¿Chinaʼ (pachin) ri Jesucristo?

1. ¿Saʼ (wach) uʼanik xjeqer loq ri ukʼaslemaal ri Jesús?

Ri Jesús na junam ta kuukʼ konoje ri winaq. Are jun uxlabʼixel (tewal) chilaʼ chikaj are kʼamajaʼ kalaxik wara chwach Ulew (Juan 8:23). Rire nabʼe xʼanik ruma ri Jehová y xutoʼo che uʼanik ronoje ri kʼolik. Ri Biblia kubʼij, «xa jun» Ukʼajol ri Dios ruma ri Jehová xuʼan utukel (Juan 1:14). Kabʼiʼx che «Utzij i Dios» ruma rire xuʼan ajbʼijol utzij re ri Utat. Chawilaʼ Colosenses 1:15-17.

2. ¿Bʼuchak xkʼun ri Jesús chwach Ulew?

Dios xutaq loq ri Ukʼajol chwach Ulew. Ri Jehová xuqʼatisaj ri ukʼaslemaal ruukʼ ri María, jun qʼapoj ali judía. Ruma laʼ, ri utat ri Jesús winaq taj (Lucas 1:30-35). Jesús xkʼun wara chwach Ulew: 1) re kukʼut ri qatzij puwiʼ ri Dios, 2) re kuyaʼ ri kʼutbʼal re, re kaqaʼan ri karaj ri Dios kʼa we kaqariq kʼaxkʼoliil, y 3) re kuyaʼ ri ukʼaslemaal jinta umak, re «tojbʼal-re» qamak. Chawilaʼ Mateo 20:28.

3. ¿Bʼuchak rajawaxik chaqe jun xutoj ri qamak?

Re kelbʼal loq ri kikʼaslemaal ri winaq jujun laj (mul) kayaʼ jun tojbʼal re (Éxodo 21:29, 30). Jehová xraj taj ri winaq kekamik y kebuʼan nimaq winaq. Qetaʼam, ruma ri Jehová xubʼij che ri Adán we kukoj tzij kakam taj, pero we na kukoj ta tzij kakamik (Génesis 2:16, 17; 5:5). Ri Biblia kubʼij ri kamik xok loq che ri Uwachulew ruma ri Adán. Ruma laʼ, Adán xuqʼatisaj chike ri ralkʼoʼal ri umak y xebʼuyaʼ pa ri kamik. Ruma laʼ lik rajawaxik junoq xutoj ri qamak. Chawilaʼ Romanos 5:12 y 6:23.

¿Chinaʼ (pachin) katojow ri tojbʼal re ri qamak y kojresaj loq che ri kamik? Ruukʼ ri kamik kaqatojo ri qamak. Qonoje yoj makunel y jinta junoq chaqe kutoj ri mak re jun chik. Chawilaʼ Mateo 16:26.

4. ¿Bʼuchak xkam ri Jesús?

Jesús na junam ta quukʼ ri yoj, sukʼilal ri ukʼaslemaal. Xkam taj ruma ri umak, ruma rire xmakun taj. Jesús xutoj ri kimak konoje ri winaq. Ri Dios xutaq loq ri Ukʼajol, xol kamoq ruma ri yoj y ruukʼ laʼ xukʼutu ruukʼ unimal kʼaxnabʼal kʼuʼx chi kojraj. Jesús xukoj utzij ri Utat y xuyaʼ ri ukʼaslemaal re tojbʼal re ri qamak, ruma laʼ xukʼutu kʼaxkojunaʼo. Chawilaʼ Juan 3:16 y Romanos 5:18, 19.

Wila’ ri video ¿Bʼuchak xkam ri Jesús?

5. ¿Saʼ (wach) katajin che uʼanik ri Jesús pa ri qʼij ojkʼo wi?

Jesús xkʼojiʼ wara chwach Ulew; xukunaj ri yabʼiil, xebʼuwalisaj loq jujun kaminaq y xebʼutoʼo ri e kʼo pa kʼaxkʼoliil. Ruma laʼ xukʼutu ri kuʼano chike ri utinamit sukʼilal chaqawach panoq (Mateo 15:30, 31; Juan 5:28). Tekʼuriʼ xkam ri Jesús, ri Dios xuwalisaj loq y xuyaʼo jun ukʼaslemaal re uxlabʼixel (tewal) chilaʼ chikaj (1 Pedro 3:18). Tekʼuriʼ ri Jesús xetzʼuloq (xkubʼi) chutzal ruukʼ ri utat chilaʼ chikaj y xuroyeʼej re kuʼan Taqanel puwiʼ ri Uwachulew (Hebreos 10:12, 13). Pa ri qʼij ojkʼo wi, ri Jesús kataqan chilaʼ chikaj y ri utijoxelabʼ kʼa ketajin che utzijoxik ri utzilaj taq tzij che ronoje ri Uwachulew. Chawilaʼ Lucas 1:32, 33 y Mateo 24:14.

Ruukʼ ri uchuqʼabʼ uyaʼom ri Dios che, ri Taqanel lik kʼo uchuqʼabʼ xa naqaj chik kusachisaj kiwach konoje ri winaq itzel kikʼuʼx y ri kʼaxkʼoliil kʼa ketajin che uʼanik. Konoje ri kʼo ukubʼibʼal kikʼuʼx che ri Jesús y kakikoj utzij kekʼasiʼ ruukʼ kiʼkotemal chwach ri chomalaj Uwachulew. Chawilaʼ Mateo 5:5.