¿Qatzij petinaq ruukʼ ri Dios ri utzilaj taq tzij re ri Biblia?

1. ¿Chinaʼ (pachin re) ri naʼoj kʼo chupa ri Biblia?

Ri utzilaj taq tzij re kakʼojiʼ jun qakʼaslemaal jinta ukʼisik wara chwach Ulew, tzʼibʼitalik chupa ri Biblia (Salmo 37:29). Chupa kʼo 66 chʼutiq wuj xkitzʼibʼaj 40 achijabʼ e sukʼulik, echaʼom ruma ri Dios. Ikʼawnaq chik 3.500 junabʼ, Moisés xutzʼibʼaj ri nabʼe 5 wuj. Ri kʼisbʼal wuj xutzʼibʼaj ri apóstol Juan ikʼawnaq chik 1.900 junabʼ. ¿Chinaʼ (pachin re) ri naʼoj xkitzʼibʼaj ri achijabʼ? Dios xchʼaw kuukʼ ruma ri uxlabʼixel (utewal) (2 Samuel 23:2). Rike xkitzʼibʼaj ri taq unaʼoj ri Dios, y na e ta ri kinaʼoj. Ruma laʼ kaqabʼij ri Biblia petinaq ruukʼ ri Dios. Chawilaʼ 2 Timoteo 3:16 y 2 Pedro 1:20, 21.

Wilaʼ ri video ¿Chinaʼ (pachin re) ri naʼoj kʼo chupa ri Biblia?

2. ¿Bʼuchak qetaʼam chi ri Biblia kubʼij ri qatzij?

Ruma ri Biblia petinaq ruukʼ ri Dios. Qetaʼam lik qatzij ruma ri Utzij ri Dios kubʼij ri kakʼun chaqawach panoq y jinta jun winaq retaʼam ri kakʼun chaqawach panoq (Josué 23:14). Xwi ri Dios utz kuʼano. Chawilaʼ Tito 1:2, 3.

We jun wuj petinaq ruukʼ ri Dios, na junam ta ruukʼ ri jujun taq wuj. Kʼiyal taq Biblia jachom pa kʼiyal taq chʼawbʼal. Ri Biblia ojer qʼanatalik, pero lik qatzij ronoje kubʼij che ri Uwachulew y niʼpa kʼo chwach. E 40 achijabʼ xetzʼibʼan re y xaq junam ri xkibʼij.a Ronoje ri Biblia kukʼutu chi Dios kʼaxkojunaʼo y kʼa pa ri qʼij ojkʼo wi kʼo uchuqʼabʼ re kujalkʼatij ri kikʼaslemaal ri winaq. Ruma laʼ, lik e kʼi ri winaq kikojom ri Biblia are Utzij ri Dios. Chawilaʼ 1 Tesalonicenses 2:13.

Wila’ ri video ¿Bʼuchak qetaʼam chi ri Biblia kubʼij ri qatzij?

3. ¿Saʼ (wach) kubʼij ri Biblia?

Ri Biblia kukʼutu ri karaj kuʼan ri Dios kuma ri winaq. Ri Biblia kubʼij saʼ uʼanik xkisach uwach ri kikʼaslemaal ri winaq chwach jun chomalaj Uwachulew y kubʼij saʼ uʼanik kuyijbʼa jumul chik. Chawilaʼ Apocalipsis 21:4, 5.

Chupa ri Biblia kʼo taqonik y pixabʼanik. Kukʼutu saʼ xuʼan ri Dios chike ri winaq ojer, ruma laʼ kukʼutu ri uchomalil ukʼuʼx ri Jehová. Ri Biblia katutoʼo re kawetamaj uwach. Kukʼut chawe saʼ uʼanik katuʼan rachbʼil re ri Dios. Chawilaʼ Hebreos 8:10; Santiago 2:23, y 4:8.

4. ¿Saʼ (wach) katutoʼo re kakʼam usukʼ ri Biblia?

Ri wuj kattajin che rilik upa katutoʼo re kakʼam usukʼ ri Biblia. Jesús xuchapebʼeej jujun taq texto re ri Biblia tekʼuriʼ xubʼij ri karaj kubʼij. Ri wuj riʼ junam ukʼutik kuʼano, katutoʼo re kawetamaj ri kubʼij ri Biblia. Chawilaʼ Lucas 24:27, 45.

Lik katkiʼkotik re kawetamaj ri utzilaj taq tzij kuyaʼ ri Dios. E kʼo jujun winaq kakaj taj kawetamaj, y e kʼo jujun chik kape koyowal che ri kabʼiʼx chike. Matbʼisonik y na kayaʼ ta kan chi retamaxik ri kubʼij ri Biblia. Kariqo ri akʼaslemaal jinta ukʼisik we kawetamaj uwach ri Dios. Chawilaʼ Juan 17:2, 3.