Kony Latin Kwanni me Baibul me Moko Tamme me Tic pi Jehovah

1-2. (a) Pingo lutino kwan me Baibul mogo ginongo ni tek me moko tamgi me doko Lucaden pa Jehovah? (b) Gin ango ma wabinyamo i pwony man?

TIKA onongo tye jami mogo ma oweko ibedo ki lworo me moko tammi me doko Lacaden pa Jehovah? Gwok ibedo ki lworo ni lutic luwoti, luremi, nyo jo gangwu cwinygi bicwer i komi. Nyo bene ibedo ki lworo ni pe ibitwero lubo jami ducu ma Jehovah mito ni itim. Ka tye kit meno, ci itwero niang kit ma latin kwanni winyo kwede ki dok pingo tek ite me moko tamme me doko Lacaden pa Jehovah.

² Yecu onongo ngeyo ni lworo ma kit meno twero gengo ngat moni me tic pi Jehovah. (Mat. 13:​20-22) Ento en pe oilo cinge me medde ki konyo jo ma gitye ki lworo me doko lulub kore. Yecu okonyo jo ma kit meno me (1) niang ariya ma gitye kwede, (2) dongo margi matut pi Jehovah, (3) keto tic pi Jehovah mukwongo i kwogi, ki dong (4) kit me loyo aunauna. I pwony man, wabinyamo kit ma watwero keto i tic jami angwen magi ka watye ka tic ki buk me Bed ki Kwo Maber Nakanaka! me konyo lutino kwanwa moko tamgi me tic pi Jehovah.

KONY LATIN KWANNI ME NIANG ARIYA MA EN TYE KWEDE

3. Ariya ango ma onongo tye ka gengo Nikodemo me doko lalub kor Yecu?

³ Nikodemo, onongo obedo laloc pa Lujudaya ma rwomme dit adada. En okemme ki ariya mo ma oweko obedo tek ite me doko lalub kor Yecu. Nikodemo oniang ni Yecu aye obedo Meciya i nge dwe abicel keken ma Yecu ocako ticce me pwony. (Jon 3:​1, 2) Kadi bed kit meno, Nikodemo oyero me rwatte ki Yecu i dyewor ‘pien onongo lworo Lujudaya.’ (Jon 7:13; 12:42) Twero bedo ni en onongo tye ki lworo ni eromo rwenyo rwomme kacel ki lonyone ka edoko lalub kor Yecu.a

4. Yecu okonyo Nikodemo me niang gin ma Lubanga mito ki bote nining?

⁴ Nikodemo onongo tye ki ngec matut i kom Cik pa Moses, ento onongo mitte ni kikonye me niang gin ma Jehovah mito ki bote. Yecu okonye nining? Yecu onongo tye atera me jalo cawane me pwonyo Nikodemo kadi wa i dyewor. Dok Yecu otito ka maleng ki Nikodemo jami ma en myero otim me doko lapwonnyene. Yecu otitte ni, en myero ongut i kom balle, onongo batija i pii, dok odong niyene i kom Wod pa Lubanga.—Jon 3:​5, 14-21.

5. Watwero konyo latin kwan me Baibul me niang ariya ma tye ka genge doko Lacaden nining?

⁵ Kadi bed latin kwanni me Baibul niang Ginacoya maber, twero mitte ni ikonye me niang ariya ma tye ka genge doko Lacaden pa Jehovah. Me labolle, twero bedo ni en cwalo cawa malac i dog ticce, nyo gwok jo ganggi pe mito ni en odok Lacaden pa Jehovah. Calo Yecu, in bene omyero ikwany cawa me konyo latin kwanni. Itwero lwonge gangngi ka namo, nyo cito ka mo ka yweyo wiwu kacel. Ka itimo meno, en twero bedo agonya me titti ariya mogo ma en tye ka kemme kwede. Ka en otitti ariya ma tye ka genge, cuk cwinye me timo alokaloka ma mitte me loyo ariya magi. Dok ipo wiye ni en myero otim alokaloka magi pe me yomo cwiny in lapwonye, ento pi marre pi Jehovah.

6. Itwero konyo latin kwanni nining me dongo tekcwiny ma mitte me moko tamme me doko Lacaden? (1 Jo Korint 16:13)

⁶ Ka latin kwanni tye ki gen matek ni Jehovah bikonye me timo gin ma atir, ci en bibedo ki kero me keto i tic gin ma opwonyo. (Kwan 1 Jo Korint 16:13.) Ticci macalo lapwony me Baibul rom aroma ki tic pa lapwony me gang kwan. Ka itamo i kare ma onongo pud itye i gang kwan, lapwony mene ma onongo imaro loyo? Twero bedo ni obedo lapwony ma onongo cuko cwinyi me bedo ki gen ni itwero timo gin moni. I yo acel-lu, lapwony maber me Baibul pe pwonyo mere gin ma Lubanga mito keken, ento bene cukocwiny latin kwanne ni ki kony pa Jehovah en twero timo alokaloka ma mitte i kwone. Itwero konyo latin kwanni me Baibul dongo mar matut pi Jehovah nining wek otim alokaloka i kwone?

KONY LATIN KWANNI ME DONGO MAR MATUT PI JEHOVAH

7. Yecu okonyo lulub kore nining me dongo mar matut pi Jehovah?

⁷ Yecu onongo ngeyo ni ka ngat mo tye ki mar matut i kom Lubanga, ci en bitute me keto i tic jami ma en opwonyo. Pol kare en onongo pwonyo lulub kore ki jami ma twero konyogi me dongo margi pi Wongi me polo. Me labolle, Yecu oporo Jehovah ki wego ma lamar ma miyo jami mabeco bot lutinone. (Mat. 7:​9-11) Twero bedo ni lulub kor Yecu mogo wongi onongo pe marogi kit meno. Go kong kit ma guwinyo kwede i kare ma Yecu omiyo lapor i kom wego ma lamar ma ojolo wode ma onongo otimo jami maraco mapol. Yecu otiyo ki lapor meno me konyo lulub kore niang ni Jehovah marogi matek dok tye ki miti me konyogi.—Luka 15:​20-24.

8. Itwero konyo latin kwan me dongo mar matut pi Jehovah nining?

⁸ In bene itwero konyo latin kwanni me dongo mar matut pi Jehovah ki bedo ka lok i kom kit mabeco mapatpat ma Jehovah tye kwede i cawa me kwanwu. Kare ducu ka wutye ka kwan, kony latin kwanni me niang kit ma gin ma wupwonyo nyuto kwede ni Jehovah marowa. Me labolle, ka wutye ka nyamo lok i kom ginkok, tite ni Jehovah pe omiyo ginkok bot dano ducu lumuku ento omiyo bot ngat acel acel kadi wa en latin kwanni. (Rom. 5:8; 1 Jon 4:10) Ka latin kwanni oniang kit ma Jehovah mare kwede, man twero konye me dongo mar matut pi Jehovah.—Gal. 2:20.

9. Gin ango ma okonyo Michael me timo alokaloka i kwone wek edok Lacaden?

⁹ Nen kong gin mutimme i kom laco mo ma nyinge Michael, ma bedo i lobo Indonesia. En odongo i gang ma jone tye Lucaden dok gupwonye ki ada ento pe onongo batija. I kare ma en tye ki mwaka 18, en ocito i lobo mukene me tic macalo ladwo mutoka. Lacen, en odwogo ci onyomme ento odok cen ka ticce kun weko jo gange i lobo Indonesia. I nge kare mo, dakone kacel ki nyare gucako kwano Baibul dok gudongo i yo me cwiny. I nge to pa minne, Michael omoko tamme me dwogo cen ka gwoko wonne dok oye me cako kwano Baibul odoco. Lok ma tye i bute me “Nong Ngec Matut” i pwony me 27 i buk me Bed ki Kwo Maber Nakanaka! ogudo Michael ma loyo ducu. I kare me kwangi, Michael ocako kok ki pig wang i nge lwodo arem cwiny ma Jehovah owinyo i kare ma oneno ka Wode deno can wa i to. Ma en oniang kit ma Jehovah gin ki Yecu gimare kwede, man otugo cwinye me nyuto pwocce ki timo alokaloka i kwone kacel ki nongo batija.

KONY LATIN KWANNI ME KETO TIC PI JEHOVAH MUKWONGO I KWONE

10. Yecu otimo gin ango me konyo lulub kore me timo alokaloka wek gumed ticgi pi Jehovah? (Luka 5:​5-11) (Nen bene cal.)

¹⁰ Pol pa jo ma gukwongo doko lulub kor Yecu guniang ni en aye obedo Meciya, ento onongo mitte ni Yecu omedde ki konygi me niang ni ka gimito tic pi Jehovah ci omyero gutit kwena maber-ri ki mit kom. I kare ma Yecu olwongo Petero ki Anderiya me cako lubo kore nino ducu, gin onongo dong gubedo lupwonnyene pi kare mo. (Mat. 4:​18, 19) Gin onongo gitimo biacara me mako rec kacel ki Yakobo ki Jon. (Mar. 1:​16-20) Nen calo Petero ki Anderiya guketo yub me nongo jami ma mitte pi jo me ganggi i kare ma gujuko tic macalo lumak rec wek gilub kor Yecu nino ducu. Gin ango ma okonyogi me timo alokaloka man wek giket tic pi Jehovah mukwongo i kwogi? Yecu otimo tango me nyutigi ni Jehovah tye ki teko me minigi jami ma mitte. Man okonyogi me dongo tekcwiny ni Jehovah kare ducu biminigi jami ma mitte ka guketo tic pire mukwongo i kwogi.—Kwan Luka 5:​5-11.

11. Gin ango ma watwero tito ki latin kwanwa me jingo niyene?

¹¹ Wan pe watwero timo tango kit ma Yecu otimo kwede me konyo lutino kwanwa me Baibul. Gin acel ma watwero timone aye tito ki lutino kwanwa gin mutimme i kwowa nyo i kwo pa utmege mukene ma nyuto ni Jehovah konyo jo ma giketo tic Pire mukwongo i kwogi. Me labolle, tika wii po kit ma Jehovah okonyi kwede i kare ma icako cito i cokke? Gwok nyo onongo mitte ni itit ki ladit ticci tyen lok ma oweko omyero ia woko con ki i dog ticci wek ibed ki kare me cito i cokke. Tit bene ki latin kwanni kit ma niyeni ojing kwede i kare ma ineno kit ma Jehovah okonyi pien iketo tic pire mukwongo i kwoni.

12. (a) Pingo omyero walwong omege ki lumege mapatpat me cito kacel kwedwa ka kwan ki latin kwanwa me Baibul? (b) Itwero tic ki vidio me pwonyo latin kwanni me Baibul nining? Mi labol.

¹² Pire tek bene ni omege ki lumege mukene gutit ki latin kwanni alokaloka ma gutimo i kwogi wek giket tic pi Jehovah mukwongo. Pi meno, lwong omege ki lumege ma gukato ki i kwo mapatpat me cito kacel kwedi ka kwan ki latin kwanni. Itwero penyogi me tito ki latin kwanni kit ma gunongo kwede ada kacel ki alokaloka ma gutimo i kwogi me keto tic pi Jehovah mukwongo. Medo i kom meno, kwany kare me neno vidio mapatpat ma gitye i bute me “Nong Ngec Matut” nyo “Tim Kwed” i buk me Bed ki Kwo Maber Nakanaka! Me labolle, ka wutye ka nyamo pwony me 37, wutwero lok i kom pwony mapatpat ma tye i vidio ma wiye tye ni Jehovah Bimiyowa Jami ma Mitte pi Kwo.

KONY LATIN KWANNI ME LWENY KI AUNAUNA

13. Yecu okonyo lupwonnyene nining me kemme ki aunauna?

¹³ Yecu otito ki lulub kore tyen mapol ni gibikemme ki aunauna ma bia ki bot jo mukene kadi wa wadigi macok. (Mat. 5:11; 10:​22, 36) Ma onongo Yecu cok to, en otito ki lupwonnyene ni kitwero nekogi pien gumoko tamgi me tic pi Jehovah. (Mat. 24:9; Jon 15:20; 16:2) En ocikogi ni omyero gugwoke ka gitye i tic me pwony. Me labolle, en ocikogi ni omyero pe gular lok ki jo ma loko marac i kom niyegi. En bene owaco ni omyero gugwokke ki lok ma giloko nyo bene jami ma gitimo i ticgi me pwony.

14. Watwero konyo latin kwanwa nining me yubbe pi aunauna? (2 Temceo 3:12)

¹⁴ Calo Yecu, wan bene omyero watit con ki latin kwanwa me Baibul ni lutic luwotgi, luremgi nyo jo me pacogi gitwero waco nyo timo gin mo ma pe ber pien gitye ka kwano Baibul. (Kwan 2 Temceo 3:12.) Lutic luwotgi gitwero ngale ma lubbe ki tam ma en omoko. Jo mukene, kadi wa wadigi macok gitwero waco ni jami ma en tye ka pwonyo-ni pe obedo lok ada. Pire tek ni iwek latin kwanni onge con ni wang ma en okato ki i aunauna. Ka itimo meno con, latin kwanni pe bibedo ki ur ka aunauna ocakke i kome dok man bikonye me ngeyo gin me awaca nyo me atima.

15. Watwero konyo latin kwanwa nining me lweny ki aunauna ma a ki bot wadine?

¹⁵ Ka latin kwanni tye ka kemme ki aunauna ma a ki bot jo me ganggi, cuk cwinye me tam i kom tyen lok mumiyo wadine cwinygi pe yom ni en tye ka kwano Baibul ki Lucaden pa Jehovah. Twero bedo ni wadine gitamo ni Lucaden gipwonyo lok goba nyo gubedo jo maraco. Kadi wa wadi pa Yecu macok bene cwinygi pe obedo yom i kom ticce pi Jehovah. (Mar. 3:21; Jon 7:5) Pwony latin kwanni ni omyero odii cwinye dok obed ma kome opye mot kun loko ki mwolo bot jo me ganggi.

16. Watwero konyo latin kwanwa nining me nywako jami ma en opwoyo i yo maber ki jo mukene?

¹⁶ Kadi bed wadi pa latin kwanni gunyuto miti me niang jami ma en tye ka pwonyo, bedo ber ka en pe otito jami ducu ma en opwonyo lawang acel. Ka en otito jami ducu, man twero balo cwiny wadine dok twero weko girwenyo miti woko me pwonyo jami mukene. Pi meno, cuk cwiny latin kwanni me tito pi niyene i yo maber ma miyo kare me nyamo lok i nino mukene. (Kol. 4:6) Tit ki latin kwanni ni en twero nyuto ki wadine bene kabedowa me Intanet me jw.org. Man bikonyo wadine me nongo ngec mapol i kom Lucaden pa Jehovah i cawa mupore pigi.

17. Itwero konyo latin kwanni nining me dok i lok goba ma dano giwaco i kom Lucaden pa Jehovah? (Nen bene cal.)

¹⁷ Itwero tic ki pwony ma kati kare ki kare ma tye i jw.org i bute me “Lapeny ma Kimaro Penyone i kom Lucaden pa Jehovah” me konyo latin kwanni yubo lagam mayot pi lapeny ma wadine nyo lutic luwote gitwero penyone. (2 Tem. 2:​24, 25) Medo i kom meno, i nge tyeko pwony acel acel, wii pe owil me nyamo lok ma tye i bute me “Jo Mogo Giwaco Ni” i buk me Bed ki Kwo Maber Nakanaka! Wupor kacel ki latin kwanni kit ma en twero gamo kwede lapeny i yo mayot kun tiyo ki nyig lok ma mege. Ka mitte, konye me nongo lagam mayot me tito pi niyene. Timo meno bikonyo latin kwanni me cung matek pi niyene.

18. Itwero cuko cwiny latin kwanni nining me cako tito kwena kacel ki kacokke? (Matayo 10:27)

¹⁸ Yecu ociko lulub kore ni gutit lok me kwena maber-ri bot dano. (Kwan Matayo 10:27.) Ka latin kwan ocako tito kwena kacel ki kacokke, en bineno kony ma Jehovah miyo dok man bimedo genne i kom Jehovah. Itwero konyo latin kwanni me doko latit kwena nining? Ka kimiyo lok angeya ni kibicako poko waraga me lwongo dano pi Nipo nyo gure madit, ci cuk cwiny latin kwanni me timo alokaloka ma mitte wek odok latit kwena i kare meno. Wacce bene ni pol kare yot me tito kwena i kare ma kit meno. Titte ni yub mukene mayot ma en twero ketone aye me cako miyo pwony i cukul ma bedo i cokke me dye cabit. Cukul man bikonye me dongo tekcwiny ma mitte me tito pi niyene.

NYUT NI ITYE KI GEN MATEK I KOM LATIN KWANNI

19. Gen matek ango ma Yecu onongo tye kwede i kom lupwonnyene?

¹⁹ Ma peya Yecu odok cen i polo, en otito ki lupwonnyene ni nino mo gibiribbe kacel. Gin pe guniang ni Yecu onongo tye ka lok i kom citogi i polo. Kadi bed lupwonnyene pe guniang jami mogo, Yecu onongo tye ki gen matek ni gitye ki miti me yomo cwiny Jehovah. (Jon 14:​1-5, 8) Yecu onongo ngeyo bene ni kare bimitte pi lupwonnyene magi me niang lok i kom gen me kwo i polo. (Jon 16:12) Calo Yecu, wan bene omyero wanyut ki latin kwanwa ni watye ki gen matek ni en mito yomo cwiny Jehovah kadi bed en peya niang jami mogo.

20. Laminwa mo ma bedo i lobo Malawi onyuto ni etye ki gen matek i kom latin kwanne nining?

²⁰ Bed ki gen ni latin kwanni me Baibul mito timo gin ma atir. Me labolle, nen kong gin ma otimme i kom laminwa mo na nyinge Christine, ma bedo i lobo Malawi. En ocako kwano Baibul ki anyaka mo ma obedo Katoli ma nyinge Alice kun gitiyo ki buk me Bed ki Kwo Maber Nakanaka! I kare ma gicok tyeko nyamo pwony me 14, Christine openyo latin kwanne ngo ma en tamo i kom tic ki cal me woro Lubanga. Lapeny meno oweko Alice okeco ci ogamo ni, “Meno obedo tam ma an aye amoko pira kena ento pe in!” I nge kwangi, Christine obedo ki par ka ce meno aye bibedo agikki me kwangi. Ento, en odiyo cwinye ci odwogo gumedde ki kwan kun geno ni lacen, Alice biloko nenone i kom tic ki cal me woro Lubanga. I nge dwe mogo manok, Christine openyo Alice ki lapeny ma tye i pwony me 34 ma waco ni: “Adwogi maber ango ma in dong inongo nicakke i kare ma icako kwano Baibul ki ngeyo Lubanga Jehovah?” Lamego Christine owaco ni, “Alice otito jami mabeco mapol ma oyomo cwinya. En bene otito ni, Lucaden pa Jehovah pe ginywako i timo jami ma Baibul waco ni rac.” Ma pe orii i nge meno, Alice ojuko tic ki cal dok onongo batija.

21. Watwero konyo latin kwanwa me moko tamme me tic pi Jehovah nining?

²¹ Kadi bed Jehovah “aye ma miyo jami dongo,” wan bene watwero konyo latin kwanwa me dongo i yo me cwiny. (1 Kor. 3:7) Pe wapwonye jami ma Lubanga mito keken, ento wapwonye bene me dongo mar matut pi Jehovah. Wacuko cwinye bene me nyuto marre pi Jehovah ki keto tic Pire mukwongo. Dok wapwonye kit me jenge i kom Jehovah ka en tye ka kato ki i peko. Ka wanyuto ki latin kwanwa ni watye ki gen matek i kome ni en mito yomo cwiny Jehovah, ci man mine tekcwiny me moko tamme me tic pi Jehovah.