KʼUTUNIK 01
¿Saʼ toʼik laa kuʼan ri Biblia pa ri kʼaslemaal laa?
Qonoje ri oj kaqaaj kaqetaʼmaj suʼchaak kʼo kʼaxkʼoliil y kamik. Y saʼ ri kakʼun chiqawach panoq. Ronoje qʼiij kubʼisoj qakʼuʼx ruma ri kaqilo y kaqariq kʼax chikixoʼl ri qapamilia. Lik kʼayew kaqachʼak qapwaq ma na jinta qachaak. E kʼi ri tikaweex kiriqom pixabʼanik y kʼulubʼal uwach che ri kitzʼonobʼenik chupa ri Biblia re kebʼutoʼo pa ri kikʼaslemaal. Chʼobʼoom laa, ¿kʼo nawi junoq kutoʼ ri Biblia?
1. ¿Saʼ taq ri tzʼonobʼenik kukʼul uwach ri Biblia?
Ri Biblia kukʼul uwach ri taq tzʼonobʼenik pachaʼ waʼ: ¿pa xojwinaqir wi?, ¿suʼchaak xya qakʼaslemaal?, ¿suʼchaak kʼo kʼaxkʼoliil?, ¿saʼ kukʼulumaj junoq echiriʼ kakamik?, ¿suʼchaak kʼo chʼaʼoj che ronoje ruwachulew?, y ¿saʼ kukʼulumaj na ruwachulew? Chupa ri Biblia kaqariq wi ri kʼulubʼal uwach che ri taq tzʼonobʼenik. Kʼiyal tikaweex lik kekiʼkotik che ri kʼulubʼal uwach kuya ri Biblia.
2. ¿Saʼ qatoʼik kuʼan ri Biblia re kaqariq kiʼkotemal pa ri qakʼaslemaal?
Ri Biblia kuya ri chomilaj pixabʼanik chaqe. Kukʼut chaqe saʼ uʼanik kaqariq kiʼkotemal chikixoʼl ri qapamilia. Ri Biblia kojutoʼo re na kubʼisoj ta qakʼuʼx echiriʼ kojikʼow pa juna kʼax. Ri pixabʼanik kuya ri Biblia kukʼut chaqe saʼ uʼanik kaqariq ri kiʼkotemal pa ri qachaak. Ruma ri katajin laa che rilik chupa wa wuuj kamaj laa ri chomilaj pixabʼanik kuya ri Biblia. Tekʼuchiriʼ kabʼiʼij laa, e ri «tzʼibʼital kanoq [chupa ri Biblia] […] lik kʼo uchak» (2 Timoteo 3:16).
Wa jun wuuj na e ta ri Biblia, xa re jun toʼbʼal laa re kakʼam laa usukʼ. Ruma laʼ kaqabʼiʼij che laa lik utz kil laa upa ronoje ri texto re ri Biblia y kajunimaj laa ri taq texto ruukʼ ri katajin laa chi retaʼmaxik ri kʼo chupa wa wuuj.
NIMARISAJ RI NAʼOJ LAA
Qilaʼ e kʼo tikaweex e toʼtajinaq ruma ri Biblia. Ketaʼmaj laa lik chirajawaxik kʼo junoq kukʼut che laa y saʼ uʼanik kariq laa ri kiʼkotemal echiriʼ kil laa upa ri Biblia.
3. Ri Biblia kutzij upa ri qabʼee
Ri Biblia e pachaʼ uwonibʼal qʼaaqʼ kutzij upa ri qabʼee. Kukʼut chaqe pachike ri bʼee kaqamaj bʼi re kaqaʼan ri utz y kubʼiʼij chaqe pachike ri utz kakʼun chiqawach panoq.
Chila alaaq Salmo 119:105 y chʼaʼta alaaq puwiʼ ri taq tzʼonobʼenik:
¿Saʼ xuchʼobʼ ri tzʼibʼaneel re ri salmo puwiʼ ri Biblia?
¿Saʼ kachʼobʼ laa che ri Biblia?
4. Ri Biblia kukʼul uwach ronoje ri qatzʼonobʼenik
Jun ixoq lik kabʼisonik ma na kuriq ta ri kʼulubʼal uwach che ri taq utzʼonobʼenik, pero chupa ri Biblia xuriq wi ri kʼulubʼal uwach. Chila alaaq ri VIDEO y chʼaʼta alaaq puwiʼ ri taq tzʼonobʼenik:
¿Saʼ ri taq tzʼonobʼenik xuʼan rixoq kʼo chupa ri video?
¿Saʼ utoʼik rixoq xuʼan ri Biblia?
Ri Biblia kubʼiʼij chaqe utz kaqaʼan taq tzʼonobʼenik. Chila alaaq Mateo 7:7 y chʼaʼta alaaq puwiʼ ri tzʼonobʼenik:
¿Pachike ri taq tzʼonobʼenik kaʼan laa kukʼul uwach ri Biblia?
5. Echiriʼ kil laa upa ri Biblia kariq laa kiʼkotemal
E kʼi ri kakil upa ri Biblia y kiriqom toʼbʼal pa ri kikʼaslemaal. Chila alaaq ri VIDEO y chʼaʼta alaaq puwiʼ ri taq tzʼonobʼenik:
¿Saʼ xkibʼiʼij ralabʼoo y ralitoo che rilik upa ri taq wuuj?
¿Suʼchaak lik kacha kikʼuʼx che rilik upa ri Biblia?
Ri kukʼut ri Biblia kojupixabʼaj y kubʼochiʼij qakʼuʼx, ruma laʼ qoyeʼem ronoje ri bʼiʼtisinik kuya ri Biblia. Chila alaaq Romanos 15:4 y chʼaʼta alaaq puwiʼ ri tzʼonobʼenik:
¿Kaʼaj nawi laa ketaʼmaj laa más puwiʼ ri bʼochibʼal kʼuʼxaj y ri bʼiʼtisinik kuya ri Biblia?
6. Ruukʼ toʼnik re jun chik kaqakʼam usukʼ ri kubʼiʼij ri Biblia
E kʼi ri tikaweex kakil upa ri Biblia pero na kakikʼam ta usukʼ. Echiriʼ kʼo junoq kakʼutuw chike kakiriq toʼnik re kakikʼam usukʼ ri Biblia. Chila alaaq Hechos 8:26-31 y chʼaʼta alaaq puwiʼ ri tzʼonobʼenik:
¿Saʼ kaqaʼano re kaqakʼam usukʼ ri Biblia? (Chila alaaq ri taq versículo 30 y 31).
Rachi re ri tinamit Etiopía xumaj usukʼ ri kubʼiʼij ri Biblia echiriʼ kʼo jun xkʼutuw che. Woʼora e kʼi ri tikaweex kakikʼam jun kʼutunik re ri Biblia ruukʼ jun chik y jelaʼ lik kakimaj usukʼ ri Biblia.
RI KAKIBʼIʼIJ JUJUN CHIK: «Urilik uwach ri Biblia na jinta uchaak».
¿Saʼ kabʼiʼij laa? ¿Suʼchaak kachʼobʼ laa waʼ?
RI XMAJ LAA
Ri Biblia kuya pixabʼanik pa ri qakʼaslemaal, kukʼul uwach ri taq qatzʼonobʼenik y kuya bʼochibʼal qakʼuʼx.
Kojchʼaʼt che ri xmaj laa
¿Saʼ taq ri pixabʼanik qariqom chupa ri Biblia?
¿Pachike ri taq tzʼonobʼenik kukʼul uwach ri Biblia?
¿Saʼ kaʼaj laa ketaʼmaj laa puwiʼ ri Biblia?
KAMAJ LAA MÁS
Ketaʼmaj laa e ri pixabʼanik re ri Biblia kajawax chaqe pa ri qʼiij ojkʼo wi.
“La eterna sabiduría de la Biblia” (La Atalaya, núm. 1 2018)
Chila laa jun achi echiriʼ kʼoʼm lik kʼo kʼax pa ranimaʼ, pero ri Biblia xutoʼo.
Ketaʼmaj laa ri chomilaj pixabʼanik kuya ri Biblia re kariq laa ri kiʼkotemal junaam kuukʼ ri pamilia laa.
“12 claves para una familia feliz” (¡Despertad!, núm. 2 2018)
Ri Biblia kukʼutu china kataqan puwiʼ ruwachulew woʼora. Chila laa wa video.
¿Suʼchaak lik chirajawaxik kaqamaj ri kubʼiʼij ri Biblia? (3:14)