KʼUTUNEM 10
¿Saʼ (wach) uʼanik kawetamaj ri religión kukʼut ri qatzij?
1. ¿Xa jun religión kukʼut ri qatzij?
Chichajij iwibʼ chike ri ajbʼil tzij e qatzij taj (MATEO 7:15)
Ri Jesús xukʼutu chike ri utijoxelabʼ xa jun religión, are ri religión kukʼut ri qatzij. Jesús xubʼij junam pachaʼ jun bʼe kojukʼam bʼi pa ri kʼaslemaal jinta ukʼisik. Pero na e ta kʼi ri winaq kakiriqo (Mateo 7:14). Ri Dios xwi kukʼamo ri religión ri kukʼut ri qatzij kʼo pa ri Utzij, ri Biblia. Konoje ri lik kikikoj uqʼij e kʼo junam xa pa jun religión. Chawilaʼ Juan 4:23, 24; 14:6, y Efesios 4:4, 5.
Wilaʼ ri video ¿Kukʼam nawi ri Dios ronoje ri taq religión?
2. ¿Saʼ (wach) xubʼij ri Jesús puwiʼ ri tijoxelabʼ kakikʼut taj ri qatzij?
«Kikibʼij ike chi ketaʼam uwach i Dios, xwiri, rumal wach i kikiʼano, kaʼiltaj chike chi na qatzij ta» (TITO 1:16)
Jesús xubʼij e kʼo winaq kakikʼut taj ri qatzij. Kilitaj chike pachaʼ e tijoxelabʼ re ri Jesús. Utz kawetamaj uwach ri religión kukʼut ri qatzij. ¿Saʼ (wach) uʼanik? Kakikʼutu ruukʼ ri kiʼanon. Chawilaʼ Mateo 7:14-23.
3. ¿Saʼ (wach) uʼanik kawetamaj uwach ri religión kukʼut ri qatzij?
Chawilaʼ 5 kiʼanon re ri tijoxelabʼ re ri Jesús re kawetamaj kiwach:
Nim kakil ri Biblia ruma are ri Utzij ri Dios. Na kakiyaʼ ta kibʼ che ri naʼoj re ri winaq, kakiʼan ronoje kichuqʼabʼ re kakikoj tzij che ri kubʼij ri Biblia (Mateo 15:7-9). Pachaʼ ri kakikʼutu, are ri kakiʼano. Chawilaʼ Juan 17:17 y 2 Timoteo 3:16, 17.
Kakiʼan nim che ri ubʼi ri Dios, Jehová. Jesús xuʼan nim che ri ubʼi ri Dios ruma xuyaʼ chi retamaxik. Xubʼij chike ri winaq puwiʼ ri Jehová y xukʼut chike kakitzʼonoj pa ri chʼabʼal kakiʼan nim che ri ubʼi (Mateo 6:9). ¿Pachike ri religión kuyaʼ chi retamaxik ri ubʼi ri Dios pa ri atinamit? Chawilaʼ Juan 17:26 y Romanos 10:13, 14.
Kakitzijoj ri Taqanik (Qʼatbʼal Tzij) re ri Dios. Jesús xtaq lo wara chwach Ulew re kutzijoj ri utzilaj taq tzij re ri Qʼatbʼal Tzij. Ri Qʼatbʼal Tzij re ri Dios kukʼam loq utzilal chike ri winaq. Jesús xutzijoj puwiʼ ri Qʼatbʼal tzij kʼa che ri qʼij re ri ukamik (Lucas 4:43; 8:1; 23:42, 43). Xubʼij chike ri utijoxelabʼ kakitzijoj ri Qʼatbʼal Tzij re ri Dios. Ruma laʼ we jun winaq kopon awuukʼ y kutzijoj ri Qʼatbʼal Tzij re ri Dios chawe, ¿pachike ri religión kabʼij kʼo wi? Chawilaʼ Mateo 24:14.
E junam taj kuukʼ ri winaq itzel kikʼuʼx. Ri utijoxelabʼ ri Jesús na kakimin ta kibʼ pa ri política y kuukʼ ri winaq kakimol kibʼ re kakiʼan chʼaʼoj (Juan 17:16; 18:36). Na kakiʼan ta pachaʼ ri kakiʼan itzelal che ri Uwachulew. Chawilaʼ Santiago 4:4.
Kakikʼutu kʼo kʼaxnabʼal kʼuʼx chikixol. Ri Utzij ri Dios kukʼut chike kʼaxkakinaʼ ri winaq re ronoje taq tinamit. Ri taq religión kakikʼut ri qatzij taj kakimin kibʼ pa chʼaʼoj kuukʼ taq tinamit, pero ri tijoxelabʼ re ri Jesús kakiʼan taj (Miqueas 4:1-3). Ruma laʼ, kakiyaʼ ri kʼo kuukʼ y ri kitiempo, re kakitoʼo y kakiyaʼ uchuqʼabʼ ri winaq. Chawilaʼ Juan 13:34, 35 y 1 Juan 4:20.
4. ¿Awetaʼam pachike ri religión kukʼut ri qatzij?
¿Pachike ri religión kukʼutu ronoje ri kʼo pa ri Biblia y kuʼan nim che ri ubʼi ri Dios? ¿Pachike ri religión kutzijoj ri Qʼatbʼal Tzij re ri Dios kukʼam loq ri utzilal pakiwiʼ ri winaq? ¿Pachike ri religión kʼaxkakinaʼ kibʼ chikiwach y na kakiʼan ta chʼaʼoj? ¿Saʼ (wach) kachʼobʼo? Chawilaʼ 1 Juan 3:10-12.