1 | Lega “Wuket Parwu Ducu i Kome”

BAIBUL WACO NI: “Wuket parwu ducu i kome [Lubanga], pien en tamo piwu.”—1 PETERO 5:7.

Tyen Lokke

Lubanga Jehovah mito ni watite kit gin mo keken ma keliwa par. (Jabuli 55:22) Pe tye peko mo madit nyo matidi tutwal ma pe watwero lega pire. Ka pire tek botwa, ci pire bene tek bot Jehovah. Tye kit meno pien Jehovah paro piwa ki kit ma wawinyo kwede. Lega bote obedo yo acel ma pire tek ma twero konyowa me bedo ki wic ma opye mot.—Jo Pilipi 4:6, 7.

Lega Twero Konyi Nining?

Ka watye ka lweny ki pekowa me two wic, watwero winyo ni watye kenwa. Watwero winyo calo jo mukene pe giniang maber peko ma watye ka lweny kwede. (Carolok 14:10) Ento ka watito bot Lubanga kit ma wawinyo kwede kikome, en biniang pekowa dok bitero ite ka winyo legawa. Jehovah nenowa, en ngeyo aremwa kacel ki pekkiwa, dok mito ni waleg bote i kom gin mo keken ma keliwa par.—2 Tekwaro 6:29, 30.

Lega bot Jehovah jingo genwa i kome ni en paro piwa. Watwero winyo calo laco jabuli ma olego ni: “Dong ityeko neno can ma omaka, dok ityeko winyo koko me can ma odiya.” (Jabuli 31:7) Ngeyo ni Jehovah neno peko ma watye ka lweny kwede twero konyowa matek me medde ki kanyo pekowa. Ento en pe neno pekowa keken ci dong otum. En niang peko ma watye ka kato ki iye dok konyowa me nongo cuko cwiny kacel ki kwecwiny i Baibul.

Kit ma Baibul Tye ka Konyo Julian

Kit ma Two Par Guda Kwede

“Atye ka lweny ki par kacel ki two wic ma kilwongo ni obsessive-compulsive disorder (OCD). Par bwoya i cawa ma nongo pe abyeko. I cawa mukene nongo atye maber, ci cutcut par bino bwoya atura labongo tyen lok mo bene. Pol kare abedo ki par ka atye i kin dano. Abedo ka paro gin ma gitye ka tamone i koma.

“Lurema ma gingeyo ni atye ki two par gitute matek me konya. Ki lok ada, i kare mogo giwaco jami ma pe amito winyone. Ento atye ki pwoc ni gitute matek me konya.

“I kare mogo, par kacel ki two wic weko bedo tek adada me lega. Tero kero madwong me keto cwinya i gin ma abiwaco i lega bot Jehovah. Tam bedo ka ngolle i wiya mapol adada ma weko wiya nywene woko. Ka pe atwero juko tam magi, ci weko bedo tek adada pira me tito ki Jehovah tamma ki kit ma awinyo kwede.”

Kit ma Baibul Tye ka Konya Kwede

“Apwonyo ki i Baibul ni pe mitte ni legawa obed mabor, nyo watit gin ma i cwinywa kore ki kore ka wek Lubanga owiny legawa. I kare mogo ka pe atwero waco ki Jehovah kit ma awinyo kwede, alego macek ni: ‘Jehovah, konya do.’ Kadi bed alego macek kit meno, awinyo ni Jehovah oniang pekona dok omina kony ma amito i cawa meno. Medo i kom lega, ayenyo kony ki bot ludiro me yotkom. Cwinya yom me waco ni pi kony pa jami magi ducu, twona pe tye ka tera marac tutwal. Kadi bed anongo ni tek adada me lega pi kony ki bot Wora me polo, atimo man pien atye ki tekcwiny ni en mara dok mito konya.”