¿Saʼ (wach) uʼanik kojkitoʼo ri taq pixabʼanik re ri Biblia?

1. ¿Bʼuchak rajawaxik chaqe ri taq pixabʼanik?

Jehová ri xojuʼano, rire lik nim ri unaʼoj chaqawach ri yoj. Pachaʼ jun utzilaj tat kojraj y kojuchajij chi utz. Xojuʼan taj re kaqakʼam bʼi jun kʼaslemaal na ruukʼ ta rire (Jeremías 10:23). Pachaʼ ri akʼalabʼ rajawaxik chike ri kitat kinan kakikʼut chike, qonoje rajawaxik ri Dios kukʼut chaqe ri taq upixabʼanik (Isaías 48:17, 18). Ri kʼutunem kakiyaʼ ri pixabʼanik re ri Biblia are jun sipanik uyaʼom ri Dios. Chawilaʼ 2 Timoteo 3:16.

Ri taq pixabʼanik y ri taqonik re ri Jehová kakikʼut chaqe ri utz y saʼ (wach) uʼanik kaqakʼamo ri utzilal jinta ukʼisik chaqawach panoq. Ruma rire xojuʼano, kuroyeʼej ri yoj kaqakʼam ri taq pixabʼanik ri kuyaʼ chaqe. Chawilaʼ Romanos 15:4 y Apocalipsis 4:11.

2. ¿Saʼ (wach) ri taq pixabʼanik re ri Biblia?

Jun pixabʼanik re ri Biblia are jun kʼutunem kajawax chaqe re kaqetamaj saʼ (wach) kaqaʼano pa ri qakʼaslemaal. Pero ri taqonik junam taj, ruma xwi kaqachapebʼeej pa jun sach (bʼiroxik) kaqakʼulumaj (Deuteronomio 22:8). Re kaqakʼam usukʼ saʼ (wach) uʼanik kaqaʼan ri kubʼij jun pixabʼanik pa qakʼaslemaal, lik rajawaxik kaqachapebʼeej ri qanaʼoj (Proverbios 2:10-12). Jun kʼutbʼal re: ri Biblia kukʼutu ri kʼaslemaal are jun sipanik re ri Dios. Ri pixabʼanik riʼ lik kajawax chaqe pa ri qachak, pa ri qachoch y we kojmalakatik. ¿Bʼuchak? Ruma kukuxtaj chaqe kaqachajij qibʼ. Chawilaʼ Hechos 17:28.

3. ¿Pachike ri 2 pixabʼanik más rajawaxik?

Jesús xukʼutu 2 pixabʼanik lik nim. Ri nabʼe kubʼij, bʼuchak yoj kʼaslik: re kaqetamaj uwach ri Dios, re kʼaxkaqanaʼo y kaqaʼan ri uchak ruukʼ sukʼilal. Ri nabʼe pixabʼanik lik rajawaxik kaqachapebʼeej che ronoje ri kaqaʼano (Proverbios 3:6). We kakiʼano, kebʼuʼan rachbʼil re ri Dios, kakiriq kiʼkotemal y jun kʼaslemaal jinta ukʼisik. Chawilaʼ Mateo 22:36-38.

Ri ukabʼ pixabʼanik kojutoʼo re kojkʼojiʼ junam kuukʼ jujun chik (1 Corintios 13:4-7). We kaqakoj ri ukabʼ pixabʼanik pa ri qakʼaslemaal, kaqaʼan pachaʼ ri kuʼan ri Dios kuukʼ ri winaq. Chawilaʼ Mateo 7:12 y 22:39, 40.

4. ¿Saʼ (wach) ri utzilal kakiyaʼ ri taq pixabʼanik re ri Biblia?

Ri taq pixabʼanik re ri Biblia kebʼutoʼo ri familia re kʼaxkakinaʼ kibʼ y re kekʼojiʼ junam (Colosenses 3:12-14). Ri Biblia kuyaʼ jun chik pixabʼanik re kebʼuchajij ri familia, y kebʼutoʼo ri e kʼulanik re na kakijach ta kibʼ. Chawilaʼ Mateo 19:5.

We kaqakoj ri taq pixabʼanik re ri Biblia kuʼan utz chaqe pa ri qachak y pa qanimaʼ. Jun kʼutbʼal re, pa kʼiyal chak kakitzukuj ajchakibʼ kakikoj tzij che ri pixabʼanik kʼo pa ri Biblia, winaq eleqʼom taj y kechakun saqil (Proverbios 10:4, 26; Hebreos 13:18). Ri Biblia kukʼut chaqe chi chojkiʼkotoq ruukʼ ri kʼo quukʼ y kukʼut chaqe ri qachbʼil qibʼ ruukʼ ri Dios más nim chwach ri bʼeyomalil. Chawilaʼ Mateo 6:24, 25, 33 y 1 Timoteo 6:8-10.

Ri taq pixabʼanik re ri Biblia kojkitoʼo che kaqariq taj yabʼiil. We kaqakoj tzij che ri taqonik chi kojqʼabʼar taj, kojuchajij re kojkam taj ruma jun kʼaxlaj yabʼiil o ruma jun chik kʼax (Proverbios 14:30; 22:24, 25; 23:20). Ri Jehová kubʼij taj chi utz taj kaqatij alcohol pero we kaqatij kʼi o kojqʼabʼarik, kojmakunik chwach ri Dios (Salmo 104:15; 1 Corintios 6:10). Ri taq pixabʼanik re ri Biblia kuyaʼ utzilal chaqe, ruma kojkitoʼo re kaqachajij ri kaqaʼano y ri qachʼobʼonik (Salmo 119:97-100). Pero xwi taj kaqakoj utzij ruma ri utzilal kuyaʼ chaqe; kaqaʼano re kaqayak uqʼij ri Qatat kʼo chikaj, Jehová. Chawilaʼ Mateo 5:14-16.