‘Tit Lok me Kwena Maber-ri Orom Kin Piny’
1. Lok me kwena maber ango ma myero wanywak ki dano?
1 Watye ki mot me “tito lok me kwena maber me kica pa Lubanga,” i lobo man ma lok me kwena maber peya oromo iye-ni. (Tic 20:24) Man tye iye tito ki dano ni “kare me agikki” dong cokcok-ki biterowa i lobo manyen me kit ma atir pa Jehovah, ka ma “gin macon dong ducu [birwenyo] woko matwal.” (2 Tem. 3:1-5; Yabo. 21:4) I kare meno two dong bibedo pe. (Ic. 33:24) Jo me amara ma guto gibikatti woko ki i lyel ci gibiribbe ki jo me odigi ki luremgi doki. (Jon 5:28, 29) Lobo ducu gibiloko doko paradic ma mwonya. (Ic. 65:21-23) Magi aye labol manok nok me kwena maber ma myero wanywak ki dano!
2. Pingo kare me Nipo obedo kare maber tutwal me tito lok me kwena maber?
2 Marci, April, ki Mai bibedo dwe maber me tito lok me kwena maber ma kit magi. I dwe magi, jami calo lyeto pinygi nongo tye maber i kabedo mapol i but lobo ducu, ma man bibedo kare maber me tero cawa mapol i tic me pwony. Medo i kom meno, nino ma pire tek me Nipo kibikwerone i twok lobo ducu i nino dwe 22 Marci i Ceng Abicel otyeno ma nongo dong ceng opoto. Man aye obedo kare me cako yubbe pi medo cawawa i tic me pwony.
3. Ngo ma twero konyowa me medo ticwa macalo jo me ot?
3 Painia pi Tutunu: Mono iromo yubo yub wek iti calo painia pi dwe acel, aryo nyo adek mo? Pingo pe kong wulok iye kacel macalo jo me ot i kare me kwanwu ma obibino? Ka wuyubo maber, ci dano acel nyo makato gitwero tic calo painia pi tutunu. (Car. 15:22) Wuket pi yub man obed i lega, ci wukur wunen kit ma Jehovah bigoyo kwede laane i kom tutewu. (Car. 16:3) Kadi bed ngat mo ki i kinwu pe twero tic calo painia pi tutunu, ngat acel acel twero keto yub me medo ticce me pwony ki tic kacel ki jo ma gitye ka tic calo painia pi tutunu.
4. Ka watye ki dog tic ma tero cawa malac, watwero yubo yub wek wati calo painia pi tutunu nining?
4 Ka itye i dog tic ma tero cawa malac, ka ce iketo yub maber ci iromo tic calo painia pi tutunu. Iromo tic ki but cawa-ni me cam me dyeceng me tito kwena. Nyo iromo penyo wek kimini wang tic ma megi ma tye cok ki gangngi nyo gang ticci ma weko itimo tic me pwony pi cawa acel mo ma peya i cito i dog tic nyo i nge tic. Itwero bene nongo cawa mukene ki diro jami mogo ma nongo pigi pe tego i dwe mukene kun ipwonyo pi cawa malac i tum cabit. Jo mukene gipenyo pi yweyo me nino acel nyo aryo ki i dog ticgi wek gibed i tic me pwony.
5. Itwero konyo jo ma goro nyo mutegi nining wek guti calo painia pi tutunu?
5 Ka ibedo dano mutegi nyo itye ki goro, pud itwero bedo painia pi tutunu kun nongo ipwonyo pi cawa mo manok keken nino acel acel. Leg bot Jehovah wek omini ‘teko madwong.’ (2 Kor. 4:7) Lamego mo acel otiyo macalo painia pi tutunu ma onongo en tye ki mwaka 106 kulu! Ki kony pa wadine ma gubedo Lukricitayo kacel ki jo me kacokke, en onywako i tic me pwony i doggola ki doggola, dok cen ka lim, kwano Baibul ki dano, kacel ki mukene mapat pat. En okonyo cako kwano Baibul ki dano ma romo apar kulu. En owaco ni: “Ka atamo pi kare mwonya ma abedo ka tic calo painia pi tutunu-ni, cwinya pong ki mar ki pwoc bot Jehovah, Wode, kacel ki Dulle. Adada amito wacci ‘apwoyi Jehovah!’”
6. Twere nining ki bulu ma dong gunongo batija ma pud gitye i cukul me tic calo painia pi tutunu?
6 Ka ibedo bulu ma dong onongo batija ma pud tye i cukul, in bene iromo tic calo painia pi tutunu. Calo jo ma gitiyo i dog ticgi pi cawa malac, in bene itwero tic ki tum cabit i tic me pwony. Iromo bene cito i tic me pwony pi cawa acel mo nyo makato i nge cawa me cukul i nino mogo. Mono tye nino mo me yweyo me cukul ma itwero tic kwede me cito i tic me pwony? Ka ce imito bedo painia pi tutunu, tit pire bot lunyodo-ni.
7. Ngo ma luelda giromo timone me medo mit kom i tic me pwony i kare me Nipo?
7 Med Mit Komi: Luelda gitwero tic ki lanengi me cuko cwiny kacokke me bedo ki mit kom. (1 Pet. 5:2, 3) Gin giromo medo yub mukene i kom yub me cokke me cito i tic me pwony pi jo ma cito odiko, i otyeno i nge kwan nyo i nge tic. Lanen wi tic omyero onen ni lutit kwena ma gitye ki ngec muromo aye gudor cokke magi dok omyero kinen ni wang tic kacel ki jami me tic calo magajin, bukke tye muromo pi dwe magi me tic matek-ki.
8. Ngo ma wapwonyo ki i gin mutimme i kacokke mo acel?
8 I kacokke mo acel, luelda gucako cuko cwiny dano me tic calo painia pi tutunu ma onongo pud odong dwe mapol anyim. Gubedo ka niango kacokke cabit ki cabit i kom wel dano ma gutyeko donyo i tic calo painia pi tutunu. Man ojingo cwiny jo ma onongo gimito medo cawagi i tic me pwony me ngeyo ni gibibedo ki cwak muromo. Gumedo bene cokke me cito i tic me pwony mukene i odiko con ki otyeno. Adwogine obedo ni lutit kwena 53 kulu gutiyo macalo painia pi tutunu i dwe me April, ma meno cok obedo nucu pa kacokke kulu!
9. Pingo kare me Nipo obedo kare maber adada pi jo ma gitye mupore me cako tito kwena maber-ri?
9 Kony Jo Mukene Wek Gupwony: Ka bulu nyo ngat mo manyen tye mupore me donyo i tic me pwony, ci kitwero weko en tiyo ki lutit kwena ma dong gucwiny. Kare maber ma kit meno romo nonge i kare me Nipo ma dano mapol i kacokke nongo gitye ka medo ticgi. Nyo itye ki latin kwanni me Baibul ma tye ka dongo ma dong oloko kwone ma lubbe ki cik pa Jehovah? Nyo itye ki lutino ma kwogi beco ma gitye ka dongo i yo me cwiny ento peya gudoko lutit kwena? Ka jo ma kit meno gunyutu miti me doko lutit kwena ma peya gunongo batija, dok in bene itamo ni gupore, ci wek laelda mo onge lokke. Wonkom pa luelda biyubo luelda aryo me neno in ki latinni nyo latin kwanni-ni.
10. Ngo ma luelda gitwero timone me konyo jo ma ticgi nongo okwe woko?
10 Dwe ma tye ka bino magi bene bibedo dwe maber atika pi jo ma nongo ticgi okwe woko me cako tic kacel ki kacokke. Ludor Cokke me Kwano Buk nyo luelda mogo omyero gutute matek me limo jo ma kit meno dok gucuk cwinygi me tic kacel kwedgi i tic me pwony. Ka onongo ticgi dong okwe woko pi kare malac, ci luelda aryo omyero kong olok kwedgi me neno ka ce gitye mupore.—km 11/00 pot 3.
11. Ngo ma onyutu “kica pa Lubanga” i yo ma pud dong dit loyo?
11 Yubbe pi Nipo: Gitum onyutu “kica pa Lubanga” i yo ma pud dong dit loyo. (Tic 20:24) Dano milion mapol ma gitye ki pwoc i but lobe ducu gibigure i Ceng Abicel, Marci 22, i nge poto ceng pi kwero Nipo me to pa Kricito. Wamito walwong dok wakony jo ducu ma gitye ki cwiny me ada me bedo tye i kwer man ma pire tek-ki. Kwer man miyo caden i kom kica ma Jehovah onyutu bot dano.
12. Angagi ma omyero walwongi me bino i kwer me Nipo?
12 Co nying jo ducu ma imito lwongogi. Co nying wadini, jirani, jo ma i ingene kwedgi i dog tic nyo cukul, lutino kwanni me Baibul, me kare mukato angec ki me kare-ni, kacel ki jo ducu ma ilimogi kare ki kare. Ka jo ma ilwongogi-ni gitye ki lapeny i kom Nipo, ci iromo tic ki pwony ma dok i kom Cam pa Rwot me Otyeno ma nonge i lamed ngec i pot karatac 206-8 i buk me Baibul Pwonyo. Man twero yabo doggola me cako kwano Baibul ki dano, pien nongo omini kare me nyutu buk ma watiyo kwede me kwano Baibul ki dano.
13. I yo ango ma Jehovah ogoyo laane i kom yelle pa lutit kwena aryo me lwongo dano me bino i Nipo?
13 Lamego mo acel ocoyo nying jo 48 me odi, ma myero elwonggi. Ka en olwongo ngat moni, ci ngolo nying ngat meno woko ki dok coyo nino dwe ma elwongo kwede ngat meno. Cwinye obedo yom atika pien jo 26 ki i kin jo ma en olwongogi-ni gubino i kwer me Nipo! Omego mo ma tye ki duka olwongo laticce mo ma onongo yam kong obedo padi. Laco meno obino ci i ngeye owacci, “Anongo pwony mapol ki i Baibul i cawa acel keken ma kato jami ma apwonyogi pi mwaki 30 kulu ma abedo kwede i Katoli.” Cutcut i nge Nipo, en oye ni kikwan kwede buk me Baibul Pwonyo.
14. Rwec ango ma bicakke i but lobo ducu i Marci 1?
14 Rweyo Dano: Cakke i Ceng Abicel me Marci 1, me o wa i Marci 22, kibipoko karatac me lwongo me Nipo i but lobo ducu. Lutit kwena ducu omyero guti matek i tic man me rweyo dano ma pire tek-ki. Bedo ber ka imiyo karatac me lwongo man bot rwod ot kikome me ka rwakone i te doggola. Ento ka wang ticwu tye malac, ci luelda gitwero mokone ni omyero kiwek karatac man ki diro i te doggola ka kinongo dano peke gang. I tum cabit, wabitero bene magajin bot dano.
15. Ngo ma watwero wacone ka watye ka miyo karatac me lwongo pi Nipo?
15 Kit ma watye ki kare manok keken me poko karatac man-ni, bedo ber ka ce waloko macek cek. Nyut cwiny me larem dok ilok ki yamo komi. Iromo lok kit man: “Wamito ni in, jo me paconi ki luremi wubin i yub mo ma pire tek ma bibedo i Marci 22. Karatac me lwongoni en. Lok mukene mapol nonge i karatac me lwongo man.” Rwod ot oromo bedo ki lapeny mapol. Nyo romo gamo karatac me lwongo meno dok bene wacci ni ebibino. Co nying jo ma gunyutu miti ci iyub yub me dok cen botgi.
16. Gin ango mutimme ma nyutu ni rweyo dano me bino i kwero Nipo pire tek?
16 I mwaka mukato, lamony mo onongo karatac me lwongo i te doggolane. En omoko tamme me cito iye ento onongo mitte ni en omyero kong openy laditte. I kare ma en onyutu karatac me lwongo meno bot laditte, laditte-ni kong oling manok ka owacce ni lunyodone gubedo Lucaden pa Jehovah dok en bene onongo ewoto i cokke kwedgi. Ladit-ti pe oye miyo twero ki lamony-nyi keken ento gucito kacel kwede i kwero Nipo!
17. Watwero nyutune nining ni pe waweko kica pa Lubanga balle nono?
17 Nyut Pwocci: Kit ma nongo nino me kwero Nipo pi mwaka 2008 woto ki nyiko cok, omyero wan ducu wabed ka tamo pi kica ma Jehovah onyutu piwa. Lakwena Paulo ocoyo ni: “Kit ma dong wunongo kwede kica pa Lubanga-ni, pe wuwek oballe nono.” (2 Kor. 6:1) Watwero nyutune nining ni pe watye ka weko kica pa Lubanga me balle nono? Paulo ocoyo ni: “Ento i kare ducu wanyuto berwa kenwa macalo wan lutic pa Lubanga.” (2 Kor. 6:4) Pi man wanyutu pwocwa pi mic pa Jehovah i kitwa kacel ki tito lok me kwena maber-ri ki mit kom. Kare me Nipo man bibedo kare maber mada botwa me medo ticwa ki tito lok me kwena maber-ri matek.
[Box on page 3]
Angagi ma Giromo Tic Calo Painia pi Tutunu?
◼ Jo me odi
◼ Jo ma gitye i dog tic ma gitiyo pi cawa malac
◼ Jo mutegi ki jo ma goro
◼ Lutino kwan
[Box on page 4]
Ka Watye ka Poko Karatac me Nipo:
◼ Lok macek; dok ki yamo komi
◼ Co nying jo ma ibidok ka limogi
◼ Ter magajin i tum cabit