¿Saʼ kaʼan laa chaʼ kamaj laa más pa ri Biblia?

Echiriʼ kajeq laa uʼanik juna nimalaj chaak, laj kanaʼ laa na kel ta utz chi qʼabʼ laa. Y kachʼobʼ laa utz kajeq laa uʼanik kokʼiil xa pa jubʼiqʼ. Junaam ruukʼ rilik upa ri Biblia. Laj tzʼonoom chibʼil iibʼ laa: «¿Pa nawi kanjeq wi?». Chupa wa kʼutunik kariq laa jujun taq pixabʼanik kutoʼ laa chaʼ kariq laa kiʼkotemal echiriʼ kil laa upa ri Biblia y kamaj laa usukʼ puwiʼ waʼ.

1. ¿Suʼchaak nawi lik chirajawaxik kaqil upa ri Biblia ronoje taq qʼiij?

We juna tikaweex kuril upa ri Biblia «rupixabʼanik ri QAJAWAL JEHOVÁ» ronoje taq qʼiij, kuriq kiʼkotemal y ronoje ri kuʼan ri tikaweex lik kel chi utz ruma (chila laa Salmo 1:1-3). Echiriʼ kajeq laa rilik upa ri Biblia, utz kesaj laa ajilaam minuto ronoje taq qʼiij. We lik kil laa upa ri Biblia más kamaj laa y más kukʼul kʼuʼx laa.

2. ¿Saʼ kutoʼ wi laa chaʼ kamaj laa más chupa ri Biblia?

Echiriʼ kaqil upa ri Biblia lik chirajawaxik kaqachaqabʼa na chaʼ kaqachʼobʼ puwiʼ ri kojtajin che rilik upa. Wa Biblia na xew ta kaqil upa, ri Biblia kubʼiʼij lik chirajawaxik «kʼola anaʼoj puwiʼ» (Josué 1:8). Echiriʼ katajin laa che rilik upa, tzʼonoj chibʼil iibʼ laa: «¿Saʼ kukʼut chwe wa tziij pixabʼ puwiʼ ri Jehová? ¿Saʼ ruʼanik kankoj utziij pa ri nukʼaslemaal? ¿Saʼ ruʼanik kebʼintoʼ ri jujun chik ruukʼ Rutziij Upixabʼ ri Dios?».

3. ¿Saʼ ruʼanik kesaj laa tiempo che rilik upa ri Biblia?

¿Lik kʼayew nawi kesaj laa tiempo che utaʼik y rilik upa ri Biblia? E kʼi chaqe ri oj lik kʼayew. Lik chapabʼeej laa ri tiempo chi utz, lik kaya iibʼ laa «che uʼanik taq ri utz» (Efesios 5:16). We kesaj laa tiempo che ronoje taq qʼiij e mismo hora, kasoq laa uʼanik. E kʼo jujun lik animtan kakito y kakil upa ri Biblia. E kʼo jujun chik kakito y kakil upa ri Biblia echiriʼ kakitij kiwaa pa meyoqʼiij. Y e kʼo jujun chik kakito y kakil upa ri Biblia chaqʼabʼ kʼamajaʼ kewarik. Y ri laal, ¿pachike nawi ri hora kabʼiʼij laa lik utz kata laa y kil laa upa ri Biblia?

NIMARISAJ RI NAʼOJ LAA

4. Lik chirajawaxik kil laa upa ri Biblia

Laj lik kʼayew chaqe kaqajeq rilik upa ri Biblia. Junaam ruukʼ echiriʼ kaqajeq utijik juna bʼiqʼbʼal qawaa che ri nabʼe laaj lik na kukʼul ta qakʼuʼx. Pero echiriʼ kaqatij tan chik, kokʼiil kukʼul qakʼuʼx. E mismo junaam ruukʼ ri Biblia, echiriʼ kaqajeq rilik upa kokʼiil kukʼul qakʼuʼx y kanimar ri qarayibʼal che rilik upa ri Biblia. Chila alaaq 1 Pedro 2:2 y chʼaʼta alaaq puwiʼ ri tzʼonobʼenik:

• We kil laa upa ri Biblia ronoje taq qʼiij, ¿kachʼobʼ nawi laa kanimar ri rayibʼal laa che rilik upa ri Biblia?

Chila alaaq ri VIDEO chaʼ ketaʼmaj laa pakiwiʼ jujun alabʼoo y alitoo kokʼiil xukʼul kikʼuʼx rilik upa ri Biblia. Tekʼuchiriʼ chʼaʼta alaaq puwiʼ ri taq tzʼonobʼenik:

VIDEO: E taq ralabʼoo y ralitoo xkijeq rilik upa ri Biblia y kokʼiil kʼax xkinaʼo (5:33)

• Tobʼ lik kʼayew, ¿saʼ ri chuqʼabʼ xkiʼan ralabʼoo y ralitoo echiriʼ xkijeq rilik upa ri Biblia?

• ¿Saʼ xtoʼw ke chaʼ na xkiya ta kan rilik upa ri Biblia?

• ¿Saʼ xkiʼan ralabʼoo y ralitoo chaʼ lik xnimar ri kirayibʼal che rilik upa ri Biblia?

Toʼbʼal e laa chaʼ kajeq laa rilik upa ri Biblia:

• Tzukuj laa juna Biblia na kʼayew ta kakʼam laa usukʼ ri chʼaʼteem kubʼiʼij chupa. Chila laa ri Traducción del Nuevo Mundo we kʼo pa ri chʼaʼteem laa.

• Nabʼe lik utz kil laa ri chʼaʼteem lik kacha kʼuʼx laa che. Kariq laa jun toʼbʼal chupa ruxaq pa kubʼiʼij wi «Jun toʼbʼal jeqebʼal re rilik upa ri Biblia».

• Kojo laa jun retalil pa xkʼis wi laa. Chapabʼeej laa ri kʼisbʼal uxaq chupa wa wuuj pa kubʼiʼij wi «Ri nuwilom chik chupa ri Biblia» y kojo laa jun retalil pa xkʼis wi laa.

• Chapabʼeej laa ri aplicación JW Library^®. We kaqasaaj lo laa pa jun dispositivo, utz kil laa upa o kata laa ri Biblia xaqipa kʼo wi laa.

• Utz kil laa pa kubʼiʼij wi apéndice pa ri Traducción del Nuevo Mundo. Chiriʼ kariq wi laa ri mapas, tablas y jun glosario chaʼ kutoʼ laa chaʼ lik kukʼul kʼuʼx laa ri Biblia.

5.Echiriʼ kʼamajaʼ kakʼam laa ri kʼutunik re ri Biblia utz yijibʼa pana iibʼ laa

Chila alaaq Salmo 119:34 y chʼaʼta alaaq puwiʼ ri taq tzʼonobʼenik:

• ¿Suʼchaak nawi lik utz kaʼan laa orar echiriʼ kʼamajaʼ kil laa upa ri Biblia y kayijibʼa iibʼ laa chaʼ kakʼam laa ri kʼutunik?

¿Saʼ ruʼanik kakʼam laa chi utz ri kʼutunik? Echiriʼ kayijibʼa iibʼ laa che ri kʼutunik chupa wa wuuj, utz kaʼan laa waʼ:

1. Chila laa ri nabʼe uxaq re ri taq kʼutunik, xew kopon laa pa kubʼiʼij wi «Nimarisaj ri naʼoj laa».

2. Tzukuj laa ri texto re ri Biblia y chila laa upa. Tekʼuchiriʼ chʼobʼo pe laa ri kʼo chupa ri Biblia y junimaj laa ruukʼ ri kʼo chupa wa wuuj.

3. Utz kajuchʼ laa ri taq chʼaʼteem lik chirajawaxik y ri kukʼul uwach ri taq tzʼonobʼenik. Waʼ kutoʼ laa chaʼ kamaj laa usukʼ ri kʼutunik echiriʼ ri tijoneel kopon ukʼ laa.

¿Etaʼam laa nawi waʼ?

Ri oj testigo re Jehová kaqachapabʼeej jujun taq Biblia, pero ri Biblia más kukʼul qakʼuʼx e ri Traducción del Nuevo Mundo ma lik tzʼaqat, lik kamajtaj usukʼ y lik kubʼiʼij chi utz rubʼiʼ ri Dios (chila laa pa jw.org: «¿Tienen los testigos de Jehová su propia Biblia?»).

RI XMAJ LAA

We kil laa upa ri Biblia lik kuya chuqʼabʼ laa y kuya toʼbʼal laa. Pero lik chirajawaxik kesaj laa tiempo che e mismo hora ronoje taq qʼiij chaʼ kil laa upa ri Biblia. Tzʼonoj laa che ri Dios kutoʼ laa chaʼ kamaj laa usuk’ ri Biblia y yijibʼa iibʼ laa chi utz che ri kʼutunik re ri Biblia.

Kojchʼaʼt che ri xmaj laa

• ¿Saʼ kutoʼ wi laa chaʼ kamaj laa más chupa ri Biblia?

• ¿Pachike nawi ri hora kabʼiʼij laa lik utz kil laa upa ri Biblia y kachʼobʼ laa puwiʼ ri kubʼiʼij?

• ¿Suʼchaak nawi lik utz kayijibʼa iibʼ laa echiriʼ kʼamajaʼ kopon ri tijoneel chaʼ kakʼam laa ri kʼutunik?

KAMAJ LAA MÁS

Chila laa jujun taq pixabʼanik chaʼ kutoʼ laa chaʼ kariq laa kiʼkotemal echiriʼ kil laa upa ri Biblia.

“Disfrute leyendo la Biblia” (La Atalaya, núm. 1 2017)

Kariq laa oxibʼ toʼbʼal kutoʼ laa chaʼ kil laa upa ri Biblia.

“¿Cómo puede ayudarme la Biblia? Primera parte: Busca tesoros en la Biblia” (Chila laa pa jw.org)

Chila laa saʼ ri kukʼul kʼuʼx laa echiriʼ kil laa upa ri Biblia.

“¿Cómo puede ayudarme la Biblia? Segunda parte: Aprende a disfrutar la lectura de la Biblia” (Chila laa pa jw.org)

E kʼo jujun tikaweex lik ukʼiyal tiempo kilom upa ri Biblia y chupa wa video rike kakiya pixabʼanik chaqe saʼ uʼanik kaqil upa ri Biblia.

¿Saʼ kutoʼ wi laa che rilik upa ri Biblia y kamaj laa más ri kʼo chupa ri Biblia? (2:06)