PWONY ME ANYAMA ME 23
WER 2 Jehovah En Nyingi
Pingo Nying Jehovah Pire Tek Adada Botwa?
“‘Wun cadenna,’ Rwot [Jehovah] ma owaco.”—IC. 43:10.
GIN MA WABIPWONYO
Wabinyamo jami ma watwero timone me nyuto ni nying Jehovah leng dok ni adot ma Catan omoro i kom Jehovah obedo goba.
1-2. Wangeyo nining ni nying Lubanga pire tek adada bot Yecu?
PE TYE gin mo keken ma pire tek loyo bot Yecu makato nying Lubanga. Dok pe tye ngat mo keken ma otimo tic madit loyo tic ma Yecu otimo me weko nying Jehovah ngene. Kit ma wanyamo kwede i pwony ma okato-ni, Yecu onongo tye atera me to wek emok ni nying Jehovah leng dok ni En timo jamine i yo ma atir. (Mar. 14:36; Ibru 10:7-9) Dok i nge tyeko Locce me Mwaka Alip Acel, Yecu bidwoko cen twero me locce bot Jehovah pien Yecu mito ni Jehovah onong deyo ducu muporo Nyinge. (1 Kor. 15:26-28) Jami ducu ma Yecu otimo pi Jehovah moko ni en maro Jehovah matek adada.
2 Yecu obino i lobo i nying Wonne. (Jon 5:43; 12:13) En oweko nying Jehovah ongene bot lulub kore. (Jon 17:6, 26) Yecu opwonyo dano dok otimo tango mapol i nying Jehovah. (Jon 10:25) Dok i kare ma en olego bot Jehovah me gwoko lupwonnyene, en olego Jehovah me ‘gwokogi i Nyinge.’ (Jon 17:11) Nen ka maleng ni, nying Lubanga onongo pire tek loyo gin mo keken bot Yecu. Dong, twerre nining ki ngat mo me waco ni ebedo Lakricitayo ka en pe ngeyo dok pe tiyo ki nying Lubanga?
3. Gin ango ma wabinyamo i pwony man?
3 Pien watye Lukricitayo me ada, walubo lanen pa Yecu ki nyuto mar kacel ki woro madit pi nying Jehovah. (1 Pet. 2:21) I pwony man, wabinyamo pingo Jehovah omiyo nyinge bot jo ma gitito “lok man me kwena maber me ker pa Lubanga.” (Mat. 24:14) Wabinyamo bene kit ma nying Jehovah pire myero obed tek kwede bot wan ducu ki acel acel.
‘LWAK MA KILWONGO KI NYINGE’
4. (a) Gin ango ma Yecu otito ki lupwonnyene i kare ma en cok dok cen i polo? (b) Lapeny mene ma wabinongo lagamme i pwony man?
4 Ma Yecu cok dok cen i polo, en owaco ki lupwonnyene ni: ‘Wun wubilimo teko ka cwiny maleng bibino i komwu, ci wubibedo lucadenna i Jerucalem ki i Judaya ducu ki i Camaria, wa i agikki lobo ducu.’ (Tic 1:8) Pi meno, lupwonnye pa Yecu onongo gibitito kwena i kabedo ducu, ento pe i Jerucalem keken. Lacen, jo me rok ducu onongo gibibedo ki kare me doko lulub kor Yecu. (Mat. 28:19, 20) Ento Yecu bene owaco ni: ‘wubibedo lucadenna.’ Tika onongo bimitte ni lupwonnye manyen magi gunge nying Jehovah, nyo mono gibibedo lucaden pa Yecu keken? Jami ma otimme ma kitito pire i Tic pa Lukwena cura 15 konyowa me gamo lapeny meno.
5. Lukwena kacel ki luelda ma i Jerucalem gunyuto nining ni pire tek ni dano ducu gunge nying Jehovah? (Nen bene cal.)
5 I mwaka 49 K.M., lukwena ki luelda ma i Jerucalem gucokke kacel me nyamo gin ma Lurok ma pe kilirogi omyero gutim wek gudok Lukricitayo. I nge tyeko nyamo lokgi, Yakobo ma obedo omin Yecu owaco ni: ‘Cimeon dong otito kit ma Lubanga okwongo nyuto kwede ni eparo pi Lurok kun okwanyo ki i kingi lwak ma kilwongo ki nyinge.’ Nying anga ma onongo Yakobo tye ka lok iye? Yakobo omedo lokke kun nwoyo lok pa lanebi Amoc, ma owaco ni: ‘Wek jo mudong guyeny Jehovah, kacel ki Lurok ducu ma kilwongogi ki nyinga, meno Jehovah aye ma owaco.’ (Tic 15:14-18) Onongo bimitte ni lupwonnye magi gupwony lok i kom Jehovah dok onongo ‘kibilwongogi ki nyinge.’ Man tyen lokke ni onongo gibipwonyo jo mukene ki nying Lubanga dok dano onongo bingeyogi macalo jo ma cung pi nying meno.
I cokke pa lukiko madit me cencwari me acel, co magi ma lugen-ni guniang ni Lukricitayo omyero gubed jo ma kilwongogi ki nying Lubanga (Nen paragraf 5)
6-7. (a) Pingo Yecu obino i lobo? (b) Tyen lok ma pire tek loyo ango ma oweko Yecu obino i lobo?
6 Nying Yecu gonye ni “Jehovah en Aye Lalar.” Dok Yecu onyuto ka maleng ni Jehovah bitic kwede me laro jo ma giketo niyegi i kome. Yecu obino i lobo me miyo kwone macalo ginkok pi dano. (Mat. 20:28) Ginkok man oweko twere me timo kica pi bal pa dano kacel ki nongo kwo ma pe tum.—Jon 3:16.
7 Ento, pingo onongo mitte ni kimi ginkok pi dano? Ginkok onongo mitte macalo adwogi me bal ma otimme i poto me Eden. Kit ma wanyamo kwede i pwony ma okato-ni, lunyodowa mukwongo, Adam ki Kawa gujemo i kom Jehovah dok gurwenyo mot me kwo pi naka. (Acak. 3:6, 24) Yecu onongo obino i lobo me laro likwayo pa Adam ki i to. Kadi bed kit meno, en onongo bene obino me timo gin mo ma pire tek kato miyo ginkok. Catan onongo owaco lok goba me balo nying Jehovah. (Acak. 3:4, 5) Dong, likwayo pa Adam myero gunge ni larogi ki i bal ki to kubbe ki lok ma pire tek loyo—ma en aye lonyo nying Jehovah. Dok Yecu aye onongo obedo ngat mupore me lonyo nying Jehovah. En onongo cung pi nying Jehovah dok otimo jami ducu kore ki kore kit ma Jehovah mito kwede.
Ngat moni twero waco ni ebedo Lakricitayo me ada nining ka en pe ngeyo dok pe tiyo ki nying Jehovah?
8. Gin ango ma lulub kor Yecu ducu omyero guniang iye maber?
8 Onongo bimitte ni Lukricitayo ducu guye ni larregi bia ki bot Lubanga Jehovah. (Jon 17:3) Medo i kom meno, calo Yecu, Lukricitayo magi bene onongo kibilwongogi ki nying Jehovah. Onongo bene bimito ni guniang ni lonyo nying Jehovah aye obedo gin ma pire tek loyo, dok larregi cung i kom lok meno. (Tic 2:21, 22) Pi meno, mitte ni lulub kor Yecu ducu gupwony lok i kom Yecu kacel ki Jehovah. Lok man konyowa me niang pingo Yecu ogiko legane ma kicoyo i Jon 17 ni: ‘Amiyo nyingi ongene botgi, dok abimiyo ngene, wek mar ma imara kwede obed i gin, ki an i igi.’—Jon 17:26.
‘WUN WUBEDO CADENNA’
9. Macalo lulub kor Yecu me ada, omyero watim gin ango?
9 Ma lubbe ki jami ma dong watyeko nyamone, nen ka maleng ni macalo lulub kor Yecu me ada omyero walony nying Jehovah. (Mat. 6:9, 10) Omyero bene wanen nying Jehovah calo obedo nying ma pire tek loyo. Dok omyero watim gin mo me nyuto ni nying meno pire tek botwa. Dong gin ango ma watwero timone me lonyo nying Jehovah ki me nyuto ki dano ni adot ma Catan omoro i kom Jehovah obedo lok goba?
10. Lok ma kicoyo i Icaya cura 42 me o i cura 44 tittiwa gin ango? (Icaya 43:9; 44:7-9) (Nen bene cal.)
10 Buk pa Icaya cura 42 me o i cura 44, nyutiwa jami ma watwero timone me lonyo nying Jehovah. I cura magi, Jehovah owaco ki jo ma pe giwore ni omyero gumok ni lubangegi obedo Lubanga me ada. Kit macalo langolkop timo kwede i kot, Jehovah owaco ni gukel cadengi me moko lok man. Ento pe tye ngat mo ma otimo meno!—Kwan Icaya 43:9; 44:7-9.
Wanyuto ni pe tye Lubanga mo mukene mapat ki Jehovah i lokwa ki jami ducu ma watimo (Nen paragraf 10-11)
11. Ma lubbe ki Icaya 43:10-12, gin ango ma Jehovah owaco ki jone ni gutim?
11 Kwan Icaya 43:10-12. Jehovah owaco ki jone ni: ‘Wun cadenna, . . . an abedo Lubanga.’ Jehovah bene openyo jone me gamo lapeny man: “Tye Lubanga mo mukene ma pe an?” (Ic. 44:8) Obedo mot madit pi wan ducu ki acel acel me gamo lapeny meno. Lokwa ki jami ma watimo myero onyut ka maleng ni pe tye Lubanga mo mukene kono Jehovah keken. Nying Jehovah dit loyo nying mo keken. Dong, kit ma wakwo kwede omyero onyut ni wamaro Jehovah matek, dok ni wabibedo lugen bote kare ducu kadi bed Catan tye ka tute matek me jukowa tic pi Jehovah. Ka watimo jami magi, wabedo ki kare me konyo i lonyo nying Jehovah.
12. Lok pa lanebi ma nonge i Icaya 40:3, 5 ocobbe nining?
12 Ka wamiyo cwak i lonyo nying Jehovah, nongo watye ka lubo lanen pa Yecu Kricito. Lanebi Icaya bene otito con ni ngat mo ‘bigero yo pa Jehovah.’ (Ic. 40:3) Lok pa lanebi man ocobbe nining? Jon Labatija oyubo yo pi Yecu, ento ki lok ada onongo oyubo ‘yo pa Jehovah’ pien Yecu obino i nying Jehovah dok oloko i nying Jehovah. (Mat. 3:3; Mar. 1:2-4; Luka 3:3-6) Lok pa lanebi man bene owaco ni: ‘Deyo pa Jehovah dong binen ka maleng.’ (Ic. 40:5) Man ocobbe nining? I kare ma Yecu obino i lobo, en otimo jami ducu kore ki kore labongo roc mo ma oweko onongo bedo calo Jehovah aye obino i lobo.—Jon 12:45.
13. Watwero lubo lanen pa Yecu nining?
13 Calo Yecu, wan bene wabedo lucaden pa Jehovah. Kilwongowa ki nying Jehovah dok watito ki dano ducu ma warwatte kwedgi jami mabeco mapol ma Jehovah otimo. Ento, ka wek wabed lucaden pa Jehovah kikome, omyero bene wawek dano gunge jami ma Yecu otimo me lonyo nying Jehovah. (Tic 1:8) Pe tye ngat mo keken ma omiyo caden i kom Jehovah makato kit ma Yecu otimo kwede, pi meno omyero walub lanenne. (Yabo 1:5) Gin ango mukene ma watwero timone me nyuto ni nying Jehovah pire tek botwa?
YO MUKENE MA WANYUTO KWEDE NI NYING JEHOVAH PIRE TEK BOTWA
14. Kit ma kitito kwede i 1 Jo Korint 1:31, wawinyo nining i kom nying Jehovah?
14 Omyero wabed ki awaka madit pi nying Jehovah. (Kwan 1 Jo Korint 1:31.) Cwiny Jehovah bedo yom adada ka wanyatte pi nyinge. (Jer. 9:23, 24; Jab. 105:3; 2 Kor. 10:17) Obedo deyo madit adada me tito ki jo mukene ni Jehovah obedo Lubanga ma kite ber dok timo jami ducu kakare. Pe omyero lewic omakwa me tito ki lutic luwotwa, lutino kwan luwotwa, jiraniwa, kacel ki jo mukene ni wabedo Lucaden pa Jehovah! Catan larac-ci mito ni wajuk tito ki jo mukene lok i kom nying Jehovah. (Jer. 11:21; Yabo 12:17) Ki lok ada, Catan kacel ki jo ma en tiyo kwedgi me nyayo lok goba, gitye ka tute matek me neno ni dano wigi owil woko i kom nying Jehovah. (Jer. 23:26, 27) Ento pien wan wamaro nying Jehovah, watito pire dok wapakke kare ducu.—Jab. 5:11; 89:16.
15. Lwongo nying Jehovah kwako gin ango?
15 Omyero wamedde ki lwongo nying Jehovah. (Joel 2:32; Rom. 10:13, 14) Lwongo nying Jehovah pe kwako mere ngeyone kacel ki tic kwede keken. Omyero wange Jehovah macalo laremwa, waket genwa i kome, dok wayeny kony kacel ki tira ki bote. (Jab. 20:7; 99:6; 116:4; 145:18) Omyero bene watit pi nyinge ki kite mabeco bot jo mukene. Dok omyero wapwonygi wek gulok kwogi i yo ma yomo cwiny Jehovah ka wek gunong kwo ma pe tum.—Ic. 12:4; Tic 2:21, 38.
16. Watwero nyuto ka maleng ni Catan obedo lagoba nining?
16 Omyero wabed atera me deno can pi nying Jehovah. (Yak. 5:10, 11) Ka wamedde ki bedo lugen bot Jehovah kadi bed watye ka deno can, ci wamoko ni Catan lagoba. I kare ma Yubu onongo pud tye kwo, Catan omoro adot i kom jo ma gitiyo pi Jehovah ni: “Gin ducu ma dano tye kwede en bimiyo pi kwone.” (Yubu 2:4) Catan onongo tye ka waco ni dano gibitic pi Jehovah keken ka kwo tye mayot. Ento ka kwo odoko tek, ci dano bijuko tic pi Jehovah woko. Yubu onyuto ni man pe obedo lok ada kulu. I kare-ni, wan bene watwero moko ka maleng ni kadi bed kwo odoko tek nyo Catan tye ka tute matek me turo cwinywa, pe wabijuko tic pi Jehovah kulu. Watwero bedo ki gen matek ni Jehovah bigwokowa pien kilwongowa ki nyinge.—Jon 17:11.
17. Kit ma kitito kwede i 1 Petero 2:12, yo mukene ango ma watwero keto kwede deyo i kom nying Jehovah?
17 Omyero wanyut woro pi nying Jehovah. (Car. 30:9; Jer. 7:8-11) Pien dano gingeyo ni wabedo Lucaden pa Jehovah, jami ma watimo twero kelo deyo nyo cac i nying Jehovah. (Kwan 1 Petero 2:12.) Pi meno, omyero watute matek wek lokwa ki ticwa okel deyo ki pak bot Jehovah. Ka watimo meno, ci wabikelo deyo i nying Jehovah kadi bed watye ki roc.
18. Yo mukene ango ma watwero nyuto kwede ni nying Jehovah pire tek botwa? (Nen bene lok ma tye i tere piny.)
18 Omyero waket deyo i kom nying Jehovah labongo paro kit ma jo mukene gibinenowa kwede. (Jab. 138:2) Pingo lok man pire tek adada? Pien ka watimo jami ma yomo cwiny Jehovah, pol kare dano pe gimaro dok gitwero cako lok marac i komwa bene.a I kare ma Yecu oto i yo me lewic, dano gunene macalo labalo dok gucaye matek. Ento Yecu onongo tye atera me to i yo meno wek elony nying Jehovah. Yecu pe obedo ka paro tutwal gin ma jo mukene gubedo ka tamone i kome dok man okonye me ‘cayo lewic ma kiketo i kome.’ (Ibru 12:2-4) Yecu oketo cwinye ducu me timo miti pa Lubanga.—Mat. 26:39.
19. In imoko tammi me timo gin ango, dok pingo?
19 Watye ki awaka me tic pi Jehovah dok obedo twon deyo madit ni wabedo Lucaden pa Jehovah. Pien nying Jehovah pire tek adada botwa, wabimedde ameda ki pakke kadi bed jo mukene gicayowa. Keto deyo i kom nying Jehovah aye pire tek loyo botwa makato gin ma dano gitamo i komwa. Dong, wamoku tamwa me medde ki pako nying Jehovah kadi bed Catan tye ka tute matek me turo cwinywa. Ka watimo meno, ci wanyuto ka maleng ni nying Jehovah pire tek loyo botwa kit ma pire tek kwede bene bot Yecu Kricito.
WER 10 Pak Jehovah, Lubangawa!
a Kadi wa Yubu ma onongo obedo lagen-ni bene ocako paro pi kit ma dano gitye ka nene kwede i kare ma lureme adek guwacce ni nen calo en otimo gin mo marac. I acakkine, ma lutinone guto dok orwenyo lonyone ducu, “Yubu pe obalo, pe owaco ni Lubanga otimo rac.” (Yubu 1:22; 2:10) Ento, i kare ma co adek-ki gukok i kome ni otimo bal, Yubu ocako ‘loko lok atata.’ En ocako keto cwinye me gengo ngeye wek elony nyinge me ka lonyo nying Jehovah.—Yubu 6:3; 13:4, 5; 32:2; 34:5.