¿Saʼ (wach) ri utzilaj taq tzij?

1. ¿Saʼ (wach) ri utzilaj taq tzij kubʼij ri Dios chaqe?

Dios karaj konoje ri winaq kakiriq kiʼkotemal pa ri kikʼaslemaal. Ruma kʼaxkebʼunaʼ ri winaq xuʼan ri Uwachulew y ronoje ri kʼo chwach. Xa naqaj chik kuresaj ri kʼaxkʼoliil y winaq re ronoje taq tinamit kakiriq jun kikʼaslemaal utz chaqawach panoq. Chawilaʼ 1 Timoteo 6:19.

Jinta jun gobierno (qʼatbʼal tzij) ukʼisom uwach ri chʼaʼoj, yabʼiil, y ri kamik. Pero kʼo utzilaj taq tzij: xa naqaj chik, ri Dios kusachisaj kiwach konoje ri taq qʼatbʼal tzij re ri winaq y kukoj na ri Uqʼatbʼal Tzij. Ri utinamit kakiriq utzil chomal (uxlambʼal kʼuʼx) y na jinta chik yabʼiil. Chawilaʼ Apocalipsis 21:3, 4, y 11:15.

2. ¿Bʼuchak lik rajawaxik ri utzilaj taq tzij?

Ri Dios kebʼuresaj konoje ri winaq itzel kikʼuʼx chwach ri Ulew, tekʼuriʼ ri kʼaxkʼoliil kakʼisik (Sofonías 2:3). ¿Jumpa kuʼano? Ri Biblia xubʼij loq ojer ri kʼaxkʼoliil ketajin chi rilik ri winaq woʼora. Ri kʼaxkʼoliil katajin woʼora kukʼutu xa naqaj chik ri Dios kuresaj na ri itzelal. Chawilaʼ 2 Timoteo 3:1-5.

3. ¿Saʼ (wach) rajawaxik kaqaʼano?

Rajawaxik kaqil upa ri Biblia re kaqetamaj puwiʼ ri Dios. Ri Biblia junam pachaʼ jun wuj kutaq bʼi jun utzilaj tat chike ri ralkʼoʼal. Kubʼij chaqe saʼ uʼanik kaqariq kiʼkotemal pa ri qakʼaslemaal woʼora y saʼ kaqaʼano re kaqariq kʼaslemaal jinta ukʼisik chaqawach panoq. Qatzij, e kʼo jujun kakaj taj kawetamaj ri kubʼij ri Biblia. Pero na kayaʼ ta kan uʼanik, ruma ri utzilal awoyeʼem lik rajawaxik. Chawilaʼ 2 Timoteo 3:12 y Apocalipsis 14:6, 7.