KʼUTUNEM 15

¿Bʼuchak rajawaxik kattajin chi retamaxik ri kubʼij ri Biblia?

1. ¿Saʼ (wach) uʼanik katutoʼo re kattajin chi retamaxik ri kubʼij ri Biblia?

Keb’ ixoqib’ kakil upa ri Biblia pa ri hora re wa’im pa kechakun wi

Ri nabʼe taq kʼutunem awetaʼam re ri Biblia ukʼiyisam ri kʼaxnabʼal akʼuʼx che ri Jehová. Woʼora lik rajawaxik katchakun che ri kʼaxnabʼal akʼuʼx che rire (1 Pedro 2:2). Kariqo ri akʼaslemaal jinta ukʼisik we katkʼojiʼ xa naqaj che ri Jehová y kawetamaj más puwiʼ ri Biblia. Chawilaʼ Juan 17:3 y Judas 21.

We kattajin chi retamaxik che ri Dios, rire kuyaʼ uchuqʼabʼ ri kubʼibʼal akʼuʼx y katutoʼo re kaʼan ri urayibʼal rire (Hebreos 11:1, 6). Ri kubʼibʼal kʼuxaj kuyaʼ achuqʼabʼ re katzalzaj awibʼ chawij che ri amak y kajalkʼatij ri akʼaslemaal re kaʼan ri utz. Chawilaʼ Hechos 3:19.

2. ¿Saʼ (wach) uʼanik katoʼo ri jujun chik?

Jun ixoq ku’an uch’ab’al che ri Dios — Utz kaʼan jun utzilaj rachbʼil ri Jehová

¿Kawaj kabʼij che jujun chik ri kattajin chi retamaxik? Qonoje kaqaj kaqabʼij utzilaj taq tzij. Ri kattajin chi retamaxik che ri Biblia kuʼano kawetamaj uchapebʼeexik re katchʼaw puwiʼ ri Jehová y re ri utzilaj taq tzij kuyaʼ chike ri winaq. Chawilaʼ Romanos 10:13-15.

Utz kajeq ukʼutik kuukʼ ri afamilia y kuukʼ ri awachbʼil. Pero, chaʼanaʼ utz che awibʼ y kabʼij taj ruukʼ kʼaxkʼolaj tzij ri ureligión kukʼut taj ri qatzij. Kabʼij chike ri ubʼim ri Dios. Chi kʼunoq chakʼuʼx, ruukʼ ri kaʼano are kitoʼik más chwach ri kabʼij. Chawilaʼ 2 Timoteo 2:24, 25.

3. ¿Saʼ (wach) uʼanik katuʼan jun utzilaj rachbʼil ri Dios?

Ri kawetamaj ri Biblia katutoʼo re kakʼiyik ri akubʼibʼal akʼuʼx y katchakunik re kaʼan jun utzilaj awachbʼil ruukʼ ri Jehová. Utz katuʼan ufamilia re ri Dios. Chawilaʼ 2 Corintios 6:18.

4. ¿Saʼ (wach) katutoʼo re katkʼiyik?

Na kayaʼ ta kanoq chi retamaxik ri kubʼij ri Biblia (Hebreos 5:13, 14). Chatzʼonoj che jun testigo re Jehová kuyaʼ jun kʼutunik re ri Biblia ruukʼ ri wuj ¿Qué nos enseña la Biblia? We kawetamaj más puwiʼ, más katkiʼkotik pa ri akʼaslemaal. Chawilaʼ 1 Timoteo 4:15, 16 y Romanos 12:2.

Ri Testigos re Jehová ketajin uya’ik jun k’utunik re ri Biblia

Chupa ri Biblia kʼo «Ri chomalaj utzilaj taq tzij re ri Dios kakiʼkotik» (1 Timoteo 1:11) Utz katkʼojiʼ xa naqaj che rire, we katopon pa ri molbʼal kibʼ kuukʼ ri rajchakibʼ e jusukʼ (Hebreos 10:24, 25). We kakoj achuqʼabʼ re kaʼan ri urayibʼal ri Jehová, kariq ri lik utz akʼaslemaal: ¡ri akʼaslemaal jinta ukʼisik! Qatzij, ri más utz kaʼano chi katkʼojiʼ xa naqaj che ri Dios. Chawilaʼ 1 Timoteo 6:19.

We kawaj kawetamaj más, chawilaʼ ri kʼutunem 18 re ri wuj ¿Qué nos enseña la Biblia?