¿Chinaʼ (pachin) ri Dios?

1. ¿Bʼuchak rajawaxik kaqayak uqʼij ri Dios?

Dios xuʼan ronoje ri kʼolik. Rire jinta jeqebʼal re y jinta kʼisbʼal re (Salmo 90:2). Ruukʼ rire petinaq wi ri utzilaj taq tzij kʼo pa ri Biblia (1 Timoteo 1:11). Ruma xuyaʼ ri qakʼaslemaal, xwi rire kaqayak uqʼij. Chawilaʼ Apocalipsis 4:11.

2. ¿Saʼ (wach) ri uchomalil ukʼuʼx ri Dios?

Jinta jun winaq rilom uwach ri Dios ruma rire are jun uxlabʼixel (tewal). Rire lik nim chaqawach ri yoj, ruma xa yoj winaq (Juan 1:18; 4:24). Pero, utz kaqetamaj ri uchomalil ukʼuʼx ri Jehová, we kaqachʼobʼo puwiʼ ri uʼanom. Jun kʼutbʼal re: ri uwach ri cheʼ y ri kotzʼij kukʼutu lik kʼaxkojunaʼo, y lik kʼo unaʼoj. Ri unimal ri kaj kukʼut chaqe lik nim uchuqʼabʼ. Chawilaʼ Romanos 1:20.

We kaqil upa ri Biblia kaqetamaj más puwiʼ ri uchomalil ukʼuʼx ri Dios. Jun kʼutbʼal re, kubʼij chaqe ri karaj y karaj taj y saʼ uʼanik kebʼuril ri winaq y ri kuchʼobʼo che ronoje ri katajin rikʼowik. Chawilaʼ 1 Juan 4:8 y Santiago 4:6.

3. ¿Kʼo ubʼi ri Dios?

Ri Jesús xubʼij: «Qaqaw chikaj, choksax uqʼij abʼi» (Mateo 6:9). Ri Dios kabʼiʼx «Tat», «Qaqaw», y jujun taq chik, pero pa qatzij wi, Rire xa jun ri ubʼi kʼolik. Junwi taq ubʼixik pa jujun taq chʼawbʼal. Pa ri qachʼawbʼal Achi kabʼiʼx che Jehová y e kʼo jujun kakibʼij che Yavé. Chawilaʼ Salmos 83:18.

Pa kʼiyal Biblia kesam ri ubʼi y kikojom che «Dios» o «Qajaw». Pero, ¿saʼ (wach) xkiʼano ri achijabʼ ri xkitzʼibʼaj ri Biblia? ¡Xkichapebʼeej ri ubʼi ri Dios 7.000 laj (mul)! Jesús xukʼutu chikiwach ri winaq puwiʼ ri Dios y xuchapebʼeej ri ubʼi. Chawilaʼ Juan 17:26.

Wilaʼ ri video ¿Kʼo ubʼi ri Dios?

4. ¿Kojraj ri Jehová?

We ri Jehová kojraj, ¿bʼuchak uyaʼom luwar kʼo kʼaxkʼoliil? E kʼo jujun kakichʼobʼo ke Rire kojuyaʼ pa kʼaxkʼoliil re kukʼam qapa, pero qatzij taj. Chawilaʼ Santiago 1:13.

Jehová uyaʼom chaqe re kaqachaʼo ri kaqaj kaqaʼano pa ri qakʼaslemaal. Ri más utz kaqachaʼo e kaqayak uqʼij ri Dios (Josué 24:15). E kʼi ri winaq kakichaʼo kakiʼan ri na utz ta chike jujun chik, ruma laʼ kʼo kʼaxkʼoliil. Ri Jehová lik kabʼisonik ruma ri itzelal. Chawilaʼ 1 Pedro 5:7.

Ri Jehová kʼaxkojunaʼo y karaj kaqariq kiʼkotemal pa ri qakʼaslemaal. Ruma laʼ xa naqaj chik kukʼis uwach ri kʼaxkʼoliil y ri itzelal. Rire retaʼam bʼuchak uyaʼom luwar che ri kʼaxkʼoliil kʼo woʼora. Pa ri kʼutunem 8 kaqetamaj bʼuchak. Chawilaʼ 2 Pedro 2:9; 3:7, 13.

5. ¿Saʼ (wach) uʼanik kojkʼojiʼ xa naqaj che ri Dios?

Jehová karaj kojkʼojiʼ xa naqaj che ruma ri qachʼabʼal. Rire lik kojraj chiqajujunal (Salmos 65:2; 145:18). Karaj kukuy qamak y kuril ri qachuqʼabʼ kaqaʼano re kaqaʼan ri karaj rire. Qatzij kojmakunik, pero utz kojkʼojiʼ xa naqaj che. Chawilaʼ 1 Juan 1:9; Santiago 4:8.

Ruma ri qakʼaslemaal uyaʼom ri Jehová, rajawaxik kʼaxkaqanaʼo puwiʼ ronoje ri kʼolik (Marcos 12:30). Kaqakʼutu kʼaxkaqanaʼo we kaqetamaj uwach y kaqakoj utzij. We kaqaʼano, kojkʼojiʼ xa naqaj che ri Jehová. Chawilaʼ 1 Timoteo 2:4; 1 Juan 5:3.