Nipo ma Tye ka Bino-ni Bimiyowa Kare me Nyuto Pwocwa

1. Nipo ma bino-ni bimiyowa kare maber me timo gin ango?

¹ Kwer me Nipo ma bibedo i April 14, bimiyowa kare maber me dongo ki nyuto pwocwa pi ber pa Jehovah. Lok ma i Luka 17:11-18 nyuto kit ma Jehovah gin ki Yecu gitero kwede pwoc. Tye me cwercwiny ni, ngat acel keken i kin ludobo apar ma kicangogi-ni aye okwanyo kare me pwoyo Yecu. I kare me anyim, mot me ginkok-ki biyabo yo me cango two ducu, kun kelo kwo ma pe tum! Labongo akalakala mo wabibedo ka pwoyo Jehovah nino ducu pi mot magi. Watwero nyuto pwocwa nining i cabit bibino i anyim?

2. Waromo dongo pwocwa pi ginkok-ki nining?

² Dong Pwocci: Bedo ka tam matut i kom gin moni twero kelo pwoc pi gin meno. Wek wadong pwocwa pi ginkok, yub me kwano Baibul pi kare me Nipo nonge i kabedo mapatpat, calo i Baibul me New World Translation manyen-ni i lamed ngec me B12, i kalenda, ki i buk me Examining the Scriptures Daily. Pingo pe wukwan man kacel calo jo me ot? Timo kit meno bimedo pwocwa pi ginkok-ki. Man bene biyubo kitwa.​—2 Kor. 5:14, 15; 1 Jon 4:11.

3. I yo ango ma watwero nyuto kwede pwocwa i kare me Nipo?

³ Nyut Pwocci: Pwoc ma watye kwede nen woko ka maleng i ticwa. (Kol. 3:15) Ladobo ma onyuto pwoc-ci otute matek me yenyo Yecu dok opwoye. Nen calo en bene oloko ki mitkom i kom tango man bot jo mukene. (Luka 6:45) Tika pwocwa pi ginkok-ki bitugo cwinywa me nywako ki mitkom i rwec me lwongo dano pi Nipo? Tic calo painia pi tutunu nyo medo cawa ma wacwalo i tic me pwony obedo yo mukene me nyuto pwocwa. I otyeno me Nipo, pwoc ma watye kwede i cwinywa biweko wajolo wele dok wamiyo kare me konyogi ki gamo lapenygi.

4. Waromo tic maber ki kare me Nipo man nining?

⁴ Man mono bibedo kwer me Nipo me agikki piwa? (1 Kor. 11:26) Pe wangeyo gire. Ento wangeyo ni teke dong okato, nongo kare me nyuto pwocwa bene okato woko. In mono ibitic maber ki kare meno? Walego ni lok me pwoc ma a ki i dogwa kacel ki tam ducu ma tye i cwinywa okel yomcwiny bot Jehovah, Lami mic me ginkok-ki.​—Jab. 19:14.