¿Bʼuchak rajawaxik kiyijbʼam kibʼ ri utinamit ri Dios?

1. ¿Bʼuchak xuʼan ri Dios che ri Israel jun tinamit kiyijbʼam kibʼ?

Dios xuyijbʼa jun tinamit ruukʼ ri ralkʼoʼal ri Abrahán y xuyaʼ kʼiyal taqonik chike. Ri jun tinamit riʼ xukoj ri ubʼi Israel. Xwi rike xkiyak uqʼij ri Dios pachaʼ xraj rire. Rike xkikʼam ri chak re kakichajij ri Utzij ri Dios (Salmo 147:19, 20). Ruma ri xuʼano, winaq re ronoje taq tinamit kakiriq utzilal. Chawilaʼ Génesis 22:18.

Dios xebʼuchaʼ ri israelitas re kebʼuʼan utestigos. Ri xkiʼan ri israelitas ojer kukʼutu ri ukojik tzij che ri taqonik re ri Dios kukʼam loq utzilal (Deuteronomio 4:6). Ruma rike, jujun chik tinamit kaketamaj uwach ri Dios. Ri Biblia kubʼij: «Ri ix, ix nutestigos, are kubʼij ri Jehová» (Isaías 43:10).

2. ¿Bʼuchak kiyijbʼam kibʼ ri utijoxelabʼ re ri Jesús?

Ri tinamit Israel xujamo ri utoʼbʼal re ri Jehová ruma xemakunik. Jehová xebʼuyaʼ kanoq y xutzukuj jun chik tinamit, are ri utijoxelabʼ re ri Jesús (Mateo 21:43; 23:37, 38). Pa ri qʼij ojkʼo wi, rike kakiyak uqʼij ri Jehová y are ri utestigos y na e ta chik ri israelitas. Chawilaʼ Hechos 15:14, 17.

Ri Jesús xebʼuyijbʼa ri utijoxelabʼ re kebʼek pa tzijonik y kakikʼut puwiʼ ri Jehová chike jujun chik che ronoje ri Uwachulew (Mateo 10:7, 11; 24:14; 28:19, 20). Pa ri kʼisbʼal qʼij ojkʼo wi, katajin chi ukʼisik ri ubʼixik ri utzilaj taq tzij. Jehová katajin che umolik kichiʼ kʼiyal winaq re ronoje tinamit re kekʼojiʼ junam ruukʼ ri religión kukʼut ri qatzij (Apocalipsis 7:9, 10). Ri tijoxelabʼ woʼora kiyijbʼam kibʼ, kakitoʼ kibʼ y kakiyaʼ unimal kikʼuʼx chikiwach. Xaq junam ri pixabʼanik re ri Biblia kaketamaj pa ri molbʼal kibʼ. Chawilaʼ Hebreos 10:24, 25.

3. ¿Saʼ (wach) uʼanik xjeqer loq ri testigos re Jehová pa ri qʼij ojkʼo wi?

Ri kichak xjeqer loq pa ri junabʼ 1870. Jupuq winaq xkijeq loq retamaxik ri qatzij puwiʼ ri Biblia, kawam kan ojer. Ketaʼam chi Jesús xuyijbʼa ri congregación re kakiʼan ri tzijonem, ruma laʼ xkijeq jun nimalaj chak pa taq tinamit re kakiyaʼ chi retamaxik ri Taqanik (Qʼatbʼal Tzij) re ri Dios. Pa ri junabʼ 1931 xkikʼam ri kibʼi testigos re Jehová. Chawilaʼ Hechos 1:8; 2:1, 4, 11, y 5:42.

4. ¿Saʼ (wach) uʼanik kiyijbʼam kibʼ ri testigos re Jehová?

Pa ri qʼij re ri apóstoles, ri jujun taq congregación re kʼiyal tinamit xetoʼik ruma jun jupuq ajkʼamal bʼe. Rike ketaʼam ri Jesús are ri Jolomaj puwiʼ ri congregación (Hechos 16:4, 5). Pa ri qʼij ojkʼo wi ri testigos re Jehová kʼo jun Jupuq Ajkʼamal bʼe chikiwach, kʼi ri ketaʼam, ruma laʼ kakichajij ri oficinas re ri testigos re ronoje ri Uwachulew. Chiriʼ kakiʼano y kakijach bʼi ri wuj esam pa ri Biblia. Are kakiqʼatisaj ri wuj pa más re 600 chʼawbʼal. Kakichapebʼeej ri Biblia re ukʼutik y rike kakiyaʼ unimal kikʼuʼx ri más re 100.000 congregaciónes pa ronoje ri Uwachulew. Chupa ri jujun taq congregación kʼo achijabʼ kakichajij ruukʼ kʼaxnabʼal kʼuʼx ri utinamit ri Dios. Chawilaʼ 1 Pedro 5:2, 3.

Ri testigos re Jehová kiyijbʼam kibʼ re kakitzijoj ri utzilaj taq tzij kuyaʼ ri Biblia y kakiʼan ajtijoxelabʼ. Pachaʼ ri apóstoles, ketzijonik chi taq ja (Hechos 20:20). Kakikʼutu ri kubʼij ri Biblia chike ri kakaj kaketamaj ri qatzij. Ruma laʼ, na xwi ta jun tinamit; e jun familia re ixoqibʼ y achijabʼ kʼaxkakinaʼ kibʼ chikiwach y kechajix ruma ri Kitat kʼo chikaj (2 Tesalonicenses 1:3). Ri utinamit ri Dios kakiʼan kichuqʼabʼ re kakiʼan ri urayibʼal y kakitoʼo jujun chik winaq, ruma laʼ are ri familia más kakiʼkotik chwach ri Ulew. Chawilaʼ 1 Pedro 2:9 y Hechos 20:35.