jo ma gunyuto miti, dok idok cen ka limogi.
4. Karatac ma kite dok pat me lwongo pi Nipo-ni kibipokone nining?
4 Ka ce twere, omyero imi karatac me lwongo-ni in kikomi i cing rwed ot acel acel. Pi meno, co piny odi ma inongo dano peke iye dok itemme me dok cen. Kacokke ma nongo pud gudong ki karatac me lwongo-ni madwong ma nongo pud odong cabit acel me kwero Nipo, giromo wekone ki diro i odi ma nongo pe kinongo iye dano. Omyero inen ni jo ma idok cen ka limogi, lutino kwanni me Baibul, wadini, lutic luwoti, jiranini, ki jo mukene ma ingeyogi ducu gunongo karatac me lwongo-ni.
5. Pingo omyero wacak goyo pulanwa kombeddi me tic calo painia pi tutunu?
5 Tic Calo Painia pi Tutunu: In mono iromo tito pi deyo pa Jehovah ki tic calo painia pi tutunu i Marci, April, ki Mai? Me timo man, mitte ni ilok yubbi me nino ducu. (Ep. 5:15-17) Bed ki gen ni yelleni me timo tic mapol i tic pa Jehovah bikelli yomcwiny ki mot ma en miyo. (Car. 10:22) Man aye obedo kare me cako goyo pulan kit macalo kare me Nipo dong tye ka nyiko cok-ki.—Car. 21:5.
6. Pwony ango ma watwero nongone ki bot laminwa ma mwakane onongo tye 90 kulu ma otiyo calo painia pi tutunu i mwaka mukato-ni?
6 Lamego mo ma tye ki mwaka 90 onongo mit pa tic calo painia pi tutunu i mwaka mukato-ni. En owaco ni: “Kadi bed ni an i ada amaro tic i dye kalla dok onongo dong amito cako pito ature, ento anongo ni omyero kong aket gin ma pire tek obed me acel. Ki miti me keto pi Ker-ri me bedo me acel, amoko tamma me tic macalo painia pi tutunu i Marci.” Tika en onongo mot mo pi tutene-ni? En owacci, “Awinyo ni atye cok ki kacokke tutwal, dok man omiyo anyiko cok ki Jehovah.” Tika twere botwa bene me ngiyo jami ma wan waketo me bedo me acel kun wajalo tic ma wamaro i yo acel-lu ka mitte?
7. Mono tek tutwal me tic calo painia pi tutunu?
7 Tic pi cawa 50 macalo painia pi tutunu pe oromo bedo tek i kit ma itamo kwede. Ngi tic ma itiyogi nino ducu kun ileg pire, yub yubbi, ci ico woko i kalenda me ticci pi Ker-ri. In ingeyo kit me kwoni maber loyo. Ka itwo dok keroni nok, ci iromo tiyo tic me pwony pi cawa mo olo nino ducu. Ka gwok itiyo pi cawa malac nyo itye i cukul, iromo tic calo painia pi tutunu ki cito i tic me pwony i cawa me otyeno nyo i tum pa cabit.
8. Ngo ma okonyo laco mo gin ki dakone me tic calo painia pi tutuno?
8 Jo mapol dong gutiyo calo painia pi tutunu macalo luot acel. I mwaka mukato-ni laco mo gin ki dakone cwinygi obedo nok me tic calo painia pi tutunu pien gutamo ni kit ma gitye kwede onongo miyo pe gitwero. Ngo ma gin gutimo pire? “Walego bot Jehovah ni okonywa me cobo gin ma onongo wamito pi kare malac me timone kacel.” Goyo pulan i yo matir omiyo gucobo yubgi-ni maber. Gin gumedde ni: “Obedo mamwonya mada. Wanongo mot mapol. Dong wamiyo tam ni, tem kong. Kit ma otwere kwede botwa-ni, in bene iromo timone.”
9. I kwanwu ma wubibedo kwede macalo jo me ot, ngo ma wuromo timone me yubo yub pi dwe ma obibedo dwe me tic magwar?
9 I kwanwu ma wubibedo kwede macalo jo me ot, pingo pe wukwany kare me nyamo kit ma wun ducu wutwero medo kwede ticwu i dwe ma gubibino-ni. Kadi bed ni jo me oti ducu pe giromo tic calo painia pi tutunu, nyo ngat acel mo ki i kinwu twero timone ki kony kacel ki ribbe pa jo mukene-ni. Ka pe twere, ci jo me oti giromo keto yub me cwalo cawa malac i tic me pwony i dwe magi ma obedo dwe me tic magwar-ri.
10. Pingo omyero walok pi miti ma watye kwede me tic calo painia i kare me Nipo ma tye kabino-ni bot jo mukene?
10 Wukony Luwotwu: Miti obedo gin ma kobbe oyot. Lok pi miti ma itye kwede me tic calo painia pi tutunu. Man twero cuko cwiny jo mukene me donyo i tic man. Medo i kom meno, jo ma gutiyo calo painia i kare mukato angec giromo mini tam ma twero konyi me yubo yub ma miyo iromo cobone. (Car. 15:22) Ka ce itwero tic calo painia pi tutunu, pingo pe ilwong latit kwena mukene ma gwok nyo kit me kwone rom ki megi me tiyo tic man me yomcwiny-nyi kacel kwedi?
11. Luelda gitwero dongo miti me tic calo painia pi tutunu i cwiny dano nining i dwe ma gitye kabino?
11 Luelda mapol giketo yub ma miyo twere botgi me bedo i kin jo ma bitiyo tic man ma kite dok pat-ti. (Ibru 13:7) Man cuko cwiny jo me kacokke mada! Luelda bene gidongo miti ki lok ma giloko ki jo mukene-ni. Lok mogo manok me cuko cwiny nyo tam mogo ma tiyo, keken aye oromo bedo gin ma mitte me cuko cwiny jo mukene me tic calo painia pi tutunu. Lanen wi tic i kacokke bimedo yub mukene i kom yub me cokke me cito i tic me pwony wek dano ducu gunong kare me wot macalo gurup i miyo caden, kadi wa i nge cawa me tic nyo cukul. Omyero kitit pire i lok angeya kare ducu. En bene omyero onen ni wang tic kacel ki bukke tye muromo.
12. Gin ango ma iromo timone ka ce pe itwero tic calo painia pi tutunu?
12 Kadi bed kit ma itye kwede weko pe itwero tic calo painia pi tutunu, pud iromo cuko cwiny jo ma gitye ka timone, kun ilego pigi bene. (Car. 25:11; Kol. 4:12) Nyo twere ni iromo yubo yub ma weko inywako kwedgi i tic me pwony i nino acel mo ma tye i dye cabit nyo tero cawa malac makato kit ma jwi.
13. Yub ango ma kiketo pi lobowu, dok kacokkewu kono twero konyo me cobo yub man nining?
13 Yub me Bedo ki Painia pi Tutunu 6,400 i April: Ma naka, wel painia pi tutunu madwong loyo pud obedo 792 pi Burundi, 2,601 pi Kenya, 1,297 pi Tanzania ka dong 455 pi Uganda. Pi meno, yub ma twero cobbe ma dok i kom wel painia pi tutunu i April en-ni pi Burundi obedo 1000, Kenya 3,300, Tanzania 1,400, ki Uganda 700. Watwero o i wel meno ka ngat 1 i kom lutit kwena 6 i kacokke acel acel otiyo calo painia pi tutunu. Ngene kene ni i kacokke mogo wel lutit kwena ma gitwero tic calo painia pi tutunu bibedo pol makato. Yub ma kit meno kacokke mapol twero cobbene. Kong igo twon yomcwiny ma yub man bikelone i kacokkewu kacel ki adwogi maber ma bibedo i tic me pwony i wang ticwu!
14. Pingo April obedo dwe maber adada me tic calo painia pi tutunu?
14 Pingo April obedo dwe ma rwatte me tic calo painia pi tutunu? Kwero Nipo bitimme i acakki dwe meno, ma meno biminiwa kare muromo me limo jo ma gibibino i kwer man. Wabitero magajin ki miti me miyo buk me Baibul Pwonyo bot jo ma wadok ka limogi ki dok cako kwano Baibul kwedgi. Pi meno, tic calo painia pi tutunu i April bimiyo botwa kare muromo me cako kwano Baibul ki dano. Medo i kom meno, April tye ki Ceng Cabit abic kulu ki dok nino madit acel, ma weko bedo yot kadi wa bot jo ma tiyo kacel ki jo ma tye i cukul.
15. Kit ma kare me Nipo man woto ki bino-ni, pingo omyero wabed kun wangeyo ni piny otyeko odic woko?
15 Kare me Nipo acel acel ma kato-ni nyikowa cok ki agikki me yub maraco me kareni ki mwaka acel. Kare ma odong me tito pi dit pa Lubangawa bot jo mukene dong ojwik woko. (1 Kor. 7:29) Ka kare me kwero Nipo man okato, nongo kare ma onen ma nino meno ominiwa me pako Wonwa me polo bene okato matwal. Pi meno, mito wayubbe kombeddi wek watitu pi tic me deyo pa Jehovah ki tekowa ducu i Marci, April ki Mai!
[Box on page 4]
Tika Waromo Cobo yub ma dok i kom painia pi tutunu i April?
Burundi 1,000
Kenya 3,300 Tanzania 1,400 Uganda 700
◼ Ngi kong jami ma iterogi calo jami ma pigi tego
◼ Wunyam yubwu macalo luot
◼ Lok pi yub ma itye kwede ki jo mukene