KʼUTUNIK 02

Ri Biblia kubʼiʼij kakʼun na jun chomilaj qakʼaslemaal

Edición impresa

Ri tikaweex che ronoje ruwachulew e kʼo pa kʼaxkʼoliil, ruma laʼ kebʼisonik, paxinaq kikʼuʼx y kuʼan kʼax che ri kanimaʼ. ¿Ikʼowinaq laa chupa waʼ? Laj kʼo juna yabʼiil che laa, kʼo junoq kaminaq chike ri pamilia laa y waʼ kuʼan kʼax che laa. Laj tzʼonoom laa julajoq, ¿jampa nawi kakʼis uwach ri kʼaxkʼoliil inkʼo chupa? Chupa ri Biblia kaqariq wi ri kʼulubʼal uwach.

1. Ruma ri kukʼut ri Biblia, ¿saʼ ri qoyeʼem chiqawach panoq?

Ri Biblia kubʼiʼij suʼchaak lik kʼi ri kʼaxkʼoliil kʼo chwach ruwachulew y kubʼiʼij chaqe xa naqaaj chik kusachisaj uwach ri kʼaxkʼoliil. Ri kubʼiʼij ri Biblia kunimarisaj qakʼuʼx y kuya chaqe «kakubʼiʼ pana qakʼuʼx che ri qoyeʼem» (chila laa 2 Tesalonicenses 2:16). Wa bʼiʼtisinik kuya ri Biblia kojutoʼo re kaqachʼij ronoje ri kʼaxkʼoliil y kaqariq kiʼkotemal pa ri qʼiij ojkʼo wi. Ma ri kubʼiʼij ri Biblia kukubʼaʼ qakʼuʼx re kaqariq kiʼkotemal na jinta ukʼisik.

2. ¿Saʼ kubʼiʼij ri Biblia puwiʼ ri kakʼun chiqawach panoq?

Ri Biblia kachʼaʼt puwiʼ ri kakʼun chiqawach panoq kubʼiʼij «na jinta chi kamik, na jinta chi oqʼej, na jinta chi kejuyuyik y na jinta chi kʼaxkʼobʼik» (chila laa Apocalipsis 21:4). Ronoje ri kʼaxkʼoliil ojkʼo chupa woʼora pachaʼ ri nibʼaʼiil, yabʼiil y ri kamik kakʼis na y mijunoq kaʼanaw kʼax chaqe. Ri Biblia kubʼiʼij ri tikaweex kakiriq kiʼkotemal na jinta ukʼisik pa jun chomilaj uwachulew.

3. ¿Saʼ uʼanik kakubʼaʼ kʼuʼx laa che ri bʼiʼtisinik kuya ri Biblia?

E kʼi ri tikaweex koyeʼem kʼo juna qʼiij kayijibʼataj ronoje, pero na ketaʼam taj we kuʼan na. Pero ronoje ri bʼiʼtisinik kuya ri Biblia, kuʼan na. We kaqaya qanaʼoj puwiʼ ri tzʼibʼital kan chupa ri Biblia, ri kubʼulibʼal qakʼuʼx che ri bʼiʼtisinik kakʼiyik (Hechos 17:11). Echiriʼ kaʼan laa waʼ, e ri laal kilow laa re we kakubʼaʼ kʼuʼx laa che ri bʼiʼtisinik kuya ri Biblia.

NIMARISAJ RI NAʼOJ LAA

Kojchʼaʼt puwiʼ ri taq bʼiʼtisinik kuya ri Biblia che ri kakʼun chiqawach panoq. Qilaʼ ri kubʼiʼij ri Biblia katajin che kitoʼik jujun tikaweex pa ri qʼiij ojkʼo wi.

Kʼaxwach: Kilitajik ri kʼaxkʼoliil kakikʼulumaj ri tikaweex pa ri qʼiij ojkʼo wi. Y kilitajik ri kikʼaslemaal pa ri Chomilaj Uwachulew. Ri taq kʼaxwach kilitaj tan chik chuxeeʼ.

4. Ri Biblia kubʼiʼtisij jun qakʼaslemaal na jinta ukʼisik pa jun chomilaj uwachulew

Chila laa ri taq bʼiʼtisinik esaam chupa ri Biblia tzʼibʼital wara. ¿Pachike ri kukʼul kʼuʼx laa? ¿Suʼchaak kukʼul kʼuʼx laa wa bʼiʼtisinik?

Chila alaaq ronoje ri texto e kʼo junaam ruukʼ ri taq bʼiʼtisinik y chʼaʼta alaaq puwiʼ ri taq tzʼonobʼenik:

¿Kakoj nawi laa ri bʼiʼtisinik kuya ri Biblia? Chʼobʼo pe laa pakiwiʼ ri kʼo chuux che laa y amigo laa, ¿kebʼutoʼ nawi rike wa taq bʼiʼtisinik?

Chʼobʼo pe laa ri kʼaslemaal chwach jun uwachulew pachaʼ waʼ:

NA JINTA CHI KʼAXKʼOLIIL	KONOJE KAKIRIQ RI UTZ
Na jinta chi junoq kuriq kʼaxkʼoliil, kuʼan nima winaq y na jinta chi junoq kakamik (Isaías 25:8).	Konoje ri tikaweex kakil tan chik ri e kaminaq echiriʼ kewalij tan chuloq chwach ruwachulew (Juan 5:28, 29).
Na jinta chi junoq kuʼan yawaaʼ y na jinta chi junoq kuʼan potzʼ, tʼoʼk, jetzʼ raqan o meʼt (Isaías 33:24; 35:5, 6).	Konoje ri tikaweex kakiriq kʼakʼ kichuqʼabʼ pachaʼ ralabʼoo y ralitoo (Salmo 103:5).
Na jinta chi junoq kuriq kʼaxkʼoliil re kakiʼan kʼax che (Isaías 32:16, 17).	Konoje ri tikaweex kʼi ri kakitijo, kekʼojiʼ pa jun chomilaj jaa y lik utz kakil ri kichaak (Salmo 72:16; Isaías 65:21, 22).
Na jinta chi junoq kuriq kʼaxkʼoliil ruma ri chʼaʼoj (Salmo 46:9).	Konoje ri tikaweex kakiriq utzil chomal (Isaías 32:18).
Na jinta chi junoq kukuxtaj ri na utz taj xikʼow chupa (Isaías 65:17).	Konoje ri tikaweex kakʼojiʼ jun kikʼaslemaal na jinta ukʼisik pa jun chomilaj uwachulew (Salmo 37:29).

Jun ralko kʼoʼm xuʼan yawaaʼ pero xutzir uwach y woʼora kulaqʼapuj ruchuu.

Jun achi lik nima winaq woʼora lik alaa tan chik rukʼam jun kareta puqʼabʼ.

5. Ri bʼiʼtisinik kuya ri Biblia kuʼan choom che ri qakʼaslemaal

E kʼi ri tikaweex kebʼisonik y jujun chik kʼo koyowal ruma ri kʼaxkʼoliil ketajin chi rilik woʼora. E kʼo jujun kakaaj kakiyijibʼa ri na utz taj. Chila pe laa e kʼi ri tikaweex ebʼutoʼom ri bʼiʼtisinik kuya ri Biblia. Chila alaaq ri VIDEO y chʼaʼta alaaq puwiʼ ri taq tzʼonobʼenik:

VIDEO: Na kwaaj ta ri kʼax kakiʼan che jun chik (4:07)

Kʼaxwach: Ri taq kʼaxwach re ri video: Tzel kinwil ri na jusukʼ taj. 1. Echiriʼ ralko kʼoʼm Rafika kuwux miit kuukʼ ri tikaweex re rutinamit. 2. Rafika lik xkiʼkotik echiriʼ xopon ri nabʼe laaj pa ri nimalaj molobʼal iibʼ ke ri testigo re Jehová ma xebʼuril ri tikaweex re ronoje taq tinamit.

¿Saʼ ri kʼax xkiʼan che ri Rafika y suʼchaak xbʼisonik?
Ri kʼax xuriqo na xsach ta uwach, pero ¿saʼ utoʼik xuʼan ri Biblia?

Ruma ri bʼiʼtisinik kuya ri Biblia qoyeʼem jun qakʼaslemaal lik utz. Waʼ kojutoʼo re kaqachʼij ruukʼ kiʼkotemal ri kʼaxkʼoliil re na kapax ta qakʼuʼx. Chila alaaq Proverbios 17:22 y Romanos 12:12 y chʼaʼta alaaq puwiʼ ri taq tzʼonobʼenik:

¿Saʼ kachʼobʼ laa puwiʼ ri bʼiʼtisinik kuya ri Biblia? ¿Kutoʼ nawi laa pa ri kʼaslemaal? ¿Suʼchaak kabʼiʼij laa waʼ?

RI KAKIBʼIʼIJ JUJUN CHIK: «Ronoje ri bʼiʼtisinik kuya ri Biblia xa raqʼul kubʼiʼij».

¿Suʼchaak chirajawaxik katzukuj laa we ri kubʼiʼij ri Biblia lik qatziij?

RI XMAJ LAA

Ri bʼiʼtisinik kuya ri Biblia kojutoʼo re kaqachʼij ri kʼaxkʼoliil ojkʼo chupa woʼora. Ruma ri bʼiʼtisinik qoyeʼem jun qakʼaslemaal nojinaq che kiʼkotemal chiqawach panoq.