¿Saʼ (wach) uʼanik katkʼojiʼ xa naqaj che ri Dios?

1. ¿Kutaʼ nawi ri Dios ronoje ri taq chʼabʼal?

Ri Dios kubʼij chike ri winaq re ronoje taq tinamit kekʼojiʼ xa naqaj che rire ruukʼ ri chʼabʼal (Salmo 65:2). Pero rire na kutaʼ ta ronoje ri taq chʼabʼal. Ri Biblia kubʼij, we jun achi kuʼan kʼax che ri rixoqil, kʼo kalatzʼan re ri uchʼabʼal (1 Pedro 3:7). Ri israelitas kʼi mul xkiʼan itzelal, ri Dios xutaʼ taj ri kichʼabʼal. Pero we ri winaq na kakiʼan ta chik kimak, ri Dios kutaʼ ri kichʼabʼal. Chawilaʼ Proverbios 28:9 y Hechos 3:19.

Wilaʼ ri video ¿Kutaʼ nawi ri Dios ronoje ri taq oración?

2. ¿Saʼ (wach) uʼanik kaqaʼan ri qachʼabʼal?

Ri chʼabʼal are junam ruukʼ ri yakbʼal uqʼij ri Dios, ruma laʼ xwi kaqaʼan qachʼabʼal che ri xʼanaw qe yoj, Jehová (Mateo 4:10; 6:9). Qetaʼam kojmakunik, ruma laʼ rajawaxik kaqaʼan ri qachʼabʼal pa ri ubʼi ri Jesús, ruma rire xkam ruma ri qamak (Juan 14:6). Jehová karaj taj kaqawererej (kaqamulij) ri qachʼabʼal o qatzʼibʼam. Rire karaj kaqaʼan ri qachʼabʼal ruukʼ ronoje qanimaʼ. Chawilaʼ Mateo 6:7 y Filipenses 4:6, 7.

Ri Dios kutaʼ ri chʼabʼal kaqaʼan pa qajolom o pa qanimaʼ (1 Samuel 1:12, 13). Kubʼij chaqe utz kaqaʼan qachʼabʼal ronoje taq qʼij, re saqirik, keʼek qʼij, we kaqatij qawa y ojkʼo pa kʼaxkʼoliil. Chawilaʼ 1 Pedro 5:7 y Mateo 15:36.

3. ¿Bʼuchak kaqamol qibʼ junam?

Ojkʼo chikixol winaq jinta kubʼibʼal kikʼuʼx che ri Dios, kakitzeʼej ri kubʼij ri Dios re kukʼam loq kiʼkotemal chwach Ulew (2 Timoteo 3:1, 4; 2 Pedro 3:3, 13). Ruma laʼ rajawaxik kaqamol qibʼ re kakiyaʼ qachuqʼabʼ. Chawilaʼ Hebreos 10:24, 25.

Re kojutoʼo kojkʼojiʼ xa naqaj che ri Qatat kʼo chilaʼ chikaj, rajawaxik kaqamol qibʼ kuukʼ ri winaq kʼaxkakinaʼ ri Dios. Ri molbʼal kibʼ ke ri testigos re Jehová kakiyaʼ utzilal chaqe, ruma ri kʼutbʼal re ri kubʼibʼal kikʼuʼx re jujun chik. Chawilaʼ Romanos 1:11, 12.

4. ¿Saʼ (wach) uʼanik katkʼojiʼ xa naqaj che ri Dios?

Re katkʼojiʼ xa naqaj che ri Jehová, rajawaxik katchʼobʼon che ri awetaʼam pa ri Biblia. Chʼobʼo puwiʼ ri uʼanom, ri upixabʼanik y ri ubʼim ri kuʼano chiqawach panoq. Ri achʼobʼonik y ri achʼabʼal katutoʼo re kakʼam usukʼ ri unimal kʼaxnabʼal kʼuʼx y ri unojbʼal ri Dios. Chawilaʼ 1 Timoteo 4:15, 16.

We kʼo akubʼibʼal akʼuʼx y kakubʼa akʼuʼx che ri Dios katkʼojiʼ xa naqaj che rire. Ri kubʼibʼal qakʼuʼx junam ruukʼ jun kotzʼij: rajawaxik kajaʼaxik ronoje taq qʼij. Junam ri kubʼibʼal qakʼuʼx, rajawaxik kaqayaʼ uchuqʼabʼ ronoje taq qʼij. Kaqaʼano we kaqachʼobʼo bʼuchak kaqakojo ri kubʼij chaqe. Chawilaʼ Mateo 4:4 y Hebreos 11:1, 6.

5. ¿Saʼ (wach) ri utzilal kuyaʼ chawe re katkʼojiʼ xa naqaj che ri Dios?

Jehová keraj ri kʼaxkakinaʼo. Rire kebʼuchajij y kebʼutoʼo we kakiriq jun kʼax che ri kubʼibʼal kikʼuʼx y ri kikʼaslemaal jinta ukʼisik koyeʼem (Salmo 91:1, 2, 7-10). Kubʼij chike kakiʼan ta sach (bʼiroxik) kuʼan kʼax y kuyaʼ bʼis chike. Jehová kukʼut chaqe pachike ri utz qakʼaslemaal. Chawilaʼ Romanos 12:2 y Santiago 4:4, 8.